Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Feverero 2016

 YOWIIRANEYA YA MWEEKUMINI

Yehova Onnikikhaliherya Muteko Kininvarela Aka

Yehova Onnikikhaliherya Muteko Kininvarela Aka

Kaahimuleela kumandanti wira kaahitoko otthukweliwa mukhatteya mwaha woohiphavela owana ekhotto. Nto kaahimukoha wira: “Kiireke munookitthukweliha-tho?” Eyo yiiraneyale ekwaha ya nenli kaalattuliwe aka orowa etoropa wEstados Unidos.

KIYARIWE eyaakha ya 1926, oCrooksville, Ohio, wEstados Unidos. Naari anamwane 8. Paapa aka ni Maama aka, khiyeettela etiini masi yaanintumererya orowaka okerexa. Nto keettela Ekerexa Metodista. Kirina ene iyaakha 14, kaahitthuveliwa ni muhooleli a ekerexa mwaha woowi mwa eyaakha ntero nkaacompenle missa a Ettiminku.

Margaret Walker (murokora a nenli okhuma moono woothiyana) aahikikhaliherya wiixutta ekeekhai

Okathi ole, namwaattamanani ahu mmosa Namoona a Yehova nsina nawe Margaret Walker, aahipacerya omuxukurya maama aka, khiyamwiixuttiha Biibiliya. Nihiku nimosa, kaahikilaathi vaavo kinaiwa mwaha mmosa waalavuliwa. Maama aka oona wira kaaphavela waakanyerya yoosoma awe, nto aahikileela okhuma opuro ole. Masi miyo kaahivikaniha owiriyana. Nuumala oxukurya ikwaha sinceene, Margaret aahikikoha so: “Munnisuwela nsina na Muluku?” Nto kaamwaakhunle so: “Khuuvo ohinisuwela wira nsina nawe ti Muluku”. Owo aahilavula ariki: “Mmukuxe Biibiliya anyu ni muhule Esalimo 83:18”. Kaahoona wira nsina na Muluku ti Yehova. Moohipisa, kaahitthimakela waari apatthani aka ni khaaleela so: “Mwaphiya owaani ohiyu ola, mwasome Esalimo 83:18, nto munoosuwela nsina na Muluku”. Woonasa wene, nyuwo pooti ohimyaka wira kaahipacerya olaleerya okathi ene yoole.

 Kaahipacerya omusoma Biibiliya, nto eyaakha ya 1941 kaahibatiziwa. Moohipisa, kaahithanleliwa wira kiiriheke yoosoma ya eliivuru ya muloko. Kaahimutumererya maama aka ni axihima aka orwa oweha mithukumano, nto otheene aya yaanirwa oweha yoosoma ya Biibiliya kiiriha aka. Masi paapa aka, khaacalela.

OLUPATTHIWA VATTHOKONI

Nto kaahivahiwa iparakha sikina mmulokoni, ni kaahikhalana ebiblioteka aka yaarina iliivuru soovirikana sa Biibiliya. Nihiku nimosa, Paapa aka aahithoonya iliivuru saka, onalavula so: “Munniweha itthu iya sotheene? Nkimphavela-tho oweha-va, ni nyuwo-tho mukhumeke vatthokoni vaka-va”. Nto kaahithaama kinarowa okhala ekwaartu emosa waattamela oZanesville, Ohio, masi kaanitthika ikwaha sikina wira kaalipihe amusi aka.

Paapa aka aanimukhoottiherya maama aka orowela mithukumano. Ikwaha sikina vaavo maama aka aarowa awe omuthukumanoni, paapa aka aaninvara maama aka, kiyamuhokoloxerya mpaani. Masi maama aka aanikhuma mukhora mukina onarowa omuthukumanoni. Nto kaahimuleela Maama aka wira: “Muhixanke maama. Paapa aka onoovela omakela wootthara-ttharani”. Nuuvira okathi, Paapa aka aahihiya omutthara-tthara maama aka, nto aaniwerya orowa omuthukumanoni ohoovaka.

Eyaakha ya 1943 muloko ahu waahipacerya okhalana Exikola ya Orummwa wa Muluku, nto kaahipacerya olavula myaha sa anaxikola. Miruku kaavahiwe aka nuumala opaka mpantta aka, saanikikhaliherya moota woolavula oratteene myaha.

