Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Omwene wa Muluku Onnilamulela!

 MURU 12

Okhala Ootthokiheya Wira Amurumeele “Muluku a Murettele”

Okhala Ootthokiheya Wira Amurumeele “Muluku a Murettele”

YOOLAKELA YA MURU OLA

Yehova onaatthokiha atthu awe

1, 2. Marukunuxo xeeni yaakumiheriwe ni Zion’s Watch Tower a Janero 1895, ni anna yoonenle sai?

OKATHI John A. Bohnet, mulipa-oomusoma Biibiliya a nthiti aakhenle awe erevista Zion’s Watch Tower (Owehaweha) ya Janero 1895, aahitteeliwa murima mwaha wa ele aasomme awe. Erevista ele yaarina ekaapa yooripa, yaahikhala elatarato ya etoore yaarina luuxu vasulu, okerekhere waya yaahikhala ephareya yowuutuwanyeya, luuxu aya aanimwaleela erimu yoriipa. Moolumo a yoohimmwa yaari-mo, voohimya sa enamuna esya ya erevista eyo yaari so: “Our New Dress” (Orukunuxiwa wa makhalelo a erevista ahu).

2 Mwaha woomusivela erevista ele, munna Bohnet aahimulepela epaphelo munna Russell oriki. “Vannikisivela woona etoore ni makhalelo ooreera a erevista ela. Yootepa oreera”. Mulipa-oomusoma Biibiliya mukina oororomeleya John H. Brown, aalempe so voohimya sa ekaapa ele: “Vannihakalaliha mutthu woona. Oweha moota etoore ele enivikaniha aya weemela nnaamwi emaniwaka ni mawimpi ni epheyo yuulupale”. Ekaapa esya ya erevista ele yaari marukunuxo oopacerya anna yoonale aya mwakha ole; masi khahiyo yaari yookiserya. Mweeri wa Novembro waahipakiwa murukunuxo mukina muulupale. Mukwaha ola ekaapa yaahiheliwa-vo ephareya yaarina mawimpi maalupale.

3, 4. Muxankiho xeeni waalaleiwale ni erevista Watch Tower 15 a Novembro 1895, ni marukunuxo xeeni maalupale yaakhumelenle muhoolo mwaya?

3 Waahithokoreriwa muru mmosa wa erevista Watch Tower (Owehaweha) 15 a Novembro 1895, yoowo wooniherya muxankiho ene oriki: Mawimpi maalupale a mixankiho, annihonona murettele wa nikhuuru nootthokiheya na Alipa-oomusoma Biibiliya. Anna annivikaniha owana-wana mwaha woophavela okhala amahoolela a muloko. Wira akhaliheriwe anna ale woona wira yahaana ohiya owana-wana, mwaha ole waahilikanyiha muloko wa eKristau ni pakiti. Erevista ele yaheemya wira anna yaahoolela khiyaawenrye omulipiha saana pakiti, wira ohinyaanyiwe okathi wa mixankiho sinlikana ni otupa wa maasi. Nto etthu xeeni yaareerela opakiwa?

4 Muru ole wahooniherya wira namahoolela a pakiti orina ankhili onnikuxa ikalawa sikina wira atthu avoloweke-mo okathi pakiti oninyaanyeya awe, nave onnalakiherya saana anamuteko akina wira asuweleke enamuna yoowakuvela ohela ikalawa mmaasini okathi onirwa aya epheyo yootepa wuupa. Vamosaru, ale anihoolela ahaana osuwelexa wira atthu otheene ari mmulokoni, annisuwela  etthu yooreerela opaka okathi onikhumelela aya maasi ootupa, niire so, mixankiho. Nto wira eyo yiiraneye mwaha ole waahilaleya marukunuxo makina maalupale. Mwaha ole waahilakiherya oriki okhuma okathi yole, “khula ekompanyia, yahaana othanliwa axitokweene” wira ‘yettiheke sana’ ipwittipwitthi.​—Mit. 20:28.

5. (a) Xeeni malokiheryo oopacerya a okhala axitokweene mmulokoni yaakhumelenle aya okathi woreerela? (b) Makoho xeeni anirowa ahu othokorerya?

