Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Junyo 2016

Niireke Munnimweemererya Yehova Owuupani?

Niireke Munnimweemererya Yehova Owuupani?

“Nyuwo atthu a Isarayeli, muri mmatatani mwaka, mulikanaka n’uloko ori mmatatani mwa mulipa-òwupa”.—YER. 18:6.

ISIPO: 23, 22

1, 2. Xeeni Biibiliya onihimya awe wira ‘Muluku animphenta’ Daniyeli, nto ninrowa omutakiha sai Daniyeli?

OKATHI aYuda yaaroihiwe aya weepotthani oBabilonia, awo yaakhala muttetthe woosareya ilatarato sa amuluku eethiru, ni atthu a elapo ele yaakokhorela minepa sootakhala. Masi aYuda akina oororomeleya, ntoko Daniyeli ni apatthani awe araru, yaahikhootta wumpwa ni atthu a oBabilonia. (Dan. 1:6, 8, 12; 3:16-18) Daniyeli ni apatthani awe yaahilakela omukokhorela Yehova paahi ntoko Mulipa-aawuupa. Nnaamwi Daniyeli aakhala muttetthe woohiloka okathi munceene wa okumi awe, masi nlaikha na Muluku naahimuhimeerya wira: “Muluku onnophentani”.Dan. 10:11, 19.

2 WIsarayeli a khalai, mulipa-oowuupa myaapu aanirumeela nifoorume wira opake etthu aaphavela awe. Olelo-va, arumeyi a Yehova annisuwela wira Yehova tori Mukhulupale a olumwenku wotheene, ni onniwerya owuupa atthu a maloko otheene. (Mmusome Yeremiya 18:6.) Nave-tho onniwerya omuupa khula mutthu. Masi owo khonimukhanyererya mutthu opaka marukunuxo. Nrowe niwehe inamuna tthaaru sa moota woovikaniha okhala ntoko oloko wowoolowa mmatatani mwa Muluku: (1) Ninrowa osyaka sai mikhalelo  saarowa oniiriha okhootta miruku sa Yehova? (2) Ninrowa okhalana sai mikhalelo sinrowa onikhaliherya okhala ntoko oloko wowoolowa ni wiiwelela? (3) Anamuyari a eKristau anrowa omwiiwelelaka sai Muluku okathi aniwuupa aya anaaya?

MUSYAKE ITTHU SAAROWA WIIRIHA MURIMA ANYU OKHALA WOOLIPA

3. Mikhalelo xeeni sikhanle oowiiriha mirima sahu okhala soolipa? Nvahe ntakiheryo.

3 Eliivuru ya Miruku 4:23 enihimya so: “Nwehererye mukhalelo wa mmurimani mwanyu: mukhalel’owo t’unkhumaya ekumi anyu”. Mikhalelo xeeni sintthuneya ahu osyaka? Mikhalelo iyo sinihela muhina wiixinnuuha, omakela opaka etampi ni ohaamini. Naahikhalane ephoole, mikhalelo iyo pooti oniiriha okhala atthu oohiiwelela ni omurukunuwela Muluku. (Dan. 5:1, 20; aHéb. 3:13, 18, 19) Eyo ti etthu yamwiiranenle Oziya, mwene a oYuda. (Mmusome 2 Wahala 26:3-5, 16-21.) Wanipacerya, “owo ahìra sorera vamaithoni v’Apwiya”, ni ‘animutthara Muluku’. Masi, “mwaha w’owerya wawe, murim’awe wahisareya wisona”, nnaamwi owerya iwo waakhuma wa Muluku! Hata aaheererya opaha erupani mpaani mwa Muluku, nnaamwi muteko owo waavariwa paahi ni alipa a mukuttho a nihimo na Aroni. Nuumala alipa a mukuttho omukoha, Oziya aahinanariwa vanceene. Nto exeeni yaakhumelenle? Yehova aahimuulihiha muru vanceene Oziya, ni aahirweela maretta mpakha okhwa.Mir. 16:18.

