Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Omwene wa Muluku Onnilamulela!

 MURU 18

Onikhuma Vai Musurukhu Onivareliwa Miteko sa Omwene?

Onikhuma Vai Musurukhu Onivareliwa Miteko sa Omwene?

YOOLAKELA YA MURU OLA

Xeeni ni moota xeeni atthu a Yehova anikhaliherya miteko sa Omwene arumeelaka musurukhu aya?

1, 2. (a) Munna Russell aamwakhunle sai mukhulupale a ekerexa aaphavela osuwela moota Alipa-oomusoma Biibiliya saaphwanya aya musurukhu yaarumeela aya? (b) Ninrowa othokorerya exeeni muru ola?

NIHIKU NIMOSA, munna Charles T. Russell aahixekuriwa ni mukhulupale a Igreja Reformada yoowo aaphavela osuwela moota Alipa-oomusoma Biibiliya yaaphwanya aya musurukhu wira avare miteko saya.

Munna Russell aamwaakhunle so: “Hiyo khannivekaveka musurukhu”.

Mukhulupale ole aahimukoha-tho so: “Nto mumphwanya sai musurukhu”?

Munna Russell aamwaakhunle so: “Miyo kaahimya ekeekhai yokhweyexa nyuwo khamunrowa waamini. Khula mutthu onisiveliwa ephiro ela, khoniroiheliwa ephace owiitho. Masi owo onnisuwela wira vanitthuneya musurukhu mwa itthu sinirumeeliwa. Awo axiineene annuupuwela so: ‘Opuro ola othukumanne ahu okhwiiye musurukhu . . . Nto miyo kikhaliherye sai?’”.

Mukhulupale ole aahaanle onwehexexaka munna  Russell mwaha woohikupali.

Munna Russell aahivikaniha oriki: “Etthu ehimyale aka ekeekhai ehinvaanyiwa. Tthiri annikikoha ariki: ‘Kiire sai wira kikhaliherye muteko ola?’ Khula mutthu onireelihiwa khukhalana etthu, oniphavela orumeela wira okhaliherye muteko wa aPwiya. Nto akhala wira mutthu khorina etthu ninwerya sai omukhanyererya okumiha etthu ehirina awe?” *

2 Tthiri munna Russell aahimya “ekeekhai ehinivaanyiwa”. Okhuma khalai atthu a Muluku onnaasivela ovaha etthu voohikhanyereriwa wira akhaliherye okokhorela wekeekhai. Muru ola, onrowa othokorerya matakiheryo ari mBiibiliyani a moota arumeyi a khalai ni ale a mahiku ala anipaka aya eyo. Okathi onirowa ahu othokoreryaka moota sinikhumelela awe musurukhu onivareliwa miteko sa Omwene mahiku ala, khula mmosa a hiyo onimwiira saana wiikoha so ‘Kinrowa okhaliherya sai Omwene?’

“Khula Mutthu Avaheke Sintthunawe”

3, 4. (a) Ororomela xeeni Yehova orina awe wa arumeyi awe? (b) AIsarayeeli yoonihenrye sai okhaliherya waya muteko wooteka etabernaakulo?

3 Yehova onnaaroromela arumeyi awe eekeekhai. Owo oosuwela wira wakhumelela okathi wooreerela, awo moohakalala  animooniherya ororomeleya waya apakaka soovaha saya soohikhanyereriwa. Muthokorerye malikanyiho manli a okathi wa Isarayeli.

4 Nuumala Yehova waakumiha aIsarayeli wEjiitu, ahaleela wira yaahaana oteka eheema wala etabernaakulu ya okokhorela wira yeettaneke. Ipakeliwo saya ni itthu saarowa oheliwa mpuwa mwaya saarowa otthuneya musurukhu munceene. Yehova aahimulakiherya Moise wira aalattule atthu ale wira akhaliherye muteko ole ohimyaka so: “Khula mutthu avaheke sintthunawe”. (Okhum. 35:5) Nto atthu ale yaavirinhe okathi munceene ‘akhanyererihiwa n’uwali ovara miteko’ sa epottha yoonenle sai okathi ole? (Okhum. 1:14) Awo yaahikhaliherya muteko ole moomalela, avahaka ni murima aya wotheene eweero eparatha ni mihakhu sikina, sinceene seiye yaavahiwe aya ni atthu yaale yaaruma wEjiitu. (Okhum. 12:35, 36) Atthu a Isarayeli yaahivaha itthu sinceene ovikana iye saatthuneya mpakha ohimmwa wira “siruhiwe sophiyerya”.​—Okhum. 36:4-7.

