Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Omwene wa Muluku Onnilamulela!

 MURU 19

Muteko Wooteka Ipa Sinninvuwiha Yehova

Muteko Wooteka Ipa Sinninvuwiha Yehova

YOOLAKELA YA MURU OLA

Muteko wooteka olumwenku wotheene oniireliwa myaha sa Omwene

1, 2. (a) Etthu xeeni enaasivela atthu a Yehova opaka okhuma khalai? (b) Etthu xeeni Yehova enivaha awe efaita yuulupale?

ATTHU oororomeleya wa Yehova okhuma khalai onnaasivela oteka ipa sinivuwiha nsina na Muluku. Mwa ntakiheryo, aIsarayeeli mooluttuweliwa yaahikhaliherya muteko woomuteka tabernaakulu nto mooreera murima yaahivaha itthu saatthuneya wira ovariwe muteko.​—Okhum 35:30-35; 36:1, 4-7.

2 Etthu enitepa omusivela Yehova kahiyo itthu sinirumeeliwa paahi wira sitekiwe ipa iyo. (Math. 23:​16, 17) Etthu Yehova enimusivela vanceene ni enivuwiha tthiri nsina nawe enivikana sotheene ti okokhoreliwa mpani-mmo onipakiwa ni arumeyi awe ohela muhina wiivahererya waya wira anvarele muteko. (Okhum. 35:​21; Mar. 12:​41-​44; 1 Tim. 6:​17-​19) Eyo etthu yuulupale. Mwaha wa xeeni? Okhala wira ipa sinnitekiwa ni sinniphweeya. Mwa ntakiheryo, etabernaakulu ni etemplo khiivo olelo-va. Inupa iye soophweeya, masi Yehova khaaliyanle arumeyi awe yavanre muteko ni opaka soovaha saya wira sitekiwe inupa iye.​—Mmusome 1 aKorinto 15:58; aHéberi 6:10.

3. Ninrowa wuuluula exeeni muru ola?

3 Atthu a Yehova olelo-va annivara muteko wa oteka mapuro a okokhorela. Nto miteko sivanre ahu nikhaliheriwaka ni Mwene, Yesu Kristu, tthiri sinceene! Vannooneya wira Yehova ooreeliha wiimananiha wahu. (Esal. 127:⁠1) Muru ola onrowa wuuluula muteko ovariwe ni moota muteko owo onvuwinhe awe Yehova. Hiyo ninrowa-tho waawiriyana atthu yiirenle mpantta muteko owo wooteka.

Otekiwa wa Ipa sa Omwene

4. (a) Xeeni vanitthuneya ahu okhalana mapuro manceene a okokhorela? (b) Xeeni ifiliyaali sinceene suraanyiwa aya ni efiliyaale ekina? (Nwehe-tho ekaaxa eni “ Otekiwa wa iFiliyaale—Otthariheliwaka Marukunuxo Anitthuneya”.)

4 Ntoko sithokorenrye ahu Muru wa  16, Yehova onaatumererya arumeyi awe wira apakeke mithukumano sa okokhorela. (aHéb. 10:​25) Mithukumano sahu sinnilipiha nroromelo nahu ni wuncererya oluttuweliwa wahu muteko woolaleerya. Vaavo wanikisa onaattamela aya, Yehova onnaakuviha muteko woolaleerya. Mwaha waivaavo, atthu imiya ikonto sinceene annikela mootthokeyani mwa Yehova khula eyaakha. (Yes. 60:​22) Vaavo atthu a Omwene antepa aya waacerereya, vanitthuneya otekiwa Inupa wira simpirimiriweke iliivuru sinimutthokiherya Biibiliya. Tthiri sinnitthuneya inupa sinceene sa okokhorela.