4, 5. Exeeni enrowa onikhumelela naahisyakeke wiixinnuwiha? Nvahe ntakiheryo.

4 Naahisyake wiixinnuuha, pooti opacerya wuupuwela wira na atthu ooloka waavikana akina, nto nnakhootta waakhela miruku sa mBiibiliyani sinvahiwa ahu. (aRom. 12:3; Mir. 29:1) Nithokorerye ntakiheryo na mutokweene mmosa oniitthaniwa Jim. Nihiku nimosa, aahivaanyihana voohimya sa mwaha mmosa ni axitokweene akhwaawe. Jim onihimya so: “Kaahinanariwa vanceene. Kahaaleela axitokweene ale wira khiyaarina exariya nto okhuma vaavale, kaahihiya omurumeela Yehova”. Jim aahiviriha iyaakha muloko ohimurumeelaka Yehova. Owo onneemererya oriki: “Wiixinnuwiha waka waahikihonona, nto kaahipacerya onvaha nthowa Yehova mwaha wa itthu sotheene saakiiraneela. Mwa iyaakha sinceene, anna yaanikixukurya wira akilipihe, masi miyo kaanikhootta nikhaliheryo naya”.

5 Yowiiraneya ya Jim enooniherya wira wiixinnuuha onniniiriha ophavela waakiherya mweettelo ahu woohiloka. Nto eyo yiiraneya, hiyo khaninkhala-tho ntoko oloko wowoolowa. (Yer. 17:9) Jim onihimya so: “Kaamakela wuupuwela wira anna ale yaahivonya”. Niireke mootoko otthekeliwa ni munna mmulokoni wala opweteiwa iparakha sanyu? Exeeni mwaapanke anyu? Niireke mwahooniherya wiixinnuuha? Wala mwaahoona wira etthu yootthuneya ti okhalana murettele ni anninyu ni ovikaniha okhala oororomeleya wa Yehova?Musome Esalimo 119:165; aKolosi 3:13.

6. Exeeni enrowa oniiraneela akhala wira nimmakela opaka itampi?

6 Mutthu onimakela opaka itampi ni oniipithiha itampi iyo, pooti onvila weemererya miruku onivahiwa awe ni Muluku. Nto, eyo enoomwiiriha woona ovila ohiya opaka itampi. Munna mmosa aahimmye wira nuuvira okathi, yowuupuxerya ya murima awe khiyamphukela-tho mwaha wa mweettelo awe woohiloka. (Mus. 8:11) Munna mukina, yoowo aarina yoolema ya oweha epornografia, aaheemererya oriki: “Kaahipacerya okhalana yoolema ya owaapa axitokweene a mmulokoni”. Yoolema awe yaanihonona mukhalelo awe womunepani. Muhoolo mwaha, anna yaahisuwela yoolema awe ele, nto aahikhaliheriwa. Otheene ahu na alipa oottheka. Masi napacerya owaapa anna wala wiipithiha  mweettelo woohiloka, ohiya ophavela nikhaliheryo na Muluku, murima ahu pooti opacerya okhala woolipa.

7, 8. (a) AIsarayeli a khalai yoonihenrye sai okhalana murima woolipa ni ohaamini? (b) Exeeni eniixutta ahu?

7 Okathi Yehova aawooponle awe aIsarayeli wEjiitu, owo aahaapakela miiriirya sinceene sootikiniha. Hata vari siiso, okathi yaattamela aya Elapo Yooleiheriwa, yaahipacerya wuumiha mirima saya. Ohiya omuroromela Yehova, awo yaahipacerya woova ni yaaninvaanyiha Moise. Hata yaaniphavela ohokolowela wEjiitu, weiwo yaari aya ipottha! Etthu eyo yaahimunanara vanceene Yehova. Nto owo aahimmye so: “Nihiku xeni atthu ala antthunaya ottharuwa okiveha?” (Moth. 14:1-4, 11; Esal. 78:40, 41) Mwaha wa olipa waya murima ni ohaamini, atthu ale otheene yaahikhwa moothakoni.

