Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Setembro 2016

“Muholowihe Miyono Sanyu”

“Muholowihe Miyono Sanyu”

“Muholowihe Miyono Sanyu”.SOFONIYA 3:16.

ISIPO: 54, 32

1, 2. (a) Mixankiho xeeni woonasa wene anamunceene aniwanana aya olelo-va, ni sinikumiherya exeeni? (b) Nlipelelo xeeni Yesaya 41:10, 13 onnivaha awe?

MUROKORA ori pioneera ookilaatheya otheliwe ni mutokweene onihimya so: “Nnaamwi kaaluttuweliwa itthu somunepani, kaaniwanana mixankiho saka mwa iyaakha sinceene. Nto mixankiho iyo saanikiiriha ohiphwanya ikhove, owereyasiwa, ohaathokorerya saana atthu akina ni okathi mukina saaniphavela okittikiherya ottuli”.

2 Munniwerya oweha mixankiho sa murokora ola? Mooriipiha murima, mwaha woowi ninkhala olumwenku ola wa Satana, sinniniphwanya mixankiho sinceene. Ntoko nankura oneemexa ekalawa, mixankiho iyo pooti onriipiha murima aahiiso onikhulumula. (Miruku 12:25) Exeeni waaniheryasa enooxankihani? Woonasa wene, munnixanka mwaha wa okhweliwa, owereyasiwa aahiiso olupatthiwa. Nave pooti wira munnixanka mwaha woothowa musurukhu wira mukhapelele emusi anyu. Vaavo okathi onivira aya, mixankiho pooti wookhulumulani ni omaliha ohakalala wanyu. Masi, mukupaliki wira Muluku onimookhaliheryani.Mmusome Yesaya 41:10, 13.

3, 4. (a) MBiibiliyani nintaphulela exeeni nuulumo noowi “miyoono”? (b) Exeeni ekhanle oowoolowiha miyoono sahu?

 3 Ikwaha sinceene Biibiliya onnirumeela mipantta sa erutthu wira otthokiherye mikhalelo soovirikana aahiiso sowiira sa mutthu. Mwa ntakiheryo, moono aahiiso ntata ninnirumeeliwa ikwaha sinceene mBiibiliyani. Vaavo Biibiliya vanihimya awe wira aahilipihiwa miyoono, eyo entaphulela wira mutthu owo aahilipihiwa, khuphwanya ikuru saamukhalihenrye opaka etthu. (1 Samuweli 23:16; Ézira 1:6) Nave pooti otaphulela wira ookhalana moonelo wooloka ni nlipelelo na muhoolo.

4 Ikwaha sikina, Biibiliya pooti ohimya wira mutthu ohoolowiha miyoono sawe. Eyo entaphulela wira mutthu owo ookhulumuwa aahiiso nommalela nlipelelo nawe. (2 Wahala 15:7; aHéberi 12:12) Okathi onixanka anyu aahiiso okhulumuwa, pooti woonaka wira wataana wanyu ni Yehova woovolola, nto eyo pooti owiirihani otthikela ottuli. Vano munrowa ophwanya woowi nikhaliheryo? Exeeni enrowa woovahani ikuru wira nvilele ni ohakalala?

“MONO W’APWIYA KHUNKHUVEYA, KHUNOJELA WOPOLA”

5. (a) Nnoonela sai vaavo sinniphwanya aya mixankiho, masi nuupuweleke exeeni? (b) Exeeni enrowa ahu othokorerya mwaha ola?

5 Mmusome Sofoniya 3:16, 17. Vaavo sinniphwanya aya mixankiho, nihooveke nnakhala okhulumuwa aahiiso woolowiha miyoono sahu. Yehova, yoowo ori Tiithi ihu oophenta, onnihimeerya wira nihele mmatatani mwawe ovelavela wahu wotheene. (1 Pedru 5:7) Yehova onninikhapelela ntoko aakhapelela awe nloko na aIsarayeli. Owo aahimenrye wira moono awe “khunkhuveya, khunojela wopola”. Okathi wotheene, Yehova aaniwoopola arumeyi awe oororomeleya. (Yesaya 59:1) Mwaha ola, ninrowa othokorerya matakiheryo mararu ari mBiibiliyani, yaawo anooniherya ophavela ni owerya Yehova orina awe wira aakhaliherye ni waalipiha arumeyi awe wira apakeke yootthuna awe, nnaamwi saaphwanyaka mixankiho suulupale. Nto, nrowe niwehe moota matakiheryo ala aniwerya aya woolipihani.

