Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 10: Epula Yuulupale ya Mutaaseke

Mwaha 10: Epula Yuulupale ya Mutaaseke

OTAA wa ekalawa, atthu yaahivikaniha okhapelela okumi aya ntoko siira aya vahinatthi. Awo nlelo khiyaakupali wira Epula ya Mutaaseke yaamoorwa. Awo pooti wi yaahitheya ovikana khalai. Masi niinanoru otheya waya waahimala.

Atthu ni inama annoova mwaha woorukureriwa ni maasi

Mootutuxerya maasi yaahipacerya omora. Ala yaahimora musuluu ntoko siisaale siniyiiha anyu maasi a mmucomani. Nowee aahihimya ekeekhai! Masi vano vaari voopisa vanceene wira mukina ori otheene okelee mukalawani. Mukhora aahitthukiwa saana ni Yehova.

Niinanoru etthaya yotheene yaahikhuneeleya. Maasi yaahikhala ntoko miroo suulupale. Ala yaahimoroxa mirii ni yaahipirikixa maluku maalupale ni yaahikumiherya onyakula wunceene. Atthu yaari oowoova. Awo yaahiwela mattumuxa oorakama. Khuu, vaakhanleke wi awo yaahiphavela omwiiwelela Nowee ni khuwerya okela mukalawani vaavo mukhora iiraawe nlelo ohiwaliwe! Masi vano vaari voopisa vanceene.

Maasi yaanivikaniha owela mowuncerereya. Moophiyeryaka mahiku 40 othana ni ohiyu, maasi yaahimora musuluu. Ala yaahiwela mipantta sa miyaako, nto niinanoru hataa miyaako soorakamexa saahikhuneeleya. Ntoko siiso Muluku saahimmya awe, atthu ni inamaa sotheene otaa wa ekalawa yaahikhwa. Masi ori otheene muhina aari oosukeya.

Nowee ni an’awe aaxilopwana yaahivara muteko wa oteka saana ekalawa. Nto maasi yaahittukhula ela, nto ela yaaniphempa vasuluu tthiri va maasi. Nto nihiku nimosaa, nuumala omaaxa epula, nsuwa naahipacerya waarya. Moota waarya aya wooreera oweha! Mapuro otheene yaari ephareya emosaa yuulupale. Nto etthu emosaa paahi yaawerya wooneya yaari ekalawa yaaphempa vasuluu.

Ekalawa eri vasulu va maasi

Vano mikwarapasa iye saahirimeela. Iye khisaawerya-tho waahaaxa atthu. Sotheene iye saahikhwa, vamosaa ni aximaama aya ni atthu akina otheene ootakhala. Masi exeeni yaawiiranenle axitiithi aya?

Axitiithi a mikwarapasa iye khahiyo wira yaari tthiri apinaatamu ntoko hiyo. Awo yaari malaikha yaale yaarun’ye wira akhaleke ntoko atthu valaponi. Siiso vaavo Epula ya Mutaaseke yaarun’ya aya, awo khiyaakhwiiye vamosaa ni atthu akina otheene. Awo yaahihiya ovarihela muteko irutthu sa opinaatamu seiyo saapanka aya, nto yaahitthikela wirimu ntoko malaikha. Masi awo khiyeemereriwe-tho wiirela mpantta wa emusi ya malaikha a Muluku. Siiso awo yaahikhala malaikha a Satana. MBiibiliyani aniihaniwa okhala axetwani.

Vano Muluku aahiiriha wi epheyo yoope, nto maasi a epula ya mutaaseke yaahipacerya owelela. Vattuli va miyeeri mithanuu ekalawa yaahirwa yeemela vasuluu va mwaako. Mahiku manceene yaahivira, nto ale yaari muhina mwa ekalawa yaahiwerya oweha vatee ni woona ithoka sa miyaako. Maasi yaahivikaniha owelela moohihiyererya.

