Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Maio 2016

Niireke Biibiliya Nlelo Onnirukunuxa Okumi Anyu?

Niireke Biibiliya Nlelo Onnirukunuxa Okumi Anyu?

“Murukunuxe mukhalelo anyu”.AROM. 12:2.

ISIPO: 29, 52

1-3. (a) Itthu xeeni nlelo sinnixankiha oturuka, hata nuumala obatiziwa? (b) Akhala wira opaka marukunuxo nuumala obatiziwa onninivila, makoho xeeni anireerela ahu wiikoha? (Nwehe ilatarato soopacerya.)

NUUMALA wiixutta ekeekhai, etthu Kevin [1] aaphavela awe, waari olipiha ompatthani awe ni Yehova paahi. Ohinatthi wiixutta ekeekhai, aahiviriha iyaakha sinceene oweettaka axooku a musurukhu, ompaha soona, ohapaliwa, ni olya mirette soohapala. Nto wira omuhakalalihe Muluku, Kevin aahaana ottharuwa itthu iyo soohiloka. Mwaha wa omuroromela Yehova, ni olipihiwa ni Nuulumo na Muluku, owo aahiwerya ottharuwa.aHéb. 4:12.

2 Nto niireke Kevin aahihiya opaka marukunuxo, nuumala obatiziwa? Nnaari, okhala wira nlelo aahaana wiimananiha okhalana ni olokiherya mikhalelo sawe sa eKristau. (aÉf. 4:31, 32) Mwa ntakiheryo, aahoona wira vaanitepa omuxankiha okhala oovola murima. Owo onihimya so: “Wiixutta okhala oovola murima waanitepa okivila, ovikana ottharuwa itthu soohiloka kaapaka aka!” Ovekela mooluttuweliwa ni omutokosa saana Biibiliya, woomukhaliherya Kevin opaka marukunuxo.

 3 Ntoko Kevin, anceene a hiyo nahaana opaka marukunuxo maalupale nihinatthi obatiziwa, wira nikhaleke moovarihana ni sooruma sa Biibiliya. Nuumala obatiziwa, nihoona wira nohaana ovikaniha opaka marukunuxo, hata yaale macikhaani, wira omutthu ahu otepeke olikana ni omutthu wa Yehova ni Kristu. (aÉf. 5:1, 2; 1 Ped. 2:21) Mwa ntakiheryo, woonasa wene noopacerya omakela wunlaseya, omoova pinaatamu, owaapa anna, wala sootteettheya sikina. Niireke vannitepa woovilani ohiya mikhalelo iyo saamukhaani soohiloka? Akhala wira ti siiso, nyuwo pooti wiikohaka so: ‘Koopaka marukunuxo maalupale, nto xeeni vanikivila aya opaka marukunuxo macikhaani? Kipakeke exeeni wira Biibiliya ovikaniheke orukunuxa okumi aka?’

NYUWO MUNOOWERYA OMUHAKALALIHA YEHOVA

4. Xeeni vahiniwerya ahu omuhakalaliha Yehova mwa itthu sotheene?

4 Okhala wira ninnimphenta Yehova, hiyo nimphavela opakaka itthu sotheene sinimuhakalaliha. Masi moothananiha, khaninwerya omuhakalaliha Muluku okathi wotheene mwaha wa ohimalela wahu. Mukhalelo ahu onlikana ni wa murummwa Paulo, yoowo olempe so: “Otthuna wira sorera, kinniwerya: nto wettela seiyo nkinwerya”.aRom. 7:18; Yak. 3:2.

5. Itthu xeeni soohiloka nihiyale ahu nihinatthi obatiziwa, masi itthu xeeni sikina sinnixankiha mwaha wa ohimalela wahu?

5 Hiyo noottharuwa ovara itthu soohiloka seiyo saarowa onooceeliha wiirela mpantta muloko wa eKristau. (1 aKor. 6:9, 10) Hata vari siiso, nlelo na atthu oohimalela. (aKol. 3:9, 10) Tivonto, nihuupuweleke wira nuumala obatiziwa, wala ovira iyaakha sinceene nibatiziwe ene, khaninrowa-tho ovonyaka, otthikela soovonya sa khalai, wala okhalana miyuupuwelo soohiloka. Itthu sikina, onnivira okathi munceene nihinatthi ohiya.

