Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 1 2017

Yesu aahirowa owannyawe Pedru khaaphwanya amaathi awe ewereiwaka nto khwaapenuxa.—Matheyo 8:14; Marko 1:29-31.

Niireke Vannitthuneya Makhulupale a Ekerexa Okhala Ahithenle?

Niireke Vannitthuneya Makhulupale a Ekerexa Okhala Ahithenle?

ITIINI sa olumwenku wotheene, ntoko Ekerexa Katoolika ya oRoma, itiini sikina sa Ortodoxa ni eBudismo, sinnaakhanyererya ahooleli aya wira akhaleke ahithenle wala ohitheliwa. Eyo, enniwiiriha atthu anceene wuupuwela wira enamuna eyo tenikumiherya mweettelo woowuuliha muru wa orupihana woohiloka onaahela muhina ahooleli a itiini sinceene.

Tivonto vanireerela aya okoha tthiri wira: Niireke Biibiliya onnaakhanyererya makhulupale a ekerexa ya eKristau okhala ahithenle? Wira naakhule nikoho nla, vanitthuneya osuwela moota sipacenrye aya yoolema eyo ni moota Muluku onoonela awe.

IPACERERYO SA OKHANYERERIWA MAKHULUPALE A EKEREXA OHITHELA

Encyclopædia Britannica ennitthokiherya yoolema eyo eriki: “Okhala ohithenle wala ohitheliwe, ohirupiha wala orupihiwa, mwaha wa ophavela okhala muhooleli a etiini wala mutthu oowiivahererya”. Mwaakha wa 2006, okathi Paapa Benedito XVI waalavula awe muthukumano oniireliwa Roman Curia, aahihimya wira yooruma enikhoottiha othela wala otheliwa “eniirela mpantta soolema saapacenrye nuumala okhwa Arummwa”.

Masi, maKristau a eseekulu yoopacerya khiyaarina yoolema ya okhoottiha othela wala otheliwa. Tthiri, murummwa Paulo, yoowo aakhala eseekulu yoopacerya, aahaalopola annawe voohimya sa atthu yaarowa olavulaka “ettharaka sowixuttiha sa Satana” ni okhoottiha “othela”.1 Timótheyo 4:1-3.

Eyo yaapacenrye eseekulu ya nenli vaavo yoolema eyo yuulaanale aya ikerexa sa “eKristau” sa ilapo sa Onikela Nsuwa. Moovarihana ni eliivuru eni Celibacy and Religious Traditions (Soolema sa Itiini Voohimya sa Ohithela), eyo yaari “etthu yuulupale vanceenexa okathi yoole wannuwa aya okhoottihiwa othela ni Olamulelo wa oRoma”.

 Nto iseekulu saattharelana, mapuro yaakhala anatiini, ni atthu ale aniireliwa Axipaapa a Ekerexa, yaahipacerya waakhanyererya makhulupale aya ohithela. Awo yuupuwela wira othela etthu yootakhala ni wira khiwaavarihana ni miteko sa mukhulupale a ekerexa. Masi, Encyclopædia Britannica ennihimya wira “muhoolo mwaya, eseekulu 10 mapaatiri ni mabispo anceene yaahikhalana axaaraya”.

Ohithela wa mapaatiri waalipiheriwe okathi wa muthukumano oniireliwa Lateran Councils wa 1123 ni 1139, waapakiwe oRoma, nto okhuma vaavale ela ti yoolema yuulupale ya Ekerexa Katoolika ya oRoma mpakha olelo-va. Eyo yaapakeliwe wira ikerexa sihipweteiweke musurukhu okhala wira mapaatiri yaathela yaamurumeelaka musurukhu owo wira yaakhapelele anaaya.

