Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Novembro 2016

Ootthokiheya Moovarihana ni Eliivuru ya Mwaneene Muluku

Ootthokiheya Moovarihana ni Eliivuru ya Mwaneene Muluku

“Apwiya àpattuxa elapo n’usuwela waya: ahàtala erimu n’ankhili aya”.MIRUKU 3:19.

ISIPO: 6, 24

1, 2. (a) Nilavulaka sa omukokhorela Muluku, exeeni atthu akina anihimya aya? (b) Exeeni ninrowa ahu othokorerya mwaha ola?

NILAVULAKA sa okokhorela, atthu akina anihimya wira: “Khivanitthuneya okhalana otthokeya wira woolakiheryekeni. Etthu enitthuneya wataana ni Muluku paahi”. Niireke eyo ekeekhai? Masi, exeeni sowiiraneya sinooniherya aya?

2 Mwaha ola, ninrowa woona moota Yehova onipaka awe itthu mootthokiheya ni moota onaatthokiha awe atthu awe. Nave ninrowa othokorerya ele enireerela ahu opaka vaavo ninvahiwa ahu malakiheryo ni otthokeya wa Yehova. (1 aKorinto 14:33, 40) Eseekulu yoopacerya, atthu a Yehova yaanitthara malakiheryo a Soolempwa ni yaaniwerya olaleya ihapari sooreera mapuro manceene. Olelo-va, ninnaatakiha nittharaka malakiheryo a Biibiliya. Tivonto, nniiwelela ahu malakiheryo ninvahiwa ahu ni otthokeya wa Muluku. Nto, ninniwerya olaleya ihapari sooreera olumwenku wotheene. Nave ninnivikaniha wiiriha muloko okhala wooloka, wa murettele ni wowiiraana.

YEHOVA TI MULUKU OOTTHOKIHEYA

3. Exeeni enookupalihani wira Yehova ti Muluku ootthokiheya?

3 Okathi ninweha ahu itthu Yehova opattunxe awe, ninnoona  wira owo Muluku ootthokiheya. Muluku ‘òpattuxa elapo n’usuwela wawe: ohàtala erimu n’ankhili awe’. (Miruku  3:19) Nto sookhala itthu Yehova opanke awe nihinsuwela ahu. Tthiri, “sothene iya t’ipantta yamukhani ya miteko sawe”. (Yobi 26:14) Tthiri, itthu vakhaani sinisuwela ahu sa olumwenku, sinnooniherya wira Muluku tootthokiheya. (Esalimo 8:4, 5) Imilyau sinceene sa itheneeri sinneetta mwa enamuna yootthokiheya. Nave nkahaya muupuwele moota ipalaneeta sineetta aya moovarihana ni nsuwa. Weetta waya saana itheneeri ni ipalaneeta iyo, enooniherya wira Yehova oopaka mwa enamuna yootthokiheya. Vaavo vanuupuwela ahu moota ‘ankhili awe apattunxe [aya] erimu’ ni elapo, ninniphavela onvuwiha, omukokhorela ni ororomeleya wa yena.Esalimo 136:1, 5-9.

4. Xeeni masientista ahiniwerya aya waakhula makoho manceene ootthuneya?

4 Masientista annirumeela itthu sinceene yiixuntta aya voohimya sa erimu ni elapo wira nikhaleke saana. Masi, khaniwerya waakhula makoho manceene ootthuneya. Mwa ntakiheryo, asomi a itheneeri ni ipalaneeta khanwerya onleela mwekeekhai moota elapo ekhumelenle aya ni nthowa naya apinaatamu, inama ni miri sikhanle aya valaponi. Nave atthu anceene khansuwela otthokiherya nthowa naya apinaatamu aniphavela aya okhala mahiku otheene. (Musuweli 3:11) Etthu emosa eniwiiriha ohiwerya waakhula makoho awo, mwaha woowi masientista ni atthu akina, anihimya wira Muluku khokhanle ni aniixuttiha wira itthu siroothatuwa. Masi Muluku onnaakhula makoho awo orumeelaka Eliivuru awe, eyo piiyo, Biibiliya.

