Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Setembro 2016

Nyuwo Anamuyari, Mwaakhaliherye Aniinyu Olipiha Waamini Waya

Nyuwo Anamuyari, Mwaakhaliherye Aniinyu Olipiha Waamini Waya

“Aximiravo ni nyuwo aximwali . . . Otheene anyu mwattottopele Apwiya”.ESALIMO 148:12, 13.

ISIPO: 41, 48

1, 2.(a) Niireke vannikhweya anamuyari owiixuttiha anaaya omwaamini Yehova, nto anrowa opaka sai eyo? (b) Iponto xeeni xexe ninrowa ahu othokorerya?

ANAMUYARI amosa oFrança ahimmye so: “Hiyo ninnaamini wira Yehova ookhala, masi eyo khentaphulela wira aniihu anrowa omwaaminiki. Maana khuuvo mutthu oniyariwa aaminiki. Aniihu anrowa waaminiki vakhaani-vakhaani”. Munna a wAustralia olempe wira: “Omukhaliherya mwaana okhalana waamini vamurimani, waaniheryasa muteko woovila vanceene”. Vano khuncererya oriki: “Nyuwo pooti woonaka wira muhaakhula saana nikoho na mwaninyu. Masi owo pooti wookohani-tho nikoho nimosaru nihiku nikina! Maana moota mwaakhunle anyu olelo-va, pooti omwiiriha ophavelaka osuwela itthu sikina muhoolo”. Vaavo anamwane vaninnuwa aya, anamuyari annoona wira ahaana otthikela waatthokiherya mwaha mmosaru ahimyaka itthu sikina sihaalavunle aya wanipacerya. Vano annoona wira ahaana orumeela inamuna sikina wira awiixuttihe anaaya omphenta Yehova.

2 Akhala wira mwa namuyari, niireke munnixanka muupuwelaka  akhala wira munoowerya tthiri owiixuttiha aniinyu omphenta Yehova ni ovikaniha omurumeela vaavo vaninnuwa aya? Mwekeekhai, khuuvo oniwerya opaka eyo mekhawe. (Yeremiya 10:23) Tivonto vanitthuneya omulipana Yehova wira onikhaliherye. Owo ohaavaha anamuyari malakiheryo manceene. Nto munrowa waakhaliherya sai aniinyu? (1) Muhaana waasuwela saana. (2) Nwiixuttihe itthu siri vamurimani vanyu voohimya sa Yehova. (3) Murumeele malikanyiho. (4) Nvekele munepa wootteela ni mwaapixeryeke murima aniinyu.

MWAASUWELE SAANA ANIINYU

3. Anamuyari anrowa otakiha sai enamuna Yesu aawiixuttiha awe anaxikola awe?

3 Yesu aahaakoha awiixutti awe ele yaakupali aya. (Matheyo 16:13-15) Nyuwo pooti omutakiha. Okathi onitthekula anyu ni aniinyu aahiiso ovara etthu hoothe, mwaakoheke ele enuupuwela aya ni mwaatumererye wooleelani moonelo aya. Niireke yookhala etthu enaatikiniha? Munna a wAustralia orina iyaakha 15 ohimmye so: “Ikwaha sinceene tiithi aka onnilavula ni miyo voohimya sa waamini waka ni onnikikhaliherya wuupuwelela. Owo onnikikoha oriki: ‘Biibiliya onihimya exeeni?’ ‘Niireke munnikupali ele enihimya awe?’ ‘Exeeni eniwiirihani okupali?’ Owo oniphavela wira kaakhule ni moolumo aka ohiya orumeela moolumo awe aahiiso a Maama aka. Vaavo vaninnuwaka kihaana osuwela otthokiherya saana myaha sinikohiwa aka”.

