Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Julyo 2016

Olaleya Ihapari Sooreera sa Oreera Murima wa Muluku

Olaleya Ihapari Sooreera sa Oreera Murima wa Muluku

“Olaleya ehapari yorera wira Muluku onniniphenta”.MITEKO 20:24.

ISIPO: 10, 25

1, 2. Moota xeeni Paulo oonihenrye awe wira aanixukhurela omoreliwa ikharari ni Muluku?

MURUMMWA Paulo aahilavula ni murima wotheene wira: “Eparakha ekivahalyawe Muluku, nkakhenle siyo”. (Mmusome 1 aKorinto 15:9, 10.) Paulo aanisuwela wira khaareerela aahiiso ophwanela omoreliwa ikharari ni Muluku. Maana ti yoole khalai aalupattha maKristau.

2 Wanikisa wa okumi awe, Paulo aahimulepela Timootheyo wira: “Miyo kinnimuxukhuru Yesu Kristu, Pwiy’ahu, yowo okilipinhe, okònne okhala òroromeleya” khukivaha muteko aahiiso orummwa. (1 Timótheyo 1:12-14) Waari muteko xeeni? Paulo aahaaleela axitokweene a muloko wEefeso wira: “Miyo kinona wira okumi aka khuhiy’etthu, hatá kinnithanya, khaweryaru ophera mukwasu n’umaliha muteko kivahiwaka n’Apwiya Yesu: eyo p’iyo, olaleya ehapari yorera wira Muluku onniniphenta”.Miteko 20:24.

3. Muteko xeeni a vameekhaaya Paulo aavahiwa awe? (Nwehe elatarato yoopacerya.)

3 Paulo aalaleya ‘ihapari [xeeni] sorera’, nto eyo yooniherya sai oreera murima wa Yehova? Paulo aahaaleela maKristau a wEefeso wira: “Muhìwa yiriwaka wira Muluku òkivaha oreriwa wo wovarelani muteko”. (aÉfeso 3:1, 2) Yesu aahimuleela Paulo wira aalaleeryeke ale yahaakhanle aYuda ihapari sooreera. Vano vaaniweryaneya amalapo wiirela mpantta eguvernu ya Omwene enilamuleliwa ni Mesiya. (Mmusome aÉfeso 3:5-8.) Paulo aahilaleya mooluttuweliwa, ni ohaavaha ntakiheryo nooloka maKristau olelo-va. Owo aahooniherya wira eparakha evahiwa awe ni Muluku, ‘khakhenle siyo’.

OREERA MURIMA WA MULUKU ONIWIIRIHANI OPAKA EXEENI?

4, 5. Xeeni vanihimya ahu wira ‘ihapari sorera sa Omwene’, etthu emosaru ni ihapari sooreera sa omoriwa ikharari wa Muluku?

4 Mahiku ala ookiserya, Arumeyi a Yehova aakhalana muteko woolaleya ‘ehapari yorera y’Omwene . . . Mulaponi mothene, wira maloko othene esuwele, yamini’. (Matheyo 24:14) Nave-tho ‘ihapari sooreera sa Omwene’, etthu emosaru ni ihapari sooreera sa omoriwa ikharari wa Muluku. Moota xeeni? Maana mareeliho otheene anrowa ahu waakhela moMweneni mwa Muluku, mwaha wa omoriwa ikharari wa Yehova. (aÉfeso 1:3) Paulo aahooniherya oxukhurela wawe oreera murima wa Yehova, olaleyaka mooluttuweliwa. Niireke munnitthara ntakiheryo na Paulo?—Mmusome aRoma 1:14-16.

5 Mwaha ovinre, nihiixutta moota hiyo anatampi ninwerya ahu ottottela mureerelo oreera murima wa Yehova, onooniherya awe mwa inamuna soovirikana. Okhala wira ninnittottela mureerelo munceene, nookhalana muritti wa owiixuttiha akina woona moota Yehova onniphenta awe, ni moota ale anaalaleerya ahu aniwerya ottottela mureerelo ophenta iwo. Mwa inamuna xeeni ninrowa ahu waakhaliherya akina oxukhurela iparakha sa Muluku?

OLALEYA IHAPARI SOOREERA SA MUKUTTHO WA YESU

6, 7. Ninlaleya sai ihapari sooreera sa omoriwa ikharari wa Muluku, okathi onaatthokiherya ahu atthu voohimya sa yowoopola?

