Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Setembro 2016

Nyuwo Amiravo, Mulipihe Waamini Wanyu

Nyuwo Amiravo, Mulipihe Waamini Wanyu

“Wamini . . . t’osuwelexa itthu sihinònahu”.AHÉBERI 11:1.

ISIPO: 41, 11

1, 2. Waaniheryasa, exeeni ikwaha sikina amiravo animurumeela Yehova aniikoha aya, ni miruku xeeni Biibiliya onivaha awe?

MUROKORA mmosa a elapo ya oGrã-Bretanha, aahihimeeriwa ni naxikola mukhwaawe wira: “Koona wira atthu oosuwela ntoko nyuwo khivanreerela okupali wira Muluku ookhala”. Munna a wAlemanha olempe so: “Maprusoore aka anihimya wira ele Biibiliya enihimya awe wira itthu siroopattuxiwa, ethiru. Nto annimananiha owiiriha anaxikola akina okupali wira itthu siroothatuwa”. Murokora mmosa mwali a oFrança onihimya wira: “Maprusoore a exikola enisoma aka, annitikihiniwa waaweha anaxikola akina avikanihaka omukupali Biibiliya”.

2 Olelo-va, atthu anceene khanikupali wira nipattuxiwe ni Muluku. Akhala wira mwa mmiravo onimurumeela Yehova aahiiso munimusoma Biibiliya, ikwaha sikina pooti wiikoha etthu enookupalihani wira Muluku Tonipattunxe. Biibiliya onninikhaliherya wuupuwela saana ele eniwiriyana ahu aahiiso enisoma ahu. Nuulumo na Muluku nnihimya wira: “Otthokiha onimoholani ephiro y’ekekhai”. Moota xeeni? Okhala wira onimookhaliheryani okhootta miyuupuwelo soohiloka wira  mulipihe omwaamini wanyu Yehova.Musome Miruku 2:10-12.

3. Ninrowa othokorerya exeeni mwaha ola?

3 Wira nilipihe omwaamini wahu Yehova, nihaana omusuwela saana. (1 Timótheyo 2:4) Nto, vaavo vanimusoma ahu Biibiliya ni iliivuru sahu, ti vootthuneya weemela ni wuupuwelela saana ele esomme ahu. Mmananihe wiiwexexa ele enisoma anyu. (Matheyo 13:23) Mwaamusomaka Biibiliya mwa enamuna eyo, munrowa ophwanya itthu sinnikupaliha wira Yehova tori Mpattuxa ahu ni wira Biibiliya tawawe. (aHéberi 11:1) Nrowe nthokorerye moota woopaka eyo.

MOOTA WOOLIPIHA WAAMINI WANYU

4. Moota xeeni okupali wira itthu siroothatuwa onlikana aya ni okupali wira itthu siroopattuxiwa? Nto, nihaana opaka exeeni?

4 Nyuwo pooti omwiiwa mutthu ohimyaka wira: “Kinnikupali wira itthu siroothatuwa maana masientista anihimya wira eyo ekeekhai. Xeeni okupaliki wira Muluku ookhala variki ohikhanle mutthu otonko omoona?” Atthu anceene anuupuwela siiso. Ekeekhai wira khanitonko omoona Muluku aahiiso onweha opattuxaka itthu. (Yohani 1:18) Nto, sai voohimya sa ale anikupali wira itthu siroothatuwa? Nave awo annikupali itthu sihinoona aya. Mwa ntakiheryo, khuuvo otonko onweha khole othatuwaka mutthu. (Yobi 38:1, 4) Tivonto, otheene ahu nihaana oweha itthu sinnikupaliha ni wuupuwelela saana itthu iyo, wira niwehe ele enooniherya aya. Atthu anceene aaweha soopattuxiwa nto ‘asuwela’ wira Muluku ookhala. Nuumala-vo, ‘ahona’ wira owo tori Mpattuxa ni aaweha wira toowerya ni ookhalana mikhalelo sooloka.aRoma 1:20.