Nuumala vo Nowee aahimukumiherya otaa wa ekalawa mwaapalame ooriipa oniihaniwa nakhuku. Ola aahikhuma ovavaka okathi munceene nuumala vo khuwerya ohokolowa, okhala wira khaawenrye ophwanya nipuro nooreera wira okote. Ola aahivikaniha opaka ela ni khuta okathi ola aahihokolowa, orwaaka omumula mukalawani.

Ekhuntta

Nowee aaphavela woona akhala wi maasi yaahiwelela elapo ya vathii, siiso moottharelana aahirumiha epomba otaa wa ekalawa. Masi epomba yaahihokolowa-tho okhala wira khiyaaphwannye opuro w’okota. Nowee aahirumiha otaa ekwaha ya nenli, nto yaahiruuha nikukhu na olivera epampeene ni munupi. Siiso Nowee aahisuwela wira maasi yaahiwelela. Nowee aahirumiha epomba otaa mukwaha wa n’eraruu, nto wanikisa waya yaahiphwanya opuro wowuuma wira ekhaleke.

Vano Muluku aahilavula ni Nowee. Owo aahihimya wira: ‘Mukhumee mukalawani. Mukuxee emusi anyu yotheene ni inamaa siri ni nyuwo.’ Awo yaahikhala muhina mwa ekalawa moovikana mwaakha ntero. Siiso hiyo nnoowerya wuupuwela moota saarya aya otheene oohakalala okhumela vatee vasyaa-tho ni okhala akumi!

Maphattuwelo 7:10-24; 8:1-17; 1 Pedru 3:19, 20.



Makoho

  • Nthowa xeeni vahaaweryaney’aya mutthu mukina okela mukalawani nuumala epula opacerya orupa?
  • Mahiku makavii othana ni ohiyu Yehova iirinhe awe orupa epula, ni wiixerya wa maasi waari wowiira sai?
  • Exeeni yiiranen’ye ni ekalawa vaavo maasi vaapacerya aya okhuneela elapo?
  • Mikwarapasa sahoopowa toko Mpulani ya Mutaaseke, nto exeeni yaawiiranenle axitiithi a mikwarapasa?
  • Exeeni yiiranen’ye ni ekalawa nuumala miyeeri mithanuu?
  • Nthowa xeeni Nowee vaamukumihenrya awe nakhuku otaa wa ekalawa?
  • Nowee aasuwenle sai wira maasi yaahiwelela valaponi?
  • Muluku aamuhimenrye exeeni Nowee nuumala Nowee ni emusi awe okhala muhina mwa ekalawa moovikanaka mwaakha mmosaa?

Makoho oowuncererya

  • Musome Maphattuwelo 7:10-24.

    Opwetexiwa wa itthu sikumi valaponi waamalenle vaavi? (Maph 7:23)

    Yaalokenle mahiku makavii wira awelele maasi a Epula ya Mutaaseke? (Maph 7:24 )

  • Musome Maphattuwelo 8:1-17.

    Moota xeeni Maphattuwelo 8:17 anooniherya aya wi yoolakela yoopacerya ya Yehova voohimya sa elapo khemalamanle? (Maph 1:22 )

  • Mmusome 1 Pedru 3:19, 20.

    Vaavo malaikha oohiiwananeya vaatthikenly’aya wirimu, yoophukela xeeni yaakhenly’aya? (Yuda 6)

    Moota xeeni yoowiiraneya ya Nowee ni emusi awe vanilipiha aya ororomela wahu owerya wa Yehova mu woopola nloko nawe? (2 Ped 2:9)

MWIIXUTTE SIKINA

MUTAKIHEKE WAAMINI WAYA

Nowe “Ètta Ephiro ya Muluku” Eekeekhai”

Muxankiho xeeni Nowe ni amwaarawe yaarina aya voohimya sa waahuwa anaaya? Moota xeeni awo yoonihenrye aya okhala oororomeleya okathi yaateka aya ekalawa?