6, 7. (a) Exeeni ennikhaliherya okhala apatthani a Yehova, hata nryeene oohimalela? (b) Xeeni vahinitthuneya ahu woovelela onvekela Yehova onilevelela?

6 Ohimalela wahu ohinikhoottiherye okhala apatthani a Yehova wala ovikaniha omurumeela yena. Nkahaya muupuwele ela: Okathi Yehova aanisuwelihale awe ekeekhai, owo aanisuwela wira ikwaha sikina naarowa ovonyaka. (Yoh. 6:44) Okhala wira Muluku onnisuwela mikhalelo sahu ni onniweha eri vamurimani vahu, nto yena aanisuwela itthu saarowa onixankihaka mwaha wa ohimalela wahu. Hata vari siiso, Yehova aaniphavela wira mukhale mpatthani awe.

7 Yehova onniniphenta vanceene, tivonto oonivaha Mwanawe oophentiwa ntoko mukuttho wowoopola. (Yoh. 3:16) Okathi onivonya ahu, nihaana onvekela Yehova wira onlevelele. Mwaha wa yowoopola, hiyo pooti ororomelaka wira onoonilevelela ni nnoovikaniha okhala apatthani awe. (aRom. 7:24, 25; 1 Yoh. 2:1, 2) Niireke nihaana woovelelaka ottottela mureerelo yowoopola, mwaha woowi nniixoona okhala anamattheka? Nnaari! Wuupuwela siiso, waarowa olikanaka ni okhootta onyawa, matata ahu anananre ene. Yehova ohaavaha yowoopola apinaatamu anittharuwa soottheka saya. Ninnixukhurela yowoopola nivahiwe ahu, maana ninniwerya okhalana ompatthani wooloka ni Yehova, hata nryeene oohimalela.Mmusome 1 Timótheyo 1:15.

8. Xeeni vahinireerela aya ohicalela sootteettheya sahu?

8 Ekeekhai wira hiyo khanimmakela woothererya wala ohicalela sootteettheya sahu. Olipiha wataana wahu ni Yehova onihela muhina omutakiha yena ni Yesu. Nave-tho  onihela muhina okhalana mikhalelo anivekela aya. (Esal. 15:1-5) Nohaana owehaweha mikhalelo sahu soohiloka ni omala-maliha sotheene, vaweryaneya vale. Hata nibatiziwe ene khalai wala ninaano, nohaana ovikaniha olokiherya omutthu ahu.2 aKor. 13:11.

9. Ninsuwela sai wira vanniweryaneya ovikaniha owara omutthu musya?

9 Nihaana ovikaniha olokiherya omutthu ahu ni ‘owara omutthu musyá’. Paulo aahiwuupuxerya maKristau akhwaawe oriki: “Tivó muhana ohiya otthara makhalelo anyu a khalai, orula omutthu wa khalai, yowo onrowa opweteya mwaha wa sotthuna saya sowototha. Muhana wikhaliha atthu a nanano mmirukuni mwanyu ni murohoni mwanyu, n’unwara mutthu musyá, opattuxiwe alikanyihiwaka ni Muluku, okhalihiwe naxariya, orerihiwe murima n’ikekhai”. (aÉf. 4:22-24) Nuulumo noowi “wikhaliha atthu a nanano” nnooniherya wira okhalana omutthu musya khonimala. Masu awo toolipiha, maana anooniherya wira hata nibatiziwe ene khalai wala ninaano, otheene ahu nihaana wiimananiha okhalana ni olokiherya mikhalelo sahu sa eKristau. Tthiri Biibiliya onoowerya orukunuxa okumi ahu.

XEENI VARYAAYA WOOVILA?

10. Exeeni enitthuneya ahu opaka wira nivikaniheke opaka marukunuxo, nikhaliheriwaka ni Biibiliya, ni makoho xeeni anikhumelela?

