Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Outubro 2016

“Muhihiyé Owakhela Aletto”

“Muhihiyé Owakhela Aletto”

“Muhihiyé owakhela aletto”.AHÉBERI 13:2.

ISIPO: 21, 50

1, 2. (a) Olelo-va mixankiho xeeni sinaaphwanya anamurwa anceene? (Nwehe elatarato yoopacerya.) (b) Exeeni murummwa Paulo ennuupuxerya awe, ni makoho xeeni ninrowa ahu othokorerya?

IYAAKHA sinivikana 30 sivinre, ohinatthi Osei okhala Namoona a Yehova, aahikhuma elapo awe oGana, orowaka okhala wEuropa. [1] (Nwehe enoota.) Owo onihimya so: “Moohipisa kaahoona wira atthu anceene khiyaakicalela. Oriirya wa elapo ele waahikixankiha vanceene. Nuumala okhuma wareporto, kaahoona oriirya kahaatonko aka woona mookumini mwaka ni kaahipacerya wunla”. Okhala wira Osei khaixuntte moowaakuveya nttaava na elapo ele, waahivira mwaakha ohiphwanyale muteko wooreerela. Nave aaninkheliwa owaani mwaha wookhala elapo yoorakamela, nto oona wira ori mekhawe.

2 Vaakhanle wira ti nyuwo, mwaarowa ophavela othokoreriwa sai? Ti voohakalaliha waakheliwa saana Empa ya Omwene ni atthu anoophentani hata muryeene a elapo ekina aahiiso nikhuli noovirikana. Tthiri, Biibiliya onnaatumererya maKristau eekeekhai wira ‘ahihiyé owakhela aletto’.  (aHéberi 13:2) Vano, nrowe nthokorerye makoho anittharelana: Yehova oniwoonela sai anamurwa? Niireke nihaana orukunuxa moota siniwoonela ahu anamurwa? Ninrowa waakhaliherya sai anamurwa woona wira annaakheliwa saana mmulokoni mwahu?

MOOTA YEHOVA ONIWOONELA AWE ANAMURWA

3, 4. Moovarihana ni Okhuma 23:9, Muluku aaphavela wira aIsarayeli yaathokoreryeke sai anamurwa, ni nthowa xeeni?

3 Nuumala Yehova owoopola atthu awe weepotthani wEjiitu, aahaavaha malamulo yaakhalihenrye waareerela murima anamurwa yaakhala eriyari aya. (Okhuma 12:38, 49; 22:20) Okhala wene khivanikhweya okhala elapo ekina, tivonto, moophenta Yehova aanaakhapelela anamurwa. Mwa ntakiheryo, awo yaahaana ottotta ipyo saamora okathi woohepha.Onamukuttho 19:9, 10.

4 Ohiya paahi waatumererya aIsarayeli wira yaattittimiheke anamurwa, Yehova aaphavela wira yuupuweleke moota yoonela aya okathi yaaryaaya anamurwa wEjiitu. (Mmusome Okhuma 23:9.) AIsarayeli ahinatthi okhala ipottha wEjiitu, atthu a wEjiitu khiyaaphavela maana yaari a elapo ekina. (Maphattuwelo 43:32; 46:34; Okhuma 1:11-14) AIsarayeli yaanihasuliwa vanceene wEjiitu. Yehova aaphavela wira yuupuweleke eyo ni yaareereleke murima anamurwa yaakhala eriyari aya.Onamukuttho 19:33, 34.

Yehova onnaareerela murima anamurwa

5. Exeeni enrowa onikhaliherya waareerela murima anamurwa ntoko siniira awe Yehova?

5 Yehova khonturukeya. Tivonto, akhala wira annoorwa anamurwa mmulokoni mwahu, nihaana wuupuwela wira nlelo Yehova onnaareerela murima atthu awo. (Otumererya 10:17-19; Malakhiya 3:5, 6) Nto muhaana wuupuwelela mixankiho waaniheryasa sirina aya. Mwa ntakiheryo, pooti wira khansuwela nttaava na elapo eyo aahiiso anithokoreriwa moohixariya. Nrowe niimananihe waakhaliherya ni waareerela murima.1 Pedru 3:8.

