Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Julyo 2016

“Muhové: Ti Miyo Kinokhaliheryani”

“Muhové: Ti Miyo Kinokhaliheryani”

NKAHAYA muupuwele mweettaka mphironi ohiyu eriyari. Mootutuxerya munninweha mutthu oottharakani. Okathi oneemela anyu, owo onneemela. Vaavo vaneetta anyu mowaakuveya, owo onipaka etthu emosaru. Vano nyuwo munnitthyawela empa yaattamenle opuro owo ya mpatthani inyu. Okathi onihula awe mukhora wira mukele, nyuwo munnihakalala maana moosuwela wira muhoopowa.

Waaniheryasa, khetonko wookhumelelani etthu siisa. Hata vari siiso, sookhala itthu sinooxankihani. Mwa ntakiheryo, niireke sookhala sootteettheya muniwanana anyu, seiyo muniphavela anyu oxintta masi vanoovilani oxinntta. Niireke munaavya muteko okhuma khalai nnaamwi mwiimananihaka muhinaphwanya. Niireke munnixanka mwaha woowi muhanle wuuluvala, ni moota wookhapelela okumi anyu muhoolo? Aahiiso yookhala etthu ekina enooxankihani?

Moohicikha mixankiho sirina anyu, ti vooloka okhalana mpatthani onimuleela anyu itthu sinooxankihani yoowo oniphavela wookhaliheryani. Niireke mookhalana mpatthani siisa? Tthiri mookhalana! Yehova ori ntoko mpatthani anyu, Abrahamu yoowo aari oororomeleya aahikhala mpatthani a Yehova ntoko sinihimya aya eliivuru ya Yesaya 41:8-13. Eversiikulu  10 ni 13, Yehova onnimuleiherya khula mmosa a hiyo ohimyaka so: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani. Ayo! Kinnovarelani ni ntata naka [na xariya]: kinniwakihani, kinniwòpolani. Tthiri miyo Apwiya, ki Muluku anyu: ti miyo kinovarelani ntata nanyu: ti miyo kinohimeryani wira: ‘Muhové: ti miyo kinokhaliheryani’”.

“KINNOVARELANI NI NTATA NAKA”

Tthiri masu ala a Yehova toomaaliha vanceene. Nkuupuwelani ele Yehova ennileiherya awe. Eversiikulu ela khenihimya wira muneetta vamosa ni Yehova nvarelanne ene matata. Vaakhanle wira ti siiso, ntata noolopwana na Yehova naarowa ovarela ntata nanyu noothiyana. Nave-tho Yehova onnoororomelihani oriki: “ntata” nawe noolopwana na xariya nnoovarela “ntata nanyu” noolopwana wira ookhaliheryeni okathi oniwanana anyu mixankiho. Vaavo Yehova onoovarelaweni ni ntata nawe noolopwana, owo onnoolipihani ni onahimya so: “Muhové: ti miyo kinokhaliheryani”.

Niireke munnimoona Yehova okhala Tiithi inyu ni Mpatthani anyu oophenta? Munnikupali wira owo onrowa wookhaliheryani okathi wa mixankiho? Tthiri Yehova onnookhapelelani ni onniphavela wookhaliheryani. Okathi muniwanana anyu mixankiho, Yehova oniphavela wira muxintte. Moota xeeni? Okhala wira owo onnoophentani vanceene. Mwekeekhai Yehova “òlikanana onikhaliherya okathi w’oxanka”.Esalimo 46:2.

AKHALA WIRA NINNIIVAHA NTHOWA MWAHA WA SOOVONYA SAHU SA KHALAI

Atthu akina annivikaniha oxanka mwaha wa soovonya saya sa khalai, ni annuupuwelela akhala wira Muluku onimwaalevelela. Akhala wira nyuwo munoona siiso, nkahaya mmuupuwele mulopwana oororomeleya Yobi. Owo aaheemererya wira aahipaka itampi okathi wa omiravo awe. (Yobi 13:26) Nave-tho nasaalimo Davidi aanuupuwela siiso khumuxonttela Yehova oriki: “Muhùpuwelé sottheka s’omiravo aka”. (Esalimo 25:7) Okhala wira naalipa-oohimalela, ‘otheene ahu nottheka, nothoiwa ovuwa wa Muluku’.aRoma 3:23.

