Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Omwene wa Muluku Onnilamulela!

 MURU 21

Omwene wa Muluku onimwaamaliha awanani awe

Omwene wa Muluku onimwaamaliha awanani awe

YOOLAKELA YA MURU OLA

Itthu sinirowa okhumelela ohinatthi ophiya okathi wa ekhotto ya Harmagedoni

1, 2. (a) Etthu xeeni enooniherya wira omwene woopacerya olamulela okhuma mwaakha wa 1914? (b) Ninrowa othokorerya exeeni muru ola?

TTHIRI woolipiha nroromelo nahu wuuluula itthu Omwene wa Muluku owenrye awe opaka eriyari ya awanani awe. (Esal. 110:2) Mwene okhalana atthu anlikana ni anakhotto yaawo ari anamalaleerya ohakalala. Owo ohaakhaliha arummwa awe ooloka omunepani ni mweettelo aya. Nnaamwi awanani amananihaka onikawanya, hiyo ninnihakalala ni wiiraana wahu wa olumwenku wotheene. Itthu iya ni iye sikina sithokorenrye ahu Omwene owenrye awe opaka sinnooniherya wira tthiri Omwene owo woopacerya olamulela okhuma eyaakha ya 1914, ni wira onilamulela eriyari ya awanani awe.

2 Muhoolo vohipisa-va, omwene owo onrowa opaka itthu suulupale ovikana iye sipanke awe. Omwene owo onirowa ‘wahonona ni wapwetexa’ awanani awe. (Math. 6:10; Dan. 2:44) Masi ohinatthi ophiya okathi owo, sookhala itthu sikina suulupale sinrowa okhumelela. Itthu xeeni? Iprofesia sinceene sa mBiibiliyani sinnaakhula nikoho nlo. Vano nrowe nithokorerye iprofesia vakhaani wira noone itthu sinrowa okhumelela ohoolo wahu moohipisa.

Etthu Eniiraneya Ohinatthi Ophiya ‘Opwetexiwa Nananoru’

3. Etthu xeeni yoopacerya eniwehererya ahu wiiraneya?

3 Olaleiwa wa murettele. Okathi murummwa Paulo aalepela awe aTesalonika, owo aahitthokiherya ipacereryo sa itthu siniwehererya ahu. (Mmusome 1 aTesalonika 5:2, 3.) Epaphelo ela Paulo onniromola “Orwa” wa Yehova weiwo onrowa opacerya ni opwetexiwa wa “Babilonia, muttetthe mulupale”. (Wis. 17:5) Masi, ohalaka okathi vakhaani wira nipacerye nihiku na Yehova maloko anirowa wiiraka alavulaka so: “Nokhalana murettele [ni omaaleleya]” Olavuliwa wa masu ala pooti wiiraneya okathi omosa wala ikwaha sinceene soovirikana. Niireke ahooleli a itiini animwiikeliha muhina? Okhala wira awo anniirela mpantta olumwenku ola, owehasa wene anirowa wiihela mpuwa okathi onirowa aya olavuliwaka masu oowi “Murettele!” (Yer. 6:14; 23:16, 17; Wis. 17:1, 2) Olaleiwa nno wa murettele ni ovareleleya enirowa okhala ethoo nyeryo yoowi nihiku na Yehova noopacerya. Awanani a Omwene wa Muluku khanirowa owerya “otthyawa”.

4. Mureerelo xeeni oniphwanya ahu mwaha wowiiwexexa yootaphulela ya masu a eprofesia ya Paulo voohimya sa olaleiwa wa murettele omaaleleya?

4 Mureerelo xeeni oniphwanya ahu mwaha wa wiiwexexa oratteene yootaphulela ya eprofesia ela? Paulo aahimmye so: “Nyuwo, amusi aka, khamunetta mwepiphini; nihiku nlo nihotutuxeni ntoko nawiye”. (1 aTes. 5:3, 4) Moovirikana ni atthu akina, hiyo ninniwerya osuwela itthu sinrowa okhumelela ohoolo. Nto eprofesia ela ya murettele ni omaaleleya enrowa waakhwanela sai moomalela? Hiyo nihaana owehererya wira nooneke moota makhalelo a sowiiraneya sinirowa aya weettaka. Timaana aya vanihimmwa aya wira “nihirupé ntoko atthu akina anrupaya, nto nilipeleleke, nìsumaliheke”.​—1 aTes. 5:6; Sof. 3:8.

