Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Setembro 2016

“Masu a Muluku ti makumi”

Makoho Anikohiwa ni Ale Anisoma Irevista Sahu

Makoho Anikohiwa ni Ale Anisoma Irevista Sahu

Exeeni ekhanle “masu a Muluku”, aHéberi 4:12 anihimya awe wira ‘ti makumi ni t’òwerya’?

Iversiikulu soopacerya sinninikhaliherya wiiwexexa wira Paulo aalavula muhupi wa Muluku waatthokiherya yoolakela awe, yeeyo eniphwanyaneya mBiibiliyani.

Ikwaha sinceene ninnimuthokorerya aHéberi 4:12 muliivuruni mwahu, niphavelaka wooniherya wira Biibiliya ookhalana owerya wa orukunuxa ikumi sa atthu, nto eyo ekeekhai. Masi, ti vooloka ophavela osuwela ele Paulo aathokorerya awe vaavo aalempe awe moolumo ari aHéberi 4:12. Owo aalipiha maKristau aHeeberi wira akhaleke moovarihana ni soolakela sa Muluku. Soolakela sinceene saaniphwanyaneya soolempwa sowaarya. Paulo aahirumeela ntakiheryo nimosa olavulaka sa woopoliwa wa aIsarayeli wEjiitu. Awo yaanilipelela okela “elapo [yooleiheriwa] enikhowa eleti n’uravo”, weiwo waarowa aya okhalana murettele.Okhuma 3:8; Otumererya 12:9, 10.

Ela yaari yoolakela ya Muluku. Masi aIsarayeli yaahikhootta weettihiwa ni Yehova ni khiyaarina waamini, tivonto, anamunceene yahooceela ophwanya omumula iwo. (Mothakoni 14:30; Yoxuwa 14:6-10) Masi, Paulo aahincererya oriki: Nlelo ookhala “natiri a Muluku wira nnorowa omumula”. (aHéberi 3:16-19; 4:1) Mwekeekhai “natiri” owo oniirela mpantta ele Muluku uupulunle awe voohimya sa yoolakela awe. Ntoko maKristau aHeeberi, nnoowerya osoma ni okhala moovarihana ni yoolakela eyo. Ophavelaka wooniherya wira yoolakela eyo yaakhuma mBiibiliyani, Paulo aahiromola mipantta sikina sa Maphattuwelo 2:2 ni Esalimo 95:11.

Masu oowi “nlelo [ookhala] natiri a Muluku wira nnorowa omumula”, annivara mirima sahu. Hiyo ninnaamini ele Biibiliya eniixuttiha awe wira nnoowerya ophwanya omumula onikumiheriwa ni Muluku, nave ninnimananiha wira naphwanye omumula iwo. Nto khannipaka eyo neereryaka otthara Nlamulo na Moise aahiiso opaka itthu sooloka wira neemereriwe ni Yehova paahi. Masi, ninnipaka eyo mwaha woowi ninnimwaamini Muluku ahu, ni ninrowa ovikanihaka okhala moovarihana ni yoolakela awe. Atthu ikonto sinceene olumwenku wotheene, annimusoma Biibiliya ni anniixutta ele Muluku uupulunle awe voohimya sa yoolakela awe. Eyo yoowiiriha atthu anceene orukunuxa ikumi saya, yaaminiki ni abatiziwaka. Moota atthu awo anirukunuxa aya ikumi saya, ethoonyeryo yoowi ‘masu a Muluku ti makumi ni t’òwerya’. Ele Muluku uupulunle awe mBiibiliyani voohimya sa yoolakela awe yoovara mirima sahu, ni enrowa ovikanihaka onikhaliherya mookumini mwahu.