Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Outubro 2016

Nwaaminiki Anatiri a Yehova

Nwaaminiki Anatiri a Yehova

“Wamini . . . t’osuwelexa itthu sihinònahu”.AHÉBERI 11:1.

ISIPO: 54, 43

1. Nooneleke sai waamini wahu?

WAAMINI khahiyo wa atthu otheene. (2 aTesalonika 3:2) Masi, Yehova onnaavaha waamini atthu otheene animukokhorela. (aRoma 12:3; aGalasia 5:22) Tthiri ninnimuxukhurela vanceene Yehova okhala wira onninivaha waamini!

2, 3. (a) Okhalana waamini, onikumiherya mureerelo xeeni? (b) Makoho xeeni ninrowa ahu othokorerya vano?

2 Yehova oonivaha Mwanawe onimphenta awe wira otheene animwaamini mwaana owo, aleveleliwe itampi saya. Eyo ennaakhaliherya atthu okhala apatthani a Yehova ni olipelela okhala moohimala. (Yohani 6:44, 65; aRoma 6:23) Tthiri Yehova onninreerela murima vanceene! Nnaamwi nryeene alipa-oottheka ni niphwanelaka okhwa, Yehova onnoona wira nnoowerya opaka itthu sooloka. (Esalimo 103:10) Owo onninikhaliherya wiixutta itthu sooreera voohimya sa Yesu ni mukuttho awe. Vaavo nimpacerya ahu omwaamini Yesu ni omutthara, ninnilipelela ophwanya okumi woohimala!Mmusome 1 Yohani 4:9, 10.

3 Itthu xeeni sikina ninwerya ahu wiixutta voohimya sa waamini? Akhala wira ninnisuwela ele Muluku opanke awe  mmureerelo ahu ni onrowa awe opaka muhoolo, niireke eyo entaphulela wira nookhalana waamini? Nrowe niwehe etthu ekina enireerela ahu opaka.

‘MWAMINIKI MMURIMANI MWANYU’

4. Waamini, onniiriha opaka exeeni?

4 Omwaamini Yehova ni Yesu, khontaphulela osuwela ele epanke aya ni enrowa aya opaka mmureerelo ahu paahi. Masi-tho, ontaphulela ophavela vanceene okhala moovarihana ni ele eniixuttihale aya. Nave ontaphulela waakhaliherya atthu akina omusuwela Yehova ni Yesu. Murummwa Paulo olempe so: “Mwahimyakaru oholo w’atthu wira Yesu ti Pwiya, mwaminikiru mmurimani mwanyu wira Muluku òmuhihimuxa Yes’uwo mw’alipa-òkhwa, nyuwo munimòpowa. Tthiri, mutthu onamini mmurimani mwawe onophwanya exariya: mutthu onihimya wamini wawe oholo w’atthu, onophwanya wòpowa”.aRoma 10:9, 10; 2 aKorinto 4:13.

5. Xeeni waamini oryaaya wootepa otthuneya, ni ninrowa olipiha sai waamini wahu? Nvahe ntakiheryo.

5 Mwekeekhai, wira niphwanye okumi woohimala elapo esya ya Muluku, nihaana okhalana ni ovikaniha olipiha waamini wahu. Waamini onlikana ni mwiri. Hiyo nihaana ovikaniha okhuwari mwiri wira ohikhwe ni ovikaniheke wunnuwa. Nto, akhala wira khannikhuwari, mwiri owo pooti onyaala ni okhwa. Moolikanasa, nihaana oweha akhala wira waamini wahu ti ‘wolipa’ ni onnivikaniha ‘wunnuwa’.—Tito 2:2; 2 aTesalonika 1:3; Luka 22:32; aHéberi 3:12.