Ikaruma sa otokosa sinimookhaliheryani otthokiherya ele enikupali anyu (Nwehe ettima 5)

5. Ikaruma xeeni sinrowa onikhaliherya otokosa wira niixutte soopattuxiwa?

5 Vaavo vaniweha ahu soopattuxiwa ni wuupuwelela saana, onninikhaliherya woona wira itthu sotheene sipakiwe mwa enamuna yootikiniha. “Mwaha wo wamini ti ninsuwela ahu” wira ookhala Mpattuxa, nnaamwi nihimoonaka. Eyo enninikhaliherya woona wira ookhalana mikhalelo  sooloka ni miruku suulupale. (aHéberi 11:3, 27) Nnoowerya wiixutta voohimya sa itthu sipattunxe awe, nisomaka itthu masientista siphwannye aya. Soohimmwa sikina pooti ophwanya mapuro ntoko eviidiyu As Maravilhas da Criação Revelam a Glória de Deus, ni ibroxura sini: A Vida—Teve um Criador?, A Origem da Vida—Cinco Perguntas Que Merecem Resposta, ni eliivuru eni: Existe Um Criador Que Se Importa com Você? Erevista Despertai! enniruuha myaha anikohiwa aya masientista ni atthu akina yaawo anitthokiherya moota vano anikupali aya wira Muluku ookhala. Myaha sini: “Teve um Projeto?”, sinnitthokiherya itthu kamosa-kamosa sa mikhalelo sa axinama ni soopattuxiwa sikina, nave sinnooniherya matakiheryo anooniherya moota masientista yeerenrye aya otakiha soopattuxiwa iyo.

6. Ikaruma xeeni sinrowa wookhaliheryani?

6 Munna orina iyaakha 19 a wEstados Unidos, onnihimya moota ottottenle awe mureerelo ibroxura piili siromoliwe, oriki: “Ibroxura iye sookikhaliherya vanceene. Koosoma ikwaha sinceene”. Murokora a oFrança olempe so: “Myaha sini ‘Teve um Projeto’, sinnikisivela vancenee! Sinnooniherya wira nnaamwi masientista atakihaka soopattuxiwa, awo khanwerya otakiha moomalela soopattuxiwa iyo”. Anamuyari a mwali orina iyaakha 15 anikhala wAfrica do Sul, anihimya so: “Mwanihu omusivela osoma erevista Despertai! opuro oni: ‘Entrevista’”. Iliivuru iyo sinoowerya wookhaliheryani woona itthu sinnikupaliha wira ookhala Mpattuxa, nave sinimookhaliheryani osuwela ni okhootta sowiixuttiha sowoothiwa. Waamini wanyu onoolipa vanceene ntoko mwiri mitathaari sawe sirapenle, ohinanttuwa okathi wa munamukhaya.Yeremiya 17:5-8.

MMWAAMINIKI BIIBILIYA

7. Xeeni Muluku oniphavela awe wira mwaarumeeleke ankhili?

7 Niireke vannitthekeya wiikoha so: ‘Exeeni enikikupaliha ele Biibiliya enihimya awe?’ Nnaari. Yehova khoniphavela wira mukupaliki etthu mwaha woowi akina anikupali eyo. Yehova oniphavela wira mwaarumeeleke ankhili wira mmusuwele Biibiliya ni ophwanya itthu sinnikupaliha wira onkhuma wa Muluku. Vaavo vanitepa anyu osuwela ele Biibiliya enihimya awe, waamini wanyu onrowa otepaka olipa. (Mmusome aRoma 12:1, 2; 1 Timótheyo 2:4.) Enamuna emosa yoomusuwela saana Biibiliya, osoma myaha sikina wira niiwexexe saana.

8, 9. (a) Myaha xeeni sinaasivela atthu akina wiixutta? (b) Moota xeeni akina attottenle aya mureerelo mwaha wa wuupuwelela ele esomme aya?