5 Marehereryo ale a waathanla axitokweene yaari oreerela okathi ole, maana yaarowa okhala mathipelo a miloko soolipa. Yahakhaliherya anna owerya owanana maasi ootupa, eyo piiyo, mixankiho saakumiheriwa ni Ekhotto Yoopacerya ya Olumwenku. Mwa iyaakha sattharela, saahipakiwa mirukunuxo sinceene seiyo saakhalihenrye atthu a Muluku okhala ootthokiheya saana wira amurumeeleke Yehova oratteene. Etthu xeeni eprofesia emosa ya Biibiliya yaahimyale aya sa mirukunuxo iyo? Mirukunuxo xeeni sa nikhuuru nootthokeya soonale anyu? Mureerelo xeeni ophwanyale anyu?

“Kinimovahani Murettele” Ntoko Makhulupale Anyu

6, 7. (a) Anitaphulela exeeni masu ari va Yesaya 60:17? (b) Anithoonyerya exeeni masu oowi ‘makhulupale’ ni ‘anamavaha muteko’?

6 Ntoko sithokorenrya ahu Muru 9, profeta Yesaya aahihimya vahinatthi wira Yehova aarowa waareeliha atthu awe wira akhale owaatta. (Yes. 60:22) Masi Yehova aahileiherya itthu sikina suulupale. Eprofesia emosaru ennihimya-tho so: “Kinoriha ekobri, kinoruha ewero; kinoriha eyuma, kinoruha eparatha; kinoriha mwiri, kinoruha eboronze; kinoriha maluku, kinoruha eyuma. Kinowomola ale yohaxani, kinimovahani makhulupale èxariya [ntoko anamavaha muteko]; kinowomola ale yopuheryani, kinimovahani murettele”. (Yes. 60:17) Enitaphulela exeeni eprofesia ela? Enivareleya sai muteko olelo-va?

Moone wira oranttelihiwa iwo khahiyo, oturukiwa wa ikaruma soohiloka ni sooloka, masi oturukiwa wa ikaruma sooloka wira siheliwe ikaruma sootepexa oloka

7 Eprofesia ya Yesaya enihimya oranttelihiwa wa ekaruma emosa ni ekhwaaya. Moone wira oranttelihiwa iwo khahiyo, oturukiwa wa ikaruma soohiloka ni sooloka, masi oturukiwa wa ikaruma sooloka wira siheliwe ikaruma sootepexa oloka. Orantteliha ekobri ni eweero tthiri oreeriha wuulupale, nto wa khula ekaruma eniranttelihiwa ti yooloka ovikana ele yoopacerya. Tthiri, masu ala anooniherya ele Yehova aahimye awe vahinatthi wira makhalelo a atthu awe yaarowa olokiheriwa vakhaani-vakhaani arowaka ohoolo. Nto oranttelihiwa xeeni onihimmwa ni eprofesia ela? Vaavo vaniromoliwa aya “makhulupale” ni ‘anamavaha muteko’, eyo enooniherya wira Yehova aarowa okumiherya mirukunuxo vakhaani-vakhaani wira atthu awe akhapeleliweke saana ni nikhuuru nootthokiheya.

8. (a) Ti pani okumihenrye mirukunuxo siromoliwe ni eprofesia ya Yesaya? (b) Mireerelo xeeni siniphwanya ahu mwaha wa mirukunuxo iyo? (Nwehe ekaaxa eni “ Moowiiyeviha Aaheemererya Okhaliheriwa”.)

8 Ti pani okumihenrye orowa vahoolo wa nikhuuru nlo? Yehova onihimya so: ‘kinoruha ewero, . . . kinoruha eparatha, . . . ni kinimovahani murettele’. Aayo, mirukunuxo sa nikhuuru nootthokiheya sinikumiheriwa ni ikuru sa mwaneene Yehova, ohiya ni apinaatamu. Nto okhuma vaavale Yesu okhalihiwe awe Mwene, Yehova onnikumiherya mirukunuxo iyo omurumaka Mwanawe. Mureerelo xeeni oniphwanya ahu mwaha wa mirukunuxo iyo? Yoolepa emosaru, ennihimya wira mirukunuxo iyo sinookumiherya “murettele” ni “exariya”. Vaavo vaneemererya ahu malakiheryo a Yehova,  ni olokiherya mweettelo ahu onnikhumelela murettele eriyari ahu, onniiriha omurumeela Yehova yoowo murummwa Paulo onimuhimya awe okhala ‘Muluku a murettele’.​—aFil. 4:9.