4. Xeeni vanitthuneya aya opixa murima ni waakhula makoho a aniinyu? Nvahe ntakiheryo.

4 Akhala wira aniinyu khanaakuva okupali ele Biibiliya eniixuttiha awe, mwaapixerye murima. Mwaakhaliherye ophwanya waakhuliwa wa makoho aya. Tiithi mmosa onihimya wira: “Nvaheke efaita makoho a aniinyu. Muhooneke wira kharina efaita aahiiso opeepheiha ni muhisyakeke moonaka wira makoho oowuuliha muru”. Tthiri, ti vooloka aniinyu wookohani mwaha woowi eyo enitaphulela wira anniphavela osuwela. Nave Yesu aanikoha okathi aaryaawe mmiravo. (Mmusome Luka 2:46.) Mmiravo mmosa a oDinamarca ohimmye so: “Okathi kaaniheryaka aka akhala wira neettela etiini yekeekhai, anamuyari aka yaanikipixerya murima, nnaamwi yaaxankale. Awo yaahaakhula makoho aka otheene amurumeelaka Biibiliya”.

Nvaaneleke voohimya sa Yehova okathi onivara anyu muteko ni aniinyu

5. Hata anamwane akhalaka ntoko annimwaamini Yehova, exeeni anamuyari anireerela aya opaka?

5 Mphaveleke waasuwela saana aniinyu. Muhuupuweleke wira aniinyu annimwaamini Yehova mwaha woowi annirowa olaleerya ni omuthukumanoni. Masi animoonela sai Yehova ni Biibiliya? Mwiimananiheke wira moone akhala wira yookhala etthu enaakhoottiherya ovikaniha omwaamini Yehova. Nvaaneleke ni aniinyu khula nihiku voohimya sa Yehova okathi onivara anyu muteko hoothe. Mwaavekeleke aniinyu, muryeene hoothe ni mwakhala mekhinyu.

NWIIXUTTIHEKE ITTHU SIRI VAMURIMANI VANYU VOOHIMYA SA YEHOVA

6. Vaavo anamuyari vanivikaniha aya omusuwela Yehova ni Biibiliya, eyo enrowa waakhaliherya sai owiixuttiha anaaya?

6 Atthu yaanisiveliwa onwiriyana Yesu  mwaha woowi aanimphenta Yehova ni aanisuwela saana Soolempwa. Nave yanoona wira Yesu aanaaphenta. Tivonto, yaaninwiriyana oratteene. (Luka 24:32; Yohani 7:46) Moolikanasa, vaavo aniinyu anoona aya wira munnimphenta Yehova, eyo enimwaakhaliherya omphenta. (Mmusome Otumererya 6:5-8; Luka 6:45.) Nto nvikaniheke omwiixutta Biibiliya ni osoma iliivuru sahu khula nihiku. Mphaveleke osuwela saana itthu Yehova sipattunxe awe. (Matheyo 6:26, 28) Vaavo vanitepa anyu omusuwela Yehova, munrowa otepaka owiixuttiha aniinyu voohimya sa yena.Luka 6:40.

Mwaaleeleke aniinyu itthu siniixutta anyu voohimya sa Yehova

7, 8. Vaavo vaniixutta anyu etthu voohimya sa Yehova, muhaana opaka exeeni? Anamuyari amosa apanke sai eyo?

7 Vaavo vaniixutta anyu etthu voohimya sa Yehova, mwaaleeleke aniinyu etthu eyo. Mpakeke eyo khula okathi munikhala anyu hoothe, ohiya paahi okathi onilokiherya anyu mithukumano aahiiso okathi wa omulompa Muluku vatthokoni. Eyo ti etthu maama mmosa ni tiithi a wEstados Unidos enipaka aya. Annivaanela ni anaaya voohimya sa Yehova, khula okathi aniweha aya etthu yooreera Yehova opattunxe awe aahiiso okathi anilya aya yoolya yoosiva. Awo anihimya so: “Ninnaakhaliherya aniihu wuupuwela ophenta wa Yehova mwa itthu sipanke awe wa mureerelo ahu”. Anamathelana amosa a wAfrica do Sul, annisiveliwa olavula itthu Yehova opattunxe awe ni anaaya aaxithiyana anli, okathi anivara aya muteko hoothe mujamrdim mwaya. Mwa ntakiheryo, pooti wira annihimya wira annitikiniheya moota enuku enimela aya khukhala mwiri. Anamuyari awo anihimya wira: “Ninneererya waakhaliherya aniihu ottittimiha okumi ni woona moota oryaaya wootikiniha”.

