Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Junyo 2016

Wiiraneya wa vano, mulopwana aarina elepelo ya mulipa-oolepa, onimuthoonyerya Yesu Kristu, yoowo okhanle tonaahela ekanyeryo atthu anrowa woopowa

Makoho Anikohiwa ni Ale Anisoma Irevista Sahu

Makoho Anikohiwa ni Ale Anisoma Irevista Sahu

Anithoonyerya exeeni mulopwana aarina elepelo ya mulipa-oolepa ni alopwana athanu namosa yaarina iyuuma soopwetexa, anromoliwa eliivuru ya Ezekiyeli?

Exeeni enniiriha ohimya siiso vano?

Nuumala Ezekiyeli oweha itthu sootakhala saapakiwa oYerusalemu, ohinatthi onyaanyiwa mwaakha wa 607 AEC, aahoonihiwa itthu saarowa wiiraneya, seiyo saarowa wiiriha muttetthe ole onyaanyiwa. Aahaaweha alopwana athanu namosa akunxe ene iyuuma soopwetexa. Nave-tho, mwa yaawo, aahinweha mulopwana mmosa “awanre ikuwo sottela [sa eliinyu]”, akunxe ene elepelo ya “mulipa-òlepa”. (Ezek. 8:6-12; 9:2, 3) Mulopwana ola aahirummwa ovira-vira mmuttettheni wira ‘ahele ekanyeryo vayuji y’alopwan’ale yajikula ni wipulela mwaha wa sonanara sothene siriwa mmuttettheni memmo’. Nto alopwana yaarina iyuuma soopwetexa, yaahirummwa owiiva atthu otheene a muttetthe ole yahaarina ekanyeryo. (Ezek. 9:4-7) Yowiiraneya ela enniixuttiha exeeni, ni ti pani onimuthoonyerya awe mulopwana aarina elepelo ya mulipa-oolepa?

Eprofesia ela yaapakiwe mwaakha wa 612 AEC, ni yahaakhwanela ekwaha yoopacerya, vaavo Yerusalemu aapwetexiwe awe ni anakhotto a oBabilonia. Nto eyo yaakhwanenle nuuvira iyaakha thanu paahi. Mwa enamuna ela, Yehova aahaarumeela anakhotto a oBabilonia wira yaahukhumu atthu awe oohiiwelela. (Yer. 25:9, 15-18) Ankhi aYuda ale yaheemererya itthu sootakhala siiraneya muttetthe ole? Yehova aahipaka mareheryo wira atthu yoopowe.

Ezekiyeli khiirenle mpantta waahela ekanyeryo wala waapwetexa atthu a muttetthe ole. Ohiya-vo, malaikha ti yaahoolela opwetexiwa wa Yerusalemu. Nto, eprofesia ela enninikhaliherya oweha etthu yiiraneya wiirimu. Yehova aahiruma malaikha awe wira apake mareheryo wira atakhali apwetexiwe, masi anaxariya yoopowe. *

Eprofesia ela enimwaakhwanela-tho muhoolo. Khalai naatthokiherya wira mulopwana aarina elepelo ya mulipa-oolepa, aathoonyerya maKristau oowoottihiwa, yaawo nlelo ari valaponi. Nave-tho naakupali wira atthu yaanaakhela ekanyeryo, vaavo yaawiriyana aya ni weemererya ihapari soreera yaalaleeriwa aya. Masi, mahiku ala, vanikhala wira nihaana olokiherya enamuna naatthokiherya ahu eprofesia ela. Moovarihana ni Matheyo 25:31-33, Yesu tonaaphukela atthu. Owo onrowa opaka eyo okathi wa maxakha maalupale. Okathi owo, ale anrowa wooniwaka ntoko ipwittipwitthi animoopowa, ale anrowa wooniwaka ntoko ipuri anoopwetexiwa.

Nto, moovarihana ni wiiwexexa nno wa ninaano, itthu xeeni siniixutta ahu ni yoohimmwa ela ya Ezekiyeli? Sookhala itthu thanu siniixutta ahu:

  1. Yerusalemu ohinatthi onyaanyiwa, Ezekiyeli, Yeremiya ni Yesaya yaahaalopola atthu voohimya sa ele yaarowa okhumelela muttetthe ole. Awo yaari ntoko alipa-oowehaweha. Olelo-va, Yehova onnirumeela egrupu yaamukhaani ya maKristau owoottihiwa wira awiixuttiheke atthu awe ni waalopola atthu akina, ahinatthi opacerya maxakha maalupale. Mwekeekhai, atthu otheene a Muluku, eyo piiyo, anamuteko akina, annikhaliherya muteko owo woolopola.—Math. 24:45-47.

  2. Ezekiyeli khaavara muteko owo wa waahela ekanyero atthu yaarowa woopowa. Vamosaru, arumeyi a Muluku olelo-va, khanaahela ekanyeryo  atthu anrowa woopowa. Awo paahi, animwaalaleerya ni waalopola atthu akina voohimya sa ele enrowa wiiraneya muhoolo. Nto malaikha tanikhaliherya muteko ola woolaleerya onivariwa olumwenku wotheene.Wis. 14:6.

  3. Mahiku a Ezekiyeli, khaavo mutthu aarina ekanyeryo yowooneya vayuuci. Nave-tho mahiku ala, khaavo mutthu orina ekanyero yowooneya vayuuci. Wira atthu yoopowe maxakha maalupale, apakeke exeeni? Okathi aniwiriyana aya yoolopola, ahaana wiixutta omutakiha Kristu, ovahererya okumi aya wa Muluku, ni waakhaliherya annawe Kristu, alaleyaka ihapari sooreera. (Math. 25:35-40) Nto, okathi wa maxakha maalupale, atthu ala anooheliwa ekanyeryo, eyo piiyo, anoothanliwa wira yoopowe.

  4. Owo onrowa waahela ekanyeryo atthu a muttitthi muulupalexa, yaawo anrowa woopowa okathi wa maxakha maalupale. Nuumala-vo, atthu awo anookhalana eparakha ya okhalana okumi woohimala valaponi.Math. 25:34, 46. *

  5. Moohipisa anrowa opwetexa maloko otheene ni atthu ootakhala.Ezek. 9:2, 6, 7; Wis. 19:11-21.

Itthu siniixutta ahu ni ele Ezekiyeli aawehihiwe awe, sinninikhaliherya ororomela wira Yehova khonrowa waapwetexa anaxariya vamosa ni atakhali. (2 Ped. 2:9; 3:9) Nave-tho enninuupuxerya otthuneya orina aya muteko woolaleerya mahiku ala. Nto atthu otheene ahaana owiriyana yoolopola, wanikisa ohinatthi ophiya!Math. 24:14.

^ etti. 6 Ale yoopoliwe, ntoko Barukhi, (mulipa-oolepa a Yeremiya), Ebedi-Meleki a wEthiyopia, ni aRekabi, khiyaaheliwe ekanyeryo vayuuci. (Yer. 35:1-19; 39:15-18; 45:1-5) Nto ekanyeryo, yaari ethoonyeryo yoowi mutthu owo aarowa woopowa.

^ etti. 12 MaKristau oowoottihiwa khantthuneya oheliwa ekanyeryo eyo wira yoopowe. Ohiya-vo, awo annaakhela othanliwa wookiserya, okathi vakhaani ahinatthi okhwa wala ahinatthi opacerya maxakha maalupale.Wis. 7:1, 3.