BIIBILIYA ONNITTHOKIHERYA WAAMINI

6. Mwa inamuna xeeni piili aHéberi 11:1, sinitthokiherya awe waamini?

6 Eliivuru ya aHéberi 11:1, ennitthokiherya ele waamini ontaphulela aya. (Mmusome.) (1) Waamini “t’inamuna y’okhalana itthu sinlipelelahu”. Itthu sinlipelela ahu, sinaahela muhina anatiri a Muluku voohimya sa muhoolo. Mwa ntakiheryo, hiyo ninnikupali wira otakhala onrowa omala ni enimoorwa elapo esya. (2) Waamini ti enamuna “y’okhalana” itthu sinnikupaliha “sihinònahu”. Nnaamwi nihimoonaka, hiyo ninnisuwela wira ookhala Yehova Muluku, Yesu Kristu, malaikha ni Omwene wa wiirimu. (aHéberi 11:3) Vano, ninrowa wooniherya sai wira ninniwaamini tthiri anatiri a Muluku ni itthu sihinoona ahu? Moota nneettiha ahu okumi ahu, moolumo ahu ni sowiira sahu, sinimooniherya wira ninniwaamini anatiri a Muluku.

7. Ntakiheryo na Nowe ninnikhaliherya sai wiiwexexa ele waamini ontaphulela aya? (Nwehe elatarato yoopacerya.)

7 Exeeni Nowe enniixuttiha awe voohimya sa waamini? Murummwa Paulo aahimmye wira Nowe, “ahimwiwelela Muluku, alèliwaka ni yowo sarowa okhumelela, sahaweryawe wona nlelo: owo ahipaka ekalawa, yeyo yamòponle yowo n’atthu ètthoko awe”. (aHéberi 11:7) Nowe aahipaka ekalawa yuulupale, okhala wira aahaamini ele Yehova aahimmye awe. Waaniheryasa, anamwaattamanani awe yaanimukoha etthu yaamwiiriha opaka ekalawa ele. Nikupaliki wira Nowe aahaatthokiherya. Maana Biibiliya onihimya wira Nowe “alaleya exariya”. (2 Pedru 2:5) Owo aahaalopola atthu wira Muluku aarowa okumiherya  epula ya mutaaseke wira omalihe otakhala. Waaniheryasa, Nowe aahaaleela moolumo a Yehova, oowi: “Miyo kihupuwela wamaliha atthu othene, okhala wira mwaha wa yawo elapo yothene yosareya owali”; ni “Miyo kinkela orupiha epula ya mutáseke, yeyo enrowa opwetexa vathí-va itthu sothene sikumi: sothene siri mulaponi-mu sinomala”. Nuumala-vo, Nowe aahitthokiherya ele yaatthuneya aya opaka wira yoopowe. Yehova aahimmye wira: “Munrowa okela mukalawani”.Maphattuwelo 6:13, 17, 18.

8. Yakobo onitthokiherya sai waamini?

8 Nave-tho, Yakobo oolepa voohimya sa waamini. Yakobo aalempe eyo moohipisa, nuumala murummwa Paulo olepa eliivuru ya aHéberi. Yakobo oriye so: “Mukòniherye wamini wanyu iwo, muhìraka itthu sorera: vano miyo, kìraka itthu sorera, kinowoniheryani wamini waka”. (Yakobo 2:18) Yakobo onitthokiherya wira waamini khontaphulela okupali itthu paahi. Nnaamwi malaikha ootakhala akupaliki wira Muluku ookhala, awo khanimwaamini Yehova. Masi awo awanani aalupale a Yehova. (Yakobo 2:19, 20) Mutthu oowaamini, onnimuhakalaliha Muluku opakaka itthu sooloka aahiiso miteko sooreera. Eyo ti etthu Abrahamu aapanke awe. Yakobo olempe so: “Abrahamu, tith’ihu a khalai, khakhalihiwe naxariya mwaha wa sowira sawe? Tthiri ahinvaha Muluku mwan’awe, Isakhi, ntoko mukuttho. Nyuwo munona wira wamini wawe wanivara muteko vamosá ni sowira sawe: wamini weiwo omalelihiwé ni miteko sorera”. Nuumala-vo, Yakobo aahittittimiherya wira waamini ohirina miteko ti wookhwa, oriki: “Sisale, ntoko erutthu ehirina eroho [“munepa”, Tradução do Novo Mundo] ti yokhwa, siso-tho wamini ohirina miteko sorera ti wokhwa”.Yakobo 2:21-23, 26.