8 Atthu akina waasivela wiixutta iprofesia sa Biibiliya. Nave, awo annisiveliwa olikanyiha ele Biibiliya enihimya awe ni soohimmwa sa atthu, masientista ni sa ale anthipa milepe. Nkahaya muthokorerye ntakiheryo na Maphattuwelo 3:15. Yehova aahipaka eprofesia ela yootepa otthuneya nuumala Adamu ni Eva ommwareela owo ni eguvernu awe. Eprofesia ela yoopacerya ya Biibiliya, ennikhaliherya woona moota Omwene wa Muluku, onrowa aya wooniherya wira olamulelo wa Muluku tori wootepa oloka, ni moota onrowa aya omaliha ohaawa. Mwaarowa opaka exeeni wira mwiiwexexe Maphattuwelo 3:15? Mwaarowa opaka elista ya iversiikulu sa Biibiliya seiyo sinitthokiherya moota eprofesia ela yaarowa ya wiiraneya. Moottharelana, mwaarowa  ophavela osuwela okathi iversiikulu iyo silempwale aya, wira moone moota itthu siiraneyale aya. Moohipisa mwanweha wira nnaamwi ale amulempe Biibiliya yaakhala okathi woovirikana, soohimmwa saya sinnikhaliherya wiiwexexa saana eprofesia ela. Eyo yaamookhaliheryani woona wira munepa wootteela wa Yehova ohaakhaliherya opaka eyo.2 Pedru 1:21.

9 Munna a wAlemanha aahoona moota khula eliivuru ya Biibiliya eniiwanyeiha aya saana Omwene. Owo aahimmye wira: “Biibiliya toovarihana, nnaamwi olepmwale ene ni alopwana 40. Nave, awo yaakhala okathi woovirikana ni khiyaasuwelana”. Murokora a wAustralia nuumala osoma mwaha mmosa a erevista Owehaweha aahiixutta wira Paasikha onnivarihana saana ni Maphattuwelo 3:15 onilavula sa Mesiya. [1] (Nwehe enoota.) Owo olempe so: “Mwaha ole wookikhaliherya woona oreera murima wa Yehova. Maana wuupuwela nivarihano nne naavahiwe aIsarayeli, vano muhoolo mwaya khiiraneya ni Yesu, tthiri yookivara murima. Kaahaana weemela ni wuupuwelela moota niira na Paasikha naari aya na nthoonyeryo!” Xeeni murokora ola ohalaka woona siisa? Mwaha woowi aahuupuwelela saana ele yaasoma awe ni iiwexexa oratteene. Opaka eyo yaahimukhaliherya olipiha waamini wawe ni omwaattamela Yehova.Matheyo 13:23.

10. Moota xeeni ororomeleya wa alipa-oomulepa Biibiliya onlipiha aya omwaamini wahu Biibiliya?

10 Nave-tho, nkahaya muupuwele ororomeleya wa alopwana amulempe Biibiliya. Okathi wotheene yaalavula ekeekhai ni khiyoova opaka eyo. Masi alipa-oolepa a okathi ole yaalepa paahi itthu sooloka sa nloko ni ahooleli aya. Maprofeta a Yehova khiyaalepa paahi itthu sooloka, masi-tho yaanilepa itthu soohiloka saapakiwa ni aIsarayeli ni mamwene aya. (2 Wahala 16:9, 10; 24:18-22) Nave alipa-oolepa yaanilavula soovonya saya ni sa arumeyi akina a Muluku. (2 Samuweli 12:1-14; Marko 14:50) Mmiravo a oGrã-Bretanha aahimmye wira: “Ororomeleya khoreere othowa elapo ela. Eyo enninikhaliherya okupali wira tthiri Biibiliya onikhuma wa Yehova”.