Masu oomaaliha aniphwanyaneya eliivuru ya Yesaya ekapitulu 41 yaalepeliwe aIsarayeli. Itampi saya saari suulupale, tivonto Yehova aahimmye awe wira aarowa waahukhumu ni waaroiha weepotthani oBabilonia. (Yesaya 39:6, 7) Okathi omosaru, Muluku aahaaleiherya wira aarowa owoopola akhala wira yaamuttharuwa ni otthikela wa yena! (Yesaya 41:8, 9; 49:8) Olelo-va, Yehova onnaaphenta ni waamorela ikharari atthu yaale anittharuwa ni murima wotheene anaphavela omuhakalaliha yena.Esalimo 51:3.

Muthokorerye yowiiraneya ya Takuya, * yoowo aaphavela oxintta yoolema ya oweha epornografia ni wiivukula. Ikwaha sinceene, aanipaka yoottheka eyo. Oonela sai? Owo onihimya so: “Miyo koona wira nkaarina efaita, masi nuumala onvekela ni omuxonttela Yehova wira okilevelele, Yehova aahikivaha ikuru wira kixintte yoolema ele”. Yehova aamukhalihenrye sai? Axitokweene a muloko wa Takuya yaahimuleela wira aalikareleke khula okathi aatthikela awe opaka yoottheka ele. Owo onneemererya oriki “Khivaakhweya waalikarela, masi kaanipaka eyo ni kaahilipihiwa vanceene”. Nuumala-vo, axitokweene ale yaahipaka mareheryo wira Takuya oxukuriwe ni mutokweene a esirkwitu. Mutokweene a esirkwitu aamuhimenrye so: “Kihoorwa-va, mwaha woowi axitokweene a muloko aakivekela orwa. Awo ahoothanlani kooxukuyeni”. Takuya onihimya so: “Masi miyo kitthenke, hata vari siiso, Yehova, aarumeelaka axitokweene, oophavela okikhaliherya”. Nuuvira okathi, Takuya aahihiya yoolema ele yoohiloka, khukhala pioneero ookilaatheya, nto vano onrumeela oBetheli. Ntoko siisaale Muluku omukhalihenrya awe munna ola, owo onrowa wookhaliheryani okathi onivonya anyu.

OKATHI ONIXANKA AHU MWAHA WA MUTEKO

Atthu akina annixanka mwaha woowi ahoomoliwa omutekoni aahiiso khamphwanya muteko. Nkuupuwelani moota vanixankiha aya okathi onaavya anyu muteko khihiyaphwanya. Vaavo mutthu vahiniphwanya awe muteko, onnipacerya wiixoona ohikhala a faita. Yehova onrowa wookhaliheryani sai? Nnaamwi ohirowaka woovahani muteko wooreerela okathi yoowo, owo pooti wookhaliheryani wuupuwela moolumo ala a Davidi ani: “Okhuma omiravo aka mpakha vano kùluvanlyaka, nkinamone naxariya onyanyaliwe ni Muluku, nkinawone amusi awe elolaka yolya”. (Esalimo 37:25) Yehova onniwoonani okhala a faita, ni onimovarelani ni “ntata” nawe na xariya, ni woovahani ele eniphavela anyu wira nvikaniheke omurumeela.