5. Mwa inamuna xeeni apinaatamu anlipana aya malamulo eephattu?

5 Yehova oopaka malamulo manceene eephattu. Malamulo awo khaniturukeya. Ale anivara muteko wa maluuxo, anilokiherya iturneera, manxinyero, aneettiha iviyau, alipa-aniwooperari atthu ni atthu akina, anlipa ni malamulo awo wira avare muteko aya. Mwa ntakiheryo, okhala wene murima oniphwanyaneya nipuro nimosaru na erutthu ahu, tivonto ale aniwooperari atthu annisuwela opuro onikhala awe. Nave atthu otheene annisuwela wira otupha nipuro noorakama amorelaka vathi, pooti wunteya aahiiso okhwa. Hiyo ninniiwelela malamulo eephattu, ntoko força de gravidade, mwaha woowi nimphavela okhala akumi.

ITTHU MULUKU OTTHOKINHA AWE

6. Ninsuwela sai wira Yehova omphavela wira atthu awe amukokhoreleke mwa enamuna yootthokiheya?

6 Yehova ootthokiha olumwenku mwa enamuna yooreera vanceene. Mwekeekhai, owo oniphavela wira atthu awe amukokhoreleke mwa enamuna yootthokiheya. Tthiri, Yehova oonivaha Biibiliya yoowo onniixuttiha moota woomukokhorela. Nto akhala wira ninnitthara malakiheryo onnivaha awe omurumeelaka Biibiliya ni otthokeya wawe, ninrowa okhalaka moohakalala.

7. Enamuna Biibiliya olempwale awe, enniixuttiha exeeni?

7 Biibiliya yoovaha yootthuneya enikhuma wa Muluku. Masi asomi akina, anihimya wira Biibiliya eliivuru ya apinaatamu erina myaha sa aYuda ni maKristau. Masi, Muluku tothanlale okathi aarowa awe olempwa Biibiliya, atthu yaarowa omulepa ni itthu saarowa aya olepa. Ti nthowa naya ninwerya ahu wiiwexexa iliivuru sa Biibiliya. Okhuma  eliivuru ya Maphattuwelo mpakha Wisupulula, Biibiliya onnooniherya wira waamukhumelela “osùlu”, yoowo waarowa wiiriha elapo okhala eparayiisu. Nave nihiixutta wira “osùlu” owo ti Kristu Yesu, nto Omwene awe onrowa wooniherya wira Yehova torina ehakhi ya waalamulela atthu otheene.Musome Maphattuwelo 3:15; Matheyo 6:10; Wisupulula 11:15.

8. Mwa inamuna xeeni aIsarayeli yaari aya ootthokiheya?

8 Okhala wira aIsarayeli yaanitthara Nlamulo Muluku aavanha awe, awo yaari ootthokiheya saana. Mwa ntakiheryo, yaahikhala ‘athiyana yarumela vamukhora w’ehema y’okumana n’Apwiya’. (Okhuma 38:8) Nave-tho, aIsarayeli yaahivahiwa malakiheryo a moota woothaama ni othaamiha etabernaakulu mwa enamuna yootthokiheya. Muhoolo mwaya, Mwene Davidi aahaatthokiha alipa-amukuttho ni aLevi wira avareke muteko empa ya Muluku. (1 Wahala 23:1-6; 24:1-3) Vaavo aIsarayeli yaamwiiwelela aya Yehova, owo aanaareeliha. Awo yaari ootthokiheya ni yaahikhalana murettele ni wiiraana.Otumererya 11:26, 27; 28:1-14.

9. Eseekulu yoopacerya, miloko saatthokihiwe sai?

9 Nave-tho, muloko wa eseekulu yoopacerya waari wootthokiheya. Naahikhala nikhuuru noolamulela, niire so, egrupu ya alopwana yaawo yaavaha malakiheryo miloko sotheene. Wanipacerya, egrupu eyo yaari arummwa paahi. Muhoolo mwaya, axitokweene akina yaaniirela mpantta. (Miteko 6:1-6; 15:6) Yehova aanaalakiherya anna a nikhuuru noolamulela ni akina yaakhaliherya wira alepe iwarakha saarina miruku ni malakiheryo yaavahiwa miloko. (1 Timótheyo 3:1-13; Tito 1:5-9) Nto, miloko saattottela sai mureerelo mwaha wootthara malakiheryo yaavahiwa aya ni nikhuuru noolamulela?

