Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 15: Mwaara A Lothi Aahiweha Ottuli

Mwaha 15: Mwaara A Lothi Aahiweha Ottuli

LOTHI ni emusi awe yaakhala vamosaa ni Abrahamu elapo ya oKanani. Nihiku nimosaa Abrahamu aahimuleela Lothi wira: ‘Opuro ola khomphiyerya inamaa sahu sotheene. Koovara metto, nrowee nivalaane. Akhala wira munrowa ephiro ele, nto miyo kinrowa ephiro ekina.’

Lothi aahiweha elapo eyo. Owo aahoona mpantta wooreera vanceene wa elapo yeeyo yaarina maasi ni munyepu munceene wooloka wa inamaa sawe. Ela yaari eDistritu ya oYordani. Siiso Lothi aahithaamela elapo ele ni emusi awe ni inamaa sawe. Wanikisa waya awo yaahipaka okhala owannyeya muttetthe wa oSodoma.

Atthu a oSodoma yaari ootakhala vanceene. Ela yaahimphweela Lothi, okhala wira aari mutthu ooreera murima. Muluku aahiphweeleya-tho. Wanikisa waya, Muluku aahirumiha malaikha manli orowa omulopola Lothi wira aarowa ohonona oSodoma ni oGomora muttetthe oowaattamela mwaha wa otakhala waya.

Malaikha yaahimuleela Lothi wira: ‘Mwaakuveke! Mwaakuxe amwaarinyu ni aniinyu anli aaxithiyana ni mukhumele otaa wa opuro ola!’ Lothi ni emusi awe yaahipisa vakhaani okhuma, siiso-nto malaikha yaahaavara ni ntata yaakumiheryaka otaa wa muttetthe. Nuumala vo mmosaa a malaikha aahihimya wira: ‘Mutthyawihee ikumi sanyu! Muhiwehee ottuli. Mutthyawele omattumuxani, wira nyuwo muhiiviwee.’

Lothi ni an’awe aaxithiyana yaahiiwelela ni yaahitthyawa oSodoma. Awo khiyeemenle hataa vakhaani, nto awo khiyaawenhe ottuli. Masi mwaara a Lothi khiiwelenle. Nuumala awo weetta moorakamela vakhaani ni oSodoma, mwaara a Lothi aaheemela ni aahiweha ottuli. Nto mwaara a Lothi aahithatuwa okhala nripu na maakha. Nyuwo munniwerya onweha owo valataratoni?

Mwa yeela hiyo nnoowerya wiixutta etthu yooloka. Ela ennooniherya wi Muluku onnaavuluxa ale animwiiwelela owo, masi otheene yaale ahimmwiiwelela owo anrowa oyeleela ikumi saya.

Maphattuwelo 13:5-13; 18:20-33; 19:1-29; Luka 17:28-32; 2 Pedru 2:6-8.

Lothi onnitthyawa oSodoma


Makoho

  • Nthowa xeeni Abrahamu ni Lothi yaavalananse aya?
  • Nthowa xeeni Lothi aathanlalya awe okhala oSodoma?
  • Atthu a oSodoma yaari a mukhalelo xeeni?
  • Yoolopola xeeni malaikha manli yanvanha aya Lothi?
  • Nthowa xeeni mwaara a Lothi vaathatunwa awe nripu na maakha?
  • Etthu xeeni eniwerya ahu wiixutta mmwaha wa mwaara a Lothi?

Makoho oowuncererya

  • Musome Maphattuwelo 13:5-13.

    Voohimya sa ophuka mixankiho eriyari ya atthu, etthu xeeni eniwerya ahu wiixutta wa Abrahamu? (Maph 13:8, 9; aRom 12:10; aFil 2:3, 4)

  • Musome Maphattuwelo 18:20-33.

    Moota xeeni Yehova omukhapelela wawe Abrahamu onnivaha aya nroromelo noowi Yehova ni Yesu anrowa ophuka mwa xariya? (Maph 18:25, 26; Mat 25:31-33)

  • Musome Maphattuwelo 19:1-29.

    Moota xeeni yoohimya ela ya Biibiliya enooniherya aya moonelo a Muluku voohimya sa orupihana wa atthu oolikana enoka? (Maph 19:5, 13; Onam 20:13)

    Ovirikana xeeni oniphwanya ahu moota Lothi ni Abrahamu yaattharenlya aya malakiheryo a Muluku, ni exeeni nniixutta ahu mwa yeela? (Maph 19:15, 16, 19, 20; 22:3)

  • Mmusome Luka 17:28-32.

    Mukhalelo xeeni wa murima aarina awe mwaara a Lothi voohimya sa itthu sa werutthuni, ni moota xeeni ela vanirumeela aya ntoko yoolopola wa hiyo? (Luk 12:15; 17:31, 32; Mat 6:19-21, 25)

  • Mmusome 2 Pedru 2:6-8.

    Nimutakihaka Lothi, tuuvi ontthuneya okhala moonelo ahu voohimya sa elapo yootakhala enrukurenrye? (Ezek 9:4; 1 Yoh 2:15-17)