OHIIRELA MPANTTA EKHOTTO

Okathi owo, yaahipacerya Ekhotto Yanenli ya Olumwenku Wotheene. Eyaakha ya 1944, naahikhuma nsina naka otoropani. Nto kaahirowa oFort Hayes oColombus, Ohio, orowa omwaleiwa erutthu aka wira kirowe otoropani. Masi kaahimuleela kumandanti wira nkeemererya okhala toropa. Nto yaahikihiya kinarowa owaani. Ohoolo waya, toropa mmosa aahiphiya vamukhora vaka nto onakileela wira: “Corwin Robison, koorummwa woovarani”.

Isumana piili muhoolo mwaya okathi kaaphukeliwa aka, mulipa oophuka aahimmye so: “Kaari mwa miyo mwaarowa okhala mukhatteya okumi anyu wotheene. Nto niireke mookhalana etthu ekina yoohimya?” Miyo kahaakhula wira: “Ohano, miyo kaahaana othokoreriwa ntoko ministro. Kinnilaleerya ihapari sooreera sa Omwene khula empa ni wa atthu otheene”. Nto mulipa oophuka aahaaleela atthu yaari vaavale oriki: “Atthu khahiyo tanirowa othanla akhala wira mmiravo ola ministro tthiri, wala nnaari. Masi muri opuro ola wira muhimye akhala wira mmiravo ola ohaana orowa okhottoni, wala nnaari”. Sihinatthi ophiya minutu 30, etribunaali yaahihimya wira koophwanyaniwa mulattu. Nto kaahiphukeliwa otthukweliwa iyaakha 5, ekhatteya yuulupale ya wAshland, oKentucky.

YEHOVA AAHIKIKHAPELELA MUKHATTEYA

Kaahiviriha isumana piili soopacerya kiryeene ekhatteya ya oColumbus, Ohio, nto nihiku noopacerya kaatthukweliwe ekwaartu emosa yaamukhaani. Nto kaahinvekela Yehova wira: “Nkinwerya okhala ekwaartu ele iyaakha 5. Koovelavela”.

Vaaxiiye aya, maguarda yaahikihulela. Nto kaahirowa vaari mulopwana mmosa aatthukweliwe oorakama, ni oowiittivala, nto kaheemela vakhiviru vawe ninaweha vaxanelani. Owo ahikikoha oriki: “Mutthukweleliweni, nyuwo mukhuveya?” Kaahimwaakhula wira: “Miyo ka Namoona a Yehova”.  Owo aahilavula wira: “Muriye mwa Namoona a Yehova? Nto muniirani-mu?” Kaahimuleela wira: “Mwaha woowi hiyo Anamoona, khaninrowa okhottoni owiiva atthu”. Owo aahihimya so: “Nyuwo mutthukweliwe mwaha woohiphavelaka owiiva atthu! Atthu akina anitthukweliwa mwaha wowiiva atthu. Kiireke eyo etthu yookhalela?” Kaahimwaakhula wira, “Nnaari, khekhalenle”.

Nuumala-vo, owo aahihimya wira: “Iyaakha 15 sivinre kiryeene ekhatteya ekina, kaanisoma iliivuru sanyu”. Nto miyo kaahinvekela Yehova, kiiraka: “Yehova mukikhaliherye wira mulopwana ola okhale mpatthani aka”. Okathi ene yoowo, mulopwana ole, nsina nawe Paul, aahilavula so: “Akhala mutthu onrowa woopacani, mukiitthane, nto miyo kinoomusomiha”. Nto nkinoopopihiwe ni alopwana ale 50 kaatthukweliwe aka vamosa mukhatteya mme.

Kiryeene eriyari ya Anamoona akina yaawo yaatthukweliwe wAshland, oKentucky, mwaha woohiphavelaka wiirela mpantta ekhotto

Okathi kaathaamiheriwe aka ekhatteya ya wAshland, kahaaphwanya weiwo anna oolipa momunepani. Wataana waka naawo waahikilipiha miyo ni akina, momunepani. Awo yaaninithanlela Biibiliya khula esumana, nto hiyo naanilokiherya makoho ni waakhuliwa wira narumeeleke mmithukumano saalokiheriwa mukhatteya. Nto yaanimuthanla munna wira orumeeleke ntoko murummwa aaweherya muttetthe woolaleerya mukhatteya. Naari ekwaartu emosa, yeeyo yaarina ikhaama sinceene. Nto munna aathanleliwe oweherya mittetthe iyo, aanikileela so: “Robison, munrowa olaleeryaka Ekhaama ele, ni ele. Nto muhaana omulaleerya khula mutthu onrwa ekhaama ele. Muhaana omulaleerya ohinatthi othaamihiwa”. Siiso, naaniwerya olaleerya mwa enamuna yootthokiheya.