10. Exeeni yiiraneya vaavo miloko sa eseekulu yoopacerya saatthara aya malakiheryo a nikhuuru noolamulela? (Nwehe elatarato yoopacerya.)

10 Musome Miteko 16:4, 5. Eseekulu yoopacerya, anna akina yaanixukurya miloko yaaleelaka “ikano savahalyaya arummwa ni mahumu òYerusalemu”, eyo piiyo, nikhuuru noolamulela. Miloko saanitthara malakiheryo awo ni “sanlipiherya wamini: atthu òwamini yaninjerereya nihiku ti níhiku”. Exeeni ntakiheryo naya ninniixuttiha aya olelo-va, ni ninnikhaliherya sai mmulokoni mwahu?

NIIREKE MUNNITTHARA MALAKIHERYO?

11. Exeeni anipaka aya axitokweene ni arummwa oorumeela vaavo anaakhela aya malakiheryo a otthokeya wa Muluku?

11 Anna a Ekomisau ya Efiliyaali aahiiso Ekomisau ya Elapo, axitokweene a esirkwiitu, axitokweene ni arummwa oorumeela ahaana wiiwelela malakiheryo anivahiwa aya ni otthokeya wa Muluku. Tthiri Eliivuru ya mwaneene Yehova, enninleela otheene ahu wira nihaana owiiwelela ale anihoolela mmulokoni. (Otumererya 30:16; aHéberi 13:7, 17) Ale aniroromeleya wa Yehova, annitthara malakiheryo anivahiwa aya ni khaninlaseya. Hiyo khanimphavela okhala ntoko Diotrefe yoowo ahaattittimiha anna yaahoolela muloko. (Mmusome 3 Yohani 9, 10.) Vaavo nintthara ahu malakiheryo ninvahiwa ahu, ninnikhaliherya mmulokoni ovikaniha okhala murettele ni wiiraana. Tivonto, niikoheke so: ‘Kiireke kinnaakhaliherya anna ni arokora okhala oororomeleya wa Yehova? Kiireke kinnaakuva otthara  malakiheryo kinivahiwa aka ni otthokeya wa Muluku?’

12. Axitokweene ni arummwa oorumeela anithanliwa sai?

12 Mahiku ala, Nikhuuru Noolamulela nooturuka moota anithanliwa aya axitokweene ni arummwa oorumeela mmulokoni. Erevista Owehaweha 15 ya Novembro ya 2014 epantte eni: “Makoho Anikohiwa ni Ale Anisoma Irevista Sahu”, ennitthokiherya wira eseekulu yoopacerya, nikhuuru noolamulela naahaavaha owerya axitokweene a esirkwiitu wira yaathanleke axitokweene a mmulokoni ni arummwa oorumeela. Tivonto, okhuma mweeri wa Setembro 2014, axitokweene a esirkwiitu annitthara malakiheryo awo. Vaavo axitokweene a mmulokoni animuthanla aya munna wira okhale mutokweene aahiiso murummwa oorumeela, mutokweene a esirkwiitu onniimananiha omusuwela munna owo ni emusi awe. Mwa ntakiheryo, pooti olaleerya hoothe ni munna owo othanliwe. (1 Timótheyo 3:4, 5) Nuumala opaka eyo mutokweene a esirkwiitu onnithukumana ni axitokweene a muloko. Nto annithokorerya saana Soolempwa sinooniherya mikhalelo sinireerela okhalana mutokweene aahiiso murummwa oorumeela.1 Timótheyo 3:1-10, 12, 13; 1 Pedru 5:1-3.