NIIREKE NIHAANA ORUKUNUXA MOOTA SINIWOONELA AHU ANAMURWA?

6, 7. Exeeni enooniherya wira maKristau aYuda yaahiixutta moota wooxintta nthalu?

6 MaKristau a eseekulu yoopacerya, yaahiixutta moota wooxintta nthalu nahaareere eriyari ya aYuda. Pentekoositi a 33 EC, maKristau aYuda yaakhala oYerusalemu yaahiwaakhela saana ni waaphenta maKristau a niinano yaakhuma ilapo sikina. (Miteko 2:5, 44-47) Eyo enooniherya wira maKristau aYuda yahiiwexexa ele enitaphulela aya “owakhela aletto”, niire so, “waareerela murima anamurwa”.

7 Masi okathi ole, yookhala etthu yiiraneyale. AYuda yaalavula eGriki yaahipacerya wunlaseya mwaha woowi anaamukhweli aya khiyaathokoreriwa saana. (Miteko 6:1) Wira aphuke muxankiho ole, arummwa yaahaathanla alopwana 7 wira  atthu otheene athokoreriweke saana. Awo yaahaathanla alopwana yaarina masina a eGriki, woonasa wene wira anaamukhweli ale ahakalaleke.Miteko 6:2-6.

8, 9. (a) Makoho xeeni anrowa onikhaliherya osuwela akhala wira nookhalana nthalu? (b) Exeeni enireerela ahu omala-maliha? (1 Pedru 1:22)

8 Pooti nisuwelaka aahiiso nihisuwelaka, ekeekhai tiila: otheene ahu ninnipaka itthu moovarihana ni makhalelo a elapo ahu. (aRoma 12:2) Nave-tho, pooti wira ninniwiiwa ale naattamanne ahu, anivarana ahu muteko, anisomana ahu exikola emosa, yaalavulaka moohiloka atthu a elapo ahu, makhalelo ahu, nloko nahu, aahiiso nikhuli nahu. Nnoonela sai miyuupuwelelo iyo soohiloka? Aahiiso nnoonela sai vaavo mutthu mukina oninyohola awe elapo ahu ni soolema sahu?

9 Waahikhala okathi murummwa Pedru aanyokha awe atthu yahaakhanle aYuda. Masi vakhaani-vakhaani, owo aahiixutta moota wooxintta moonelo owo woohiloka. (Miteko 10:28, 34, 35; aGalasia 2:11-14) Vamosaru, akhala wira ninnoona wira nookhalana nthalu aahiiso ninniixinnuwiha mwaha wa nikhuli nahu, nihaana wiimananiha wira nimalihe moonelo owo. (Mmusome 1 Pedru 1:22.) Exeeni enrowa onikhaliherya opaka eyo? Nuupuweleke wira otheene ahu naatthu oohimalela, moohicikha etthu sa elapo enikhuma ahu, khuuvo a hiyo aaphwanela woopowa. (aRoma 3:9, 10, 21-24) Tthiri khuuvo orina ehakhi yoowoona wira tootthuneyexa onvikana mutthu mukina! (1 aKorinto 4:7) Nihaana okhalana moonelo ntoko wa murummwa Paulo. Owo aahaaleela maKristau akhwaawe wira “khamuhiyó-tho aletto nnákhala anamurwa” masi “nyuwo mw’àtthu a Muluku”. (aÉfeso 2:19) Otheene ahu nihaana wiimananiha omaliha nthalu wira niware omutthu wa niinano.aKolosi 3:10, 11.

MOOTA WOWAAREERELA MURIMA ANAMURWA

10, 11. Moota xeeni Bowazi aatakinhe awe moota Yehova oniwoonela awe anamurwa?