6 Okhala wira olelo-va atthu anceene khanoova opaka itampi, nto khanoona wira apinaatamu ahaana woopoliwa. Hata vari siiso, aakhala atthu anceene anoona wira mweettelo wa okumi onitthara aya khonaahakalaliha. Masi atthu anceene ahitonko omwiixutta Biibiliya ni Anamoona a Yehova, khansuwela etampi exeeni, moota aranve aya, ni ele enitthuneya aya opaka wira ataphuwe okhala epottha ya etampi. Nuumala osuwela ele etampi enitaphulela aya, atthu a murima saana annimuxukhuru Yehova mwaha wa omuruma Mwanawe orwa valaponi wira onoopole yoottheka ni okhwa. Yehova onnipaka eyo mwaha wa ophenta wawe ni oreera wawe murima.1 Yohani 4:9, 10.

7 Nwehe moota Paulo aalavunle awe voohimya sa Mwaana oophentiwa a Yehova: “Tthiri Kristu ònopola n’iphome awe, ònilevelela sottheka sahu: attharihaka eparakh’awe [Yehova] yulupalexa”. (aÉfeso 1:7) Mukuttho wowoopola wa Kristu ti ethoonyeryo yuulupalexa wira Muluku onniniphenta ni enooniherya oreera murima wuulupale wa Muluku. Tthiri etthu yoohakalaliha osuwela wira naamini mukuttho wa Yesu, nnooleveleliwa soottheka sahu ni nnookhalana yowuupuxerya ya murima yooloka! (aHéberi 9:14) Moohaaniherya, iya ihapari sooreera wira naaleeleke atthu akina!

MWAAKHALIHERYE ATTHU OKHALA APATTHANI A MULUKU

8. Xeeni apinaatamu anitthuneya aya wataanihiwa ni Muluku?

8 Akhala wira atthu khanaamini mukuttho wowoopola wa Yesu, Muluku onnaathokorerya okhala awanani awe. Tivonto, nookhalana muritti wowaaleela atthu awo wira anoowerya okhala apatthani a Muluku. Murummwa Yohani olempe so: “Ole onimwamini Mwana òkhalana ekumi yohimala; vano ole onkhotta omwiwelela Mwana, khakhalanne ekum’iyo, nto onanariwa wa Muluku onokhala ni yowo”. (Yohani 3:36) Ninnihakalala osuwela wira mukuttho wowoopola wa Kristu onninikhaliherya okhala apatthani a Muluku. Paulo aatthokihenrye mwa enamuna ela: “Khalai, nyuwo-tho mwahirekamelana ni Muluku: mwari awanani awe mmurimani mwanyu mwaha wa sotakhala sìranyu. Nto vano Muluku ohàtana-tho ni nyuwo mwaha w’okhwa wa Yesu Kristu mwerutthuni mwawe mohawa”.aKolosi 1:21, 22.

Nookhalana muritti wowaaleela atthu wira anoowerya okhala apatthani a Muluku

9, 10. (a) Muritti xeeni Kristu aavanha awe annawe oowoottihiwa? (b) Moota xeeni “ipwittipwitthi sikina” sinaakhaliherya aya ale oowoottihiwa?

9 Kristu ohaavaha annawe oowoottihiwa ari valaponi “muteko w’owatàniha atthu” ni Muluku. Paulo aahimenrye wira: “Sothene iya sinkhuma wa Muluku: Muluku ònatàniha ni yowo, mwaha wa Kristu, khunivahererya muteko w’owatàniha atthu akina ni yowo. Vekekhai, Muluku t’owatànihale atthu othene ni yowo mwa Kristu: owo khanupuwela-tho itampi s’atthu, nto òhela mwano mwahu ehapari yo watàniha. Tivó miyo ka namitthaka a Kristu, ni ti Muluku onotumereryani ni molumo ak’ala. Kihovarani metto ni nsina na Kristu: mutthikele watàna ni Muluku”.2 aKorinto 5:18-20.