Axitokweene anninivaha malakiheryo anikhuma mBiibiliyani okhala wira aniphavela waakiherya ni okhapelela muloko

13. Ninrowa wooniherya sai wira ninnitthara malakiheryo ninvahiwa ahu ni axitokweene?

13 Axitokweene anninivaha malakiheryo anikhuma mBiibiliyani okhala wira aniphavela waakiherya ni okhapelela muloko. Nihaana owiiwelela maana malakiheryo aya anninikhaliherya. (1 Timótheyo 6:3) Eseekulu yoopacerya, yaahikhala atthu akina ‘yetta vohiloka’. Atthu awo khiyaavara muteko masi yaikeliha myaha sahaawiira mpantta. Axitokweene yaneererya waattaruxa masi atthu awo yaanikhootta. Paulo aahivaha malakiheryo a moota wowaathokorerya atthu awo. Owo aahimmye wira: “Mmuhiye akhaleke mekhawe”. Anna yahaana ohiya wataana ni mutthu owo masi ahimuthokoreryaka ntoko nwanani. (2 aTesalonika 3:11-15) Nave-tho, olelo-va axitokweene ahaana waakhaliherya ale ahinicalela malamulo a Muluku, mwa ntakiheryo, ale anuuryana ni mutthu oohibatiziwa. (1 aKorinto 7:39) Akhala wira mutthu owo khoniphavela ohiya mweettelo owo woohiloka, axitokweene pooti othanla olavula mwaha atthokiheryaka moota mweettelo owo onrowa aya owiiriha akina onyohola muloko. Munrowa woonela sai, akhala wira axitokweene a muloko anyu annilavula mwaha ntoko owo? Ankhi akhala wira munnimusuwela mutthu ene, niireke munrowa ohiya wataana nuuwo? Wira siiso, pooti omukhaliherya mutthu owo woona wira mweettelo awe ti woohiloka ni khonimusivela Yehova, nto eyo pooti omwiiriha ohiya mweettelo awe. [1]—Nwehe enoota.

 NVIKANIHE WIIRIHA MULOKO OKHALA WOOLOKA, WA MURETTELE NI WOWIIRAANA

14. Ninrowa okhaliherya sai muloko ovikaniha okhala wooloka?

14 Nuulumo na Muluku ninninleela ele enireerela ahu opaka wira mmulokoni sihikele itthu soohiloka. Nkahaya muthokorerye ele yiiraneyale oKorinto. Paulo aanaaphenta anna ni arokora a muloko ole. Nave aahaakhaliherya anamunceene a yaawo wiixutta ekeekhai. (1 aKorinto 1:1, 2) Tivonto, nkahaya muupuwele moota oonenle awe nuumala osuwela wira ookhala mutthu aararuwa, nto anna amuhiya mutthu owo ovikanihaka okhala mmulokoni! Paulo aahaaleela axitokweene wira: “Mmunnyererye mulopwan’owo Satana”. Axitokweene ale yahaana omoomola mmulokoni, niire so, omukumiha mutthu owo. (1 aKorinto 5:1, 5-7, 12) Olelo-va, axitokweene pooti omukumiha mutthu yoole otthenke ni ohimphavela ottharuwa. Akhala wira eyo enimwiiraneya, ninrowa omuthokoreryaka sai mutthu okumihiwe ntoko Soolempwa sinihimya aya? Napaka siiso, nnimwiiriha muloko ovikaniha okhala wooloka. Nave nnoomukhaliherya mutthu owo woona wira ohaana ottharuwa ni onvekela Yehova wira omulevelele.

15. Ninrowa ovikaniha sai okhalana murettele mmulokoni?

15 Waahikhala muxankiho mukina muloko wa oKorinto. Atthu akina yanaakaxari annaya otribunaali. Paulo aakonhe so: “Khino vamuhirerela ovilela wireliwa yotakhala?” (1 aKorinto 6:1-8) Olelo-va, aakhala anna akina a mmulokoni avarihanne omweetta nakoso, masi aapwata aahiiso ahoona wira munna yaamweettana aya nakoso ohaawoka. Awo annaakaxari annaya otribunaali. Nto eyo yakhumelela, pooti owiiriha atthu akina omulavula moohiloka Yehova ni atthu awe. Nave pooti okumiherya mixankiho mmulokoni. Eliivuru ya mwaneene Muluku enninikhaliherya woona moota woovikaniha okhalana murettele ni annihu, hata nrowaka opweteiwa musurukhu. [2] (Nwehe enoota.) Tthiri, Yesu oohimya moota woophuka mixankiho suulupale aahiiso ohiiwanana. (Mmusome Matheyo 5:23, 24; 18:15-17.) Vaavo nniiwelela ahu malakiheryo awe, nnoovikaniha okhalana murettele ni wiiraana mmulokoni.