9. Etthu xeeni enikhumela anna a mmulokoni yakhala ootthokiheya ni oowiiraana, nto mwaha wa xeeni?

9 Omuhimyaka Yehova murummwa Paulo oni: ‘Muluku ti Muluku a murettele, khahiyó [onyakulihana]’. (1 aKor. 14:33) Masu a Paulo khaniruma ohiya onyakulihana paahi, masi anitumererya okhala atthu a murettele. Mwaha wa xeeni? Muthokorerye ela: Khahiyo wira khula okathi, ohinyakulihana ti etthu enikumiherya murettele. Mwa ntakiheryo, egrupu emosa ya atoropa, enoowerya weetta vootthokiheya wala voohinyakulihana erowaka ohoolo, masi nipuro ninrowa aya enoowerya okumiherya ekhotto, ohiya murettele. Vano hiyo nikhanle maKristau nihaana wuupuwelaka ela: Khula nikhuuru nootthokiheya waahikhale murettele, hata vapisaka, nikhuuru nlo nnomala-mala. Moovirikana ni eyo, murettele onikhuma wa Muluku onnikumiherya wiiwanana ohinimala. Ti maana aya vanitteeliwa ahu murima, osuwela wira nikhuuru nahu ninneettihiwa ni oreerihiwa ni “Muluku yowo onvaha murettele”! (aRom. 15:33) Murettele onikhuma wa Muluku, tokhanle mathipelo a otthokiheya ni wiiwanana oniphwanyaneya mmulokoni olumwenku wotheene.​—Esal. 29:11.

10. (a) Mirukunuxo xeeni sipakiwe ni nikhuuru nahu nootthokiheya? (Nwehe ekaaxa eni “Enamuna Elokiheriwe Aya Moota Woweettiha Muloko”.) (b) Makoho xeeni anrowa ahu othokorerya?

10 Ekaaxa eni “ Moota Silokiheriwe Aya Inamuna sa Ohoolela” ennooniherya mireerelo siniphwanya ahu mwaha wa mirukunuxo sipakiwe sa nikhuuru nahu mwa iyaakha sivinre. Nto mirukunuxo xeeni sinilikana ni oturukiwa wa ‘ekobri ni eweero’, Yehova opanke awe omurumaka Mwene ahu mahiku ala? Moota xeeni mirukunuxo iya sa moota wohoolela muloku sinikumiherya aya murettele ni wiiraana mmulokoni olumwenku wotheene? Moota xeeni mirukunuxo iyo sinookhaliheryaayani omurumeela “Muluku a murettele”?

Kristu Onihoolela Sai Muloko?

11. (a) Otokosiwa wa Soolepa wakhumihenrye mirukunuxo xeeni? (b) Exeeni anna a Nikhuuru Noolamulela yaalakenle aya opaka?

11 Okhuma eyaakha ya 1964 mpakha 1971, nikhuuru noolamulela nahireherya muteko womutokosa ni omwiiwexexa Biibiliya, wira anna asuwele moota woweettiherya myaha sinceene ntoko iya: moota saatthokihiwa aya muloko wa eKristau wa eseekulu yoopacerya. * Voohimya sa makhalelo a muloko, anna ale yaahiixutta wira muloko wahooleliwa ni nikhuuru na axitokweene, ohiya mutthu mmosa paahi, yoowo ooniwa okhala mahoolela. (Mmusome aFilipi 1:1; 1 Timotheyo 4:14.) Nuumala mwaha ola wiiwexexiwa saana, nikhuuru noolamulela naahoona wira ole ori Mwene aya, Yesu, aahiwooniherya ephiro wira apake mirukunuxo, voohimya sa ohoolela muloko wa atthu a Muluku; nto anna a nikhuuru noolamulela yaahipaka okhala yoolakela aya wiiwelela malakiheryo a Mwene aya. Moohipisa awo yaahipaka mirukunuxo nave yahiiriha nikhuuru nahu, otthara saana malakiheryo a moota axitokweene yarowa aya ovaraka muteko ntoko sinihimya awe Biibiliya. Nto marukunuxo xeeni yaapakiwe wanipacerya wa iyaakha sa 1970?

12. (a) Marukunuxo xeeni yaapakiwe muhina mwa nikhuuru noolamulela? (b) Muhimye moota Nikhuuru Noolamulela nitthokihiwe aya. (Nwehe ekaaxa eni “ Moota Nikhuuru Noolamulela Ninkhapelela Aya Miteko sa Omwene”, epaaxina 130.)