Opacereya wa Maxakha Maalupale

5. Etthu xeeni enrowa okhala ethoonyeryo ya opacerya wa maxakha maalupale?

5 Otupheliwa wa Etiini. Muupuweleke ele Paulo aalempe awe wira: ‘Vano, atthu yahimyá wira: ‘Nokhalana murettele [ni omaaleleya]!’ vavo t’uniraya warwele opwetexiwa nananoru’. Siisaale overunya onittharana aya ni etari, nto okathi oniriwa aya ohimmwaka masu oowi ‘Nokhalana murettele [ni omaaleleya]!’, nto tonrowa okhumelela ‘opwetexiwa nananoru’. Masi exeeni enrowa opwetexiwa? Wanipacerya, “Bibilonia Muulupale”, yoowo okhanle Olamulelo wa Itiini Soowoka Moolumwenkuni, onisuweliwa okhala muthiyana “namararuwa”. (Wis. 17:5, 6, 15) Opwetexiwa wa eKristau Yoowootha, ni mitthenkeso sikina sowootha tekhanle ethoonyeryo ya opacerya wa “maxakha maalupale”. (Math. 24:21; 2 aTes. 2:8) Wa anamunceene itthu iya sinirowa waakhumelela mootutuxa. Nthowa xeeni? Okhala wira okathi ole, namararuwa ole onrowa wuupuwelaka wira owo “pwiyamwene” yoowo ‘ohinrowa ohawa’. Masi moohipisa owo onrowa woona wira ele eniroromela awe, etthu yeethiru. Owo onrowa opwetexiwa mowaakuveya, ntoko “nihiku nimosá pahi”.​—Wis. 18:7, 8.

6. Ti pani wala exeeni enrowa ovara muteko wa ompwetexa “Babilonia Muulupale”?

6 Ti pani wala exeeni enrowa ovara muteko wa ompwetexa “Babilonia Muulupale”? “Nxeni ni manyaka mulokó”. Eliivuru ya Wisupulula ennooniherya wira nxeni nlo nintaphulela Nações Unidas (ONU). Manyaka muloko anithoonyerya makhulupale otheene a epoliitika anikhaliherya “nxeni noxerya”. (Wis. 17:3, 5, 11, 12) Otupheliwa nno onrowa okhala wa muthinto xeeni? Maloko a ONU anrowa omwakha sotheene sirina awe, okhura erutthu awe ni “anopwetexa ni moro”.​—Musome Wisupulula 17:16. *

7. Moota xeeni masu a Yesu ari va Matheyo 24: 21, 22 yaakhwanenle aya eseekulu yoopacerya EC, ni waakhwanela xeeni oniwehererya ahu muhoolo?

7 Ovukuliwa wa Mahiku. Mwene ahu oonileela ele enrowa wiiraneya waphiya mpantta ole wa maxakha maalupale. Yesu aahimmye so: “vano Muluku òvukula mahiku yawo mwaha w’atthu òthanliwa”. (Mmusome Matheyo 24:21, 22.) Masu a Yesu yaahakhwanela vakhaani mwaakha wa 66 EC, vaavale Yehova ‘avukunle awe mahiku’, okathi yoole aRoma yaamutuphenle aya Yerusalemu. (Mar. 13:20) Yowiiraneya ele yaahaavaha okathi maKristau oYerusalemu ni oYudeya wira yoopowe. Nto exeeni enrowa wiiraneya okathi onrowa aya okhumelela maxakha maalupale  a olumwenku wotheene? Yehova, orweela wa Mwene ahu onrowa “ovukula mahiku” Nações Unidas onrowa awe oviriha opwetexaka etiini wira etiini yeekeekhai ehipwetexiwe vamosa ni ele yowooka. Tthiri, vaavo etiini yoowoka enrowa aya opwetexiwa, etiini ya ekeekhai enrowa woopowa. (Esal. 96:5) Vano nrowe nithokorerye itthu sinrowa okhumelela nuumala ovira mpantta wa maxakha maalupale.

