Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 2: Ejardim Yooreera

Mwaha 2: Ejardim Yooreera

NKAWEHANI valaponi va! Moota ery’aya yooreera etthu eri yotheene! Nkawehani munyepu ni miri, ithutuu ni inamaa sotheene. Nyuwo munniwerya ohiyaniha etthepo piivi ni akharamu paavi?

Inama saari ojardim ya wEedeni

Ejardim ela yooreera ekhumelenle sai? Saana, nrowee niwehee moota Muluku saalokihenrya awe elapo ya vathi wa hiyo.

Wanipacerya, Muluku aahipaka munyepu ooripelela wira okhuneeleke etthaya. Nto aahipaka mithinto sotheene sa miri saamukhaani, makukhu ni mirii. Itthu iya sinimela sinnikhaliherya oreeriha elapo ya vathi. Masi sinnipaka sinceene ovikana vo. Sinceene sa iyo sinninivaha-tho soolya soosiva.

Vattuli vaya, Muluku aahipaka ihopa wira sikateke mmaasini ni axipalame wira avaveke musuluu. Owo aahaapaka alapwa, akwaatu ni ikhavalo; inamaa suulupale ni inamaa saamukhaani. Inamaa xeeni sinkhala waattamela owannyu? Khinnihakalala mwaha wa Muluku opaka itthu iya sotheene wa hiyo?

Wanikisa waya, Muluku aahipaka nipuro nimosaa mu elapo ya vathi okhala navameekh’aya vanceene. Owo aahiihana nipuro nna okhala ejardim ya wEedeni. Nna naari noomalela tthiri oloka waya. Etthu eri yotheene yaari mme yaari yooreera. Nto Muluku aaphavela wira elapo yotheene ya vathi ekhalee ntoko ejardim ela yooreera yaapanka awe.

Masi nkatthikelani-tho oweha elatarato ya ejardim ela. Nyuwo munnisuwela yeele Muluku yoonaly’awe wira yaanihalela? Nrowee niwehee.

Maphattuwelo 1:11-25; 2:8, 9.



Makoho

  • Muluku aalokihenrye sai elapo wira hiyo nooneke oreera?
  • Muhimye inamaa sinceene soovirikana seiyo Muluku sipattunxe awe. (Nwehe elatarato.)
  • Nthowa xeeni ejardim ya wEedeni yaari aya yootepexa oreera?
  • Muluku aaphavela wira elapo yotheene epakeye okhala exeeni?

Makoho oowuncererya

  • Musome Maphattuwelo 1:11-25.

    Exeeni Muluku yaapanke awe nihiku na neeraru na opattuxa? (Maph 1:12)

    Exeeni yiiranen’ye nihiku na neexexe na opattuxa? (Maph 1:16)

    Mithinto xeeni sa inamaa Muluku aapanke awe nihiku na neethanu, ni neethanu na mosa? (Maph 1:20, 21, 25)

  • Musome Maphattuwelo 2:8, 9.

    Mirii xeeni miili sa vameekha aya Muluku aahenle awe mujardim, ni saathoonyerya exeeni?