5. Okathi Davidi avenkenle awe aIsarayeeli ovaha mihakhu saya wira etekiwe etemplo awo yoonenle sai?

5 Nuuvira iyaakha 475, Mwene Davidi aahikuxa “muhakhu awe” khukhaliherya muteko wootekiwa empa ya Muluku yoopacerya yaari nipuro nuulupale na okokhorela wa ekeekhai valaponi. Nto aahatumererya aIsarayeli akhwa awe wira awo avaheke-tho, khwiira; ‘Vano, mwa nyuwo ti pani ontthuna olelo omurerela murima Yehova?’ Nto atthu ale ‘tthiri yahinva sothene Yehova ni murima worera’. (1 Wah. 29:3-9) Mwaha wa osuwela wira Yehova taari mwaneene soovaha iye, Davidi aahipaka nivekelo wa Yehova ohimyaka so: “Itthu Sothene sinnikhuma mwa nyuwo; vano hiyo, nimanlene wakhela mmatatani mwanyu, ninnovahani-tho nyuwo”.​—1 Wah. 29:14.

6. Xeeni vanitthuneya aya musurukhu wira sivariwe miteko sa Omwene olelo-va, nto makoho xeeni anikhumelela?

6 Moise vamosa ni Davidi khakhanyerenrye atthu a Muluku wira avahe etthu. Masi atthu ale yaavanhe ni murima aya wotheene. Olelo-va exeeni eniiraneya? Hiyo noosuwela wira muteko wa Omwene wa Muluku onitthuneya musurukhu wira ovariwe. Onitthuneya musurukhu munci wira apakiwe ni okaiwa aBiibiliya ni iliivuru sinimutthokiherya Biibiliya, oteka ni olokiherya mapuro anipakiwa mithukumano sahu, iFiliyaali, ni waakhaliherya ale sinaakhumelela itthu sootutuxerya ntoko ihasara sa ephattu. Tivonto annikhumelela makoho ala: Onikhuma vai musurukhu onirumeeliwa? Niireke vanitthuneya waakhanyererya atthareli a Mwene wira avaheke etthu?

“Khannirowa Waavekela Apinaatamu Musurukhu”

7, 8. Xeeni atthu a Yehova ahiniveka-veka aya musurukhu wa atthu akina?

7 Munna Russell ni apatthani awe yaahikhootta otthara mweettelo wa ikerexa sa eKristau, wa oveka-veka musurukhu. Nummuru na nenli na erevista Watch Tower, yaahiruuha mwaha waarina muru oni ‘Munnimphavela ‘Torre de Vigia de Sião’?’ Russell aahimmye so: ninnikupali wira YEHOVA tori namakhaiherya a ‘Torre de Vigia de Sião’ , nto akhala wira ti siiso, khonkhala-khala  ovekavekaka musurukhu aahiiso ovekela nikhaliheryo na pinaatamu. Maana okathi ole onihimya wira: ‘Eweero ni eparatha yotheene ya mmiyaakoni ti yawaka’ onrowa awe ohiya ovaha nikhaliheryo nintthuneya, ninrowa osuwela wira woophiya okathi woohiya okumiherya erevista ela”. (Hag. 2:7-9) Olelo-va soovira iyaakha 130, masi Owehaweha ni mulokiheryo onikumiherya erevista ela onootepa wunnuwa!