9, 10. Ontaphulela exeeni omwaamini Mwaana?

9 Nuuvira iyaakha 30, Yohani aahilepa Evangelyo awe ni iwarakha tthaaru. Ntoko alipa-oolepa akina a Biibiliya, Yohani aanisuwelexa ele waamini ontaphulela aya. Murummwa Yohani aahimurumeela verbo a eGriki yoowo ikwaha sinceene, ontaphuleliwa “okhalana waamini” nttaava na Emakhuwa.

Omwaamini Mwaana, ontaphulela omwiiwelela Yesu

10 Mwa ntakiheryo, Yohani aatthokihenrye so: “Ole onimwamini Mwana òkhalana ekumi yohimala; vano ole onkhotta omwiwelela Mwana, khakhalanne ekum’iyo, nto onanariwa wa Muluku onokhala ni yowo”. (Yohani 3:36) Omwaamini Mwaana, ontaphulela omwiiwelela Yesu. Tthiri, soolepa sa Yohani sinnoona wira ikwaha sinceene Yesu aahihimya wira omwiiwelela yena ni Tiithi awe, ontaphulela okumi woohimala.—Yohani 3:16; 6:29, 40; 11:25, 26; 14:1, 12.

11. Ninrowa wooniherya sai wira ninnimuxukhurela Yehova mwaha wa osuwela ekeekhai?

11 Yehova oorumeela munepa awe wootteela, wira onikhaliherye wiiwexexa ekeekhai voohimya sa yena ni Mwanawe, wira niwaaminiki. (Mmusome Luka 10:21.) Ninrowa wooniherya sai wira ninnimuxukhurela Yehova mwaha wa itthu sotheene sinivanhe awe? Nihikhala-khale nihiyaka omuxukhurela mwaha woonikhaliherya  wataana ni yena, orweela mwa Yesu yoowo ‘onnihola ephiro yo wamini’. (aHéberi 12:2) Nave nihaana ovikaniha olipiha waamini wahu ninvekelaka Yehova ni osoma Nuulumo nawe.aÉfeso 6:18; 1 Pedru 2:2.

Mooniherye waamini wanyu mwaalaleeryaka atthu ihapari sooreera khula okathi (Nwehe ettima 12)

12. Waamini onrowa onikhaliherya opaka exeeni?

12 Nihaana ovikaniha wooniherya ni miteko sahu wira ninniwaamini vanceene anatiri a Yehova. Mwa ntakiheryo, nihaana ovikaniha waalaleerya atthu Omwene wa Muluku ni waakhaliherya okhala atthareli a Yesu. Nave-tho, nihaana ovikaniha owiirela “sorera atthu othene, masi vanjenexa amus’ihu [annihu] òwamini”. (aGalasia 6:10) Nto nihaana wiimananiha ‘orula omutthu wa khalai ni miteko saya’ maana khanimphavela ohonona wataana wahu ni Yehova.aKolosi 3:5, 8-10.

OMWAAMINI MULUKU TI MATHIPELO AHU

13. Xeeni vanitthuneya ahu ‘omwamini Muluku’? Biibiliya onitthokiherya sai omwaamini Muluku, ni nthowa xeeni?

13 Biibiliya onihimya wira: “Khavo mutthu onwerya omusiveliha Muluku, ahaminiki: mana ole onimwattamela Muluku ohana wamini wira Muluku òkhala ni wira onnatthuvela ale animphavela”. (aHéberi 11:6) Nave-tho, Biibiliya onnooniherya wira ‘omwamini Muluku’ etthu yoopacerya maKristau eekeekhai anitthuneya aya okhalana. Eyo eniirela mpantta mathipelo ahu. (aHéberi 6:1) Ohiya paahi waamini, sookhala mikhalelo sikina sootthuneya wira naataane ni Yehova mahiku otheene.Mmusome 2 Pedru 1:5-7; Yuda 20, 21.

14, 15. Nalikanyiha ni ophenta, xeeni waamini oryaaya wootthuneya?