8 Tiithi mmosa a wAustralia aahimukuxa mwanawe aarina iyaakha 10 omuroiha omuseu. Tiithi ole aalakenle orumeela okathi ole wira omukhaliherye mwanawe olipiha waamini wawe ni oweha itthu sinnikupaliha wira Yehova tori Mpattuxa. Owo aahimmye so: “Naahiweha omuseu soopattuxiwa sa mphareya sa khalai siniihaniwa amonitas ni trilobitas. Eyo yonooniherya wira soopattuxiwa iya sa khalai saari sooreera, sootikiniha ni soomalela, niire so, ntoko soopattuxiwa sinoona ahu olelo-va. Tivonto, akhala wira okumi othatunwe wa etthu yaamukhaani mpakha okhala yuulupale, nto xeeni soopattuxiwa iya sa khalai siryaaya sootikiniha vanceenexa? Soopattuxiwa iya sookiixuttiha etthu yuulupale ni sookikhaliherya omwiixuttiha mwanaka”.

MURUMEELEKE MALIKANYIHO

9. Xeeni varyaaya vootthuneya orumeela malikanyiho? Nlikanyiho xeeni maama mmosa aarumenle awe?

9 Ikwaha sinceene, Yesu aanirumeela malikanyiho. Owo aaniwiixuttiha etthu yuulupale orumeelaka sowiiraneya aahiiso matakiheryo. (Matheyo 13:34, 35) Okathi onirumeela anyu malikanyiho, mwaahiyeke aniinyu wira arumeeleke muupuwelo aya. Eyo enimwaakhaliherya wuupuwelela ele eniwiixuttiha anyu, wiiwexexa oratteene ni  ohiliyala ele yiixuntte aya. Tthiri awo anoosiveliwaka wiixutta. Mwa ntakiheryo, maama mmosa a oJapão aaphavela wira anaawe anli, yiixutte moota Yehova onnithokorerya awe mwaha wa enamuna opanke awe makhalelo a elapo. Mmiravo mmosa aarina iyaakha 8 ni mukina aarina iyaakha 10. Maama ole aahirumeela malikanyiho yaakhweya wiiwexexa moovarihana ni iyaakha saya. Aahaavaha amiravo ale eleeti, esuukhiri ni ekafe. Vano aahaavekela wira khula mmosa opaka ekafe. Owo otthokihenrye so: “Awo yaahipaka saana ekafe ele. Vaavo kaakonhe aka ele yaawirinhe opaka saana, awo yaakhunle wira yaaphavela opaka ekafe ntoko siniphavela aka. Kaahaatthokiherya wira Muluku oopaka ipheyo sa wiirimu mwa enamuna emosaru, niire so, epheyo yookhalela wa hiyo”. Tthiri, amiravo ale, yaahisiveliwa ni ele yiixuntte aya ni khiyaaliyanle-tho!

Murumeeleke malikanyiho ookhweya wira nwooniherye aniinyu wira ookhala Mpattuxa (Nwehe ettima 10)

10, 11. (a) Nlikanyiho xeeni mwaarowa anyu orumeela wira mwaakhaliherye aniinyu wira ookhala Mpattuxa? (Nwehe elatarato yoopacerya.) (b) Malikanyiho xeeni murumeelale anyu?

10 Munrowa orumeela nlikanyiho xeeni wira nwooniherye aniinyu wira ookhala Mpattuxa? Mwa ntakiheryo, nyuwo pooti wooxa eboolu ni mwaninyu murumeelaka malakiheryo a moota woopaka. Nto, mmutthokiherye otthuneya waya otthara saana malakiheryo awo. Nuumala-vo, munvahe mwaninyu masa aahiiso muhokorokho mukina, nto mmukohe so: “Mwaanisuwela wira masa ala apakiwe atthariwaka malakiheryo?” Moottharelana, mwiikitthe eriyari masa awo ni munvahe enuku ene. Nto mmuleele wira enuku eyo yookhalana malakiheryo. Nave malakiheryo a enuku eyo pooti okumiherya masa. Masi malakiheryo ari muhina mwa enuku ela tootepa otikiniha ovikana malakiheryo a moota woopaka eboolu. Vano mmukohe wira: “Ookhala olempe malakiheryo a moota woopaka eboolu. Vano ti pani opanke malakiheryo anikumiherya masa?” Akhala wira anamwane awo ahinnuwa vakhaani, pooti waahimeerya wira malakiheryo a mwiri wa nsa yoowo onikumiherya masa manceene ari etthu eniitthaniwa ADN, yeeyo eri muhina mwa enuku. Nave pooti owooniherya ilatarato ni matakiheryo makina ari ipaaxina 10 mpakha 20, ebroxura eni: A Origem da Vida—Cinco Perguntas Que Merecem Resposta.

