Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 1: Muluku Onnipacerya Opaka Itthu

Mwaha 1: Muluku Onnipacerya Opaka Itthu

ITTHU sotheene sooreera sirinaahu sinikhuma wa Muluku. Owo aahipaka nsuwa wira ninivaheke omwaleya othana, nto mweeri ni itheneeri wira niweryeke woona ohiyu. Nto Muluku aahipaka elapo ya vathi wira hiyo nikhaleke memmo.

Masi nsuwa, mweeri, itheneeri ni elapo ya vathi khisaahiyo itthu soopaceriwa opakiwa ni Muluku. Nyuwo munnisuwela ele yaari yoopacerya? Wanipacerya Muluku aapanke atthu oolikanasa n’uwo. Hiyo khinniwerya owoona atthu ala, siisaale hiyo sihiniwerya ahu omoona Muluku. MBiibiliyani atthu ala aniihaniwa malaikha. Muluku aahipaka malaikha wira akhaleke n’uwo wirimu.

Nlaikha noopacerya opakiwa ni Muluku naari navameekh’aya vanceene. Nna naari Mwaana oopacerya a Muluku, ni owo aahivara muteko ni Atithi awe. Owo aahimukhaliherya Muluku opaka itthu sikina sotheene. Owo aahimukhaliherya Muluku opaka nsuwa, mweeri, itheneeri ni elapo ahu tho ya vathi.

Vanonto elapo ya vathi yaari sai? Wanipacerya khuuvo aakela owerya okhala mu elapo ya vathi. Khivaakhanle etthu, masi maasi a ephareya yuulupale yaakhuneelela etthaya yotheene. Masi Muluku aaphavela wira atthu akhaleke elapo ya vathi. Siiso aahipacerya olokiherya itthu wa hiyo. Exeeni yaapanka awe?

Saana, wanipacerya elapo ya vathi yaatthuneya okhala yookokola. Siiso Muluku aahiiriha wira waarya wa nsuwa omwaleeleke elapo ya vathi. Owo aahipaka eyo wira vakhalee ohiyu ni othana. Vattuli vaya Muluku aahiiriha wi etthaya ekhumele vasuluu va maasi a ephareya.

Wanipacerya khivaakhanle eetthu vatthayani. Yaari ntoko sinoona anyu valataratoni va. Khivaakhanle ithutuu, mirii aahiiso inamaa. Khiyaakhanle hata ehopa mphareya. Muluku aahikhalana muteko munceenexa oovara wira okhalihe elapo ya vathi yooreera tthiri wira inamaa ni atthu akhaleke memmo.

Yeremiya 10:12; aKolosi 1:15-17; Maphattuwelo 1:1-10.

Etthaya yowuuma


Makoho

  • Itthu sooreera sotheene sikhumme wuuwi, nto munniwerya ohimya emosa mwa itthu iyo?
  • Etthu xeeni yaari yoopacerya opattuxiwa ni Muluku?
  • Nthowa xeeni nlaikha noopacerya naari aya navameekha’ya?
  • Muhimye moota elapo yaari aya wanipacerya. (Nwehe elatarato.)
  • Moota xeeni Muluku aapacenrya awe olokiherya elapo wira ekhaliweke ni atthu vamosa ni inama?

Makoho oowuncererya

  • Mmusome Yeremiya 10:12.

    Mikhalelo xeeni sa Muluku sinooneya mwa soopattuxa sawe? (Yes 40:26; aRom 11:33)

  • Mmusome aKolosi 1:15-17.

    Muteko xeeni Yesu aarina awe okathi waapattuxiwa itthu, nto eyo enivara sai moonelo ahu voohimya sa Yesu? (aKol 1:15-17)

  • Musome Maphattuwelo 1:1-10.

    Elapo ephattunwe sai? (Maph 1:1)

    Exeeni yiiranen’ye nihiku noopacerya na opattuxa? (Maph 1:3-5)

    Nkatthokiheryani ele yiiranen’ye nihiku na nenli na opattuxa. (Maph 1:7, 8)