10 Bowazi, mulopwana oororomeleya, aahitakiha moota Yehova oniwoonela awe anamurwa. Moota xeeni? Vaavo Bowazi aaronwe awe omatta wawe oweha muteko woohepha, aahimoona Ruthi, muthiyana namurwa aakhumme elapo ya oMowabi. Ruthi aanikhalela nthiti muteko awe woottotta ipyo. Moovarihana ni Nlamulo na Moise, Ruthi aahikhalana ehakhi yoottotta ipyo iye. Masi, vaavo Bowazi aiwale awe wira Ruthi aahivekela wira ottotteke ipyo, Bowazi aahitikinihiwa vanceene ni aahimweemererya Ruthi ottotta makala a mavisi mmatta mme.Mmusome Ruthi 2:5-7, 15, 16.

11 Ele yiiraneyale moottharelana, ennooniherya wira Bowazi aanisuwela mixankiho sa Ruthi ntoko namurwa. Owo aahimuleela wira okhaleke ni aximwali yaahepha mmatta mwawe wira alopwana akina yaavara muteko ahimuhasule. Tivonto, Bowazi aahipaka marehereryo wira Ruthi ovahiweke yoolya ni maasi yaaphiyerya, ntoko anamuteko akina. Bowazi aanimuttittimiha muthiyana ole oohaawa ni aanimulipiha.Ruthi 2:8-10, 13, 14.

12. Waareerela murima anamurwa onrowa waakhaliherya sai?

 12 Bowazi aahimureerela murima Ruthi ohiya mwaha wookhala oororomeleya wa maathi awe Nowemi, masi mwaha woowi Ruthi aahipacerya omurumeela Yehova ni aaphavela wira okhapeleliweke ni Yehova. Vaavo Bowazi aamureerela awe murima, owo aatakiha tthiri ophenta wa Yehova. (Ruthi 2:12, 20; Miruku 19:17) Nto vaavo olelo-va, vanaareerela ahu murima akina, nnoowerya waakhaliherya “atthu othene” wiixutta ekeekhai ni woona wira Yehova onnaaphenta vanceene.1 Timótheyo 2:3, 4.

Niireke ninniwaakhela saana anamurwa vaavo vanirwa aya Empa ya Omwene? (Nwehe ittima 13, 14)

13, 14. (a) Xeeni vanireerela aya waalavuliha anamurwa Empa ya Omwene? (b) Munrowa oxintta sai wuuliwa muru okathi onilavulana anyu mutthu a elapo ekina?

13 Hiyo ninnaareerela murima anamurwa, vaavo nnaalavuliha ahu moopatthaneya Empa ya Omwene. Anamurwa yaawo animala ophiya elapo ekina, ikwaha sikina annoova ni khantaphuwa. Okhala wira soolema saya ni makhalelo aya pooti owiiriha wiixoona ohikhala etthu eriyari ya atthu a elapo eronwe aya. Tivonto, nihaana opacerya waalavuliha, waareerela murima ni waathokorerya. Akhala wira nttaava nanyu ookhala aplicativo JW Language, pooti wookhaliheryani wiixutta moota wookoha ihaali ni nttaava naya.Mmusome aFilipi 2:3, 4.

14 Waaniheryasa nyuwo pooti wuuliwa muru muhinawerya olavula ni mutthu a elapo ekina. Wira muxintte wuuliwa muru iwo, pooti olavula ni atthu awo voohimya sa nyuwo. Nto munimoona wira sookhala itthu sinceene sinlikana anyu, ohiya ele yuupuwela anyu. Musuweleke wira khula elapo yookhalana itthu sooloka ni soohiloka.