11 Anamuyari anceene annisoma ni anaaya myaha siri Despertai! opuro oni: “Teve um Projeto?” Akhala wira anaaya nlelo anamwane, anamuyari pooti waatthokiherya mwa enamuna yookhweya. Mwa ntakiheryo,  anamathelana amosa a oDinamarca yaahilikanyiha iviyau ni axipalame. Awo yaahimmye so: “Iviyau sinnilikana ni axipalame. Masi niireke iviyau sinnirela ni otothola iviyau saamukhaani? Niireke axipalame aakhalana nipuro na vameekhaaya ammora aya? Mwaarowa olikanyiha sai oruma wa eviyau ni wiipa wa mwaapalame? Vano ti pani orina ankhili anceene, ole opanke iviyau aahiiso aapanke axipalame?” Vaavo vanaakoha anyu ni owiiriha aniinyu wuupuwelela, munnaakhaliherya waarumeela “ankhili” aya ni olipiha omwaamini waya Yehova.Miruku 2:10-12.

12. Munrowa orumeela sai malikanyiho wira nwiixuttihe aniinyu wira Biibiliya onilavula ekeekhai?

12 Nyuwo pooti orumeela malikanyiho wira nwiixuttihe aniinyu okupali wira ele Biibiliya enihimya awe ekeekhai. Mwa ntakiheryo, nyuwo pooti omusoma Yobi 26:7. (Mmusome.) Nto muhaaleeleke paahi wira moolumo ari eversiikulu ela anikhuma wa Yehova. Masi, mwaakhaliherye waarumeela ankhili aya. Nyuwo pooti omuleela wira okathi wa Yobi atthu khiyaakupali wira elapo khevareleliwe ni etthu. Awo yaanisuwela wira khula etthu, ntoko boola aahiiso nluku nookhala nipuro nneemela aya. Okathi ole, khuuvo aawerya wooniherya wira elapo kherina yoovareleya aya, okhala wira khiyaakhanle maakina aniitthaniwa telescópio ni nave espacial. Etthu eniixutta ahu tiila: Hata Biibiliya olempwale ene khalai, okathi wotheene onilavula ekeekhai okhala wira onikhuma wa Yehova.Nehemiya 9:6.

NWIIXUTTIHE OTTHUNEYA WAYA OLAKIHERIWA NI BIIBILIYA

13, 14. Anamuyari anrowa owiixuttiha sai anaaya weettela ele Biibiliya enihimya awe?

13 Ti vootthuneya owiixuttiha aniinyu wira anoophwanya ohakalala wuulupale yeettelaka ele Biibiliya enihimya awe. (Musome Esalimo 1:1-3.) Mwa ntakiheryo, nyuwo pooti waakoha wira: muupuwele vaakhanle wira nvekeliwe orowa okhala vasisironi. Nave moovekeliwa waathanla atthu wira yakhaleke ni nyuwo. Nuumala-vo, pooti omukoha so: “Mwaarowa waathanla atthu a mukhalelo xeeni wira mwakhaleke saana opuro ole?” Nto mmusome aGalasia 5:19-23, wira nwehe muthinto wa atthu Yehova onaaphavela awe wira yakhaleke elapo esya.

14 Mwa enamuna ela, munoowerya owiixuttiha aniinyu itthu piili sootthuneya. Yoopacerya: Yehova onniniixuttiha moota wookhalana okumi woohakalaliha vano ni okhalana murettele ni atthu akina. Yanenli: Owo onniniixuttiha moota wookhala elapo esya. (Yesaya 54:13; Yohani 17:3) Nave pooti owooniherya aniinyu moota Biibiliya aakhalihenrye awe annihu. Mwa ntakiheryo, nwehe sowiiraneya sa mweekumini siri muliivuruni mwahu, woonasa wene, myaha sini: “Biibiliya Onnirukunuxa Mirima sa Atthu”, sa erevista Owehaweha. Aahiiso pooti omukoha munna wala murokora a mmulokoni, wira ooleeleni nyuwo ni aniinyu moota Biibiliya omukhalihenrya awe opaka marukunuxo maalupale wira omuhakalalihe Yehova.aHéberi 4:12.

