Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Dezembro 2016

Wuupuwelela Itthu Somunepani Ontaphulela Okumi ni Murettele

Wuupuwelela Itthu Somunepani Ontaphulela Okumi ni Murettele

“Yale anèttela sa muneparu, anúpuwela sa muneparu”.AROMA 8:5, Biblya Exirima.

ISIPO: 22, 52

1, 2. Xeeni aRoma 8 oryaawe ootthuneya wa maKristau oowoottihiwa?

OKATHI wa Wuupuwelela okhwa wa Yesu, woonasa wene ninnimusoma aRoma 8:15-17. Iversiikulu iya sinnitthokiherya moota maKristau oowoottihiwa anisuwela aya wira annilipelela orowa wiirimu. ARoma 8:1, onnaahimya maKristau oowoottihiwa wira ahiiraana ni “Yesu Kristu”. Niireke wira aRoma ekapitulu 8 enaahimya paahi maKristau oowoottihiwa? Aahiiso, niireke ennaakhaliherya ale anilipelela okhala mparayiisu valaponi?

2 ARoma ekapitulu 8, yaalepeliwe maKristau oowoottihiwa. Awo ahaakhela munepa wira Muluku ‘àkhalihe an’awe, [ni] awòpole mwa sotakhala s’erutthu’. (aRoma 8:23) Muhoolo, anrowa okhala anamwane a Muluku wiirimu. Yehova ohaalevelela soottheka saya orumeelaka yowoopola. Nave ohaakhaliha anaxariya wira akhale anaawe.aRoma 3:23-26; 4:25; 8:30.

3. Ale anilipelela okhala mparayiisu valaponi, anittottela sai mureerelo ekapitulu 8 ya aRoma?

 3 Wanipacerya, eliivuru ya aRoma, Paulo onnimuhimya mulopwana ahoottihiwe masi aathokoreriwa okhala naxariya ni Yehova. Mulopwana owo aari Abrahamu. Nto Abrahamu aari oororomeleya ni aakhanle Yesu ohinatthi ovaha okumi awe ntoko mukuttho. (Mmusome aRoma 4:20-22.) Nave, olelo-va Yehova pooti waathokorerya maKristau oororomeleya anilipelela okhala mparayiisu valaponi okhala anaxariya. Awo nave annittottela mureerelo miruku siniphwanyaneya aRoma ekapitulu 8.

4. Okathi onimusoma ahu aRoma 8:21, nihaana wiikoha exeeni?

4 ARoma 8:21, onnooniherya wira elapo esya, Yehova onrowa owoopola apinaatamu yoottheka ni okhwa. Nave, onnooniherya wira apinaatamu, anrowa ophwanya “otaphuwa n’uvuwa w’àna a Muluku”. Niireke munniwerya woona muryeene elapo esya? Nrowe noone ele enireerela ahu opaka wira nakhale elapo eyo.

WUUPUWELELA ITTHU SA WERUTTHUNI

5. Paulo onitthokiherya exeeni eliivuru ya aRoma 8:4-13?

5 Mmusome aRoma 8:4-13. Ekapitulu 8 ya aRoma, Paulo onnitthokiherya inamuna piili sa makhalelo a atthu, ale “antthara makhalelo aya òtakhala”, niire so, a werutthuni ni ale “antthara eroho”, niire so, munepa. Atthu akina anuupuwela wira Paulo aahimya maKristau ni ale yahaakhanle maKristau. Masi iversiikulu iya, Paulo aalepenle maKristau yaawo  ‘yathanleliwe okhala atthu’ a Muluku. (aRoma 1:7) Tivonto, moolumo oowi ale “antthara makhalelo aya” a werutthuni ni ale “antthara” munepa, Paulo aahimya maKristau paahi. Nto igrupu iya piili saavirikanne sai?

6, 7. (a) MBiibiliyani, nintaphulela exeeni nuulumo noowi “erutthu”? (b) Nuulumo noowi “erutthu”, ninrumeeliwa sai aRoma 8:4-13?

