Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 1 2017

 MWAHA WA VAKAAPANI | NIIREKE MUNNEEMYA YOOVAHA YUULUPALEXA YA MULUKU?

Yoovaha Ehinilikana ni Soovaha Sikina

Yoovaha Ehinilikana ni Soovaha Sikina

OWEHA ekalawa yaamukhaani yaari mmatatani mwa Jordan, khamunoona efaita erina aya. Masi eyo ti etthu yootepexa otthuneya erina awe. Jordan onihimya so: “Aakivanhe ela Russell, mpatthani oowuuluvala a emusi ahu, kiryeene mwaana”. Nuumala okhwa Russell, Jordan aahihimeeriwa wira Russell ahaakhaliherya vanceene atatawe. Jordan onihimya-tho so: “Nuumala osuwela itthu sinceene voohimya sa Russell, yoovaha awe ele yaamukhaani yootepa okhalana efaita ovikana khalai”.

Ntoko enooniherya aya yowiiraneya ya Jordan, yoovaha pooti okhalana efaita vakhaani wala ohivahiwa efaita ni atthu akina. Masi mutthu ole ooxukhuru onivahiwa, pooti woona okhala ya efaita yuulupale, ehiniweryaneya ohimya esisapo aya. Biibiliya onnihimya yoovaha emosa erina efaita yuulupalexa orumeelaka masu ala oosuwelexiwa: “Vekekhai, Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.Yohani 3:16.

Yoovaha eyo enniwerya omphwanyiha ekumi ehinimala ole onivahiwa! Niireke yookhala yoovaha ekina yuulupalexa enivikana eyo? Nnaamwi anamunceene ahoonaka efaita erina aya yoovaha eyo, maKristau a ekeekhai annivaha efaita ‘yuulupale’. (Esalimo 49:9; 1 Pedru 1:18, 19) Nto, xeeni Muluku ohalaka ovaha ekumi ya Mwanawe?

Murummwa Paulo onnitthokiherya eyo ni masu ala: “Mutthu mmosá pahi t’oruhale etampi mulaponi, etamp’iyo yoruha okhwa. Siso okhwa ohaphwanya atthu othene”. (aRoma 5:12) Mutthu oopacerya, Adamu, aahimutthekela Muluku nnaamwi aasuwela wira aapaka etthu yoohiloka, nto owo aahikhwa.  Adamu ohaaphwanyiha okhwa anaawe, eyo piiyo, apinaatamu otheene.

“Ale anvarela muteko etampi anniliviwa n’ukhwa. Vano eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”. (aRoma 6:23) Wira owoopole apinaatamu, Muluku aahimuruma Mwanawe, Yesu Kristu, orwa valaponi wira ovahe ekumi awe yoomalela wira owoopole atthu. Orumeeliwaka mukuttho owo, onisuweliwa okhala ‘yowoopola’ atthu otheene animwaamini Yesu anoophwanya ekumi ehinimala.aRoma 3:24.

Olavulaka sa mareeliho otheene Muluku onaavaha awe arumeyi awe anikhumelela mwa Yesu Kristu, Paulo onihimya so: “Nimuxukhuruku Muluku mwaha wa sovaha sawe sotikiniha”. (2 aKorinto 9:15) Tthiri, yowoopola etthu yootikiniha ehiniwerya ahu otthokiherya moomalela. Mwa soovaha sotheene Muluku aavanhe awe apinaatamu, xeeni yowoopola eryaaya ya vameekhaaya? Mwa enamuna xeeni ehinilikana aya ni soovaha sikina sa Muluku? * Nto ninrowa oxukhurela sai? Hiyo ninnoolattulani wira musome waakhuliwa wa makoho ala orumeeliwaka Biibiliya miru miili sinittharelana.

^ etti. 8 Yesu vootthuna vawe “òleva ekumi awe mwaha wa hiyo”. (1 Yohani 3:16) Okhala wira mukuttho owo oniirela mpantta yoolakela ya Muluku, erevista ela ennitthokiherya muteko wa Muluku ntoko Namavaha a yowoopola eyo.