8 Atthu a Yehova khanivekaveka musurukhu. Awo khaneettiha ephace wala olepa ipaphelo avekaka musurukhu. Khaniveka idiisimo hata ovahererya envelope wira yaheliweke musurukhu khula mweeri. Awo anitthara malakiheryoa yaahimwale ni Torre de Vigia wira “Hiyo ninnoona okhala etthu yoohikhalela ovekaveka musurukhu mwaha wa Pwiya ntoko siniira aya anatiini akina. . . Ankhili ahu anninooniherya wira inamuna sinirumeeliwa wira ovekavekiwe musurukhu mwa nsina na Pwiya, etthu yowuuliha muru, owo khoneemererya ni khonaareeliha ale anivaha, hata miteko sinivareliwa awe musurukhu owo”. *

“Vano Khula Mutthu Avaheke Attharihaka Murim’awe”

9, 10. Etthu xeeni enniiriha opakaka soovaha soohikhanyereriwa?

9 Hiyo nikhanle atthu a Omwene khannitthuneya okhanyereriwa wira nivahe etthu. Moovirikana ni atthu akina, hiyo moohakalala ninnivaha mihakhu ni musurukhu ahu wira nikhaliherye miteko sa Omwene. Exeeni enniiriha okhala oovaha siiso? Muthokorerye mathowa mararu.

10 Etthu yoopacerya enniiriha opaka soovaha soohikhanyereriwa mwaha woowi hiyo ninnimphenta Yehova ni nimphavela opaka itthu “sinimusivela”. (1 Yoh. 3:22) Yehova tthiri onnitteeliwa murima ni arumeyi awe anipaka soovaha ni murima aya wotheene. Nrowe nithokorerye masu a murummwa Paulo voohimya sa ovaha wa eKristau. (Mmusome 2 aKorinto 9:7.) Kristau a ekeekhai khonitthuneya okhanyereriwa wala woovelela ovaha etthu. ‘Khula mutthu avaheke attharihaka murim’awe’. * Eyo enitaphulela wira mutthu owo mwaneene onoona wira vanitthuneya nikhaliheryo nto khiyakhaliherya. Anamavaha moota owo anniphentiwa ni Yehova okhala wira ‘anivaha murima wattenle ene”. Biibiliya mukina onihimya so: “Muluku onnaaphenta ale aniphenta ovaha”.

Anamwane akina oMoçambique onnaasivela-tho ovaha

11. Exeeni enniiriha onvaha Yehova etthu yoolokexa erina ahu?

11 Etthu ya nenli enniiriha, ovahaka mihakhu sahu okhala wira eyo enamuna ya omuxukhuru Yehova mwaha wa mareeliho manceene annivaha awe. Muthokorerye masu ala oovara murima a Nlamulo na Moise. (Mmuosme Otumererya 16:16, 17.) Khula okathi yaarowa aya ifesta sa khuta mwaakha, khula mwIsarayeeli mulopwana ahaana okuxa yoovaha “aphimelelaka soruwerya sivahiwawe” ni Yehova. Ti maana aya, khula mulopwana ohinatthi orowa khula efesta ya khula mwaakha, ahaana ovarerya murima awe wira woone mareeliho xeeni avahiwe awe ni Yehova, nto khiyathanla yoovaha yooreerela oroiha. Mwa enamuna  emosaru, vaavo vanoona ahu mareeliho manceene Yehova annivaha awe, nihaana ophavelaka onvaha etthu yoolokexa erina ahu. Soovaha sahu sa murima wotheene sinihela muhina mihakhu sahu, sinooniherya wira ninnixukhurela mareeliho anivahiwa ahu ni Yehova ni onireerela wawe murima.​—2 aKor. 8:12-15.

12, 13. Enamuna xeeni soovaha sahu soohikhanyereriwa sinooniherya aya omphenta wahu Mwene, nto khula mutthu ovaheke kavi?

12 Etthu ya neeraru enniiriha opaka soovaha sahu soohikhanyereriwa, okhala wira hiyo ninniphenta, Mwene ahu Yesu Kristu. Moota xeeni? Nkawehani ele Yesu yaahimeeryale awe awiixutti awe ohiyu wookiserya waari awe valaponi. (Mmusome Yohani 14:23.) Yesu aahimmye wira “Akhalá mutthu onikiphenta, onimwettela molumo aka”. “Moolumo” a Yesu anihela muhina nlamulo na olaleiwa ihapari sooreera sa Omwene elapo yotheene enikhala atthu. (Math. 24:14; 28:19, 20) Hiyo ninniiwelela “moolumo” awo nivaraka sotheene ni ikuru sahu sotheene; ohela muhina orumeela okathi ahu, owerya wahu ni mihakhu sahu—wira nikhaliherye muteko woolaleya Omwene. Hiyo nimphavela tthiri wooniherya wira ninnimphenta Mwene ahu a Mesiya.