5. Xeeni nsina noowi Empa ya Omwene niryaaya nooreerela? (Nwehe-tho ekaaxa eni “ Omwaleya wa Niinano wa Ekerexa”.)

5 Wuupaceryani wa muteko wa Atthu a Yehova, Alipa-oomusoma Biibiliya yaahipacerya woona oreera waya okhalana opuro aya wira athukumaneke. Vanikhala ntoko wira nipuro noopacerya otekiwa na okokhorela naari oWest Virginia, EUA, mwaakha wa 1890. Iyaakha sa 1930, atthu a Yehova yaahiteka wala olokiherya Inupa sinceene, masi mapuro ale yathukumaniwa nlelo khiyaarina nsina nookhalela. Mwaakha wa 1935, munna Rutherford aahixukurya elapo ya Havai, weiwo waatekiwa aya enupa ni eFiliyaali esya nipuro nimosaru. Okathi aakohiwa awe nsina naakhanle oovahiwa enupa ele, munna Rutherford aakhunle so: “Nyu munoonela sai, niireke ‘Empa ya Omwene?’, okhala wira hiyo ninlaleya ihapari sa Omwene”? (Math. 24:​14) Nsina nle nooreerela moohipisa naarowa ovahiwa mapuro otheene yaapakiwa mithukumano yaarumeeliwa ni miloko sa Yehova olumwenku wotheene.

6, 7. Malokiheryo a otekiwa Ipa sa Omwene moowaakuveya akumihenrye exeeni?

6 Mwaakha wa1970, saanitthuneya Ipa sa Omwene sinceene moohipisa. Nto, anna a wEstados Unidos, yaahikumiherya enamuna emosa yooteka ipa sooreera, sookhweya mmahiku vakhaani. Mwaakha wa 1983, saahitekiwa Ipa sa Omwene 200, wEstados Unidos ni oCanadá. Wira ovariwe muteko ola anna yaahilokiherya ikomisau sa muttetthe sinivara muteko wooteka. Enamuna eyo yaahooniwa oreerela, nto mwaakha wa 1986, Nikhuuru Noolamulela naaheemererya enamuna eyo, tivonto mwaakha wa 1987, saahikhala Ikomisau Sooteka sa Mittetthe (ISK) 60 Westados Unidos. * Mwaakha wa 1992, saahipakiwa ISM, wArgentina, wAustralia, oFrança, wAlemanha, oJapão, oMéxico, wAfrika do Sul, ni wEspanha. Anna ala anivara muteko wooteka Ipa sa Omwene ni Ipa sa Asembeleya, aahaana okhaliheriwa ni oxukhureliwa okhala wira muteko onivara aya, ti wa Muluku.

7 Ipa sa Omwene sinitekiwa mowaakuveya, sinnivaha onamoona wuulupale mittetthe sinitekiwa aya. Mwa ntakiheryo ejornaale emosa ya wEspanha, yaahikumiherya muru muulupale waahimya so: “Tthiri Nroromelo Ninniwerya Weettiha Myaako”. Elavulaka sa otekiwa wa Empa ya Omwene muttetthe wa oMartos, ejornaale ele yaakoha so: “Vaniweryaneya sai olumwenku ola atthu onitepa aya wiitthuna; atthu anceene wiivahererya akhumaka ipantte sinceene sa [wEspanha], arwaaka oMartos nno oteka empa, yeeyo enivikana itthu sotheene mwaha wa waakuva waya otekiwa, itekeliwo saya, ni moota otthokihiwa aya?” Mwaha ola aahaakhula nikoho nlo, oromolaka masu a Namoona mmosa yoowo aivaherenrye ani: “Itthu iya sotheene siniweryaneya mwaha woowi hiyo naatthu nniixuttihiwa ni Yehova”.

