Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 11: Ekhweyi Yoopacerya

Mwaha 11: Ekhweyi Yoopacerya

NYUWO munnisuwela etthu yoopacerya yeeyo Nowee yaapanka awe vaavo owo ni emusi awe vaakhumenlya awe otaa wa ekalawa? Owo aahipaka yoovaha aahiiso mukuttho wa Muluku. Nyuwo munoowerya onweha opakaka ela valataratoni vathii-vo. Nowee aahivaha mukuttho ola wa inamaa omuxukhurelaka Muluku mwaha wa ovuluxa emusi awe mu epula yuulupale ya mutaaseke.

Ekalawa vamosa ni ekhweyi

Nyuwo munuupuwela wira Yehova aahisiveliwa ni yoovaha ela? Aayo, owo aahisiveliwa. Siiso-nto aahimutthukwela natiri Nowee wira khaakhala-khala ohononaka olumwenku vasyaa-tho orweela mwa epula ya mutaaseke.

Moohipisa etthaya yotheene yaahuuma, nto Nowee ni emusi awe yaahipacerya okumi musyaa otaa wa ekalawa. Muluku aahaareeliha awosa ni khwaahimeerya wira: ‘Nyuwo muhaana okhalana anamwane anceene. Nyuwo muhaana wuncerereyaka mpakha atthu okhala elapo yotheene ya vathii.’

Masi vattuli vaya, vaavo atthu vaarowa aya wiiwa sa epula yuulupale ya mutaaseke, pooti wira yaarowa woova wi epula ya mutaaseke ntoko ele yaarowa wiiraneya vasyaa-tho. Siiso Muluku aahaavaha etthu yaarowa owuupuxerya atthu natiri awe oowi khiyaakhala-khala yiiraneyaka vasyaa-tho epula ya mutaaseke mu elapo yotheene ya vathii. Nyuwo munnisuwela etthu yaavanha awe wira ewuupuxeryeke? Yaari ekhweyi.

Nowee ni emusi awe

Ekhweyi imaara sinceene ennooneya musuluu vaavo nsuwa vanaarya aya nuumala orupa epula. Ikhweyi sinoowerya okhalana ikoore sinceene sooreera. Nyuwo mootoko oweha emosa? Nyuwo munniweha emosa valataratoni-va?

Ela ti etthu Muluku yaahimmya awe: ‘Natiri aka toowi nkinkhala-khala vasyaa-tho kaapwetexaka atthu ni inamaa sotheene orweela mwa epula ya mutaaseke. Miyo kinnihela mmeekuni ekhweyi aka. Nto vaavo ekhweyi vanikhumela aya, miyo kinrowa oweha ela ni wuupuwelela wira natiri aka.’

Siiso vaavo nyuwo muniweha anyu ekhweyi, ela eniwuupuxeryani exeeni? Aayo, natiri a Muluku oowi khonkhala-khala ohononaka olumwenku vasyaa-tho orweela mwa epula yuulupale ya mutaaseke.

Maphattuwelo 8:18-22; 9:9-17.



Makoho

  • Ntoko sooniheriwa aya valataratoni, etthu xeeni yoopacerya Nowee yaapanke awe vaavo vaakhumenlya awe otaa wa ekalawa?
  • Yooruma xeeni Muluku yanvanha awe Nowee ni emusi awe nuumala Epula ya Mutaaseke?
  • Natiri xeeni Muluku ampanke awe?
  • Vaavo vaniweha ahu ekhweyi, ennuupuxerya exeeni?

Makoho oowuncererya

  • Musome Maphattuwelo 8:18-22.

    Ninwerya sai olelo ovaha ‘mukuttho woowunkhela’ wa Yehova? (Maph 8:21; aHeb 13:15, 16)

    Yehova oonale exeeni voohimya sa mukhalelo wa murima a mutthu, nto ephoole xeeni nintthuneya ahu wooniherya? (Maph 8:21; Mat 15:18, 19)

  • Musome Maphattuwelo 9:9-17.

    Wataana xeeni Yehova aapanke awe ni soopattuxiwa sotheene sa mulaponi? (Maph 9:10, 11)

    Iyaakha kavii ekhweyi ya wataana yaarowa aya ovikaniha wooneya? (Maph 9:16)