Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Omwene wa Muluku Onnilamulela!

Epaphelo ya Nikhuuru Noolamulela

Epaphelo ya Nikhuuru Noolamulela

Oophentiwa Nyuwo Anamalaleerya a Omwene:

NKAHAYA MUUPUWELELE muryeene mutthu a emusi ya oBetheli oBrooklyn, Namathanu vasiisu, 2 a Outubro 1914. Nyuwo mukilaathale opuro onimakela anyu okilaathi okathi wa yoolya ya vasiisu, mmulipelelaka munna C. T. Russell. Voohipisa, mukhora wa erefeitoorio onnihuleya, nto munna Russell onniphiya. Owo onneemela okathi vakhaani ntoko sinimakela awe, nto ohakalanle ene onnilavula ni wa emusi ya oBetheli oriki: “Makhomaso, wa nyuwo otheene”. Masi, ohiya waakuvela okilaathi nipuro ninkilathi ole onihoolela mesa, owo onnimana makuphi nto khiyahimya so: “Okathi wa Amalapo woomala; mahiku a mamwene aya aamala!” Vano nyuwo khamunwerya ohooniherya ohakalala wanyu, maana okhuma khalai mwanilipelela okathi ola wa vameekhaaya! Nto vamosa ni emusi ya oBetheli, nyuwo munnimana makuphi moohakalala mwaha wa ele ehimmwale.

 Vano iyaakha sinceene soovira nuumala munna Russell olavula masu ale oohakalaliha. Nto etthu xeeni Omwene wa Muluku opanke aya okhuma okathi yoole? Itthu sinceene! Orweela mwa mareheryo a Omwene, Yehova onnaareeriha ni owiixuttiha atthu awe moohihiyererya; nave okhuma 1914, arumeyi a Muluku yaari ikonto vakhaani, masi olelo-va etthu yowiiraka imilyau 7 ni nimeya. Niireke nyuwo moottottela mureerelo wiixuttihiwa wa enamuna eyo?

Olelo-va nimmakela owiiwa annihu ariki: “Ekaaro ya wiirimu ya Yehova enneetta!”, nto eyo ekeekhai. Masi, okhuma mwaakha wa 1914, ekaaro ya wiirimu yeeyo enithoonyerya epantte ya vathi ya Nikhuuru nootthokiheya na Yehova, enneetta vootepexa waakuveya, ntoko sinrowa anyu woona akhala wira munoosoma saana eliivuru ela. Anamalaleerya a Omwene anniphavela wira ihapari sooreera silaleiwe olumwenku wotheene. Tivonto, awo annirumeela itthu soovirikana ni soorowa vahoolo ntoko ijornaale, weetta mphironi aryeene atthu anceene, orumeela ilatarato, olaleerya sirumeeliwaka ikartaxi, ifonoografu, raadio, ni Interneti.

Yehova onnireeliha muteko ola; tivonto vano ninnipaka iliivuru sahu sooreera sinimutthokiherya Biibiliya mmattaava anivikana 670; nave ninnivaha iliivuru iyo nihivekelaka musurukhu. Anna ni arokora oowiivahererya annikhaliherya otekiwa wa Ipa sa Omwene, Ipa sa Asembeleya, ni ifiliyaali, ilapo sa atthu oothaaciri ni ilapo sa atthu oohaawa. Nave okathi onikhumela aya ehasara, anna ni arokora oophenta annaakuveya wira yaakhaliherye ale aphwanyiwe ni ihasara iyo. Tthiri anna awo annooniherya okhala ‘munna a okathi w’oxanka’.​—Mir. 17: 17.

Okathi mukina, ahooleli a itiini ni anamalupattha ‘annihonona exariya’ khiyanivaha mulattu. Masi waamini wahu onnilipa mwaha woosuwela wira ikwaha sinceene, wiimananiha waya woohiloka onnikhweiherya ‘olaleiwa wa ihapari sooreera’.​—Esal. 94:​20; aFil. 1:⁠12.

Tthiri wataana ni nyuwo ntoko anamuteko akhwiihu eri eparakha yuulupale wa hiyo. Xontte, musuwele wira hiyo ninnoophentani vanceene. Nto ninvekela wira eliivuru ela yookhaliheryeni otepa ovaha efaita vanceene yoohiyeriwa anyu yomunepani.​—Math. 24:45.

Mwaakhele makhomaso ahu a niphento, hiyo ti

Anninyu,

Nikhuuru Noolamulela na Anamoona a Yehova