 13 Aayo atthu otheene a Omwene, anniphavela ni murima aya wotheene okhaliherya miteko sa Omwene avahaka mihakhu saya. Nto nimpaka sai eyo? Eyo yoothanla ya mutthu mwaneene. Khula mutthu onivaha ele yoolokexa eniwerya awe. Anamunceene a hiyo kharina mihakhu sinceene. (Math. 19:23, 24; Yak. 2:5) Masi anna awo anniphwanya ohakalala vaavo vanisuwela aya wira Yehova ni Mwanawe annivaha efaita hata soovaha saamukhaani sinivahiwa ni murima wootheene.​—Mar. 12:41-44.

Onaakheliwa Sai Musurukhu Onivahiwa?

14. Mwa iyaakha sinceene Anamoona a Yehova yaakawa sai iliivuru saya?

14 Mwa iyaakha sinceene, Anamoona a Yehova yaanikawela iliivuru saya avekelaka wira mutthu owo onaakhelela ovaheke musurukhu. Musurukhu waavekeliwa waari vakhaani wira hata atthu ale ahirina musurukhu munceene aweryeke waakhela iliivuru iyo. Tthiri vakhala wira mwaneene etthoko aanisiveliwa iliivuru iyo masi khuhikhalana musurukhu, anamalaleerya a Omwene yaanisiveliwa omuhiyerya iliivuru iyo. Yoolakela aya waari waakawela iliivuru atthu yaatthuna osoma ni ottottela mureerelo.

15, 16. (a) Mirukunuxo xeeni Nikhuuru Noolamulela nipanke aya okhuma mwaakha wa 1990 wa enamuna yookawa iliivuru sahu? (b) Onivahereriwa sai musurukhu wa soovaha? (Nwehe-to ekaaxa eni “ Siniroihiwa Vai Soovaha Sahu?”)

15 Mwaakha wa 1990, Nikhuuru Noolamulela naahipacerya opaka marukunuxo a enamuna yookawa iliivuru. Okhuma eyaakha yeele wEstados Unidos, iliivuru sotheene sahipacerya okaiwa voohihimya musurukhu ene, mutthu okhanle awe oovaha. Epaphelo yaaroiheliwe miloko sotheene sa elapo ele yaahimya so: “Irevista ni iliivuru sinrowa ovahiwaka anamalaleerya ni atthu akina aniphavela ahivekeliwaka musurukhu wala waaleela wira akumiheke moori wira avahiwe khula etthu eniphavela aya. . . . Vano khula mutthu oniphavela ovaha musurukhu wira okhaliherye muteko wa omwiixuttiha Biibiliya onivariwa pooti ovaha, masi khula mutthu ohaana waakhela iliivuru khula okathi hata orineene wala ohirina musurukhu”. Malakiheryo ala yahitthokiherya saana wira muteko onivara ahu ntoko maKristau khahiyo wa nakoso, nave vahiiweya saana wira ‘hiyo khannitumiha nuulumo na Muluku’. (2 aKor. 2:17. NM.) Nuuvira okathi malokiheryo ala a soovaha soohikhanyereriwa yaahipacerya wuulaana iFiliyaali sinceene orukurerya elapo yotheene.

16 Nto sinivahereriwa sai soovaha iyo sihinikhanyereriwa? Khula Empa ya Omwene ya Anamoona a Yehova soopwehiwa ikaaxa sa soovaha opuro wooreerela. Mutthu oniphavela onniwerya oroiha mwaneene soovaha sawe oFiliyali, niire so, wa nikhuuru nowemereriwa ninrumeeliwa ni Anamoona a Yehova muttetthe owo. Khula mwaakha onnikumiheriwa mwaha mmosa murevistani ya Owehaweha otthokiheryaka moota woopaka soovaha iyo.