Otekiwa wa Ipa Ilapo Soothowa Musurukhu

8. Eprograma xeeni esya yeemereriwe ni Nikhuuru Noolamulela okhuma mwaakha wa 1999, ni nthowa xeeni?

8 Wuukiseryani wa eseekulu 20, atthu anceene ahiittheleya munikhuuruni na Yehova, ilapo seiye anna anceene ahirina aya musurukhu. Miloko sa mapuro awo saanipaka etthu yaawerya aya wira sikhalane opuro woothukumana. Masi ilapo sikina, anna yaaniveehiwa ni onyoholiwa okhala wira Ipa saya sa Omwene saari soohiloka voovirikana ni ikerexa sikina. Okhuma mwaakha wa 1999, Nikhuuru Noolamulela, naaheemererya wira opaceriwe ovariwa muteko wooteka Ipa sa Omwene ilapo seiye siri soothowa musurukhu. Musurukhu wa ilapo iye soothaaciri, waahikuxiwa onarowa otekeliwa Ipa sa Omwene ilapo saarina othoiwa, wira anna a ilapo iye ehikhale ‘enahalela’. (Mmusome 2 aKorinto 8:​13-​15.) Anna ni arokora yaahiivahererya okhaliherya muteko owo wooteka.

9. Muteko xeeni wooniwa okhala woovila, masi exeeni eweryanenye opakiwa vano?

9 Wanipacerya muteko owo waari woovila. Erelatoorio emosa yaapakiwe mwaakha wa 2001, yaahooniherya wira mwa ilapo 88 soothowa musurukhu, saanitthuneya Ipa sa Omwene 18.300. Nikhaliheriwaka ni munepa wa Muluku, ni Mwene ahu Yesu Kristu, nto khuuvo muteko onooceeliwa. (Math. 19:​26) Muhina mwa iyaakha 15, okhuma 1999 mpakha 2013, atthu a Muluku aateka Ipa sa Omwene 26.849, ntoko mpantta wa eprograma yooteka. * Nave Yehova onnivikaniha oreeliha muteko woolaleerya, tivonto mwaakha wa 2013 nlelo vatthuneya aya Ipa sa Omwene 6.500, ilapo soothowa musurukhu; nave nenna-va sinnitthuneya Ipa sa Omwene imiya sinceene khula mwaakha.

Oteka Empa ya Omwene, ilapo soothowa musurukhu onnikumiherya mixankiho sa vameekha aya

10-12. Moota xeeni otekiwa wa Ipa sa Omwene onivuwiha aya nsina na Yehova?

 10 Moota xeeni otekiwa wa Ipa iyo sa Omwene isya onivuwiha aya nsina na Yehova? Erelatoorio emosa enikhuma eFiliyaali ya oZimbabwe yaahimya so: “Mweeri mmosa paahi nuumala otekiwa Empa ya Omwene, mwaattelo wa atthu anirwa mithukumano onnincerereya ikwaha piili”. Ilapo sinceene, vanikhala ntoko wira atthu annoovelela okhala Namoona mwaha wa ohikhala opuro wooreerela onithukumaniwa. Vanonto, nuumala otekiwa Empa ya Omwene esya, ennisareiwa naananoru, nto khiyatthuneya otekiwa-tho ekina. Ekeekhai wira atthu ale khanikhala Anamoona a Yehova mwaha wa Ipa iyo sintekiwa. Masi etthu eniwiiriha, mwaha wa ophentiwa ni atthu anithukumana mpaani-mmo aniirela mpantta nikhuuru nahu. Nrowe nithokorerye matakiheryo vakhaani.

11 Indonésia. Nuumala mulopwana mmosa yoowo aaweha Empa ya Omwene etekiwaka, osuwela wira atthu yaavara muteko ole, yarimwiivahererya, owo aahimyale so: “Nyuwosa khuuvo onilikana anyu! Okathi ola wotheene kanoowehani, koona wira khula mmosa mwa nyuwo onivara muteko ni murima wotheene, moohakalala hata muhiliviwaka etthu. Kinoona wira khiivo-tho etiini ekina yowiiraana enilikana ni nyuwo”!

12 Ucrânia. Muthiyana aamakela ovira opuro watekiwa Empa ya Omwene, aahoona wira atthu yaavara muteko ole yaari Anamoona a Yehova, ni yaateka Empa ya Omwene. Owo aahimmye so: “Muhima aka okileela sa Anamoona a Yehova, maana owo namoona. Masi nuumala woona etekiwaka Empa ela, vano koopaka yoothanla aka ya wiirela mpantta emusi ela ya omunepani. Nipuro nla kihoona moota atthu aniphentana aya”. Muthiyana ole aaheemererya omusoma Biibiliya, ni aahibatiziwa eyaakha ya 2010.