16. Nthowa xeeni atthu a Muluku aryaaya oowiiraana?

16 Eliivuru ya mwaneene Yehova enihimya so: “Mòne: ti yorera ni ti yosivela tthiri wira amusi [anna] ekhaleke vamosá”. (Esalimo 133:1) Vaavo yaamwiiwelela aya Yehova, aIsarayeli yaanikhala ootthokiheya ni oowiiraana. Muluku aahaaleela atthu awe wira: “Kinimothukumanyani othene anyu, ntoko sinthukumanyiwaya ipwittipwitthi munsisini”. (Mikeya 2:12) Nave-tho, Yehova  aahileiherya wira atthu awe yaarowa wiixutta ekeekhai ya Biibiliya ni omurumeela mowiiraana. Owo aahimmye so: “Numalá, kinoreriha iyano s’amalapo, wira othene aya ekilompeke miyo pahi, ehalompeké-tho amuluku èthiru, ni wira ekirumeleke ni murima mmosaru”. (Sofoniya 3:9) Tthiri ninnixukhurela okhala wira ninnimukokhorela Yehova mowiiraana!

Axitokweene ahaana omukhaliherya ole ‘ophwanyiwe ìraka etthu yotakhala’ (Nwehe ettima 17)

17. Axitokweene ahaana opaka exeeni akhala wira munna aahiiso murokora mmulokoni onnittheka?

17 Akhala wira munna aahiiso murokora onnittheka, axitokweene ahaana waakuvela omukhaliherya moophenta. Awo annisuwela wira Yehova oniphavela wira akhapeleleke muloko wira sihikele itthu sootakhala ni ovikaniheke okhala wooloka ni wowiiraana. (Miruku 15:3) Paulo aanaaphenta vanceene anna a oKorinto, ni aahaattaruxa, ntoko ninsoma ahu ewarakha awe yoopacerya. Ninnisuwela wira axitokweene a muloko ole yaahitthara malakiheryo a Paulo mwaha woowi nuuvira myeeri vakhaani, owo aahaattottopela ntoko ninsoma ahu ewarakha awe ya nenli. Akhala wira munna aahiiso murokora ‘òphwanyiwa ìraka etthu yotakhala’, axitokweene ahaana omukhaliherya mooreerela murima.aGalasia 6:1.

18. (a) Moota xeeni malakiheryo a Nuulumo na Muluku yaakhalihenrya aya miloko eseekulu yoopacerya? (b) Mwaha onittharelana, ninrowa othokorerya exeeni?

18 Ekeekhai wira vaavo maKristau a eseekulu yoopacerya yaatthara aya malakiheryo a Eliivuru ya mwaneene Muluku, miloko saya saakhala sooloka, sa murettele ni sowiiraana. (1 aKorinto 1:10; aÉfeso 4:11-13; 1 Pedru 3:8) Nto eyo yaanaakhaliherya anna ni arokora omulaleerya ihapari sooreera “khula mutthu vathí-va”. (aKolosi 1:23) Nave olelo-va, atthu a Yehova tootthokiheya ni oowiiraana, ni annaalaleerya ihapari sooreera atthu otheene anikhala valaponi. Mwaha onittharelana, onimooniherya mathowa makina anooniherya wira yoophavela ahu yuulupale ti onvuwiha Mukhulupale Pwiya Yehova, ni wiiwelela malakiheryo a Eliivuru awe, eyo piiyo, Biibiliya.Esalimo 71:15, 16.

^ [1] (ettima 13) Nwehe eliivuru Organizados para Fazer a Vontade de Jeová, ipaaxina 134-136.

^ [2] (ettima 15) Itthu sikina sinimwiiriha muKristau omukaxari muKristau mukina otribunaali, nwehe eliivuru eni: “Mukhaleke Mophentani Mwa Muluku”, ipaaxina 223, enoota.