6, 7. Nniixutta exeeni vaavo aIsarayeli yaaxinttale aya Amaleeki?

6 Nuumala aIsarayeli woopoliwa weepotthani wEjiitu, moohipisa atthu a wAmaleeki yaahaatuphela. Moise aahimuleela Yoxuwa, mulopwana oolipa murima wira aahoolele aIsarayeli okhottoni. Moise aahimukuxa Aroni ni Huri anarowasa mwaako waattamenle vaavale. Aryeene vamwaako vale, yaaniwerya waaweha aIsarayeli awanaka. Niireke atthu ale araru yaatthyawa ekhotto mwaha wa woova? Nnaari!

7 Moise aahitthara malakiheryo yaakhalihenrye aIsarayeli oxintta ekhotto yaawana aya ni Amaleeki. Owo aahinvarelela ttootto a Muluku eekeekhai, khumutthukulela osulu. Vaavo Moise aapaka awe eyo, Yehova aanaavaha ikuru aIsarayeli wira awane ni Amaleeki. Masi okathi Moise saamuuma aya miyoono ni onamoroxa, atthu a wAmaleeki yaanixintta ekhotto. Moohipisa, Aroni ni Huri yaahimukhaliherya Moise. Awo “yahikuxa nluku, khwiyathi vathí: Moise ahikilathi vavo. Àroni ni Huri khunvarelela matata, mukina mono wolopwana, mukina mono wothiyana. Verihiwaya sisa, matata  a Moise khiyàmonre-tho mpakha okela nsuwa”. Tthiri, mwaha woovahiwa ikuru ni Muluku, aIsarayeli yaahixintta ekhotto.Okhuma 17:8-13.

8. (a) Asa aapanke exeeni vaavo anakhotto a wEthiyopia yaawoopopiha aya aYuda? (b) Ninrowa omutakiha sai Asa?

8 Nave Yehova aahirumeela owerya wa miyoono sawe wira aakhaliherye arumeyi awe mahiku a Mwene Asa. Anakhotto anceene anniromoliwa mBiibiliyani, masi nummuru ninceene na anakhotto anihimmwa mBiibiliya yaari a wEthiyopia, yaawo yaari 1.000.000 yaasuwela owana ekhotto. Anakhotto a wEthiyopia yaari anceene waavikana anakhotto a mwene Asa. Niireke Asa aahixanka, aahoova ni aahikhulumuwa? Niireke aahoolowiha miyoono sawe? Nnaari! Moohipisa Asa aahinvekela Yehova nikhaliheryo. Okhala wira anakhotto ale khiyaareere, vaakhala ntoko wira khivaaweryaneya waaxintta anakhotto ale a wEthiyopia. “Masi Muluku khivo enojelawe”. (Matheyo 19:26) Muluku aahirumeela owerya wawe wuulupale wira ‘axintte anakhotto òNubia [wEthiyopia] oholo wa mwené Asa’ maana “murima wa mwené Asa wahasiveliha Apwiya mahiku othene èkumi awe”.2 Wahala 14:7-12; 1 Mamwene 15:14.

9. (a) Xeeni Nehemiya ahaahiyale awe oteka ixiri sa Yerusalemu? (b) Muluku aakhunle sai nivekelo na Nehemiya?

9 Okathi Nehemiya aaronwe awe oYerusalemu, aaphwannye exeeni? Aaphwannye awanani a ilapo sikina awoopopihaka aYuda, nto aYuda ale yaahihiya oteka ixiri sa oYerusalemu. Mwaha woohikhalana ixiri, epooma ele vaanoopiha aYuda otupheliwa ni awanani aya ni yaahikhulumuwa. Nehemiya oonenle sai? Niireke aahikhulumuwa ni woolowiha miyoono sawe? Nnaari! Ntoko Moise, Asa, ni arumeyi akina oororomeleya a Yehova, Nehemiya aanimuroromela Yehova okathi wotheene. Okathi ole, Nehemiya aahinvekela Yehova nikhaliheryo, nto Yehova aahimwaakhula. Muluku aahirumeela ‘owerya wawe’ wuulupale “n’ikuru sa mono” awe wira aalipihe aYuda. (Mmusome Nehemiya 1:10; 2:17-20; 6:9.) Niireke munnikupali wira Yehova onnirumeela ‘owerya wawe’ wuulupale “n’ikuru sa mono” awe wira aalipihe arumeyi awe olelo-va?

YEHOVA ONOOLIPIHA MIYOONO SANYU

10, 11. (a) Satana oneererya sai woolowiha miyoono sahu? (b) Exeeni Yehova onirumeela awe wira onlipihe ni onivaha ikuru? (c) Malakiheryo a Yehova anookhaliheryani sai?

