Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 7: Mulopwana Oolipa Murima

Mwaha 7: Mulopwana Oolipa Murima
Henoki

VAAVO nummuru na atthu naapacenrya aya wuncerereya valaponi, anamunceene a yaawo yaavara itthu sootakhala ntoko Kayini. Masi mulopwana mmosa aari oovirikana. Owo mulopwana ola iihaniwa Henoki. Henoki aari mulopwana oolipa murima. Atthu otheene yaamurukurenrye yaavara itthu sootepa otakhala, masi Henoki nlelo aahivikaniha omurumeela Muluku.

Nyuwo munnisuwela nthowa naya atthu a okathi ole yaavara aya itthu sinceenexa sootakhala? Saana, nkaapuwelelani, Tani aawiirinhe Adamu ni Eva ohimwiiwelela Muluku ni olya muhokorokho yoowo Muluku aahimmya awe wira khiyaatthuneya olya? Aayo, naari nlaikha nootakhala. Biibiliya oniitthana okhala Satana. Nto owo onneererya omwiiriha ori otheene okhala ootakhala.

Nawiiye vamosa ni mulipa owiiva

Nihiku nimosaa, Yehova Muluku aahimuhimeerya Henoki waaleela atthu etthu yeele awo yahaaphavela aya wiiwa. Yaari ela: ‘Nihiku nikina Muluku onrowa waapwetexa atthu otheene ootakhala.’ Waaniheryasa atthu awo yaahinanariwa vanceene wiiwa ela. Awo pooti wi yaaheererya-tho omwiiva Henoki. Siiso Henoki aatthuneya okhala oolipexa murima mu waaleela atthu voohimya sa yeele Muluku yaarowa awe opaka.

Muluku kheemerenrye wira Henoki okhale okathi munceene eriyari ya atthu ale ootakhala. Henoki aahikhala mukumi paahi iyaakha 365. Nthowa xeeni wiiraka “paahi iyaakha 365”? Nthowa noowi atthu mmahiku ale yaari aikuruu vanceene ovikana vano ni yaanikhala okathi munceene. Aayo, Metuxela mwaana a Henoki aahikhala mukumi iyaakha 969!

Atthu anipaka itthu sootakhala

Saana, nuumala Henoki okhwa, atthu yaamutepeleleya okhala ootakhala. Biibiliya onihimya wira ‘etthu eri yotheene yeeyo yuupuwela aya yaari yootakhala okathi wotheene,’ nto ‘elapo ya vathi yaahisareya ohaaxa.’

Nyuwo munnisuwela nimosa na mathowa aya vaakhanle aya muxankiho muulupalexa mulaponi mahiku ale? Nthowa noowi Satana aahikhalana ephiro esya yoowiiriha atthu opaka itthu sootakhala. Hiyo ninrowa wiixutta voohimya sa ela moottharelana.

Maphattuwelo 5:21-24, 27; 6:5; aHeberi 11:5; Yuda 14, 15.



Makoho

  • Moota xeeni Henoki aary’awe oovirikana?
  • Nthowa xeeni atthu mmahiku a Henoki yaavara aya itthu sootepa otakhala?
  • Itthu xeeni sootakhala atthu saavara aya? (Nwehe elatarato.)
  • Nthowa xeeni vaatthuneya aya Henoki okhala oolipa murima?
  • Atthu yaakhalana iyaakha kavi okathi ole, masi Henoki aakhanle iyaakha kavi?
  • Exeeni yiiranen’ye nuumala Henoki okhwa?

Makoho oowuncererya

  • Musome Maphattuwelo 5:21-24, 27.

    Muthinto xeeni a wataana aarina awe Henoki ni Yehova? (Maph 5 :24)

    Moovarihana ni Biibiliya, mulopwana xeeni aatonko okhala mu iyaakha sinceene, ni aarina iyaakha kavi okathi waakhwiiya awe? (Maph 5:27)

  • Musome Maphattuwelo 6:5.

    Nuumala okhwa Henoki mikhalelo sootakhala saari sai valaponi? Nto moota xeeni iya vanilikana aya ni mahiku ahu? (2 Tim 3:13)

  • Mmusome aHeberi 11:5.

    Mukhalelo xeeni aarina awe Henoki “waamusivelinhe saana Muluku,” ni yookhumelela aya yaari exeeni? (Maph 5:22)

  • Mmusome Yuda 14, 15.

    Moota xeeni maKristau a olelo vantakihery’aya olipa murima wa Henoki vaavo vanaalopola aya atthu sa ekhotto enirwa ya Harmagedoni? (2 Tim 4:2; aHeb 13:6)