 12 Murukunuxo woopacerya waahela mpuwa oturuka mukhalelo wa nikhuuru noolamulela. Okathi ole, egrupu ya anna oowoottihiwa 7 ti yaari a nikhuuru naahoolela a Watch Tower Bible and Tract Society of Pennsylvania. Masi, mwaakha wa 1971, nikhuuru noolamulela naahiwuncererya atthu, okhuma 7 khukhala 11 nto khinaarina-tho muteko mmosaru wa madiretor a Sociedade. Vano khivaakhala-tho ovirikana wa miritti wa anna a nikhuuru noolamulela, nto khupacerya oranttelana khuta mwaakha wira khula munna okhaleke presidenti otthariwaka alfabeto a khuta nsina.

13. (a) Marehereryo xeeni yaavareliwa muteko mwa iyaakha 40? (b) Exeeni Nikhuuru Noolamulela naapanke aya mwaakha wa 1972?

13 Murukunuxo waahela mpuwa makhalelo a muloko. Mwa enamuna xeeni? Okhuma mwaakha wa 1932 mpakha 1972, munna mmosa paahi taahoolela muloko okathi ole. Mwaakha wa 1936, anna awo yiireliwa diretor a muteko. Nuuvira okathi nsina nlo nahiturukiwa khukhala murumeyi a ekompanhia, muhoolo mwaya khukhala murumeyi a muloko, nto wookiseryani waya, khukhala muhooleli a muloko. Anna awo oothanliwa annivara muteko aya mwa nthiti mmureerelo wa nikoto notheene. Muhooleli a muloko aanipaka soothanla mekha awe ahaakonhe arumeyi akina a muloko owo. Masi, mwaakha wa 1972, Nikhuuru Noolamulela, naahilokiherya ephiro yaarowa okumiherya murukunuxo muulupale. Nto murukunuxo xeeni waapakiwe?

14. (a) Marehereryo xeeni yaapacenrye ovara muteko nihiku na 1 a Outubro 1972? (b) Moota xeeni mutokweene onuraanyiha nikhuuru na axitokweene onivarihela awe muteko miruku siniphwanyaneya va aFilipi 2:3?

 14 Ohiya okhalana munna mmosa paahi ahoolela khula muloko, anna akina oophwanelela moovarihana ni Biibiliya, yaahaana othanliwa wira akhale axitokweene a eKristau. Otheene aya yaahaana wiirela mpantta nikhuuru na axitokweene aniweherya muloko owo. Marehereryo a axitokweene yaapacenrye nihiku na 1 a Outubro 1972. Olelo-va mutokweene onuuraanyiha nikhuuru na axitokweene khoniixoona okhala muulupalexa waavikana akhwaawe, masi ohaana okhala ntoko “mwamukhani” ohoolo wa akhwaawe. (Luk. 9:48) Tthiri anna awo owiiyeviha ahooneya okhala mareeliho maalupale wa anna olumwenku wotheene!​—aFil. 2:3.

Nto vannooneya wira mwa miruku, Mwene ahu aahipaka marehereryo wira atthareli awe akhapeleliwe saana

15. (a) Marehereryo oowi muloko okhalaneke nikhuuru na axitokweene akumihenrye mireerelo xeeni? (b) Exeeni enooniherya wira Mwene ahu onnipaka itthu mwa miruku?

15 Marehereryo oowi axitokweene a nikhuuru na muloko ahaana okawana miteko, ahooneya okhala marukunuxo maalupale. Nrowe nithokorerye mireerelo miraru. Woopacerya ni wootepexa otthuneya tuula: marehereryo awo annaakhaliherya axitokweene voohicikha etthu sa miritti sirina aya, woona wira Yesu tokhanle Muru wa muloko. (aÉf. 5:23) Wa nenli onivarihana ni Miruku 11:14 yoowo oni: “Yattá anvaha miruku sorera, onokhala oreriwa”. Okathi axitokweene onithukumana aya anathokorerya mwaha wa okhala saana wa muloko, annitokosa moonelo wa khula mutthu ni amurumeelaka Biibiliya, annipaka soothanla sooloka. (Mir. 27:17) Yehova onnireeliha soothanla iyo, nto awo anakhumela saana. Wa neeraru, mwaha wookhalana anna anceene oophwanelela  orumeela ntoko axitokweene, nikhuuru nootthokiheya noowerya othokorerya saana wuncerereya wa otthuneya anna aniwerya okhapelela ni okukhula mmulokoni. (Yes. 60:3-5) Nkahaya muupuwelele ela, olumwenku wotheene nummuru na miloko sihincerereya okhuma 27.000 mwaakha wa 1971, khuphiya 113.000 mwaakha wa 2013! Nto vannooneya wira mwa miruku, Mwene ahu aahipaka marehereryo wira atthareli awe akhapeleliwe saana mwa okathi woreerela.​—Mik. 5:5.