15. Exeeni enrowa wookhaliheryani owiixuttiha aniinyu?

15 Murumeele muupuwelo anyu wira nwiixuttihe aniinyu myaha sootthuneya ni soohakalaliha. Mphavelase inamuna sikina sinrowa waakhaliherya osiveliwa wiixutta voohimya sa Yehova ni ophavela omwaattamela. Nave nvikaniheke opaka eyo vaavo vaninnuwa aya. Tiithi mmosa ohimmye wira: “Muhikhulumuwe weererya inamuna isya wira mutthokiherye myaha sa khalai”.

 NVEKELE MUNEPA WA YEHOVA NI MWAAPIXERYEKE MURIMA ANIINYU

16. Xeeni vanitthuneya aya opixa murima okathi oniwiixuttiha ahu anamwane? Moota xeeni anamuyari akina yaapinxe aya murima?

16 Mukhaliheriwaka ni munepa wa Yehova, aniinyu anoowerya olipiha waamini waya. (aGalasia 5:22, 23) Masi onoovira okathi wira aniinyu alipihe waamini waya. Tivonto, mwaapixeryeke murima, nvikaniheke owiixuttiha. Tiithi mmosa a oJapão, orina anamwane anli, mwaamulopwana ni mwaamuthiyana, onihimya so: “Miyo ni mwaaraka ninnaathokorerya aniinyu vanceene. Okhuma onamwane aya, kaaniwiixuttiha aniihu khula nihiku minutu 15, masi nihiku na mithukumano sa muloko khinaasoma. Minutu 15 khisaavila wa hiyo ni aniihu”. Mutokweene a esirkwiitu olempe wira: “Mwaha wookhala mmiravo kaahikhalana makoho manceene nto nkaawerya otthokiherya. Nuuvira okathi, kaahiphwanya waakhuliwa wa makoho ale omuthukumanoni, okathi wa yoosoma ya etthoko ni okathi kaapaka aka yoosoma aka. Ti maana aya vanitthuneya aya anamuyari ovikaniha owiixuttiha anaaya”.

Wira mukhale mwiixuttihi ooloka, nyuwo muhaana ophenta Nuulumo na Muluku (Nwehe ettima 17)

17. Xeeni vanitthuneya aya anamuyari olipiha waamini waya? Moota xeeni anamuyari amosa a oBermuda yaakhalihenrye aya anaaya axithiyana omwaamini Yehova?

17 Mwekeekhai, aniinyu anoowerya wiixutta itthu sinceene akhala wira annoona wira nyuwo munnimwaamini vanceene Yehova. Nave anoowehaka ele enipaka anyu. Tivonto, mulipihe waamini wanyu. Mwaahiye aniinyu yoone wira tthiri munnimukupali Yehova. Mwa ntakiheryo, vaavo anamuyari amosa a oBermuda yaakhalana aya muxankiho mmosa, yaanivekela hoothe ni anaaya axithiyana anvekelaka Yehova wira aavahe miruku. Nave, yaanaatumererya anaaya opaka mavekelo aya. Awo anihimya wira: “Naahimuleela-tho mwanihu muulupale mwaamuthiyana wira: ‘Omuroromeleke Yehova, oluttuweliweke ni miteko sa Omwene ni ohitepeke oxanka’. Vaavo saakhumelela aya itthu sooloka, aanoona wira Yehova onninikhaliherya. Eyo yoomukhaliherya omwaamini Muluku ni omukupali Biibiliya”.

18. Exeeni anamuyari ahinreerela aya oliyala?

18 Nyuwo anamuyari, muhikhala-khale muliyalaka wira khivanitthuneya waakhanyererya aniinyu okhalana waamini. Muritti anyu waala ni okhuwari, masi Yehova tonrowa wunnuwiha. (1 aKorinto 3:6) Tivonto, mwiimananihe owiixuttiha aniinyu voohimya sa Yehova, nave nvekele munepa awe wira aakhaliherye olipiha waamini waya. Mukupaliki wira Yehova onooreeliha wiimananiha wanyu.aÉfeso 6:4.