Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Muhokolowele wa Yehova

 MPANTTA 4

Wiivaha Nthowa: “Ttipihani Itampi Saka Sothene”

Wiivaha Nthowa: “Ttipihani Itampi Saka Sothene”

Martha onihimya so: “Muteko aka musya woolokiherya makhalelo a emusi ahu, masi-tho waahikiiriha opaka itthu sinceene soohiloka. Kaahipacerya wiirela mpantta iferiyado sa epagau, kaaniirela mpantta myaha sa epoliitika, ni kaahipacerya weetta okerexa. Miyo ka Namoona a Yehova; masi kaahihiya olaleerya mwa iyaakha 40. Vaavo vaavira aya okathi munceene, kaamutepa wuupuwela wira khivaaweryaneya oleveleliwa ni Yehova. Nto kaamakela wiivaha nthowa. Miyo kaanisuwela ekeekhai, masi kaahilakela otthara ephiro yoohiloka”.

WIIVAHA NTHOWA pooti okhala ntoko muritti woolemelexa. Mwene Davidi olempe so: “Sottheka saka sokisamiha, ntoko màsi òwixa, sokilemela ntoko muritti ohinweryaka otexa”. (Esalimo 38:5) MaKristau makina, annitepa oriipiwa murima yuupuwelaka wira khivaniweryaneya Yehova waalevelela. (2 aKorinto 2:7) Nto niireke atthu awo annuupuwela saana? Hata mpanke ene yoottheka yuulupale, niireke khivaniweryaneya Yehova woolevelelani? Nnaari, khahiyo ti siiso!

“Haya, Rwakani, Nivaneleke”

Yehova khonimunyanyala namattheka onttharuwa. Tthiri Yehova onnaaphavelasa atthu awo. Nlikanyiho na Yesu na mwaana aakhumme vatthokoni, Yesu aahimulikanyiha Yehova ni tiithi oophenta, yoowo mwanawe mmosa mwaamulopwana aakhumme vatthokoni va tiithi ole nto khiyatthara mweettelo woohiloka. Nuuvira okathi mwaana ole aahiphavela otthikela owaani. “Atithi awe awo yahimona ari ottaiwene nlelo; yahimmorela ikharari, yahimutthimakela, khumukhuparela, envahaka ibejo”. (Luka 15:11-20) Niireke munniphavela omuhokolowela Yehova masi khiyoona wira ‘muri ottaiwene’ wa yena? Ntoko tiithi a nlikanyiho na Yesu, Yehova onniwoonelani othunku. Owo onoosiveliwa woowehani mmuhokolowelaka.

Ankhi muupuwelaka wira soottheka sanyu ti sootepa wunnuwa ni sowaatta, ni khivaniweryaneya Yehova woolevelelani? Xontte muthokorerye nlattulo na Yehova nri va Yesaya 1:18: “Haya, rwakani, nivaneleke, anihimya t’Apwiya. Sottheka sanyu sinakhalaru soxerya ntoko ephome, miyo kinotteliha mpakha olikana ni nxotte.” Tthiri, hata nuupuwelaka wira soottheka sahu khasinttipiheya, ntoko ekuwo yootteela exuweiwale mphomeni, masi Yehova onoowerya ottipiha.

Yehova khoniphavela wira nivikaniheke ohaawa mwaha wa wiivaha nthowa. Vaniweryaneya sai mutthu oleveleliwa itampi sawe ni Muluku, ni okhalana yowuupuxerya ya murima yooloka? Muthokorerye itthu piili Mwene Davidi aapanke awe. Yoopacerya, owo aahimmye so: “Kinimwahimerya Apwiya sotakhala saka”. (Esalimo 32:5) Muupuweleke wira Yehova onnoolattulani omwaattamela munvekelaka ni ‘ovanela’ ni yena. Nto mwaakhulele nlattulo nla. Mmuhimeerye Yehova soottheka sanyu. Mwaha wa ele yaamwiiranenle, Davidi anwerya ohimya so: “Ttipihani itampi saka sothene. . . . Muhinyoholé murima wophweya ni wowiyeviha.”Esalimo 51:4, 19.

Ya nenli, Davidi aahikhaliheriwa ni murumeyi mmosa aathanliwe ni Muluku, profeta Natani. (2 Samuweli 12:13) Olelo-va, Yehova ohaakumiherya axitokweene a mmulokoni yaawo axuttihiwe moota wowaakhaliherya anamattheka  attharunwe wira alokiherye wataana waya ni Yehova. Mwalavula ni axitokweene, anoomurumeela Biibiliya ni animoovekelelani wira mukhale saana, anoovukula wala omaliha miyuupuwelelo sanyu soohiloka, ni animookhaliheryani openuwa momunepani.Yakobo 5:14-16.

Yehova oniphavela wira mukhalane yowuupuxerya ya murima yooloka

“Òreriwa T’ale Aleveleliwe Itampi Saya”

Ekeekhai wira nyuwo pooti woona okhala vootepexa ovila omuleela Yehova Muluku soottheka sanyu, ni olavula ni axitokweene. Moohaaniherya, Davidi oonela siiso. Owo ‘ahikhuwa’ soottheka sawe mwa okathi vakhaani. (Esalimo 32:3) Masi, nuuvira okathi, owo aahiphwanya mireerelo mwaha wa ohimya itampi sawe ni olokiherya mweettelo awe.

Etthu emosa yootepa oreera aaphwannye awe, waari otthikela ohakalala. Owo olempe so: “Òreriwa t’ale aleveleliwe itampi saya, òreriwa t’ale sottheka saya sittipihiwe”. (Esalimo 32:1) Nave-tho aahivekela oriki: “Apwiya! Muhelé mwano mwaka molumo òvuwa, wira kilaleye orera wanyu murima”. (Esalimo 51:17) Nuumala okhaliheriwa olokiherya murima awe ni oleveleliwa ni Muluku, Davidi aahilakela waaleela atthu akina voohimya sa Yehova.

Yehova oniphavela wira mukhalane yowuupuxerya ya murima yooloka. Ni oniphavela wira mwaleeleke atthu akina voohimya sa soolakela sawe, muhiivahaka nthowa, masi moohakalala. (Esalimo 65:1-4) Muupuweleke wira owo onnoolattulani wira “sittipihiwe itampi sanyu. Siso Apwiya [Yehova] animovahani mahiku a murettele”.Miteko 3:19, 20.

Eyo ti etthu yiiraneyale ni Martha. Owo onihimya so: “Mwanaka aamakela okivaha irevista Owehaweha ni Despertai! Nto kaahipacerya vakhaani-vakhaani omuhokolowela Yehova. Etthu yootepa ovila waari oveka musammaha mwaha wa itampi sotheene kaapanke aka. Masi kaahinvekela Yehova wira okilevelele. Vannikirikela otthokelela wira sahaana ovira iyaakha 40 wira kitthikele wa Yehova. Miyo ka ntakiheryo nnooniherya wira hata sivinre ene iyaakha sinceene, mutthu pooti ovahiwa eparakha ya omuhokolowela Yehova ni otthikela ophentiwa nuuwo”.