Ovaha Ntakiheryo Nooloka wa Nikoto

16. (a) Miritti xeeni sirina aya axitokweene? (b) Alipa-oomusoma Biibiliya, yoonela sai miruku sa Yesu voohimya sa ‘okukhula ipwittipwitthi’?

16 Okhuma okathi yoole wa Alipa Oomusoma Biibiliya, ale yaari amahooleli yaanisuwela wira muteko aya waari waakhaliherya annaya ovikaniha omurumeela Muluku. (Mmusome aGalasia 6:10.) Eyaakha ya 1908, erevista Watch Tower yaahithokorerya saana yooruma ya Yesu eni: “Mwalyiheke amwapwittipwitthi aka”. (Yoh. 21:15-17) Mwaha ole waahaaleela axitokweene wira: “Ola mwaha muulupale, tivonto muteko wa Pwiya wa okhapelela ipwittipwitthi ohaana okhala vamurimani vahu ni nihaana osiveliwa eparakha eyo yuulupale ya waalyiha atthareli a Pwiya”. Mwaakha wa 1925, erevista The Watch Tower yaahittittimiherya otthuneya waya orumeela ntoko amakampusi vaavo vawuupuxenrye aya axitokweene eriki: “Muluku tori mwaneene ekerexa . . . nave owo onimwaakhaliherya atthu otheene arina muritti wowaakhapelela annaya”.

17. Moota xeeni axitokweene yakhaliheriwa aya okhala amakampusi ooloka?

17 Moota xeeni otthokeya wa Yehova waakhalihenrye aya axitokweene olokiherya inamuna saya sa okukhula akhalaka ntoko aranttelinhe ‘eyuuma ni eparatha’? Mwaha wa wiixuttihiwa waya. Mwaakha wa 1959, yaahipakiwa Exikola ya Orummwa wa Omwene yoopacerya. Mpantta mmosa wa exikola eyo waahithokorerya mwaha oni, ‘omukhaliherya khula mutthu’. Anna yaarina muritti mmulokoni yaahitumereriwa “ompaka palano a waaxukurya anamalaleerya mmaitthokoni mwaya”. Mwaha ole waahithokorerya  inamuna sinceene sa moota axitokweene ale yaarowa aya wiiriha mikwaha iyo sooxukurya okhala soolipiha. Mwaakha wa 1966, yaahitthikeliwa opakiwa Exikola ya Orummwa wa Omwene. Eyo yaahitthokiherya mwaha waari ni muru oni ‘otthuneya waya muteko wookukhula’. Nto exeeni yaari eponto yuulupale ya exikola ele? Yaahimya so: “Ale yaari axitokweene yahaana ovara muteko wa okhapelela nikoto na Muluku, okathi omosaru yaakhapelelaka atthu a vatthokoni vaya ni orowa muteko wolaleerya”. Nto mahiku ala sinnipakiwa ixikola sinceene sa axitokweene. Vano wiixuttihiwa onikumiheriwa ni nikhuuru na Yehova oniphwanyiha mireerelo xeeni? Olelo-va mmulokoni wa eKristau aakhala anna oophwanelela ikonto sinceene yaawo anirumeela ntoko amakampusi oomunepani.

Exikola ya Orummwa wa Omwene. oFilipina, 1966

18. (a) Miritti xeeni soohikhweya avahiwe aya axitokweene? (b) Xeeni Yehova ni Yesu vanaaphenta aya axitokweene anivara muteko mooluttuweliwa?