10 Eparakha yuulupale erina aya “ipwittipwitthi sikina” waakhaliherya maKristau oowoottihiwa muteko woolaleerya. (Yohani 10:16) Ntoko ‘anamitthaka’ a Kristu aahiiso anamalaleya, “ipwittipwitthi sikina” sinnivara muteko munceene wa olaleya ihapari, owiixuttiha ekeekhai atthu, ni waakhaliherya okhalana wataana wooloka ni Yehova. Tthiri waakhaliherya atthu wira yaataane ni Yehova, ti etthu yootepa otthuneya muteko woolaleya ihapari sooreera sa omoriwa ikharari wa Muluku.

NWIIXUTTIHEKE ATTHU WIRA MULUKU ONNIWIRIYANA MAVEKELO

11, 12. Xeeni siryaaya ihapari sooreera atthu osuwela wira pooti onvekela Yehova?

11 Atthu anceene anivekela mwaha woowi opaka eyo onnaahakalaliha, nnaamwi ahikupaliki wira Muluku onniwiriyana tthiri mavekelo aya. Nto ahaana osuwela wira Yehova ‘onniwa mavekelo’. Nasalimo Davidi aalempe so: “Nyuwo munniwìwa ale anovekelani: tivó atthu othene annorwelani. Sottheka sahu sonilemela: nto nyuwo munnittipiha sotakhala seiyo”.Esalimo 65:3, 4.

Vaavo vaniwiixuttiha ahu atthu moota woovekela, ninnaakhaliherya okhala apatthani a Yehova

12 Yesu aahaaleela awiixutti awe wira: “Etthu p’itthu enavekelanyu Atithi ni nsina naka, awo animovahani”. (Yohani 16:23) Ela entaphulela wira hiyo pooti ovekela “etthu p’itthu” enivarihana ni yootthuna ya Yehova. Yohani aalempe wira: “Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe”. (1 Yohani 5:14) Ti vooloka waakhaliherya atthu osuwela wira nivekelo khahiyo etthu eniphavela onihakalaliha paahi, masi ninninikhaliherya waattamela ehice ya “eparakha” ya Yehova. (aHéberi 4:16) Vaavo vaniwiixuttiha ahu atthu moota woovekela mookhalela, Ole onireerela onvekela, ni itthu sinireerela ovekela, ninnaakhaliherya okhala apatthani a Yehova ni ophwanya nimaaliho okathi anihaawa aya.Esalimo 4:2; 145:18.

MULUKU ONONREERELA MURIMA ELAPO ESYA

13, 14. (a) Mareeliho xeeni anrowa aya okhalana maKristau oowoottihiwa muhoolo? (b) Muteko xeeni wooreera anrowa aya ovaraka wira yaakhaliherye apinaatamu?

13 Yehova onrowa wooniherya oreera wawe murima vanceenexa “onkelelahu”, niire so, elapo esya. Moota xeeni? Maana Muluku onrowa waavaha eparakha yuulupale atthu 144.000, yaawo anrowa olamulelaka ni Kristu. Paulo aahitthokiherya eparakha eyo olepaka so: “Vano, onimorela wawe ikharari Muluku ti wowatta: oniphenta wawe Muluku ti wulupale. Tthiri, hiyo nari òkhwene mwaha wa itampi sahu, masi Muluku ònivaha-tho ekumi vamosá ni Kristu. Eparakha ya Muluku t’iwoponleni. Mwa Yesu Kristu, Muluku ònihihimuxa vamosá ni yowo, khunikilathiha vamosá ni yowo wirimu. Siso Muluku onnithonyerya mahiku othene, mpakha onkelelahu, muhakhu wohiphimeya w’eparakh’awe n’othunku onònenlyawe mwa Yesu Kristu”.aÉfeso 2:4-7.

14 Ti voohakalaliha wuupuwela itthu sooreera Yehova onrowa awe waavaha maKristau oowoottihiwa, vaavo anrowa aya olamulelaka ni Kristu wiirimu. (Luka 22:28-30; aFilipi 3:20, 21; 1 Yohani 3:2) Nave Yehova onrowa waavaha “muhakhu wohiphimeya w’eparakh’awe” maKristau oowoottihiwa, mwa enamuna ya vameekhaaya. Awo anrowa okhala ‘Yerusalemu a nanano’, aahiiso mwaarawe Kristu. (Wisupulula 3:12; 17:14; 21:2, 9, 10) Anrowa ovaraka muteko ni Yesu wira ‘yavonihe atthu a maloko othene’. Nave anrowa waakhaliherya apinaatamu otaphuwa mwa yoottheka ni okhwa wira akhale oomalela.Mmusome Wisupulula 22:1, 2, 17.