NUUMALA OKHUMA MUKHATTEYA

Nnaamwi yaamanle Ekhotto ya Nenli ya Olumwenku Wotheene eyaakha ya 1945, nkaakumihiwe mukhatteya. Kaaniwuupuwela atthu a emusi aka owaani, okhala wira kihinatthi okhuma, Paapa aka aahimmye so: “Kaweryaru owoomolani nyuwo, atthu akina a etthoko ela khanirowa-tho owokiwaka”. Nuumala okumihiwa mukhatteya, kaahiphwanya etthu yaatempe okihakalaliha. Vanaamwi Paapa aka ahaasiveliwa ni atthu yaamusoma Biibiliya, kaahaaphwanya amusi aka 7 ahicompelaka mithukumano, nave kaahimphwanya murokoraka mmosa obatiziwe ene.

Nihinatthi orowa muteko woolaleerya ni Demetrius Papageorge, munna oowoottihiwa, yoowo aapacenrye omurumeela Yehova mwaakha wa 1913

Okathi Ekhotto ya oKoreya yaapacenrye aya mwaakha wa 1950, kaahilattuliwa-tho orowa okhottoni ekwaha ya nenli, nto kaahirowa opuro wa atoropa, oFort Hayes. Nuumala omwaleiwa erutthu aka wira kirowe otoropani, mukhulupale aatoropa aahimmye so: “Eriyari ya egrupu ela, nyuwo murina ivalore suulupale”. Nto kaahimwaakhula wira: “Vaareera, masi kimphavela wooleelani wira  nkinrowa okhottoni”. Kaahilavula nthowa nene, kiromolaka yoolepa ya 2 Timótheyo 2:3, nto kaahimuleela wira: “Miyo ka nakhotto oororomeleya a Kristu”. Nuumala ovira okathi munceene ohilavunle etthu, aahimmye so: “Muroweke!”

Nuumala-vo, kaahirowa owiriyana muthukumano wa atthu aniphavela orowa orumeela oBetheli waapakiwe okongresuni oCincinnati, Ohio. Munna Milton Henschel aahinileela wira akhumelela munna oniphavela okhaliherya miteko sa Omwene, otthokeya wa Yehova waamusiveliwa omurumeela munna owo oBetheli. Nto kaahilepa eformulaario khirowana oBetheli ni kaahilattuliwa orumeela eBetheli ya oBrooklyn, mweeri wa Agosto 1954. Okhuma vaavo kinirumeela oBetheli.

Nkinathoiwe muteko oBetheli. Mwa iyaakha sinceene, muteko aka waari orumeela maakina yaavihiha maasi, nave kaanilokiherya maakina ni olokiha mikhora. Kaanivara miteko sikina Ipa sa Asembeleya, Epooma ya oNova York.

Kaakhapelela aka maakina yaavihiha maasi eBetheli ya oBrooklyn

Kaanisiveliwa vanceene marehereryo a omunepani a oBetheli, ntoko eprograma ya Omulompa Muluku vaasiisu, Yoosoma ya Owehaweha ya emusi ya oBetheli, ni okhaliherya muteko woolaleerya muloko waathanleliwa aka. Okathi munuupuwela anyu makhalelo awo, tthiri munnoona okhala eparakha yuulupale, wiirela mpantta emusi ya Anamoona a Yehova. Okathi anamuyari ni anaaya anithokorerya aya khula nihiku Soolempwa, Omulompa Muluku Vatthokoni ni ohicompela mithukumano, ohela muhina wiirela mpantta muteko woolaleerya ihapari sooreera, otheene a vatthokoni anikhala oolipa momunepani.