14 Alipa-oomulepa Biibiliya annilavula waamini ikwaha sinceene ovikana mikhalelo sikina. Niireke eyo entaphulela wira waamini ti mukhalelo muulupalexa nintthuneya ahu okhalana?

15 Paulo aahilikanyiha waamini ni ophenta. Aalempe so: “Karina wamini womalela, weiwo omphiyerya olovola miyako: kahiphentekeru, nkihiyó etthu”. (1 aKorinto 13:2) Yesu aahimmye wira “yoruma yulupalexa” ya Nlamulo ti omphenta Muluku. (Matheyo 22:35-40) Ophenta onninikhaliherya okhalana mikhalelo sikina sinimuhakalaliha Muluku. Mwa ntakiheryo, Biibiliya onihimya wira ole omphenta  ‘onnikupali’ itthu sotheene. Tivonto, ophenta onoonikhaliherya okupali aahiiso waamini khula etthu Muluku onnileela awe mBiibiliyani.1 aKorinto 13:4, 7.

16, 17. Biibiliya onitthokiherya sai waamini ni ophenta? Waamini ni ophenta, tuuvi ori muulupalexa ni nthowa xeeni?

16 Waamini ni ophenta mikhalelo sootepa otthuneya. Tivonto, alipa-oomulepa Biibiliya ikwaha sinceene annilavula ophenta ni waamini okathi omosaru. Paulo aahaatumererya annawe wira ‘awareke wamini n’uphentana’. (1 aTesalonika 5:8) Omuhimyaka Yesu, Pedru olempe so: “Nyuwo munnimphenta, munamwi muhimonne: munnimwamini, nlelo muhimonaka”. (1 Pedru 1:8) Yakobo aahaakoha annawe oowoottihiwa wira: “Muluku khathanlale alipa-òhawa a vathí-va wira àkhalihe athajiri mowaminini ni wira yakhele omwene ohimyalyawe wavaha ale animphenta?” (Yakobo 2:5) Nto, Yohani aalempe wira Muluku onniruma wira “nimwamini Yesu Kristu, Mwan’awe, ni wira niphentaneke”.1 Yohani 3:23.

17 Nave-tho Paulo olempe so: “Vano, sinihala iya ttharu: wamini, ororomela n’uphenta. Nto wulupalexa wa itthu iya, ophentá”. (1 aKorinto 13:13) Muhoolo khaninrowa otthuneyaka owaamini anatiri a Muluku voohimya sa elapo esya, okhala wira anatiri awo anrowa wiiraka yiiraneyale ene. Ninrowa okhalana okumi wooloka yoowo Biibiliya onihimya awe. Masi, okathi wotheene ninrowa omphentaka Muluku ni atthu awe. Tthiri waaphenta wahu onrowa otepaka wunnuwa mahiku otheene.

YEHOVA ONNIREELIHA WAAMINI WAHU

18, 19. Olelo-va, waamini waakhalihenrye sai atthu a Muluku, ni tani onireerela ovuwihiwa?

18 Atthu a Yehova a mahiku ahu ala annaamini Omwene wa Muluku ni annikhaliherya. Nave awo anniphentana mukina ni mukhwaawe. Ela enniiraneya okhala wira annihiya munepa wa Muluku waalakiheryaka. (aGalasia 5:22, 23) Nto tiivi eri yookhumelela aya? Anna ni arokora anivikana imilyau 8, olumwenku wotheene, aakhalana murettele ni anniiraana mmulokoni mwaya. Tthiri waamini ni ophenta mikhalelo suulupale.

19 Wiiraana iwo onniweryaneya mwaha woowi Muluku ahu tonnikhaliherya. Nto owo onnireerela ottottopeliwa. (Yesaya 55:13) Ninnixukhurela vanceene mwaha woowi Muluku ookhaliherya wira ‘nopowe mwaha wowamini’. (aÉfeso 2:8) Yehova onrowa ovikaniha waakhaliherya atthu anceene omwaamini. Nuumala-vo, elapo yotheene enrowa okhaliwaka ni atthu oomalela, a xariya ni oohakalala yaawo anrowa onvuwihaka Yehova mahiku otheene!