8 Olelo-va nnaattamela ahu elapo esya, waamini wahu onnitepa weehereriwa. Tivonto, nihaana ovarerya waamini wahu waalimpe ene. Mwa ntakiheryo, nihaana othokorerya moolumo a Yesu alempwe eliivuru ya Matheyo 6:33. Mwiikoheke so: ‘Kiireke soolukama ni soothanla saka sinnooniherya wira kinnikupali masu ala? Kiireke kaamulakela ocompa mithukumano aahiiso muteko woolaleerya, wira kiphwanye musurukhu munceene? Kaarowa opaka exeeni akhala wira kinivekeliwa ovara muteko okathi munceene? Kiireke kaarowa weemererya wira olumwenku ola okuupe, ni okihiihe omurumeela Yehova?’

9. Xeeni vanitthuneya aya wiivarerya wira ‘mòneke mwari ni wamini’, nto vaniweryaneya sai opaka eyo?

9 Vakhala wira khanintthara ele Biibiliya enihimya awe voohimya sa wataana woohiloka, moota woowoonela atthu ookumihiwa mmulokoni wala matthekulelo oohiloka, murima ahu pooti okhala woolipa. Exeeni enrowa anyu opaka akhala wira murima anyu woopacerya okhala woolipa? Muhaana ovarerya waamini wanyu moohipisa! Biibiliya onihimya so: “Mukoheke murim’anyu: mòneke mwari ni wamini. Mwilamuleke mmansinyu”. (2 aKor. 13:5) Mwiivareryeke ni murima wotheene, murumeelaka Nuulumo na Muluku wira nookhaliheryeni olokiherya muupuwelo anyu.

NVIKANIHEKE OKHALA NTOKO OLOKO WOWOOLOWA

10. Exeeni enrowa onikhaliherya okhala ntoko oloko wowoolowa mmatatani mwa Yehova?

10 Wira onikhaliherye ovikaniha okhala ntoko oloko wowoolowa, Muluku oonivaha Nuulumo nawe, muloko wa eKristau ni muteko woolaleerya. Ntoko sisaale maasi anoolowiha aya oloko, omusoma Biibiliya khula nihiku ni wuupuwelela ele enisoma ahu, onoonikhaliherya okhala oowoolowa mmatatani mwa Yehova. Mwa ntakiheryo, Yehova aanaaruma mamwene a wIsarayeli olepa ekoopiya ya Nlamulo na Muluku ni osomaka khula nihiku. (Otum. 17:18, 19) Arummwa a Yesu yaanisuwela wira osoma Soolempwa ni wuupuwelela seiyo, wamwaakhaliherya ovara muteko aya woolaleerya. Okathi yaalepa aya iliivuru sa Biibiliya, awo yaaniromola Soolempwa sa eHeeberi ikwaha sinceene, ni yaanaatumererya atthu akina osoma Soolempwa. (Mit. 17:11) Olelo-va, ninnoona efaita yuulupale erina aya osoma ni wuupuwelela Nuulumo na Muluku khula nihiku. (1 Tim. 4:15) Opaka eyo onoonikhaliherya ovikaniha okhala oowiiyeviha, nto Yehova onoowerya onuupa.

Murumeeleke soovaha sa Muluku wira nvikaniheke okhala ntoko oloko wookhweya wuupeya (Nwehe ittima 10-13)

11, 12. Yehova onirumeela sai muloko wa eKristau wira onuupe moovarihana ni sootthuneya sahu? Nvahe ntakiheryo.