6 MBiibiliyani nuulumo noowi “erutthu”, ninnitaphulela itthu sinceene. Ikwaha sikina pooti otaphulela erutthu ahu. (aRoma 2:28; 1 aKorinto 15:39, 50) Nave pooti otaphulela wataana wa amusi. Mwa ntakiheryo, Biibiliya onnihimya wira Yesu aari “mutthu a vathí-va munlokoni mwa Davidi”. Nave Paulo onnaahimya aYuda okhala ‘axinn’awe, ayaraniwe [awe] nloko nimosá’.aRoma 1:3; 9:3.

7 Eliivuru ya aRoma 8:4-13, ennaahimya ale “antthara makhalelo aya” a werutthuni. Masi Paulo aaphavela ohimya exeeni ni masu ala? Waakhuliwa waya oniphwanyaneya aRoma 7:5. Eversiikulu ela Paulo aahimmye so: “Vekekhai, okathi nattharahu sowunlela sahu sotakhala, sowunlela seiyo sonanara, silipihiwe n’ikano, saninivarela miteko” sa werutthuni. Paulo onnitthokiherya va wira atthu yaale “antthara makhalelo aya” a werutthuni, taale anuupuwelela ni otthara soophavela saya soohiloka, ni annipaka ele eniphavela murima aya.

8. Xeeni Paulo ohalaka waalopola maKristau oowoottihiwa wira ‘ahitthareke makhalelo aya’ a werutthuni?

8 Xeeni Paulo ohalaka waalopola maKristau oowoottihiwa wira ‘ahitthareke  makhalelo aya’ a werutthuni? Nave, xeeni yoolopola ela eryaaya yootthuneya wa maKristau otheene olelo-va? Mwaha woowi, arumeyi oororomeleya a Muluku pooti opaceryaka woona soophavela saya okhala sootepa otthuneya mookumini mwaya. Mwa ntakiheryo, Paulo aalempe wira anna akina a oRoma yaari ipottha sa “erukulu aya”. Eyo enitaphulela wira orupihana woohiloka, olya aahiiso itthu sikina saahakalaliha erutthu aya saari sootepa otthuneya. (aRoma 16:17, 18; aFilipi 3:18, 19; Yuda 4, 8, 12) Nave-tho, waahikhala muxankiho muulupale muloko wa oKorinto, maana yaahikhala ‘alopwana yarupa ni mwara a tithi aya’. (1 aKorinto 5:1) Tthiri, Paulo aahaana waalopola maKristau ale a eseekulu yoopacerya, okhala wira ‘yatthara makhalelo aya’ a werutthuni.aRoma 8:5, 6.

9. Exeeni aRoma 8:6 ehiniphavela awe ohimya?

9 Yoolopola ela ennivareleya muteko olelo-va. Maana hata mutthu yoole opacenrye khalai omurumeela Yehova pooti opacerya ‘otthara makhalelo awe’ a werutthuni. Nto, niireke Paulo aaphavela ohimya wira nihikhala-khale nuupuwelaka itthu ntoko yoolya, muteko, otthekula ni ophavela othela aahiiso otheliwa? Nnaari. Okhala wira itthu iyo ti sootthuneya mookumini mwahu. Yesu aanilya ni aanaavaha yoolya atthu akina. Nave aanisuwela wira aahaana ophumurya. Paulo aalempe wira orupihana etthu evahiwe paahi ale athelanne.

Itthu sinilavula ahu sinooniherya exeeni? (Nwehe ittima 10, 11)

10. Anitaphulela exeeni masu oowi “ophavela itthu”, niire so, wuupuwelela?

10 Paulo aaphavela ohimya exeeni ni masu oowi “ophavela itthu”, niire so, wuupuwelela? Nuulumo na eGriki, nrumeeliwe ni Paulo nintaphulela wuupuwelela paahi etthu eyo ni ompakela palano. Musomi mmosa onitthokiherya wira masu ala anaahimya atthu “yaale aniphavela vanceene etthu eyo, ni animakela olavulasa etthu eyo”, aahiiso aniwehexexa paahi soophavela saya sa werutthuni. Okumi wa atthu awo onneettihiwa ni soophavela iyo.

