Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 9: Nowee Onniteka Ekalawa

Mwaha 9: Nowee Onniteka Ekalawa
Atthu animutheya Nowe

NOWEE aahikhalana mwaarawe ni anamwane aaxilopwana araruu. Masina aan’awe yaari: Semi, Khami ni Yafeti. Ni khuta mmosa a anamwane ala aaxilopwana aahikhalana mwaarawe. Siiso yaahikhala atthu athanu ni araruu mu emusi ya Nowee.

Vano Muluku aahimuruma Nowee opaka etthu yoohilimaleleya. Owo aahimuleela oteka ekalawa yuulupale. Ekalawa ela yaari yuulupale ntoko pakiti, masi ela yaakhala ntoko ekaaxa yuulupalexa, ni yoorakama. Muluku aahihimya wira: ‘Muthataanyiheryeke ekalawa eyo ipa tthaaru,’ ‘nto muhina mwaya mupakee ikwaartu.’ Ikwaartu iya saari sa Nowee ni emusi awe, inamaa ni yoolya yootthuneya wa otheene aya.

Muluku nave-tho aahimuleela Nowee wira oreherye saana ekalawa wira maasi ahiweryeke okela. Muluku aahihimya wira: ‘Miyo kinrowa orumiha maasi a epula yuulupale ya mutaaseke ni opwetexa olumwenku wotheene. Ori otheene yoole ohikhanle muhina mwa ekalawa onrowa okhwa.’

Nowee ni an’awe aaxilopwana yaahimwiiwelela Yehova ni yaahipacerya oteka. Masi atthu akina yaamutheya paahi. Awo yaahivikaniha okhala ootakhala. Khuuvo aamukupanli Nowee vaavo aaleela awe awosa yeele Muluku yaarowa awe opaka.

Emusi ya Nowe enihela inama vamosa ni soolya mukalawani

Ekalawa ela yaahikuxa okathi munceene wira etekiwe, okhala wira ela yaari yuulupalexa. Wanikisa waya, nuumala iyaakha sinceene, ekalawa yaahimala. Vano Muluku aahimuleela Nowee wira oruuhe inamaa okelihaka mukalawani. Muluku aahihimya wira okelihe inamaa piili-piili sa mithinto imosaa, soopiili yoolopwana ni yoothiyana. Masi mithinto sikina sa inamaa, Muluku aahimuleela Nowee wira okelihe thanuu ni piili. Muluku nave-tho aahimuleela wira okelihe mithinto sotheene soovirikana sa axipalame. Nowee aahiira sotheene siiso-eenexa ntoko Muluku saahimmya awe.

Vattuli vaya, Nowee ni emusi awe-tho yaahikelasa mukalawani. Nuumala vo Muluku aahitthukwa mukhora. Mukalawani-mme, Nowee ni emusi awe yaamulipelela. Nkaapuwelelani paahi nyuwo muri mukalawani-mme n’awosa, mulipelelaka. Yaamoorwa tthiri epula ya mutaaseke ntoko Muluku saahimmya awe?

Maphattuwelo 6:9-22; 7:1-9.



Makoho

  • Yaari atthu akavii mu etthoko ya Nowee, ni taavi yaari masina aanamwane araruu aaxilopwana a Nowee?
  • Etthu xeeni yoohilimaleleya Muluku yanvekenlya awe Nowee wira ovare, ni nthowa xeeni?
  • Oowaattamana a Nowee yaakhula sai vaavo Nowee aaleela awe sa ekalawa?
  • Muluku aamuleelale Nowee wira iirihe exeeni inamaa?
  • Nuumala Muluku owala mukhora wa ekalawa, Nowee ni emusi awe yiirani?

Makoho oowuncererya

  • Musome Maphattuwelo 6:9-22.

    Exeeni yaamwiirinhe Nowee okhala namakokhorela avameekh’aya a Muluku ekeekhai? (Maph 6:9, 22)

    Yehova onoonela sai owali, ni moota xeeni ela enivara aya mwaha wa othanla wahu otthekula? (Maph 6:11, 12; Sal 11:5)

    Moota xeeni ninrowa ahu omutakiha Nowee vaavo vanaakhela ahu yoolakiherya enikhuma mmulokiheryo wa Yehova? (Maph 6:22; 1 Yoh 5:3)

  • Musome Maphattuwelo 7:1-9.

    Moota xeeni vannilipiha aya olelo, osuwela wi Yehova aahimoona okhala ntoko naxariya mutthu oohimalela Nowee? (Maph 7:1; Mir 10:16; Yes 26:7)