Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Muhokolowele wa Yehova

 MPANTTA 1

“Miyo Kinophavela Ipwittipwitthi Sirimenle”

“Miyo Kinophavela Ipwittipwitthi Sirimenle”

Epwittipwitthi erooxanka. Okathi yaalya aya malaxi ooripelela, yaahivalaana ni ipwittipwitthi sikina ehisuwelaka. Vano, kheniwerya oweha ipwittipwitthi sikina hata onweha makampusi aya. Vaapacerya oriipa. Epwittipwitthi eyo eri mmaxakhani, maana opuro oryaaya sookhala-tho inama sinceene sowoopiha. Nuuvira okathi munceene, vano enniiwa nsu nilimalenle aya, eyo piiyo, nsu na makampusi aya, yoowo onrwa otthimakaka, khiyakuxa epwittipwitthi ele, khiyahela vaniveruni na nlaya nawe orowanaka owaani.

IKWAHA SINCEENE, Yehova onniilikanyiha ni makampusi ntoko ola. Owo onninlipiherya orweela mwa Nuulumo nawe oriki: “Miyo mmansaka kinrowa okuxa ipwittipwitthi saka, kisukeke”.Ezekiyeli 34:11, 12.

“Ipwittipwitthi Sinlyihaka”

Ti pani ari ipwittipwitthi sa Yehova? Mmasu ookhweya, ipwittipwitthi sa Yehova atthu yaale animphenta ni omukokhorela yena. Biibiliya oni: “Murwé, nakokhorele Apwiya vowalapela: nakokhorele Apwiya anipattunxe. Tthiri awo ti Muluku ahu, hiyo ná nloko naya: awo t’akhanle makampusi ahu: hiyo ná ipwittipwitthi saya”. (Esalimo 95:6, 7) Ntoko ipwiettipwitthi enimutthara aya makampusi, anamakokhorela a Yehova anniphavela vanceene omutthara Makampusi aya. Niireke awo toomalela? Nnaari. Ikwaha sikina arumeyi a Muluku annikhala ntoko ‘ipwittipwitthi somwareya’, ni “ipwittipwitthi sirimenle”. (Ezekiyeli 34:12; Matheyo 15:24; 1 Pedru  2:25) Hata vari siiso, okathi mutthu onirimeela awe, Yehova khonimunyanyala ntoko mutthu ohirina yoolipelela.

Niireke nlelo munnoona wira Yehova Makampusi anyu? Yehova onooniherya sai wira Makampusi olelo-va? Nithokorerye inamuna tthaaru:

Owo onninlyiha momunepani. Yehova onihimya so: “Kinorowana mapuro òwatta munyepu, . . . memmo, sinowerya omumula mmasisini mwaya n’ulya munyepu worera, sihòvaka etthu”. (Ezekiyeli 34:14) Yehova onninivaha yoolya yomunepani yinceene, mwa okathi wooreerela. Niireke munnuupuwela mwaha waakhumme muliivuruni, wala waalavuliwe, hata eviidiyu yaakhunle nivekelo nanyu? Niireke eyo khiyaawiirinheni okupali wira Yehova onnoothokoreryani?

Owo onninikhapelela ni onikhaliherya. Yehova onninleiherya oriki: “Kinohokoloxa sihapuwale, kinohela murette sivulanle, kinovaha ikuru sinwereiwa”. (Ezekiyeli 34:16) Yehova onnaalipiha ale atteetthen’ye wala axankale ni mixankiho saya. Onnihela murette ipwittipwitthi sawe wira saakuve ovola akhala wira soovulalihiwa, hata ikwaha sikina avulalihiwaka ni annaya. Nave onnaahokoloxa ale arimenle ni woonasa wene aniixoona ohikhala ni efaita.

Owo onninithokorerya. Yehova onihimya so: “Kinokumiha seiyo mmapuroni mothene mwamwarenlyaya. Miyo kinophavela ipwittipwitthi sirimenle”. (Ezekiyeli 34:12, 16) Yehova khonuupuwela wira epwittipwitthi erimenle kheniweryaneya ophwanyiwa. Owo onnisuwela vaavo epwittipwitthi enirimeela aya, onniphavelasa ni onnihakalala nuumala ophwanya. (Matheyo 18:12-14) Ti maana aya Yehova oniwiitthana awe arumeyi awe okhala “nikoto naka, ipwittipwitthi sinlyihaka”. (Ezekiyeli 34:31) Nyuwo munniirela mpantta ipwittipwitthi iyo.

Yehova khonliyala epwittipwitthi erimenle. Onnihakalala okathi epwittipwitthi eyo eniphwanyiwa aya

“Munivahe-tho Ovuwa Wahu wa Khalai”

Xeeni Yehova onoophavelaweni ni woolattulani wira mmuhokolowele? Mwaha woowi oniphavela wira muhakalaleke. Owo onnileiherya wira onrowa ovaha mareeliho ipwittipwitthi sawe ntoko “epula”. (Ezekiyeli 34:26) Yehova khanootha. Nyuwo mootoko woona mareeliho awe.

Nkahaya muupuwele okathi mwaapacenrye anyu omusuwela Yehova. Mwa ntakiheryo, moonenle sai okathi waapacenrye anyu wiixutta ekeekhai voohimya sa nsina na Muluku ni yoolakela awe wa apinaatamu? Munnuupuwela moota waryaaya woohakalaliha othukumana ni annihu a eKristau okathi wa mithukumano suulupale, ntoko asembeleya ni akongresu? Niireke khimwaatteeliwa murima vanceene, vaavo mwamphwanya anyu mutthu aasiveliwa ihapari sooreera okathi waalaleerya anyu?

Nyuwo munoowerya otthikela-tho ohakalala. Arumeyi a Muluku a khalai yaavekenle so: “Apwiya! Munihokoloxerye wa nyuwo; hiyo nnohokolowa! Munivahe-tho ovuwa wahu wa khalai”. (Wikhupanyerya 5:21) Yehova aahaakhula nivekelo nlo, nto atthu awe yaahitthikela omurumeela moohakalala. (Nehemiya 8:17) Yehova onoowiirelani etthu emosaru.

Masi, omuhokolowela Yehova khivanikhweya. Muthokorerye itthu siniiriha okhala voovila ohokolowa ni moone moota wooxintta.