Itthu Sinirowa Okhumelela Mpakha Ophiya Harmagedoni

8, 9. Sowiiraneya xeeni sootikiniha Yesu aahimmye awe, nto atthu anrowa woonela sai?

8 Eprofesia ya Yesu voohimya sa mahiku ookiserya yaahihimya wira saamukhumelela itthu suulupale ohalaka okathi vakhaani wira ophiye Harmagedoni. Itthu soopacerya piili sinrowa ahu othokorerya sinniromoliwa ni Ivangelyo sa Matheyo, Marko ni Luka.​—Mmusome Matheyo 24:29-31; Mar. 13:23-27; Luka 21:25-28.

9 Mitikiniho Wiirimu. Yesu aahihimya vahinatthi wira: “nsuwa nnottipha, mweri onohiya warya, itheneri sinomorasa wirimu”. Tthiri atthu khanirowa-tho waaroromelaka makhulupale a etiini wira yaalakiherye. Niireke Yesu aahimya soowiraneya sootikiniha sihinawehiwe tthiri wiirimu? Waaniheryasa. (Yes. 13:9-11; Yow. 2:1, 30, 31 ) Nto atthu anrowa woonela sai itthu iye sinrowa okhumelelaka? Awo anrowa okhala “òwova” mwaha woohisuwela yoowiira. (Luka 21:25; Sof. 1:17) Aayo awanani a Omwene wa Muluku: okhuma ‘mamwene mpakha ipottha’, anrowa “okhala ooxanka ni woova mwaha woohisuwelexa ele enrowa waakhumelela”, nto anrowa otthyawela mmakhukuni wira yiipitthe. Hata vari siiso, awo khanirowa ophwanya nipuro nooreerela wiipitha wira ahiphwanyiwe ni esara ya Mwene ahu.​—Luka 21:26; 23:30; Wis. 6:15-17.

10. Masu xeeni oophukela anrowa ohimmwa ni Yesu, nto anrowa woonela sai anamakhaliherya ni ale ari awanani a Omwene?

10 Masu a Ophukela. Awanani otheene a Omwene wa Muluku anrowa woona siiraneyaka itthu sinirowa wuncererya ohaawa waya. Yesu aahimmye so: “Atthu anomona Mwana a Mutthu orwaka mmekuni, n’uwerya wawe n’uvuwa wawe wulupale”. (Mar. 13:26) Yowiiraneya ela enirowa wooniherya ikuru sinceene enrowa wooniherya wira Yesu onrweela ophukela elapo. Mpantta mukina wa eprofesia voohimya ya mahiku ookiserya, Yesu onnitthokiherya oratteene masu a ophukela yaawo anrowa ohimmwa okathi owo. Hiyo ninniphwanya soohimmwa iyo mwa nlikanyiho na ipwittipwitthi ni ipuri. (Mmusome Matheyo 25:31-33, 46.) Atthu anikhaliherya Omwene wa Muluku moororomeleya anirowa ohimmwa okhala “ipwittipwitthi” yaawo anrowa ‘ovenxa muru’ okhala wira ‘wopoliwa waya ori vakhiviru’. (Luka 21:28) Masi, awanani a Omwene anrowa ohimmwa okhala “ipuri” yaawo anrowa ‘wìkhupanyeryaka’ mwaha woosuwela wira anrowa ‘opwetexiwa woohimala’.​—Math. 24:30; Wis. 1:7.