11. Moota xeeni malakiheryo a Biibiliya annikupaliha aya wira Biibiliya onikhuma wa Muluku?

11 Vaavo atthu yeettela aya malakiheryo a Biibiliya, awo yaanoona moota malakiheryo awo yaakhaliherya aya. Eyo yaahaakupaliha wira Biibiliya onikhuma wa Muluku. (Musome Esalimo 19:8-12.) Mwali a oJapão olempe so: “Emusi aka ennihakalala vanceene mwaha wa weettela sowiixuttiha sa Biibiliya. Nookhalana murettele, wiiraana ni ninniphentana”. Biibiliya ohaakhaliherya atthu anceene woona wira itthu saakupali aya khalai khahiyo sa ekeekhai. (Esalimo 115:3-8) Nave malakiheryo awo ahaakhaliherya omulipana Yehova, yoowo ori Muluku oowerya sotheene ni onileiherya itthu sooloka muhoolo. Masi, atthu akina ahinikupali wira Muluku ookhala, annipaka-tho soopattuxiwa okhala amuluku aya. Atthu akina anuupuwela wira apinaatamu anookumiherya itthu sooloka muhoolo, masi nuumala oweha ele apinaatamu epanke aya mpakha olelo-va, annoona wira atthu khaniwerya ophuka mixankiho sa olumwenku ola.Esalimo 146:3, 4.

MOOTA WOWAATTHOKIHERYA AKINA

12, 13. Ninrowa olavula sai ni atthu akina voohimya sa soopattuxiwa aahiiso Biibiliya?

12 Vaavo vanilavula anyu ni akina voohimya sa soopattuxiwa aahiiso Biibiliya,  wanipacerya mphavele osuwela ele mutthu owo enikupali awe tthiri. Muupuweleke wira atthu akina yaawo anikupali wira itthu siroothatuwa, annikupali-tho wira Muluku ookhala. Awo anihimya wira itthu sotheene Muluku opattunxe orumeelaka othatuwa. Akina anikupali wira yowiixuttiha ya othatuwa ekeekhai, mwaha woowi enniixuttihiwa oxikola. Akina aahiya omukupali Muluku mwaha woowi aanyoonyiheya ni sowiira sa ahooleli a etiini. Tivonto, mphavele osuwela ele mutthu owo enikupali awe ni ele enimwiiriha okupali. Nuumala-vo nwiriyane saana ele enihimya awe. Mwapaka eyo, owo onoophavelaka woowiriyanani.Tito 3:2.

Mwaakoheke sookupali saya mwa nttittimiho, ni nwiriyaneke saana ele enihimya aya

13 Vaakhanle wira mutthu onihimya wira mwa mulolo mwaha wookupaliki wira ookhala Mpattuxa, mwaarowa omwaakhula sai? Mwa nttittimiho munvekele wira ohimye muupuwelo awe voohimya sa moota okumi opacenrye aya. Nyuwo pooti ohimya wira akhala wira okumi oroothatuwa, nto okumi woopacerya waahaana owerya wiikawanya, niire so, okumiherya okumi mukina. Tthiri, prusoore mmosa a quimika aahimmye wira eyo yahaana wiiraneya maana vannitthuneya, (1) itthu ntoko esapala wira ekhuneele, (2) owerya ovaha ikuru ni orumeela, (3) soohimmwa siniwerya weettiha makhalelo ni munnuwelo ni (4) owerya okopiari soohimmwa iyo. Khuncererya oriki: “Kinnitikinihiwa vaavo kiniweha aka soopattuxiwa sootepa oyeva”.

14. Malikanyiho xeeni ookhweya munrowa anyu orumeela okathi munitthokiherya anyu wira itthu siroopattuxiwa?

14 Okathi munitthokiherya anyu wira itthu siroopattuxiwa, murumeeleke malikanyiho ookhweya wiiwa, ntoko siira awe murummwa Paulo. Owo olempe so: “Vekekhai, khul’empa entekiwa ni mutthu: vano Muluku t’upanke itthu sothene”. (aHéberi 3:4) Tthiri, empa enitekiwa ni mutthu. Mwekeekhai, okhala wira itthu sikumi, ti sootikihina ovikana empa, eyo enooniherya wira ookhala mutthu opanke. Nave nyuwo pooti orumeela iliivuru sahu. Murokora mmosa aahivaanela ni mwammiravo ahaakupali wira Muluku ookhala. Murokora owo aahinvaha ibroxura piili silavunle ahu wanipacerya, nto nuumala esumana, mwammiravo ole aahimmye so: “Vano kinnikupali wira Muluku ookhala”. Mwammiravo ole aahipacerya omusoma Biibiliya ni ohoolo waya khukhala munna.