10 Wira Nuulumo na Muluku nivikaniheke orukunuxa okumi ahu, nihaana wiimananiha vanceene. Masi, xeeni vanivekeliwa ahu wiimananiha vanceene? Vakhala wira Yehova onnireeliha wiimananiha wahu, nto xeeni vahinikhweya aya opaka marukunuxo? Niireke khivaaweryaneya Yehova opaka itthu mwa enamuna ennikhweiherya opaka itthu sooloka?

11-13. Xeeni Yehova onilipelela awe wira niimananiheke oxintta sootteettheya sahu?

11 Nuupuwelela makhalelo a olumwenku, nnooweha wira Yehova tooweryexa. Mwa ntakiheryo, oopaka nsuwa, nenlo wa khula esegundo, ninkumiherya waarya wuulupale ni oviha vanceene. Waarya ni oviha vakhaani paahi toniwerya ophiya elapo ya vathi, masi onniphiyerya okhaliherya okhala okumi valaponi. (Esal. 74:16; Yes. 40:26) Yehova onnaavaha owerya arumeyi awe, okathi aniphavela aya. (Yes. 40:29) Tthiri, Yehova aaphavenle, anwerya opaka itthu mwa enamuna ennikhweiherya oxintta sootteettheya sahu ni ohiya wuupuwela itthu soohiloka. Nto xeeni ohiiraka siiso?

12 Yehova oonivaha othanla mootaphuwa. Nto othanla opaka yootthuna ya Muluku ni wiimananiha vanceene omurumeela, ninnooniherya omphenta wahu wuulupale ni wira nimphavela omuhakalaliha. Nave-tho ninnooniherya wira ninnikhaliherya okhulupale awe. Okhala wira Satana onnimootherya Yehova, nto vaavo vaniimananiha ahu omwiiwelela Muluku, owo onnihakalala ni oxukhurela vanceene. (Yobi 2:3-5; Mir. 27:11) Masi akhala wira Yehova onoonikhweiherya owanana sootteettheya sahu, nto niireke naamukhalana eparakha ya omooniherya omwiiwelela wahu ni murima wotheene?

13 Yehova onihimya wira nihaana wiimananiha vanceene wira ntakiheke mikhalelo sawe. (Mmusome 2 Pedru 1:5-7; aKol. 3:12) Nave-tho onlipelela wira nihaana wiimananiha vanceene wira nikhapeleleke muupuwelo ahu. (aRom. 8:5; 12:9) Naimananiha ni khikhumela saana, ninnihakalala vanceene osuwela wira Biibiliya nlelo onnirukunuxa okumi ahu.

 MWEEMERERYE NUULUMO NA MULUKU ORUKUNUXAKA OKUMI ANYU

14, 15. Nipakeke exeeni wira nikhalane mikhalelo sinimusivela Yehova? (Nwehe ekaaxa eni: “ Biibiliya ni Mavekelo Soorukunuxa Okumi Aya.”)

14 Nipakeke exeeni wira ninnuuherye mikhalelo sinimusivela Yehova? Naphavela olokiherya omutthu ahu, nipakeke eyo moovarihana ni malakiheryo a Muluku. ARoma 12:2 onihimya so: “Muhitthareké mwettelo w’atthu a vathí, masi murukunuxe mukhalelo anyu, mùlule osuwela wanyu, wira nwerye osuwela sintthunawe Muluku, muthanlaka etthu ekhanle yorera, enimusivela Muluku ni ya xariya”. Yehova onnirumeela Nuulumo nawe ni munepa wootteela wira onikhaliherye osuwela yootthuna awe, opaka yeeyo, ni olokiherya okumi ahu wira nikhaleke moovarihana ni malamulo awe. Nto nihaana omusoma Biibiliya ni wuupuwelela ele enisoma ahu khula nihiku, ni onvekela munepa awe wootteela. (Luka 11:13; aGal. 5:22, 23) Niira siiso, Yehova onoonikhaliherya osuwela itthu sinimusivela, ni nnoowerya okhalana muupuwelo awe. Nto, khula etthu enuupuwela ahu, enilavula ahu ni enipaka ahu enrowa otepaka omusivela Yehova, ni nnoowerya weettiherya makhalelo ahu ahilimpe. Masi hata vari siiso, nohaana ovikaniha owanana sootteettheya sahu.Mir. 4:23.