18 Nto axitokweene othene a mmulokoni apwehiwe ni Yehova, orweela wa Mwene ahu, Yesu, wira avareke miteko iyo soohikhweya. Masu awo anitaphulelani? Anitaphulela wira awosa anrowa oweettihaka atthu a Muluku okathi woovila ohitonko wiiraneya. (aÉf. 4:11, 12; 2 Tim. 3:1) Yehova ni Yesu anniphenta vanceene muteko woovila onivariwa ni axitokweene, maana anna ala anniiwelela yooruma ya Biibiliya eni: ‘Mulyiheke orattene ipwittipwitthi sinnyereriwanyu ni Muluku . . . n’utthuna wanyu wothene . . . , vohikhala ntoko munokhanyereriwa. . . , mwetteke vophwanela wira yotthareni’. (1 Ped. 5:2, 3) Vano nrowe nithokorerye inamuna piili sa moota amakampusi a eKristau anivaha aya ntakiheryo wa nikoto ni moota anikhaliherya aya wira okhale murettele ni ohakalala mmulokoni.

Enamuna Axitokweene Anikukhula aya Nikoto na Muluku Olelo

19. Nniwoonela sai axitokweene anirowana ahu muteko woolaleerya?

19 Yoopacerya, axitokweene annivara muteko ni khula mutthu a mmulokoni. Mulipa oolepa Evangelyo, Luka, onilavula wira: ‘Yesu  anivira ilapo ni mittetthe sothene, alaleyaka ehapari yorera y’omwene wa Muluku. Ni yanimutthara awixutti awe mulokó nanli’. (Luk. 8:1) Ntoko sisaale Yesu aalaleerya awe ni awiixutti awe, nave axitokweene ooloka annilaleerya vamosa ni annaya a mmulokoni. Awo annisuwela wira opaka eyo, onnikumiherya makhalelo ooloka a muloko. Nto anna a mmulokoni awooneleke sai axitokweene awo? Janeni, murokora orina iyaakha sinivikana 80, onihimya so: “Orowa olaleerya ni axitokweene, onnikivaha okathi wooreerela wa ovaanelana ni waasuwela saana anna awo”. Steven munna orina iyaakha 30, onihimya so: “Okathi onilaleerya aka ni mutokweene, empa ti empa, kinnoona wira owo onniphavela okikhaliherya. Nto weemya okhaliheriwa onnikiphwanyiha ohakalala”.

Siisaale makampusi ole aalakenle awe orowa ophavela epwittipwitthi emurimenle, axitokweene annirowa waaphavelasa ni waakhaliherya ale arimenle mmulokoni

20, 21. Moota xeeni axitokweene animutakiha aya makampusi oromoliwe mu nlikanyiho na Yesu? Nvahe ntakiheryo. (Nwehe ekaaxa eni “ Oxukurya wa Khula Esumana Onnikumiherya Mireerelo”.)

20 Yanenli, nikhuuru notthokiheya na Yehova, nowiixuttiha axitokweene enamuna yowakhapelela ale ahiyale wataana ni muloko. (aHéb. 12:12) Xeeni axitokweene vanitthuneya aya waakhaliherya ale ari ootteettheya omunepani, ni anrowa opaka sai eyo? Nlikanyiho na Yesu voohimya sa makampusi ni epwittipwitthi yoorimeela ninnaakhula nikoho nla. (Mmusome Luka 15:4-7.) Okathi makampusi ole onoona awe wira yoomurimeela epwittipwitthi emosa, owo onniphavelasa epwittipwitthi ele yoorimeela okhalaka ntoko orina emosa yeele paahi. Vano axitokweene a eKristau atthareke sai ntakiheryo na makampusi ole? Siisaale epwittipwitthi yoorimeela erya aya yootthuneya wa makampusi ole, siiso-tho, ale akhumme mmulokoni annivikaniha okhala ootthuneya vamaithoni va axitokweene. Awo anniwoona ale atteettheyale omunepani ntoko ipwittipwitthi soorimeela, khanoona okhala etthu ehinifai. Siisaale makampusi aalakenle awe ‘arowa ophavela ele emurimenle, mpakha ophwanya’, axitokweene annirowa waaphavelasa ni waakhaliherya ale arimenle.