13, 14. (a) Etthu xeeni eniixutta anyu sa moota mulopwana mukina ni mwaara awe soonenle awe muteko wooteka Empa ya Omwene? (b) Etthu xeeni ekhanle anyu oopaka wira nipuro nanyu na okokhorela nivuwiheke nsina na Yehova?

13 Argentina. Mulopwana mmosa ni amwaarawe aahirowa olavula ni munna aaweherya muteko ole wooteka Empa ya Omwene. Mulopwana ole aahimmye so: “Okathi wotheene waavariwa muteko wootekiwa Empa ela, hiyo nanoowehani, nto. . . vano nimphavela wiixuttaka voohimya sa Muluku opuro yoola”. Nuumala-vo aahikoha-tho, “Nipake exeeni wira neemereriwe orwa mithukumano sa enupa ela?” Anamathelana ale yaaheemya omusoma Biibiliya, masi yaahihimya wira yaaphavela wira emusi aya yotheene emusomeke Biibiliya vamosa. Anna yahaakhulela yooveka eyo.

14 Owehasa wene nyuwo pooti muhikhalihenrye muteko wooteka Empa ya Omwene enithukumana anyu, masi nlelo sookhala inamuna sinceene mukhaanle anyu ookhaliherya nipuro na mithukumano wira nivuwihe nsina na Yehova. Mwa ntakiheryo, nyuwo pooti waalattula mooluttuweliwa ale anaasomiha anyu Biibiliya, anaaxukurya anyu ni ale akina anaaphwanya anyu mulaleeryaka wira arwe owiriyana mithukumano Empa ya Omwene ya muloko anyu. Nyuwo-tho munoowerya okhaliherya orattela ni olokiherya nipuro nlo na mithukumano. Nave mwapaka malokiheryo ooloka, nyuwo munoowerya opaka soovaha sanyu wira elokiheriwe Empa ya Omwene ya muloko anyu wala wira nitekiwe nipuro nikina na othukumana ilapo sikina. (Mmusome 1 aKorinto 16:⁠2.) Miteko iyo sotheene sinnincererya ovuwa wa nsina na Yehova.

Anamuteko “Yaawo Yiivaherenrye Vootthuna Waya”

15-17. (a) Okathi wooteka anamunceene anivara muteko anikhuma woowi? (b) Muniixutta exeeni wa masu alavuliwe ni munna mmosa ni mwaara awe yaawo yaivaherenrye oteka Ipa sa Omwene ilapo sikina?

15 Muteko munceene onivariwa okathi onitekiwa aya Ipa sa Omwene, sa Asembeleya, ni sa iFiliyaali, anamunceene anivara muteko owo, anna ni arokora a muttetthe yoowo. Imaara sinceene, anna a muttetthe mmosa annikhaliheriwa ni anna a ilapo sikina yaawo anisuwela oteka oratteene ipa. Anamunceene mwa anna awo, annilokiherya makhalelo aya wira arowe ovara muteko wooteka ipa ilapo sikina, weiwo onikhala aya isumana sinceene. Anna akina anniivahererya wira avirihe iyaakha sinceene akhaliheryaka miteko iyo, nto awo annithaama nipuro nimosa arowaka nipuro nikina, ninrowa otekiwa Empa ekina.

Timo ni Lina Lappalainen (Nwehe ettima 16)

