Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Muhokolowele wa Yehova

Epaphelo ya Nikhuuru Noolamulela

Epaphelo ya Nikhuuru Noolamulela

Anna oophentiwa:

Ntoko sinisuwela anyu, Biibiliya ti eliivuru enaalavula atthu anceene. Anceene a yaawo, yaari alopwana ni athiyana yaarina mixankiho ntoko sawihu. Awo ‘yari atthu ntoko hiyo’. (Yakobo 5:17) Akina yaahixanka mwaha wa mixankiho saya. Akina-tho, yaanikumiheriwa mixankiho ni amusi aya, wala annaya a eKristau. Nave-tho anceene, yaaniivaha nthowa mwaha wa soovonya saya.

Niireke atthu awo yaahihiya omphenta Yehova voomalela? Nnaari. Anamunceene a yaawo, yaalikana ni nasalimo mmosa aavekenle oriki: “Kòthwelela ntoko epwittipwitthi yorimela. [Mumphavele] murumeyi anyu, [mana nkiliyanle] malamulo anyu”. (Esalimo 119:176, Biblya Exirima) Niireke nyuwo munoonela siiso?

Yehova khonaaliyala arumeyi awe akhumme munikotoni. Masi, onniwaattamela; ikwaha sinceene onnaarumeela annaya a eKristau. Mwa ntakiheryo, muupuwele moota Yehova aamukhalihenrye awe murumeyi awe Yobi, yoowo samphwannye mixankiho sinceene, ohela muhina opweteiwa muhakhu awe, okhweliwa, ni owereiwa vanceene. Yobi aahivilela-tho oruwaniwa ni atthu yaale yaareerela omukhaliheryaka. Masi owo khonamunyanyale Yehova, vanaamwi ikwaha sikina uupuwela wira Yehova taakumiherya mixankiho sawe. (Yobi 1:22; 2:10) Yehova aamukhalihenrye sai Yobi wira otthikele olipiha waamini wawe?

Yehova aahimurumeela Elihu, yoowo aari murumeyi a Muluku oororomeleya. Okathi Yobi aamuleela awe mixankiho sawe, Elihu aahinwiriyana oratteene nuumala-vo onapacerya olavula. Exeeni Elihu aahimyale awe? Niireke aahimpwapwela Yobi, wala omuupuxerya soovonya sawe aahiiso omuulihiha muru? Niireke Elihu aixoona okhala a faita onvikana Yobi? Nnaari! Okhaliheriwaka ni munepa wootteela, Elihu aahimmye so: “Miyo ni nyuwo nnolikana vamaithoni va Muluku; owanli ahu nikumihiwe mmattopheni”. Moottharelana, aahimulipiha Yobi ariki: Tivó vahinweryanyu okòva, nnákhala wojeihiwa ni molumo aka”. (Yobi 33:6, 7) Ohiya omutepiha woona owereya, Elihu moophenta aahimulipiha Yobi ni onvaha miruku saareerela.

Xontte musuwele wira ntoko Elihu, hiyo noolokiherya ebroxura ela wira yoolipiheni. Wanipacerya, nihaawiriyana ale ahiyale olaleerya, nave noothokorerya makhalelo aya. (Miruku 18:13) Moottharelana, nooweha Soolempwa, ninvekelaka Yehova wira onikhaliherye otokosa matakiheryo a atthu a khalai yaakhaliheriwe ni yena okathi yaarina aya mixankiho ntoko hiyo. Wookiseryani, nootakaaha sowiiraneya iyo siri mBiibiliyani ni sowiiraneya sa mahiku ala, nto khukumiherya ebroxura ela. Ninnoolattulani wira mutokose saana ebroxura ela. Xontte musuwele wira ninnoophentani vanceene.

Nikhuuru Noolamulela na Anamoona a Yehova