Itthu xeeni sootepa otthuneya mookumini mwahu?

11. Itthu xeeni saarowa oniiriha woona okhala sootepa otthuneya mookumini mwahu?

11 MaKristau a oRoma, yaahaana wiivarerya wira awehe itthu yuupuwelela aya. Nto itthu iyo sa werutthuni saari exeeni? Nave-tho, olelo-va nihaana wuupuwelela itthu sootepa otthuneya. Itthu xeeni sinnisivela olavula? Itthu xeeni sinnisivela ovara? Akina pooti woona wira okathi wotheene, anuupuwelela itthu ntoko iya: inamuna soovirikana sa eviinyu, oreeriha empa aya, othuma ikuwo isya, wuncererya musurukhu aahiiso okhuma ifeeriya. Itthu iyo khahiyo sootakhala. Woonasa wene itthu sootthuneya mookumini mwahu. Mwa ntakiheryo, Yesu aahikumiherya eviinyu ofestani wa ekasamento. Nave, Paulo aahimutumererya Timootheyo owurya “evinyu vakhani” mwaha wa oretta awe. (1 Timótheyo 5:23; Yohani 2:3-11) Masi eyo khentaphulela wira eviinyu yaari yootepa otthuneya mookumini mwaya. Ankhi hiyo? Itthu xeeni sootepa otthuneya mookumini mwahu?

12, 13. Xeeni nintthuneya ahu okhalana ephoole ni itthu nnuupuwelela ahu?

 12 Paulo aahimmye wira “ophavela sintthunaya makhalelo òtakhala, onniphwanyiha okhwa”. (aRoma 8:6) Exeeni Paulo aaphavela awe ohimya ni masu ala? Akhala wira ‘nintthara makhalelo ahu’ a werutthuni, nnoopweteiwa wataana wahu ni Yehova ni nlipelelo na okhalana okumi woohimala muhoolo. Tthiri khanimphavela wira eyo yiiraneye. Maana mutthu pooti orukunuxa mweettelo awe. Niireke munnimuupuwela mulopwana ole a oKorinto aakumihiwe mmulokoni? Owo aahituruka mweettelo awe ni aahihiya weettihiwa ni soophavela sawe soohiloka. Nto aahitthikela omurumeela Yehova mwa enamuna yooloka.2 aKorinto 2:6-8.

13 Mulopwana ole ntakiheryo nuulupale na mutthu ‘atthara makhalelo awe’ a werutthuni, masi owerya orukunuxa mweettelo awe. Nave olelo-va, akhala wira muKristau onnitthara soophavela sawe soohiloka, ohiya malamulo a Yehova, owo onoowerya orukunuxa mweettelo awe. Wuupuwelela nlopolo na Paulo nnoonikhaliherya opaka marukunuxo a khula etthu yoohiloka mookumini mwahu.

WUUPUWELELA ITTHU SOMUNEPANI

14, 15. (a) Paulo ontumerenrye wuupuwelela exeeni? (b) Exeeni ehintaphulela aya “ophavela itthu sinitthunaya” munepa?

14 Nuumala Paulo olavula woopiha waya “ophavela sintthunaya makhalelo òtakhala” aahiiso a werutthuni, owo aahitthokiherya-tho wira “ophavela sintthunaya” munepa, “onniphwanyiha ekumi ni murettele”. Tthiri eyo enrowa okhala etthuvo yuulupale!

15 Masi “ophavela itthu sinitthunaya” munepa, khonitaphulela wira mutthu owo khonicalela itthu sikina. Nave khonitaphulela wira okathi wotheene mutthu owo onilavula paahi voohimya sa Yehova aahiiso Biibiliya. Mwa ntakiheryo, arumeyi a Muluku a eseekulu yoopacerya yaari atthu ntoko akina. Awo yaanivara itthu iya: olya ni owurya, othela aahiiso otheliwa, waahuwa anamwane ni ovara muteko.Marko 6:3; 1 aTesalonika 2:9.