15, 16. Yehova onrowa wooniherya sai oreerela wawe murima “ipwittipwitthi sikina” muhoolo?

15 AÉfeso 2:7 onihimya wira Muluku onrowa wooniherya oreera wawe murima “onkelelahu”, niire so, elapo esya. Okathi owo, khula mutthu valaponi onrowa ophwanya “muhakhu wohiphimeya w’eparakh’awe”. (Luka 18:29, 30) Enamuna emosa Yehova onrowa wooniherya oreera wawe murima valaponi, onrowa waahihimuxa apinaatamu ari “mMahiye”. (Yobi 14:13-15; Yohani 5:28, 29) Ti pani anrowa ohihimuxiwa? Alopwana ni athiyana oowaamini akhwiiye Kristu ohinatthi okhwa, ni ale a “ipwittipwitthi sikina” yaawo anikhwa olelo-va amwaaminiki Yehova. Atthu awo anrowa ohihimuxiwa wira avikaniheke omurumeela Yehova.

16 Nave, apinaatamu imilyau sinceene, yaawo anikhwa ahimusuwenle Muluku, anrowa ohihimuxiwa. Yohani olempe wira: “Numalá, kahiwona alipa-òkhwa, alupale n’akhani, yemenlene oholo w’ehije. Vano, sahitthukuliwa ilívuru: nlelo yahitthukuliwa elívuru ekina, yari elívuru y’ekumi. Alipa-òkhwa yahiphukiwa sitthariheliwka miteko savanryaya, ntoko salempwaya mulivuruni. Ephareya yahahokoloxa atthu ale yakhwenle memmo. Okhwa n’ilapo y’alipa-òkhwa wahattikiherya atthu yakhwiye yarina aya. Vano othene yahilamuliwa sitthariheliwaka miteko savanryaya”. (Wisupulula 20:12, 13) Ale anrowa ohihimuxiwa anookhalana eparakha ya wiixutta voohimya sa Yehova ni weemererya olamulelo awe. Nto ahaana wiixutta ni ovarihela muteko malakiheryo a Biibiliya ni malakiheryo masya ari “mulivuruni” aahiiso iroolu isya. Malakiheryo awo masya anrowa okhala enamuna ekina Yehova onrowa awe wooniherya oreera wawe murima.

NVIKANIHEKE OLALEYA IHAPARI SOOREERA

17. Nuupuweleke exeeni okathi onilaleerya ahu?

17 Vano, ti vootepa otthuneya ovikaniha olaleya ihapari sooreera sa Omwene, mwaha woowi wanikisa ori vakhiviru! (Marko 13:10) Okathi onilaleerya ahu, nihaana wuupuwelaka wira yoolakela ahu onvuwiha Yehova. Ninrowa owerya sai opaka eyo? Nihaana waaleela atthu wira mareeliho otheene anrowa ahu okhalana elapo esya, anniweryaneya mwaha wa oreera murima wa Yehova.

Murumeeleke mooluttuweliwa ntoko “murumeyi òroromeleya a iparakha sohilikana sa Muluku”.—1 Pedru 4:10 (Nwehe ittima 17-19)

18, 19. Ninvuwiha sai oreera murima wa Yehova?

18 Okathi onaalaleerya ahu atthu, nnoowerya otthokiherya wira vaavo Omwene wa Kristu vanilamulela awe, apinaatamu anrowa waakhela mareeliho a yowoopola ni vakhaani-vakhaani okhala oomalela. Biibiliya onihimya wira: “Okhala wira seiyo-tho sinrowa wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’àna a Muluku”. (aRoma 8:21) Ela enimwiiraneya mwaha wa oreera murima wa Yehova.

19 Nookhalana eparakha ya waaleela apinaatamu otheene yoolipelela yoohakalaliha eniphwanyaneya eliivuru ya Wisupulula 21:4, 5, yeeyo eni: “[Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”. Nave Yehova, yoowo okilanthe veehiceni vawe onihimya wira: “Mone: itthu sothene miyo kokhaliha isyá!” Nave-tho onihimya so: “Mulepe etthu ila, okhala wira molumo aka t’òroromeleya ni t’èkekhai”. Vaavo vaniluttuweliwa ahu waalaleerya atthu ihapari sooreera, ninnivuwiha oreera murima wa Yehova!