Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 3: Mulopwana Ni Muthiyana Oopacerya

Mwaha 3: Mulopwana Ni Muthiyana Oopacerya

EXEENI ekhanle yoovirikana valataratoni va? Aayo, atthu ari vaavo. Awo arii mulopwana ni muthiyana oopacerya. Tanii aapanke? Apakiwe ni Muluku. Nyuwo munnisuwela nsina nawe? Ti Yehova. Nto mulopwana ni muthiyana yiihaniwa Adamu ni Eva.

Adamu ni Eva aryeene ojardim ya wEedeni

Yehova Muluku aapanke Adamu mmoota ola. Owo aahavunle etthaya vakhaani ya vathi ni ela aahipaka erutthu yoomalela oloka waya, erutthu ya mulopwana. Nuumala vo aahiiseelela iphumu mphulani mwa mulopwana owo, nto Adamu khukhala mukumi.

Yehova Muluku aahikhalana muteko oowi Adamu avareke. Aahimwiirela Adamu wira ovahe masina inamaa sa mithinto sotheene soovirikana. Waaniheryasa Adamu aahivira okathi munceene owehexexaka inamaa wira othanle masina ooreerela wa inamaa sotheene. Vaavo Adamu vaavahaawe masina inamaa aahipacerya woona etthu emosa. Nyuwo munnisuwela etthu ene yaari exeeni?

Inamaa sotheene saahikhalana mwaapara aya. Aahikhala paapa eetthepo ni maama eetthepo, ni aahikhala paapa a kharamu ni maama a kharamu. Masi Adamu khaarina mutthu wira okhalee mwaapara awe. Siiso Yehova aahimwiiriha Adamu ophwanya ikhove suulupale, nto aahikumiha niparari nimosaa. Ovarihelaka muteko niparari nna, Yehova aahimpaka muthiyana wa Adamu, nto ola aahikhala mwaarawe.

Moota Adamu aakhanlya awe oohakalala vano! Ni nkaapuwelelani moota Eva saakhanlya aya oohakalala okuhiwa mujardim mooreera mmo wira akhaleke! Vano awo yanwerya okhalana anamwane ni okhala vamosaa moohakalala.

Yehova aaphavenle wira Adamu ni Eva akhaleke moohimala. Owo aaphavela wira apake elapo yotheene ya vathii okhala yooreera ntoko ejardim ya wEedeni. Moota Adamu ni Eva saakhanle aya oohakalala vaavo vaapuwela aya opaka ela! Nyuwo mwaaniphavela wiirela mpantta mu opaka elapo ya vathi okhala ejardim yooreera? Masi ohakalala wa Adamu ni Eva khiwaalokenle. Nrowee niwehee nthowa naya.

Esalimo 83:18, Tradução do Novo Mundo; Maphattuwelo 1:26-31; 2:7-25.



Makoho

  • Evirikanne sai elatarato ya Mwaha 3 ni elatarato ya Mwaha 2?
  • Tani ampattunxe mulopwana oopacerya, nto nsina na mulopwana owo naari aani?
  • Muteko xeeni Muluku anvanha awe Adamu wira ovareke?
  • Nthowa xeeni Muluku aamwiirinhe awe Adamu orupa ikhove suulupale?
  • Adamu ni Eva yaarowa okhalaka mpakha iyaakha kavi, ni muteko xeeni Yehova aaphavela awe wira avareke?

Makoho oowuncererya

  • Musome Esalimo 83:18, Tradução do Novo Mundo.

    Nsina na Muluku tani, nto tuuvi ori opuro awe woohilikanyihiwa vasulu va elapo yotheene? (Yer 16:21, Tradução do Novo Mundo; Dan 4:17)

  • Musome Maphattuwelo 1:26-31.

    Exeeni yaari yootthuneya yaakisenrye opattuxiwa ni Muluku nihiku na neethanu na mosa, ni moota xeeni yoopattuxiwa ela yaarya aya yoovirikana ni inamaa? (Maph 1:26)

    Yoovaha xeeni Yehova yaapanke awe wa atthu ni inama? (Maph 1:30)

  • Musome Maphattuwelo 2:7-25.

    Exeeni yaaheliwe muhina mmuteko wa Adamu wa ovaha masina inama? (Maph 2:19)

    Moota xeeni Maphattuwelo 2:24 annikhaliherya aya wiiwexexa moonelo a Yehova voohimya sa othela, ovalanasa ni omwalana? (Mat 19:4-6, 9)