11. Etthu xeeni enitthuneya ahu wuupuwelaka okathi onithokorerya ahu itthu sinrowa wiiraneya muhoolo?

11 Nuumala Yesu ophukela “maloko otheene” sookhala itthu suulupale sinrowa okhumelela ehinatthi opacerya ekhotto ya  Harmagedoni. (Math. 25:32) Vano ninrowa othokorerya sowiiraneya iyo piili: Otuphela wa Gogi ni othukumanyiwa wa alipa-owoottihiwa. Okathi onrowa ahu othokorerya sowiiraneya iya piili, hiyo nihaana osuwelaka wira Omwene wa Muluku khonihimya oratteene okathi ene sinirowa aya wiiraneya itthu iya. Tthiri vanikhala ntoko yowiiraneya emosa enrowa opaceryaka eriyari ya yowiiraneya ekina.

12. Satana onrowa otuphela sai Omwene wa Muluku?

12 Otupheliwa Woomalela. Gogi a oMagogi, onrowa waatumererya anapoliitika otheene a mulaponi wira yaatuphele alipa-owoottihiwa nlelo anrowa wiiraka ari valaponi ni apatthani aya a ipwittipwitthi sikina. (Mmusome Ezekiyeli 38:2, 11.) Otupheliwa nno wa Omwene wa Muluku yoowo opacenrye olamulela khalai, onrowa okhala ekhotto yookiserya ya Satana eniwanana awe alipa-owoottihiwa okhuma vaavale voomoliwe awe wiirimu. (Wis. 12:7-9, 17) Satana oneererya waapwetexa alipa-owoottihiwa, vanceenexa okhuma vaavale awo apacenrye aya othukumanyiwa mmulokoni wa eKristau. (Math. 13:30) Masi, okathi yoole onkela aya wiiraka mitthenkeso sotheene sa etiini yoowoka sipwetexiwe ene; nto atthu a Muluku yooniwaka ntoko anikhala muttetthe ohirina “mikhora nnákhala makokoro walá mwakiheryo mukina”, Satana onrowa woonaka okhweya waamalamaliha atthu ale. Owo onrowa waatumererya anamakhaliherya awe otheene wira yaatuphele moomalela ale anikhaliherya Omwene.

13. Yehova onrowa owaakiha sai atthu awe?

13 Ezekiyeli onnitthokiherya ele enrowa okhumelela moottharelana. Voohimya sa Gogi, eprofesia eyo enihimya so: “Mukhumaka elapo anyu enikhala wokiseryani, epantte enikela epheyo. Munovenya weiwo muholaka muttitthi mulupale ni wowerya w’anakhotto òtupa a maloko manjene, othene aya ewenlene ikhavalo saya. Munimwatuphela atthu a nloko naka a Isarayeli, mulikanaka ni meku anikhunela elapo”. (Ezek. 38:15, 16) Vano Yehova onrowa waakhula sai otupheliwa nno wowoopiha onikhala ntoko khuuvo oniwerya ottipiherya? Yehova onaakhula so: “kinoviruwa vanjene. Kinomuroihela Gogi ihasara sothene”. (Ezek. 38:18, 21; mmusome Zakariya 2:8.) Yehova onrowa waakhaliherya arumeyi awe valaponi. Waakhaliherya wawe iwo tekhanle ekhotto ya Harmagedoni.

14, 15. Etthu xeeni enrowa okhumelela okathi omosaru nuumala Satana waatuphela atthu a Muluku moomalela?

14 Nihinatthi orowa ohoolo wira nawehe moota Yehova onrowa awe owaakiherya arumeyi awe okathi wa ekhotto ya Harmagedoni, nrowe neemele vakhaani wira nithokorerye yowiiraneya ekina yootthuneya. Etthu ela enrowa wiiraneya eriyari ya okathi Satana onrowa awe waatuphela atthu a Muluku moomalela ni okathi Yehova onrowa awe opacerya owaakiha arumeyi awe va Harmagedoni. Ntoko soonale ahu ettima ya 11, yowiiraneya ya nenli eri othukumanyiwa wa alipa-owoottihiwa oohalela yaale nlelo ari valaponi.