Kihaapaka apatthani anceene oBetheli ni mmulokoni. Akina yaari anna oowoottihiwa ni munepa, yaawo vano ari wiirimu. Masi akina khahiyo. Masi arumeyi otheene a Yehova, waahela muhina ale anikhala oBetheli, toohimalela. Akhala wira kinninyoonyihana ni munnaka, khula okathi kinnimananiha wataana nuuwo. Kinnimuupuwelela Matheyo 5:23, 24 voohimya sa ophavela wiiwanana wakhumelela onyoonyihana. Ovekela musammaha khivanikhweya, masi opaka eyo onnikhaliherya ophuka muxankiho orina ahu.

MIREERELO KIPHWANYALE AKA MUTEKO ONIVARA AKA

Mwaha wowuuluvala, vano nkiniwerya orowa olaleerya empa ni empa, masi nkinihiya ovara muteko owo. Kihiixutta vakhaani eMandarim, nttaava na oChina, nto kinnisiveliwa waalaleerya aChina  mphironi. Mahiku makina, opuro onikilaathi aka kinnaakawela irevista siniphiyerya 30 wala 40 ale aniphavela.

Kaalaleeryaka aChina oBrooklyn, oNova York

Kootoko otthikela omuxukurya mutthu aari oChina! Nihiku nimosa, mwali mmosa oohakalala aahivira okawaka ipaphelo simmulaleya nakoso. Nto kaahinvaha Erevista Owehaweha ni Despertai! a nttaava na eChina. Owo aahaakhelela ni aahikileela nsina nawe wira Katie. Nuumala-vo, khula okathi aakiweha awe aanirwa olavula ni miyo. Kaahimuleela moota siitthaniwa aya mihokhorokho ni mathaapa mwa nttaava na Enkelexi, nto owo aanitthikela oromola wa enamuna kaaromola aka. Nto miyo kaanimutthokiherya soolepa sa Biibiliya, nave kaahinvaha eliivuru Biibiliya Oniixuttiha Exeeni. Nuuvira isumana vakhaani, nkanweha-tho Katie.

Nuumala myeeri vakhaani, mwali mukina yoowo aamulaleya nakoso, aaheemererya irevista kanvahale aka. Esumana ekina, owo aahikivahererya celulaari awe, onahimya so: “Mulavule ni mutthu ori oChina”. Nto miyo kaahihimya wira: “Nkinimusuwela mutthu oChina”. Masi owo aahithipelela, nto kaahimukuxa telefone ni kaahipacerya olavula kiiraka: “Aló, onlavula ti Robison”. Nto kaahiiwa nsu nimosa naakhulaka so: “Robby, munlavula ni Katie. Kootthikela oChina”. Nto miyo kaahithamala kiiraka: “OChina?” Katie aahaakhula iiraka: “Aayo. Robby, munnimusuwela mwali owo oovaherenryeni telefoni? Owo muhima aka. Nkinliyala itthu soreera sikiixuttihale anyu. Xontte mmwiixuttihe muhima aka owo itthu sikiixuttihale anyu”. Nto miyo kaahimuleela so: “Katie, kinoomukhaliherya vanweryaka. Kooxukhurela okileela opuro oryaanyu”. Moohipisa, kaahiwerya olavulana muhima awe Katie ekwaha yookiserya. Nkinsuwela opuro oryaaya vano, masi kinlompa wira amusuwelase Yehova.

Kinnimurumeela Yehova mwa iyaakha 73. Kinnihakalala osuwela wira Yehova ookikhaliherya ohiirela mpantta elapo ni olipiha waamini waka mukhatteya kaatthukweliwe aka. Nave, axihima aka ni axirokoraka aakileela wira yaahivikaniha okhala oolipa murima, mwaha wa ovilela waka olupatthiwa ni Paapa aka. Maama aka ni axihima aka 6 aabatiziwa. Nave paapa aka aahivukula onanariwa wawe, ni aahipacerya orowela mithukumano yena ohinatthi okhwa.

Tthiri kinniroromela wira Muluku atthuna, onimwaahihimuxa amusi ni apatthani aka akhwiiye wira yakhaleke elapo esya. Tthiri vanrowa okhala voohakalaliha otheene ahu omurumeelaka Yehova okathi wotheene, vamosa naale anaaphenta ahu! *

^ etti. 32 Munna Corwin Robison okhwiiye oororomeleya wa Yehova, okathi mwaha ola iira awe olokiheriwaka wira okumiheriwe.