10 Nikupaliki wira Diabo khonkhala-khala oolowihaka miyoono sawe. Owo onoovikanihaka ontuphela, ophavelaka onihiiha miteko sahu sa eKristau. Onnirumeela wootha, woopopihiwa ni anamalamulela, ahooleli a itiini ni anammwareya. Exeeni eniphavela awe? Oniphavela wira nihiye olaleya ihapari sooreera sa Omwene. Masi Yehova toowerya ni oniphavela onikhaliherya, nto onnirumeela munepa  awe wootteela wira onlipihe. (1 Wahala 29:12) Tivonto, ti vootthuneya onvekela Muluku munepa awe wootteela wira niwanane Satana ni olumwenku awe wootakhala. (Esalimo 18:40; 1 aKorinto 10:13) Nave ninnimuxukhurela Muluku mwaha wa Nuulumo nawe ninnikhaliherya. Nkahaya muupuwele-tho moota iliivuru sa otthokeya wahu sinnikhaliherya aya wiixutta itthu sinceene khula mweeri. Moolumo ari eliivuru ya Zakariya 8:9, 13 (mmusome) yaalavuliwe okathi yaatthikeliwa aya otekiwa etemplo ya oYerusalemu, moolumo awo anoowerya-tho onikhaliherya olelo-va.

Ti vootthuneya onvekela Muluku munepa awe wootteela wira niwanane Satana ni olumwenku awe wootakhala

11 Nave Yehova onninlipiha orumeelaka malakiheryo anivahiwa ahu mmithukumanoni sa eKristau, asembeleya, akongresu ni ixikola sa Omwene. Malakiheryo awo anoowerya onikhaliherya omurumeela Muluku mookhalela, okhalana soolukama ni ovara saana miritti sinivahiwa ahu mmulokoni. (Esalimo 119:32) Niireke munniphavela olipihiwa ni sowiixuttiha sa Yehova?

12. Nihaana opaka exeeni wira nivikanihe okhala oolipa?

12 Yehova aahaakhaliherya atthu awe waaxintta anakhotto a wAmaleeki ni wEthiyopia, ni aahinvaha Nehemiya ni aYuda ikuru wira amalihe oteka ixiri sa oYerusalemu. Moolikanasa, Muluku ononlipiha wira nivikanihe olaleerya nnaamwi nikumanaka mixankiho, nilupatthiwaka ni ohicaleliwa ni atthu akina. (1 Pedru 5:10) Yehova khonrowa opaka mwiiriirya wira omalihe mixankiho sahu. Masi, nihaana opaka ele eniwerya ahu. Moota xeeni? Nihaana omusoma Biibiliya khula nihiku, olokiherya ni orowa omuthukumanoni khuta esumana, ovikaniha opaka yoosoma ahu, aahiiso omulompa Muluku vatthokoni ni omuroromela ninvekelaka Yehova. Niheemererye itthu sikina sinikhoottiheryaka ottottela mureerelo itthu Yehova onnivaha awe wira sinlipihe. Akhala wira munnoona wira miyoono sanyu sinnoolowela miteko iyo siromoliwe, munvekele nikhaliheryo Muluku. Nuumala-vo, nwehe moota munepa wa Muluku onookhaliheryayani okhalana ikuru ni “otthuna” opaka etthu. (aFilipi 2:13) Niireke munoowerya olipiha miyoono sa atthu akina?

MULIPIHE MATATA AKHULUMUNWE

13, 14. (a) Munna mmosa aalimpe sai nuumala okhweliwa amwaarawe? (b) Ninrowa waalipiha sai atthu akina?

13 Yehova oonivaha anna ni arokora a olumwenku wotheene yaawo annikhapelela ni onlipiha. Murummwa Paulo olempe so: “Mòkolole matata akhulumunwe, mulipihe makutha attèttheiye: mokolole iphiro sinviranyu”. (aHéberi 12:12, 13) MaKristau manceene a eseekulu yoopacerya yahaakhaliherya anna ni arokora. Nave olelo-va eyo enniiraneya. Muthokorerye ntakiheryo nimosa. Nuumala munna mmosa okhweliwa amwaarawe ni ovilela mixankiho sinceene, aahimmye wira: “Kihiixutta wira khaninwerya othanla enamuna, okathi ni ikwaha sinikhumela aya mixankiho. Ovekela ni opaka yoosoma ya omwaneene, onlikana ni onwara salva vida yoowo onimwiiriha mutthu ohisama mmaasini. Nave nikhaliheryo na anna ni arokora ninnikimaaliha vanceene. Kinnoona otthuneya waya wunnuuherya wataana wooloka ni Yehova nnaamwi sikhumelelaka mixankiho”.