 MWAAKHALIHERYE WOONA WIRA ANNAAKHELIWA

15. Exeeni enrowa onikhaliherya waapixerya murima anamurwa vaavo vaniimananiha aya olimalela elapo ahu?

15 Wira mwaakhaliherye akina woona wira annaakheliwa mmulokoni, mwiikoheke so: ‘Kaaronwe elapo ekina, kaarowa ophavela othokoreriwa sai?’ (Matheyo 7:12) Mwaapixeryeke murima anamurwa vaavo vaniimananiha aya olimalela elapo anyu. Wanipacerya, hiyo pooti ohisuwela muupuwelo ni moonelo aya. Masi ohiya ophavelaka wira anamurwa yuupuweleke ni opaka itthu ntoko atthu a elapo ahu, xeeni oheemereryaka makhalelo aya?Mmusome aRoma 15:7.

Mwaapixeryeke murima anamurwa vaavo vaniimananiha aya olimalela elapo anyu

16, 17. (a) Ninrowa opaka exeeni wira nsuwele soolema sa anamurwa? (b) Itthu xeeni sikina sinireerela ahu opaka wira naakhaliherye anamurwa mmulokoni mwahu?

16 Akhala wira ninniimananiha osuwela makhalelo ni soolema sa elapo ya anamurwa, eyo enoonikhaliherya waasuwela saana. Okathi onimulompa ahu Muluku vatthokoni, hiyo pooti otokosa soolema sa anamurwa a muloko ahu aahiiso a muttetthe ahu. Enamuna ekina ya waasuwela saana anamurwa, ori waalattula vatthokoni vahu wira nilye hoothe. Yehova “ahahulela amalapo mikhora so wamini”, tivonto nihaana omutakiha niwaakhelaka anamurwa vatthokoni vahu, vanceenexa “amus’ihu [anna] òwamini”.Miteko 14:27; aGalasia 6:10; Yobi 31:32.

Niireke munniwaakhela saana atthu animala ophiya a elapo ekina? (Nwehe ittima 16, 17)

 17 Oviriha okathi ni emusi ya anamurwa, enoonikhaliherya waasuwela ni waattottopela wiimananiha waya wira alimalele soolema sahu. Nnimoona wira khivanaakhweela wiixutta nttaava, nto nihaana waakhaliherya. Nave-tho, hiyo pooti waakhaliherya ophwanya opuro wookhala ni muteko. Opaka eyo, pooti waakhaliherya vanceene anna ni arokora.Miruku 3:27.

18. Ntakiheryo xeeni na ottittimiha ni oxukhuru anamurwa olelo-va anireerela aya otakiha?

18 Tthiri anamurwa ahaana wiimananiha wira alimalele makhalelo a elapo ethaamenle aya. Ruthi oovaha ntakiheryo nooloka. Noopacerya, owo aanittittimiha soolema sa muttetthe ole musya, ovekelaka wira ottotte ipyo. (Ruthi 2:7) Ruthi khuupuwela wira ookhalana ehakhi aahiiso woona wira aahaana ottotta ipyo iye ohivenke. Na nenli, owo aanaaleela akina wira aanixukhurela omureerela waya murima. (Ruthi 2:13) Vaavo anamurwa anooniherya aya mukhalelo wooloka, anna ni arokora ni atthu a muttetthe owo anrowa waattittimihaka vanceene.

19. Mathowa xeeni arina ahu wira niwaakheleke saana anamurwa?

19 Ninnihakalala vanceene Yehova onireerela wawe murima ni weemererya wira atthu otheene awiriyaneke ihapari sooreera. Pooti wira elapo aya, khiyaamusoma Biibiliya aahiiso othukumana ni atthu a Yehova. Masi vano aakhalana eparakha ya othukumana ni hiyo, nto nihaana waakhaliherya wira ahooneke wira nlelo anamurwa. Pooti wira khanrina musurukhu munceene wira naakhaliherye, masi nihaana waareerela murima nimutakihaka Yehova yoowo onaaphenta. Okhala wira nimmutakiha Muluku, nrowe niimananihe owaakhela saana anamurwa ari eriyari ahu!aÉfeso 5:1, 2.

^ [1] (ettima 1) Nsina nooturukiwa.