15 Othukumanyiwa wa Alipa-owoottihiwa. Matheyo ni Marko oowanli aya anniromola masu a Yesu voohimya sa “atthu  othanliwa” eyo piiyo, maKristau owoottihiwa ni munepa wootteela, ntoko epantte ya itthu sinrowa okhumelela ohinatthi opacerya Harmagedoni. (Nwehe ettima 7.) Ohimyaka sa owo muneene ntoko Mwene, Yesu aahilavula eprofesia ela: “Owo onoruma malaikh’awe wira yathukumanye atthu òthanliwa mulaponi mothene mwa vathí, okhuma wopajeryani wa elapo mpakha wokiseryani w’erimu”. (Mar. 13:27; Math. 24:31) Muteko xeeni wa waathukumanya atthu onihimmwa ni Yesu? Owo khaahimya oheliwa ethoonyeryo yookiserya wa alipa-owoottihiwa ari valaponi nlelo, okhala wira eyo enrowa wiiraneya ohalaka okathi vakhaani wira apacerye maxakha maalupale. (Wis. 7:1-3) Tivonto, Yesu aahimya etthu enrowa okhumelela okathi wa maxakha maalupale. Tthiri, woonasa wene eriyari ya okathi owo nuumala Satana opacerya waatuphela atthu a Muluku, alipa-owoottihiwa nlelo ari valaponi anrowa otakaaheriwa ni ale ari wiirimu.

16. Okathi wa ekhotto ya Harmagedoni, muteko xeeni alipa oowoottihiwa onrowa aya ovara nuumala ohihimuxiwa?

16 Moota xeeni othukumanyiwa wa alipa owoottihiwa ari valaponi onivarihana aya ni itthu sinrowa okhumelela nuuvira Harmagedoni? Othukumanyiwa wa alipa-oowottihiwa onooniherya wira otheene saya anrowa wiiraka aryeene wiirimu okathi onrowa aya opacerya ekhotto ya Muluku, Harmagedoni. Wiirimu, a 144.000, yaale anrowa olamulelaka ni Yesu, anrowa ovahiwa owerya wira ntoko Yesu, akuxeke “ekopo ya eyuma” wira apwetexe maloko otheene aninyokha Omwene wa Muluku. (Wis. 2:26, 27) Yahihimuxiwa alipa-oowottihiwa, awo vamosa ni malaikha oowerya anrowa omutthara Kristu yoowo okhanle Muhooleli a ekhotto, onrowa ohoolela “muttitthi mulupale wa anakhotto” yaawo anaarukurerya atthu a Muluku. (Ezek. 38:15) Nto okathi wovaraaniwa ekhotto eyo yoowali, tonrwa aya okhumelela Harmagedoni!​—Wis. 16:16.

Omala Woohiliyaleya wa Maxakha Maalupale

Opacerya wa ekhotto ya Harmagedoni!!

17. Okathi wa Harmagedoni “ipuri” sinrowa wiirihiwa exeeni?

17 Okathi wa Ophukela. Ekhotto ya Harmagedoni tekhanle imalelo sa maxakha maalupale. Okathi owo Yesu onrowa ovara muteko mukina. Ohiya okhala Namaphukela a “maloko otheene” paahi, owo onrowa owookottha-tho atthu a maloko otheene yaale wuupaceryani aahimmye awe okhala “ipuri”. (Math. 25:32, 33) Orumeelaka “mwalo wowitha”, Mwene ahu onrowa “[wawerya] amalapo”. Aayo, atthu otheene yaale anilikana ni ipuri, okhuma “mamwene” mpakha “ipottha” anrowa ‘opwetexiwa wohimala’.​—Wis. 19:15, 18; Math. 25:46.

18. (a) Murukunuxo xeeni onrowa wiiraneya mmureerelo wa “ipwittipwitthi”? (b) Yesu onrowa omaliherya sai oxintta wawe?