Etthu yootepa otthuneya mookumini mwa Paulo waari omurumeela Muluku

16. Muteko xeeni waari wootepa otthuneya mookumini mwa Paulo?

16 Masi Paulo ni maKristau makina a eseekulu yoopacerya, khiyaahiya itthu iyo sikhalaka sootepa otthuneya mookumini mwaya. Mwa ntakiheryo, ninnisuwela wira Paulo aanivara muteko woopaka iheema. Masi muteko owo khahiyo waari wootepa otthuneya mookumini mwawe. Maana etthu yootepa otthuneya mookumini mwa Paulo waari omurumeela Muluku. Tivonto, Paulo aanaalaleerya ni owiixuttiha atthu mwa nthiti. (Musome Miteko 18:2-4; 20:20, 21, 34, 35.) Anna ni arokora a oRoma yaahaana omutakiha Paulo, nave hiyo nihaana opaka etthu emosaru.aRoma 15:15, 16.

17. Ninrowa ophwanya exeeni akhala wira ‘ninniphavela sintthunaya’ munepa?

17 Okumi ahu onrowa okhala sai akhala wira nimmurumeela Yehova paahi? ARoma  8:6 onihimya wira: “Ophavela sintthunaya” munepa, “onniphwanyiha ekumi ni murettele”. Opaka eyo onihela muhina weemererya muupuwelo ahu weettihiwa ni munepa wa Yehova ni wiixutta moota owo onuupuwela awe. Yehova oonileiherya onivaha okumi woohakalaliha vano ni woohimala muhoolo.

Nimuxukhureleke Yehova mwaha woonivaha murettele wekeekhai wa mmuupuweloni

18. Ninrowa ophwanya sai murettele akhala wira ‘nimphavela sintthunaya’ munepa?

18 Paulo aaphavela ohimya exeeni ni masu oowi “ophavela sintthunaya” munepa, onniphwanyiha murettele? Nnaamwi atthu otheene aphavelaka murettele, vanceenexa murettele wa mmuupuweloni, atthu vakhaani paahi taniphwanya murettele owo. Nihaana omuxukhurela Yehova mwaha woonivaha murettele wekeekhai wa mmuupuweloni. Nave ninniwerya okhalana murettele ni amusi ahu ni anna mmulokoni. Okhala wira naalipa-oottheka, okathi mukina hiyo pooti onyoonyihana ni anna ni arokora. Akhala wira eyo enookhumelela, nihaana otthara miruku sa Yesu sini: “Murowé toko, mwatàne ni munn’iny’uwo”. (Matheyo 5:24) Muupuweleke wira anna ni arokora animurumeela Yehova, “Muluku, yowo onvaha murettele”.aRoma 15:33; 16:20.

19. Akhala wira ninnuupuwelela sintthuna munepa, murettele xeeni ninrowa ahu okhalana?

19 Akhala wira ninnuupuwelela aahiiso “ophavela sintthunaya” munepa, ninrowa okhalana murettele ni Muluku. Profeta Yesaya olempe so: “Nyuwo, Apwiya, munnalipiha ni murettele ale anthipelela owiwelelani ni wororomelani”.Yesaya 26:3; mmusome aRoma 5:1.

20. Xeeni ninxukhurela ahu miruku siniphwanyaneya aRoma ekapitulu 8?

20 Hata nilipelelaka orowa okhalaka wiirimu aahiiso mparayiisu valaponi, otheene ahu ninnittottela mureerelo miruku siniphwanyaneya aRoma ekapitulu 8. Ninnixukhurela okhala wira Biibiliya onnintumererya omurumeela Yehova, ohiya otthara soophavela sahu. Ninnisuwela wira navikaniha wuupuwelela aahiiso “ophavela sintthunaya” munepa, ninrowa otthuveliwa. Maana Paulo olempe so: “Eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”.aRoma 6:23.