Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 12: Atthu Annimuteka Namukattha Muulupale

Mwaha 12: Atthu Annimuteka Namukattha Muulupale

SAAHIVIRA iyaakha sinceene. Anamwane aaxilopwana a Nowee yaahikhalana anamwane anceene. Nto an’aya yaahinnuwasa ni yaahikhalana anamwane anceene. Niinanoru yaahikhala atthu anceene mulaponi.

Mmosaa a atthu ala aari mwaamusulwa awe Nowee iihaniwa Nemurodi. Owo aari mulopwana ootakhala yoowo aaxaya ni iiva inamaa ni hata atthu. Nemurodi nave-tho aahiipaka okhala mwene wira aalamuleleke atthu akina. Muluku khaasiveliwa ni Nemurodi.

Atthu otheene okathi ole yaalavula elavulelo emosaa. Nemurodi aaphavela waathukumanya vamosaa otheene ayasa wira oweryeke waalamulelasa. Siiso nyuwo munnisuwela etthu yaapanka awe? Owo aahaaleela atthu wira ateke muttetthe ni namukattha muulupale mmuttettheni-mme. Mwaaweheke awosa valataratoni vo apakaka itijolo.

Yehova Muluku khaasiveliwe ni yooteka ela. Muluku aaphavela wi atthu amwaramwareye ni akhaleke elapo yotheene ya vathii. Masi atthu yaahimmye so: ‘Nrowee! Niteke muttetthe ni namukattha oorakamexa nto ethoka awe ephiyee wirimu. Nto hiyo ninrowa okhala oovuwa!’ Atthu yaaphavela nttittimiho na mmensayaru, ohiya wa Muluku.

Siiso Muluku aahiiriha wi atthu amuhiye omuteka namukattha. Nyuwo munnisuwela moota saapanka awe ela? Mootutuxerya, iirinhe wi atthu alavuleke ilavulelo soovirikana, mmapuro mwa elavulelo emosaa paahi. Anamateka khiyiiwananne-tho mukina ni mukhw’awe. Nna ti nthowa naya muttetthe ole wiihaniwa awe Babeli, aahiiso Babilonia, onitaphulela “Waakanyereya.”

Atthu yaahipacerya vano omwareya oBabeli. Maloko aatthu yaalavula elavulelo emosaa yaahirowa okhalaka vamosaa mipantta sikina sa elapo ya vathii.

Maphattuwelo 10:1, 8-10; 11:1-9.

Anamuteko aniteka empa yoorakama


Makoho

  • Nemurodi aari aani, ni Muluku aamoonela sai?
  • Valataratoni va, nthowa xeeni atthu yaapaka aya itijolo?
  • Nthowa xeeni Yehova vahaasiveliwa awe ni yooteka ela?
  • Muluku aahiihale sai atthu omuteka namukattha?
  • Muttetthe ole iitthaniwa sai, nto nsina nne naataphulela exeeni?
  • Exeeni yaawiiranenle atthu nuumala Muluku waakanyerya ilavulelo saya?

Makoho oowuncererya

  • Musome Maphattuwelo 10:1, 8-10.

    Mikhalelo xeeni Nemurodi oonihenrya awe, nto yoolopola xeeni enivaha aya ela wa hiyo? (Mir 3:31)

  • Musome Maphattuwelo 11:1-9.

    Muttetthe ole aatekiwe ni yoophavela xeeni, ni nthowa xeeni muteko owo wahaakelenlya awe otthu? (Maph 11:4; Mir 16:18; Yoh 5:44)