Onirumeeliwa Sai Musurukhu Owo?

17-19. Mutthokiherye moota sinirumeeliwa aya soovaha wira (a)  okhaliheriwe muteko wa olumwenku wotheene, (b) wira sitekiwe Ipa sa Omwene olumwenku wotheene, ni (c) wira siliveriwe itthu sinitthuneya muloko yoowo.

17 Muteko wa Olumwenku Wotheene Musurukhu owo onirumeeliwa wira siliviwe itthu sinitthuneya wira ovariwe muteko  woolaleerya olumwenku wotheene. Sooliva iyo sinihela muhina opaka ni okawa iliivuru olumwenku wotheene, oteka ni olokiherya ipa sa iFiliyaali ni wiiriwa wa ixikola soovirikana sa Muluku. Ohiya-vo musurukhu ola onnirumeeliwa-tho wira akhapeleliwe mamisionaario, axitokweene ooweetteetta ni mapioneero a vameekhaaya. Soovaha sa muteko wa olumwenku wotheene sinnirumeeliwa wira akhaliheriwe ale saakhumenle ihasara sa ephattu. *

18 Otekiwa wa Ipa sa Omwene Olumwenku Wotheene. Musurukhu ola onnirumeeliwa wira sikhaliheriwe miloko oteka wala olokiherya Empa aya ya Omwene. Okathi onaakheliwa aya soovaha iyo, nlelo oniira otthuneyaka musurukhu wira sikhaliheriwe miloko sikina. *

19 Soovaha Sinirumeeliwa Mmulokoni. Musurukhu ola onirumeeliwa wira oliveriwe itthu sinitthuneya ni olokiherya Empa ya Omwene. Axitokweene pooti othanla wira musurukhu mukina oroihiwe oFiliyaali wira wakhaliherye oroihela ohoolo miteko sikina sa omwene. Wira apake eyo, axitokweene ahaana waakoha anna a mmulokoni wira yiiwanane musurukhu ene wooroiha. Nto yaiwanana musurukhu owo ohaana oroihiwa. Khula mweeri, munna onikhapelela ikontha sa muloko onnipaka erelatoorio yeeyo enisommwa mmulokoni.

20. Munrowa onvuwiha sai Yehova ni ‘sorera sanyu sothene’?

20 Nuumala othokorerya itthu sootheene sinitthuneya wira ovariwe muteko woolaleya Omwene ni waapaka awiixutti olumwenku wotheene, ninnoona oreerela waya omuxukhuru Yehova ‘ninvahaka sorera sahu’. (Mir. 3:9, 10) Itthu sahu sooreera sinihela muhina erutthu, muupuwelelo ni makhalelo ahu oomunepani. Tthiri hiyo ninniphavela orumeela itthu iyo moomalela mmutekoni wa Omwene. Nto muhiliyale wira itthu sahu sooreera sinihela muhina mihakhu sahu. Tivonto nrowe niimananihe ovaha ele erina ahu okathi oniwerya ahu. Soovaha sahu sohikhanyereriwa sinninvuwiha Yehova ni sinnooniherya wira ninnikhaliherya Omwene wa Mesiya.

^ etti. 1 Erevista The Watch Tower, 15 ya Julyo , 1915, ipaaxina 218-219.

^ etti. 8 Erevista The Watch Tower, 1 ya Agosto , 1899, epaaxina 201.

^ etti. 10 Musomi mmosa onihimya wira nuulumo na eGriki nitaphuleliwe wira ‘attharihaka murim’awe’ “nnooniherya yoothanla mutthu enipaka awe vahinatthi”. Owo onihimya-tho so: “Ole onivaha onniphwanya ohakalala mwaha wa ovaha iwo, nto khiyailokiherya wira ovaheke mwa enamuna yootthokiheya”.​—1 aKor. 16:2.

^ etti. 17 Wira moone itthu sikina sa moota sinivariwa awe muteko wowaakhaliherya ale yaaphwannye ehasara nwehe Muru 20.

^ etti. 18 Soohimmwa sikina sa muteko wootekiwa Ipa sa Omwene nwehe Chapter 19.