18 Nto itthu sinrowa ovirikana wa atthu yaale Yesu onaahimya awe okhala ipuri! Ohiya onyakeliwa ni metto sa anakhotto anceene a Satana, niire so, ni “ipuri”; “muttitthi mulupale” wala “ipwittipwitthi”, seiye sooniwa okhala vookhweya omalamalihiwa, sinrowa woopowa, tivonto vanihimmwa aya wira “Ala ti yale yaharere olupatthiwa n’uhaxiwa”. (Wis. 7:9, 14) Nto nuumala Yesu waaxintta ni waamalamaliha awanani a Omwene wa Muluku, onrowa onvara Satana ni malaikha awe amurihele mowiixani.  Mulittini mme awo anrowa okhalaka ntoko arimookhwa eyo piiyo, khanirowa oweryaka ovara etthu mpakha oviriha iyaakha ekonto emosa.​—Musome Wisupulula 6:2; 20:1-3.

Ninrowa Wiilokiherya Sai?

19, 20. Ninrowa ovarihela sai muteko masu aniphwanyaneya va Yesaya 26:20 ni 30:21?

19 Ninrowa wiilokiherya sai mwaha wa itthu iyo sooxankiha sinrowa okhumelela muhoolo? Erevista Owehaweha ya iyaakha sivinre yaahihimya so: “Woopowa wahu onilipa ni wiiwelela wahu”. Moota xeeni? Waakhuliwa wa nikoho nla oniphwanyaneya mmasu Yehova aalavunle awe aalopolaka aYuda, yaakhala weepotthani oBabilonia khalai. Yehova aahihimya vahinatthi wira aBabilonia yaamwaavara atthu a Muluku, masi niireke aahaalela atthu wira yiilokiherye mwaha wa ele yaarowa okhumelela? Yehova aalavunle so: “Nyuwo atthu a nloko naka, mutthikele owannyu: mwiwaleleke mpa mwinyu, mulipihe [mikhora]. Mwipitheke okathi vakhani, mpakha ovira oviruwa” iwo. (Yes. 26:20) Nwehe moolumo anirumeeliwa iversu iya: “mutthikele owannyu” “mwiwaleleke mpa mwinyu”, “mulipihe [mikhora]”, “mwipitheke” masu ala otheene onooniherya okhala yooruma wala nlamulo. Ayuda ale yaarowa wiiwelela nlamulo nle yahaana okhala mpani mwaya, wira ahooniwe ni anakhotto ale yaaxinttale muttetthe aya yeettaka mphironi. Tthiri woopowa waya waalipa ni wiiwelela waya malakiheryo a Yehova. *

20 Masu ala anniixuttiha exeeni? Ntoko siiranen’ya aya ni arummwa a Muluku a khalai, woopoliwa wahu mwa itthu sinrowa wiiraneya voohipisa, onilipa ni wiiwelela malakiheryo a Yehova. (Yes. 30:21) Malakiheryo awo hiyo ninnivahiwa mmulokoni. Ti maana aya vanitthuneya ahu wiiwelela ni murima ahu wotheene malakiheryo anivahiwa ahu. (1 Yoh. 5:3) Akhala wira hiyo ninniwerya wiiwelela olelo-va, nave vanirowa okhala vookhweya wiiwelela muhoolo nto nnookhapeleliwa ni Tiithi ahu Yehova ni Mwene ahu Yesu. (Sof. 2:3) Okhapeleliwa wahu iwo onrowa onikhaliherya woona ni maitho ahu moota Omwene wa Muluku onrowa awe waamaliha awanani awe otheene. Tthiri itthu iyo sinrowa okhala soohiliyaleya!

^ etti. 6 Ti vooreerela wuupuwela wira opwetexiwa wa “Babilonia Mulupale” onihimmwa opwetexiwa wa mitthenkeso sotheene sa etiini yoowoka, khonihimmwa wiiviwa wa khula mutthu oneettela etiini yoowoka. Okhala wira anamunceene yaale yaari mBabilonia khanrowa wiiviwa okathi owo, muhoolo mwaya akina a yaawo anrowa omananiha wiivalaanya ni etiini yoowoka ntoko sinihimmwa aya va Zakariya 13:4-6.

^ etti. 19 Soohimmwa sikina siniphwanyaneya eliivuru Profecia de Isaías — Uma Luz Para Toda a Humanidade I ipaaxina 282-283.