MOONELO WA MULUKU VOOHIMYA SA OHITHELA MWAHA WA ETIINI

Moonelo wa Muluku voohimya sa okhoottiheriwa othela makhulupale a etiini onniiwanyeihiwa mBiibiliyani. Hiyo nnoowerya osoma masu a Yesu voohimya sa ale anikhala ahithenle, ntoko owo: “Mwaha w’omwene wa wirimu”. (Matheyo 19:12) Ottharaka muupuwelelo mmosaru, murummwa Paulo, aahilavula sa maKristau anithanla otthara ntakiheryo na ohithela mwaha wa “ehapari yorera”.—1 aKorinto 7:37, 38; 9:23.

Hata vari siiso, Yesu wala Paulo khanamukhanyererye mutthu wira okhaleke ohithenle wala ohitheliwe. Yesu aahihimya wira ohithela yaari “yoovaha” yahaaweryaneya waakheleliwa ni atthareli awe otheene. Okathi Paulo aalempe awe aahimyaka atthu ale “ahithenle”, owo aahilavula mooluluwanya oriki: “Nkirina ikano s’Apwiya. Vano, kinovahani miruku saka”.Matheyo 19:11; 1 aKorinto 7:25.

Ohiya-vo, Biibiliya onnooniherya wira arummwa a eKristau a eseekulu yoopacerya, omuhela muhina murummwa Pedru yaari atthu oothela. (Matheyo 8:14; Marko 1:29-31; 1 aKorinto 9:5) Tthiri, mwaha wa orupihana woohiloka waasareyale oRoma okathi ole, Paulo aalempe wira akhala Kristau oothela aahoolela muloko ahaana okhala “mulopwana a muthiyana mmosá pahi” nave “akhalanaka an’awe òrumeya”.1 Timótheyo 3:2, 4.

Atthu ale yaathelana khiyaakhottiheriwa orupihana, okhala wira Biibiliya onnihimya wira “mulopwana aivahererye wa mwar’awe ntoko simphwanelawe” ni wira atthu oothelana ‘ahikhotaneke’. (1 aKorinto 7:3-5) Tthiri, ninnoona wira Muluku khonikhoottiha othela, ni wira khuuvo muhooleli a eKristau onikhanyereriwa okhala ohithenle.

OHITHELA MWAHA WA IHAPARI SOOREERA

Okhala wira ohithela khonikhanyereryaniwa, tivonto Yesu ni Paulo yaalavunle aya vookhalela mwaha ola. Tthiri ohithela onnimphwanyiha iparakha sinceene mutthu, wira aalaleerye ihapari sooreera atthu akina. Atthu oohithela anniwerya wiivahererya wira avare miteko sinceene, okhala wira kharina mixankiho sinaakhumelela atthu oothela.1 aKorinto 7:32-35.

Nkahaya muthokorerye ntakiheryo na Davidi yoowo olakenle ohiya muteko aaliviwa awe musurukhu munceene oMexico, wira othaamele muttetthe wa ota wa oCosta Rica wira awiixuttiheke atthu akina Biibiliya. Niireke Davidi onnoona wira ohithela wawe woomukhaliherya opaka eyo? Owo onihimya wira: “Aayo, nnaamwi vaari vooxankiha olimalela makhalelo makina, masi okhala wira kaari mekhaka vaahikikhweiherya waakuva olimalela”.

Claudia, murokora oohitheliwa yoowo aathaamale orowaka muttetthe woothowa anamalaleerya, onihimya so: “Onnikisivela muteko oninvarelaka Muluku. Waamini waka ni wataana waka ni Muluku woolipa okathi onoona aka moota onikikhapelela awe”.

“Moohicikha etthu sa makhalelo anyu, okhale mutthu ootheliwa wala oohitheliwa, munoowerya okhala oohakalala okathi onimurumeela anyu Yehova Muluku”.Claudia

Ohitheliwa moota owo khahiyo etthu yookhanyereriwa. Claudia onnincererya oriki: “Moohicikha etthu sa makhalelo anyu, okhale mutthu ootheliwa wala oohitheliwa, munoowerya okhala oohakalala okathi onimurumeela anyu Yehova Muluku”.Esalimo 119:1, 2.