16 Muteko wooteka Inupa ilapo sikina, tiwooxankiha masi onnikumiherya mareeliho manceene. Mwa ntakiheryo, Timo ni Lina, awo aheetteetta ilapo sinceene wAsia, wEuropa, ni América do Sul, atekaka Ipa sa Omwene, sa Asembeleya, ni iFiliyaali. Timo, onihimya so: “Muhina mwa iyaakha iya 30, wa khula iyaakha piili kaanithaamihiwa, kiroihiwaka nipuro nikina”. Lina yoowo otheliwe ni Timo mwa iyaakha siniphiyerya 25, onihimya so: “Miyo ni Timo noorumeela hoothe ilapo soovirikana. Vanitthuneya ikuru ni okathi munceene wira mutthu olimalele yoolya, oriirya wala oviha, nttaava, enamuna ya olaleerya ni waapaka apatthani asya khula muttetthe”. * Niireke wiimananiha waya wookumiherya mureerelo? Lina onihimya so: “Mixankiho, sinniniphwanyiha mareeliho manceene. Nihoona hiyo aneene niphento na eKristau ni waakheliwa wahu saana ni anna, nave nihoona ophenta ni othokorerya wuulupale wa Yehova. Nihoona-tho wiiraneya wa yoolaiherya ya Yesu wa atthareli awe elempwale va Marko 10:​29,30. Tthiri hiyo nihaaphwanya axinnihu, axirokorihu ni aximaama ahu ikwaha miloko muloko”. Timo onilavula so: “vanninsivela vanceene orumeela osuwela wahu, mwa enamuna yootepexa oreerela, nikhaliheryaka muteko wa othukumanyiwa mireerelo sa Mwene”.

 17 Darren ni Sarah, yaawo akhalihenrye otekiwa wa Ipa sa Omwene wAfrika, wAsia, América Central, Europa, América do Sul, ni Sul do Pacífico, awo anoona wira ahaakhela mareeliho manceene ovikana iye sivanhe aya. Hata saaphwannye mixankiho sinceene, Darren onihimya so: “Tthiri eparakha yuulupale ovara muteko ni anna a mapuro oovirikana a olumwenku ola. Miyo kaahoona wira omphenta wahu Yehova onikhala ntoko mukhoi wotthaviwa onnuuraanya otheene ahu, orukurerya olumwneku wotheene”. Sarah onihimya so: “Miyo kihiixuttihiwa itthu sinceene ni anna ni arokora a mapuro manceene! Waaweha moota yaimananiha aya omurumeela Yehova, waanikiiriha miyo nave, ovara muteko ni owerya waka wotheene”.

18. Moota xeeni eprofesia ya Esalimo 110:1-3 enaakhwanela aya olelo-va?

18 Mwene Davidi aahihimya vahinatthi wira atthu otheene anikhaliherya Omwene wa Muluku, sinimwaaphwanya mixankiho, hata vari siiso awo anrowa wiivahererya ‘votthuna waya’, wira akhaliherye miteko sa Omwene. (Musome Esalimo 110:​1-⁠3.) Ale otheene anivara muteko wira akhaliherye Omwene annikhaliherya wiiraneya wa masu a eprofesia eyo. (1 aKor. 3:⁠9) Mwaattelo wa iFiliyaali sinitekiwa, imiya sinceene sa Ipa sa Asembeleya ni ikonto miloko sinceene sa Ipa sa Omwene, olumwenku wotheene sinnooniherya vohikhootteya-vo, wira Omwene wa Muluku wookhala tthiri ni onnilamulela. Tthiri eparakha yuulupale erina ahu ya omurumeelaka Mwene ahu Yesu Kristu, nivaraka muteko yoowo onivuwiha nsina na Yehova, ovuwa onimphwanela tthiri!

^ etti. 6 Mwaakha wa 2013, anna owiivahererya aniphiyerya 230,000 yaahemereriwa ovara ni Ikomisau sa Oteka sa Muttetthe 132 wEstados Unidos. Elapo ele, khula mwaakha ekomisau eyo ennihoolela otekiwa wa Ipa sa Omwene 75 ni sinnikhaliherya olokiheriwa Ipa sa Omwene siniphiyerya 900.

^ etti. 9 Nummuru nla khannihela muhina Ipa sa Omwene sitekiwe ilapo sikina siniteka ekhayaru.

^ etti. 16 Nnaamwi anna anrowa okhaliherya muteko wooteka ilapo sikina avirihaka okathi munceene nipuro nnivariwa muteko wooteka, masi awo-tho annikhaliherya miloko saattamenle alaleeryaka makaaripi ni wuumalani wa esumana.