Khula mutthu mmulokoni onoowerya waalipiha atthu akina (Nwehe ettima 14)

 14 Aroni ni Huri yaahimukhaliherya Moise olipiha miyoono sawe, okathi aIsarayeli yaawana aya ni Amaleeki. Nave, olelo-va ninnoona inamuna sa waakhaliherya atthu akina. Anna akina annixanka mwaha wa wuuluvala, owereyasiwa, olupatthiwa ni amusi aya, omeekha aahiiso okhweliwa. Hiyo pooti waalipiha amiravo yaawo ikwaha sinceene anikhanyereriwa opaka itthu soohiloka ni waakhaliherya wira akhumele saana olumwenku ola. (1 aTesalonika 3:1-3; 5:11, 14) Niphavelaseke inamuna sa waathokorerya atthu akina omuthukumanoni, naalaleeryaka, okathi ninlya ahu vamosa aahiiso naavaanelaka nimurumeelaka telefoni.

15. Moolumo xeeni ooloka akhanle oowaalipiha anna ni arokora?

15 Nuumala Asa waaxintta anakhotto anceene a wEthiyopia, profeta Azariya aahimulipiha Asa ni atthu awe oriki: “Nto nyuwo mukhalé atthu òlipa, matat’anyu ehojeyé: tthiri nyuwo munotthuveliwa mwaha wa muteko anyu”. (2 Wahala 15:7) Masu ala yaahimukhaliherya Asa opaka marukunuxo ni olokiherya okokhorela wekeekhai. Moolikanasa, moolumo anyu ooloka pooti waalipiha atthu akina ni waakhaliherya ovikaniha omurumeela Yehova. (Miruku 15:23) Nave muhikhala-khale muliyalaka wira ikomentaario sanyu sinnaalipiha vanceene anna okathi wa mithukumano.

Nehemiya khahiyo aamwaaweha paahi atthu avaraka muteko. Owo aanaakhaliherya oteka ixiri sa oYerusalemu

16. Axitokweene anrowa omutakiha sai Nehemiya? Muhimye matakiheryo a moota anna ni arokora yookhalihenryayani.

 16 Okhaliheriwaka ni Yehova, Nehemiya ni aYuda yaahilipiha miyoono saya. Tthiri awo yaahiwerya omaliha oteka ixiri sa oYerusalemu mahiku 52! (Nehemiya 2:18; 6:15, 16) Nehemiya khahiyo aamwaaweha paahi atthu avaraka muteko. Owo aanaakhaliherya oteka ixiri sa oYerusalemu. (Nehemiya 5:16) Moolikanasa, axitokweene anceene annimutakiha Nehemiya akhaliheryaka oteka ipa sa omwene aahiiso olokiherya ni orattela Empa ya Omwene. Alopwana ala oophenta annaalipiha-tho anna ni arokora ooxanka, okathi onaaxukurya aya ni vaavo anilaleerya aya hoothe.Mmusome Yesaya 35:3, 4.

“MUHOLOWIHE MIYONO SANYU”

17, 18. Okathi ninkumana ahu mixankiho aahiiso wuukhuwa, nikupaliki exeeni?

17 Vaavo vanivara ahu muteko vamosa ni anna ni arokora, ninnilipiha wiiraana wahu. Eyo enninikhaliherya okhalana ompatthani ohinimala. Nave-tho enoolipiha ororomela wahu mareeliho yaawo Omwene wa Muluku onrowa aya oruuha moohipisa. Vaavo vanilipiha ahu miyoono sa atthu akina, ninnaakhaliherya ovilela mixankiho ni okhalana nlipelelo nooloka na muhoolo. Nave, okathi nnaakhaliherya ahu akina, ninnilipiha miyoono sahu, nto opaka eyo enninikhaliherya owehexexa itthu sa muhoolo.

18 Vaavo nnuupuwela ahu moota Yehova aakhalihenrye awe ni waakhapelela arumeyi awe oororomeleya khalai, waamini ni omuroromela wahu Yehova onnilipa. Tivonto, okathi munkumana anyu mixankiho ni munuukhuwa, “muholowihe miyono sanyu”! Mukupaliki wira mwanvekela Yehova wira ookhaliheryeni, owerya wa miyoono sawe onimoolipihani wira mwaakhele mareeliho a Omwene muhoolo.Esalimo 73:23, 24.