21 Exeeni enipaka awe makampusi ole okathi oniphwanya awe epwittipwitthi yaarimenle? Mooreerela murima onnittukhula ‘khukapatta epwittipwitth’iyo mmakhatani’ khuyattikiherya munikotoni. Axitokweene nave, vaavo vanihimya aya masu ooreerela annattukhula momunepani ale ari ootteettheya anaattikiherya mmulokoni. Etthu ntoko ela yaahimwiiraneela munna mmosa oniireliwa Victor onikhala wAfrika yoowo aahiiye wataana ni muloko. Owo onihimya so: “Kaahiviriha iyaakha 8, kihivaraka miteko sa Muluku, axitokweene yaahimananiha okikhaliherya”. Nto exeeni yanvanre murima? Onihimya so: “Nihiku nimosa John, mutokweene kaarowanne aka Exikola ya Muteko wa Opioneero, aahikixukurya ni okooniherya ifootu saakuminha ahu okathi wa exikola. Ifootu iye, saahikuupuxerya itthu sinceene soohakalaliha mpakha opacerya okinkhela ohakalala waaphwannye aka okathi waamurumeelaka Yehova”. Okathi vakhaani, nuumala oxukuriwa ni John, Victor aahitthikela mmulokoni. Olelo-va onnirumeela-tho ntoko pioneero. Tthiri okhapeleliwa wahu saana ni axitokweene, onniniphwanyiha ohakalala.​—2 aKor. 1:24. *

 Ohooleliwa Saana Onnilipiha Wiiraana wa Atthu a Muluku

22. Moota xeeni exariya ni murettele sinilipiha aya wiraana wa muloko wa eKristau? (Nwehe-tho ekaaxa eni “ Eyo Yaahinivara Murima”.)

22 Ntoko soonale ahu wanipacerya, Yehova aahihimya vahinatthi wira atthu awe yaamukhalana exariya ni murettele. (Yes. 60:17) Mikhalelo iya sinnilipiha wiiraana wa miloko sa eKristau. Mwa enamuna xeeni? Voohimya sa exariya, Yehova “ti Muluku ahu”. (Otum. 6:4) Malamulo awe a xariya khanivirikana eriyari ya muloko wa elapo emosa ni muloko wa elapo ekina. Malamulo awe voohimya sa ele eri yooloka ni yoohiloka ari mamosaru, ni anoolikana ‘miloko sothene’. (1 aKor. 14:33) Miloko sinookhala saana, akhala wira sinneettela malamulo a Muluku. Voohimya sa murettele, Mwene ahu, oniphavela wira murettele ahu, ohimaleleke mmulokoni paahi, masi wira nikhaleke-tho atthu “anetetela wiwanana ni murettele”. (Math. 5:9) Tivonto hiyo ‘niphaveleke itthu siniphwanyiha murettele’. Hiyo nihaana okhala atthu anipacerya ophavelasa omala-maliha milattu sinikhumela eriyari ahu. (aRom. 14:19) Mwa enamuna eyo, hiyo ninrowa okhaliherya okhumelela murettele ni wataana mmulokoni mwahu.​—Yes. 60:18.

23. Makhalelo xeeni ooloka arina aya arumeyi a Yehova olelo-va?

23 Okhuma Novembro a 1895, okathi erevista Watch Tower yaalavunle aya ekwaha yoopacerya sa marehereryo a muteko wa axitokweene, anna yaarina miritti sa ohoolela yahooniherya ophavela waya okhaliherya. Mwa enamuna xeeni? Awo yaanikhaliherya ni opaka mavekelo manceene wira marehereryo ala masya a nikhuuru na Muluku awerye tthiri waakhaliherya atthu a Muluku wira akhale oolipiherya wataana ni ‘wamini waya’. Vaavo vaniweha ahu ottuli, iyaakha miloko sinceene sivinre, ninnitteeliwa murima woona wira mirukunuxo sipakiwe ni Yehova orweela mwa Mwene ahu Yesu, voohimya sa ale anihoolela muloko, tthiri soolipiha wataana wahu ntoko arumeyi a Muluku. (Esal. 99:4) Olelo-va, atthu a Yehova olumwenku wotheene annihakalala okhala wira aneettela “munepa mmosaru”, otthara “ephiro emosaru” amurumeelaka “Muluku a murettele” ni “murima mmosaru”.​—2 aKor. 12:18; Mmusome Sofoniya 3:9.

^ etti. 11 Itthu saaphwanyiwa okathi waatokosiwa aya myaha iye saanikumiheriwa eliivuru: Ajuda ao Entendimento da Bíblia.

^ etti. 21 Nwehe muru oni “Axitokweene MaKristau​—‘Annivara Muteko ni Hiyo Wira Nihakalaleke”, ori erevista Owehaweha 15 a Janero 2013.