Yehova onrowa wookhaliheryani sai okathi onrowa anyu oyeleela muteko anyu

Sara yoowo onikhala oColombia, ahoona moota Yehova aaphavela awe omukhaliherya. Owo aaniphwanya musurukhu munceene okhala wira aavara muteko empresa yoosuwelexiwa ni yoovuwa vanceene. Masi owo aaniphavela onvarela muteko munceene Yehova, vano aahihiya muteko ole khukhala pioneera. Masi, vaaninvila ophwanya muteko wa okathi vakhaani. Sara aahipacerya omutumiha sorveti, masi vakhani-vakhani aahipwata khuhiya omutumiha sorveti. Owo onihimya wira: “Soovira iyaakha tthaaru sooxankiha, masi kinnimuxukhuru Yehova maana ookikhaliherya ovilela”. Sara aahiixutta ophavela itthu saamuthowa ni osyaka wuukhuwa mwaha wa nihiku na meelo. (Matheyo 6:33, 34) Ohoolo waya, patarau awe aahimulikarela wira otthikele ovara muteko aavara awe. Sara aahimmye wira aamweemererya ovara muteko ole akhala wira aamukhalana okathi woorowa omuthukumanoni, asembeleyani ni okongresuni. Olelo-va, Sara khonaakhela musurukhu munceene ntoko khalai, masi onniwerya orumeela ntoko pioneera. Nave onihimya wira, okathi owo wooxankiha ohoona ntata noophenta na Yehova.

OXANKIHEYA MWAHA WOOSUWELA WIRA MUHANLE WUULUVALA

Atthu akina annixanka mwaha woowi aapacerya wuuluvala ni moohipisa anrowa oreformari. Etthu enaaxankiha wuupuwela wira khanrowa okhalana musurukhu oniphiyerya wira akhaleke saana. Nave annixanka mwaha wa wuupuwelaka wira khino muhoolo anrowa owereyasiwaka. Woonasa wene ela ti etthu yaamwiirihale Mwene Davidi omuxonttela Yehova oriki: “Vavo vuluvanlyaka, muhikikhotté: ikuru saka sivukuwaka, muhikinyanyalé”.Esalimo 71:9, 18.

Exeeni enrowa waakhaliherya ale yuuluvanle ohixanka vanceene voohimya sa muhoolo? Ahaana ovikaniha olipiha omwaamini waya Muluku, ni okupali wira onrowa waakhaliherya ni waavaha khula etthu enaathowa. Masi, ekeekhai wira akina yaanipuha okathi yaarina aya musurukhu munceene, nto vano ahaana wiixutta okhweiherya okumi aya, ahakalalaka ni itthu vakhaani. Nave pooti woona wira fataari olya “ntikwa” ohiya “orerya enama” mmureerelo wa ekumi aya! (Miruku 15:17) Akhala wira yoolukama anyu omurumeela Yehova, mukupaliki wira owo onrowa tthiri woovahani itthu sinoothowani okathi onuuluvala anyu.

José ni Rose vamosa ni Tony ni Wendy

Nkahaya mmuupuwele José ni Rose, yaawo yaamurumeela Yehova muteko wa okathi wotheene iyaakha sinivikana 65. Okathi owo yaahikhalana mixankiho sinceene. Maana yahaana omukhapelela paapa awe Rose, yoowo aatthuneya okhaliheriwa othana ni ohiyu. Nave, José aahaana ovilela mwaha wa operasau wa kanser ni ompaka quimioterapia. Moota xeeni Yehova aavarenle awe ni ntata nawe noolopwana anamathelana ala oororomeleya? Owo aahimurumeela Tony ni Wendy, maKristau oothelana. Tony ni Wendy yaahikhalana empa yeeyo yaaphavela aya owooliha mapioneero. Tony onnuupuwela okathi aasoma awe exikola secundária, aaninweha ori vaxanelani José ni Rose alaleeryaka khula nihiku. Tony aahisiveliwa oweha moota yaaluttuweliwa aya, nto eyo yaahinvara murima vanceene. Okhala wira José ni Rose yaahiviriha okathi munceene amurumeelaka Yehova, nto Tony ni Wendy yaahiwooliha empa aya. Iyaakha sowiiraka 15, awo yaahimukhaliherya José ni Rose, yaawo vano arina iyaakha 85. José ni Rose annoona wira Tony ni Wendy yoovaha enikhuma wa Yehova.

Yehova onooleiheryani wira: “Muhové: ti miyo kinokhaliheryani”. Nave owo onimoovarelani ni “ntata” nawe noolopwana na xariya. Niireke nyuwo munneemererya wira Yehova ovareleke ntata nanyu?

^ etti. 11 Masina makina aaturukiwa.