11 Yehova onnirumeela muloko wa eKristau wira onuupe moovarihana ni sootthuneya sahu. Jim, yoole omuromonle ahu woopaceryani, aahipacerya olokiherya muupuwelo awe okathi aaxukuriwe awe ni mutokweene mmosa aamureerenle murima. Jim onihimya so: “Munna ole khonatoko okivaha nthowa wala okiphukela mwaha wa mukhalelo aka. Khaatonko okivaha  nthowa wala okiphukela mwaha wa mukhalelo aka. Ohiya-vo, aanikireerela murima ni aaniphavela okikhaliherya ni murima wotheene”. Nuuvira myeeri miraru, mutokweene ole aahimulattula Jim orowa omuthukumanoni. Jim onihimya so: “Muloko waahikaakhela saana, ni ophenta waya ti waakikhalihenrye ohokolowa. Kaahipacerya woona wira moonelo aka khahiyo teri etthu yootepa otthuneya. Anna ni mwaaraka, yoowo ahaahiyale omurumeela Yehova, yaahikikhaliherya vanceene wira kihokolowele omurumeela Yehova. Nave kaahilipihiwa vanceene osoma myaha saakumiheriwe erevista A Sentinela a 15 a Novembro, 1992, miru sini: ‘A culpa não é de Jeová’ ni ‘Sirva lealmente a Jeová’.

12 Nuuvira okathi, Jim aahithanliwa-tho okhala mutokweene. Okhuma vaavo, Jim onnaakhaliherya anna arina mixankiho simosaru aarina awe, wira aphuke ni akhalane mukhalelo womunepani wooloka. Owo onnimaliha oriki: “Miyo kuupuwela wira kaahilipa momunepani, masi nkaalimpe! Kinnithanana vanceene, maana kaaheemererya wira wiixinnuuha ottiyelele muupuwelo aka, khuhiyoona itthu siri sootthuneya, masi kinathipelela owehexexa soovonya sa akina”.1 aKor. 10:12.

13. Muteko woolaleerya onrowa onikhaliherya okhalana mikhalelo xeeni, ni mireerelo xeeni sikhanle ookhumelela?

13 Muteko woolaleerya onrowa onuupa sai ni onikhaliherya okhala atthu ooloka? Waalaleerya akina ihapari sooreera, onoonikhaliherya okhala oowiiyeviha ni okhalana mikhalelo sikina siniirela mpantta yoowiima ya munepa wa Muluku. (aGal. 5:22, 23) Nkuupuwelani mikhalelo sooloka mphwannye anyu mwaha wa muteko woolaleerya. Okathi onimutakiha ahu Yesu, atthu annisiveliwa muhupi ahu ni pooti owiiriha oturuka moota yanoonela aya khalai. Mwa ntakiheryo Anamoona anli yaahinwiriyana saana mwaneene etthoko, masi muthiyana ole aahinanariwa vanceene. Nuuvira okathi, muthiyana ole aahithanana moota aathokorenrye awe  anamalaleerya ale anli, nto aahilepa epaphelo oroihaka ofiliyaali. Mpantta mmosa wa epaphelo eyo waahimya so: “Kiniphavela waavekela musammaha atthu ale anli oopixa murima ni oowiiyeviha, mwaha wa waathokorerya moohireerela. Kinoona wira ka mulolo mwaha wa owoomola moota yoole, atthu ale yaalaleya Nuulumo na Muluku”. Niireke muthiyana ole aamulepa moolumo ale, vaakhanle wira anamalaleerya ale yaahaakhula moonanariwa? Woonasa wene nnaari. Tthiri, muteko ahu woolaleerya onninikumiherya mireerelo ni onnaakumiherya mireerelo ale anaalaleerya ahu!