Muthanleleke myaha sinikumiheriwa ni iliivuru sahu, wala soolepa sa mBiibiliyani, seiyo sinilavula mwaha onooxankihani, ni nvareryeke nuuvira okathi vakhaani (Nwehe ettima 15)

15 Ohiya paahi omusoma Biibiliya khula nihiku, nihaana-tho osoma iliivuru sahu sinimutthokiherya Biibiliya, wira niweryeke otakiha mikhalelo sooloka sa Yehova. Akina annoona oreerela othanlela myaha sinikumiheriwa ni irevista Owehaweha wala Despertai!, aahiiso soolepa sa mBiibiliyani, seiyo sinilavula mwaha onaaxankiha ni sinithokorerya moota wookhalana mikhalelo sa eKristau.

16. Xeeni vahinitthikela ahu ottuli akhala wira khanniwerya opaka marukunuxo mowaakuveya?

16 Vannikuxa okathi wira niixutte otakiha mikhalelo sa Yehova. Okhalana mikhalelo sooloka khonimala. Nto nohaana opixa murima, okathi oneemererya ahu wira Biibiliya orukunuxe omutthu ahu. Wanipacerya, pooti otthuneya wiilimaleliha opaka ele Biibiliya eniixuttiha awe. Masi okathi onirowa ahu otepaka wuupuwela ni opaka itthu ntoko Yehova oniphavela awe, nto vanrowa otepaka onikhweela otakiha mikhalelo sa Yehova.Esal. 37:31; Mir. 23:12; aGal. 5:16, 17.

MUUPUWELELEKE ITTHU SOOHAKALALIHA SA MUHOOLO

17. Navikaniha ororomeleya wa Yehova, nlipeleleke exeeni muhoolo?

17 Arumeyi a Yehova annilipelela okathi onrowa aya okhala oomalela ni omurumeelaka Yehova okathi ohinimala. Okathi  owo khaninrowa owananaka sootteettheya sahu, masi vanirowa okhweyaka omutakiha Yehova. Hata okathi ola onikhala ahu, vanniweryaneya omurumeela Yehova mwaha wa mukuttho wowoopola wa Yesu. Nnaamwi nihimalenle, vanniweryaneya omuhakalaliha Yehova akhala wira nnimwiimananiha weemererya Nuulumo nawe wira nipake marukunuxo mookumini mwahu.

18, 19. Ninsuwela sai wira Biibiliya onoowerya orukunuxa okumi ahu?

18 Kevin, yoole oromoliwe wanipacerya, aahiimananiha vanceene wira ovukule waakuva onanariwa. Aanuupuwelela ni ovarihela muteko malakiheryo a Biibiliya, ni aaheemererya okhaliheriwa ni annawe mmulokoni. Mpakha va, Kevin ohiimananiha vanceene ni onniwerya wiihiiha. Nuuvira okathi, aahiphwanelela okhala murummwa oorumeela, nto vano soovira iyaakha 20 onirumeela awe ntoko mutokweene a mmulokoni. Masi hata vari siiso, mpakha olelo-va onnivikaniha wiimananiha wira ohitthikele ottuli.

19 Ntoko Kevin, Biibiliya onoowerya onikhaliherya olokiherya okumi ahu. Tivonto, nivikaniheke weemererya Nuulumo na Muluku wira nipakeke marukunuxo mookumini mwahu, maana wira siiso nnootepa omwaattamela Muluku. (Esal. 25:14) Okathi vanimoona ahu Yehova onireelihaka, ninnisuwela tthiri wira Biibiliya onoovikaniha orukunuxa okumi ahu.Esal. 34:9.

^ [1] (ettima 1) Nsina nooturukiwa.