15, 16. Nihaana opaka exeeni nihinatthi omutthokiherya mutthu wira Biibiliya onikhuma wa Muluku? Nto okathi wotheene nuupuweleke exeeni?

15 Akhala wira mutthu khonimukupali Biibiliya, ninrowa omukhaliherya sai? Ntoko sihimmwale aya vasulu-vo, mmukohe mutthu owo ele enikupali awe. Nave-tho, mphavele osuwela itthu sinimusivela. (Miruku 18:13) Akhala wira sinimusivela myaha sa siensia, mulavule myaha siri mBiibiliyani sinooniherya wira Biibiliya onihimya ekeekhai aalavulaka myaha iyo. Akhala wira onnisiveliwa sowiiraneya sa mulaponi, pooti olavula mwaha onromoliwa muliivuruni sa mulaponi ni omooniherya moota Biibiliya aahimmye awe iyaakha sinceene vahinatthi wiiraneya mwaha owo.  Waaniheryasa, atthu akina pooti woowiriyanani akhala wira munniwooniherya malakiheryo a Biibiliya anrowa waakhaliherya, ntoko ale aniphwanyaneya Mwaha Yesu aalavunle awe Vamwaako.

16 Muupuweleke wira khanniphavela onyakulihana ni atthu awo. Masi nimphavela wira asiveliweke ovaanela ni hiyo vaavo vanaakhaliherya ahu omwiixutta Biibiliya. Tivonto, mwaakoheke mwa nttittimiho ni waawiriyana saana. Vaavo vanimutthokiherya anyu mutthu mukina sookupali sanyu, mmureereleke murima, vanceenexa akhala wira mutthu owo muulupale woovikanani nyuwo. Akhala wira munimwaattittimiha akina, nave awo anrowa woottittimihakani. Anootikinihiwa moota mwaatthokihenrye anyu saana sookupali sanyu hata muryeene mmiravo. Mwekeekhai, akhala wira ookhala oniphavela onyakulihana ni nyuwo aahiiso woonyoholani, khivantthuneya omwaakhula.Miruku 26:4.

MUTOKOSE IKEEKHAI SA BIIBILIYA WIRA MULIPIHE WAAMINI WANYU

17, 18. (a) Exeeni enrowa wookhaliheryani olipiha omwaamini wanyu Biibiliya? (b) Nikoho xeeni ninrowa ahu othokorerya mwaha onittharelana?

17 Hiyo pooti osuwela soowiixuttiha sinceene sa Biibiliya, masi sookhala itthu sikina sinireerela opaka wira nilipihe waamini wahu. Tivonto, nihaana otokosa saana ikeekhai iyo wira niphwanye ikeekhai suulupale, ntoko nnaavya mihakhu soovithiwa. (Miruku 2:3-6) Enamuna emosa ya olipiha waamini wahu ori omusoma Biibiliya otheene. Nyuwo pooti omusoma Biibiliya otheene eyaakha emosa. Opaka eyo yaahimukhaliherya mutokweene a esirkwiitu omwaattamela Yehova oryeene mmiravo. Owo ohimmye wira: “Etthu yaakikhalihenrye woona wira Biibiliya Nuulumo na Muluku, waari omusoma otheene. Myaha sa Biibiliya kaixuntte aka kiri mmiravo sookikhaliherya vanceene”. Nave-tho, murumeele ikaruma sa otokosa sa nttaava nanyu wira sookhaliheryeni wiiwexexa ele enisoma anyu. Nyuwo pooti omurumeela Watchtower Library em DVD, EBIBLIOTEKA ONLAINE ya Torre de Vigia, Índice das Publicações da Torre de Vigia ni Guia de Pesquisa para Testemunhas de Jeová.

18 Nyuwo anamuyari, ti murina muritti wa owiixuttiha aniinyu voohimya sa Yehova. Nto, munrowa waakhaliherya sai aniinyu olipiha waamini waya? Mwaha onittharelana onrowa othokorerya moota woopaka eyo.

^ [1] (ettima 9) Owehaweha, 15 a Dezembro, 2013.