ANAMUYARI AHAANA OMWIIWELELA MULUKU OKATHI ANIWUUPA AYA ANAAYA

14. Anamuyari apakeke exeeni wira akhumele saana okathi aniwuupa aya anaaya?

14 Anamwane anceene towiiyeviha ni anniphavela wiixutta. (Math. 18:1-4) Tivonto, anamuyari a miruku ahaana wiimananiha owiixuttiha anaaya ekeekhai ni ophenta ekeekhai yeeyo, nlelo aryeene anamwane. (2 Tim. 3:14, 15) Masi wira akhumele saana, anamuyari ahaana opacerya awo aneene ophenta ekeekhai ni weettela ele Biibiliya oniixuttiha awe. Okathi anamuyari anipaka aya eyo, anamwane onnaakhweela opaka eyo. Nave-tho, anamwane animoona wira miruku anivahiwa aya ni anamuyari aya sinooniherya wira awo ni Yehova annaaphenta.

15, 16. Anamuyari anrowa wooniherya sai wira annimuroromela Muluku okathi anaaya anikumihiwa aya mmulokoni?

15 Hata anamuyari akina awiixuttihaka anaaya ekeekhai, anamwane akina annihiya weettela ekeekhai ni annikumihiwa mmulokoni. Eyo ennaawereya vanceene anamuyari. Murokora mmosa a wAfrica do Sul onihimya so: “Okathi murokoraka aakumihiwe awe mmulokoni, vaakhala ntoko orimookhwa. Eyo yaahikiwereiha murima vanceene!” Nto murokora ola ni anamuyari awe yaapanke exeeni? Yaahitthara malakiheryo aniphwanyaneya mBiibiliyani. (Mmusome 1 aKorinto 5:11, 13.) Anamuyari awe anihimya so: “Naahilakela othanla otthara ele Biibiliya onihimya awe, maana naanisuwela wira otthara moonelo wa Muluku waamukumiherya mireerelo sooloka. Naanoona wira okumihiwa mmulokoni yaari enamuna emosa Yehova aamuttaruxa awe [mwanihu], ni yaari yowooniherya yoowi aanimphenta. Tivonto, naanimulavuliha mwanihu okathi yoole naaphuka ahu myaha sootthuneya sa emusi paahi”.

16 Mwaana ole oonenle sai? Vano owo onihimya so: “Kaanisuwela wira amusi aka khiyaakinyokha, masi yaamwiiwelela Yehova ni mulokiheryo awe”. Aahincererya-tho oriki: “Okathi muhinikhalana anyu mutthu mukina wira ookhaliheryeni, nyuwo munnimuroromela Yehova paahi”. Nkahaya muupuwele moota emusi awe yaahakalanle aya nuumala mmiravo ole ottikiheriwa mmulokoni! Tthiri omwiiwelela Yehova mwa itthu sotheene, nnoophwanya mireerelo sooloka.Mir. 3:5, 6; 28:26.

17. Xeeni vanitthuneya aya omwiiwelela Yehova okathi wotheene, ni mureerelo xeeni ninrowa ahu ophwanya?

17 Profeta Yesaya aahihimya vahinatthi wira aYuda ale yaaroihiwe oBabilonia, yaamuttharuwa mweettelo aya ni yaarowa ohimya so: “Nto nyuwo Apwiya [Yehova] mwá Tith’ihu: hiyo nri ntoko oloko, ti nyuwo munupalé; othene hiyo nùpiwé ni nyuwo!” Nuumala vo, yammuxonttela eriki: “Nyuwo Apwiya! Muhitepé oniviruwela; muhitthokelelé sottheka sahu mpakha vohimala. Muniweheke: othene ahu n’àtthu anyu”. (Yes. 64:8, 9) Navikaniha wiiyeviha ni omwiiwelela Yehova okathi wotheene, owo onrowa onoonaka okhala atthu ooloka, ntoko aamoonela awe profeta Daniyeli. Ohiya-vo, Yehova onoovikaniha onuupa orumeelaka Nuulumo nawe, munepa awe, ni mulokiheryo awe, wira muhoolo nikhale ‘àna a Muluku’ oomalela.aRom. 8:21.