Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Dezembro 2016

Yehova Onnaatthuvela Ale Animphavela

Yehova Onnaatthuvela Ale Animphavela

“Ole onimwattamela Muluku ohana wamini wira Muluku òkhala ni wira onnatthuvela ale animphavela”.AHÉBERI 11:6.

ISIPO: 26, 55

1, 2. (a) Waamini ni ophenta onivarihana sai? (b) Makoho xeeni ninrowa ahu othokorerya?

TIITHI IHU, Yehova, ooleiherya wira onimwaatthuvela arumeyi awe oororomeleya. Ela enamuna emosa Yehova enooniherya awe oniphenta wawe, nave hiyo ninnimphenta “okhala wira Muluku t’opajenrye oniphenta”. (1 Yohani 4:19) Vaavo omphenta wahu Yehova oninnuwa aya, omwaamini wahu onnilipa ni ninnikupali wira Yehova onrowa waatthuvela ale animphenta.Mmusome aHéberi 11:6.

2 Yehova onnaatthuvela arumeyi awe! Maana okhuma khalai owo onnaatthuvela. Tivonto, omwaamini wahu Muluku onoolipa akhala wira ninnikupali wira onimwaatthuvela ale animphavela. Nthowa xeeni? Nthowa noowi “wamini t’inamuna y’okhalana itthu sinlipelelahu”. (aHéberi 11:1) Waamini onitaphulela okupali wira Muluku onrowa waareeliha ale animuroromela. Moota xeeni olipelela etthuvo onnikhaliherya aya? Yehova aatthuvenle sai arumeyi awe a khalai ni onaatthuvela sai arumeyi awe a mahiku ala? Nrowe noone.

 YEHOVA OOLEIHERYA WAAREELIHA ARUMEYI AWE

3. Natiri xeeni ori eliivuru ya Malakhiya 3:10?

3 Yehova Muluku, ooleiherya waatthuvela arumeyi awe oororomeleya. Owo onnintumererya wira nipakeke sotheene siniwerya ahu niroromelaka wira onrowa onitthuvela. Yehova onihimya wira: “Mukehererye”. Nave onnivikaniha oriki: “Munimona wira miyo kinrowa otthukula mikhora sa wirimu, wira komoriheleni watta wa sorera sa khula enamuna”. (Malakhiya 3:10) Ninnooniherya oxukhurela wahu mareeliho awo neemereryaka nlattulo na Yehova noowi: mukeehererye.

4. Xeeni ninroromela ahu masu a Yesu ari Matheyo 6:33?

4 Yesu aahaaleiherya awiixutti awe wira, akhala wira yaamuhela nipuro noopacerya Omwene, nto Muluku aarowa waakhaliherya. (Mmusome Matheyo 6:33.) Yesu aahilavula eyo maana aanisuwela wira anatiri a Muluku anniiraneya tthiri. (Yesaya 55:11) Tivonto, hiyo pooti okupali wira akhala wira nnoomwaamini Yehova, owo onrowa ommaliherya natiri awe oni: “Miyo nkinonyanyalani-tho: Kinimojalani mahiku othene”. (aHéberi 13:5) Natiri ola a Yehova onninikhaliherya ororomela masu a Yesu ari Matheyo 6:33.

Yesu aahaaleela awiixutti awe wira yaarowa otthuveliwa mwaha wa wiimananiha waya (Nwehe ettima 5)

5. Moota Yesu aamwaakhunle awe Pedru, onnilipiha sai otheene ahu olelo-va?

5 Murummwa Pedru aahimukoha Yesu wira: “Hiyo va, nohiya itthu sothene, nnottharani nyuwo. Ninrowa ophwanya-ni?” (Matheyo 19:27) Yesu khampwapwenle Pedru mwaha woomukoha. Maana Yesu aahaaleela awiixutti awe wira yaarowa  otthuveliwa mwaha wa wiimananiha waya. Muhoolo, arummwa ni arumeyi akina oororomeleya anrowa olamulelaka ni Yesu wiirimu. Nave Yesu aahihimya wira olelo-va ninnitthuveliwa oriki: “Othene ale anihiya emp’aya walá anahiya axinn’aya n’axirokor’aya n’atithi aya n’ame aya n’an’aya n’imatta saya mwaha wa nsina naka, animwinjereriwa mpakha miloko mulokó iye sihiyalyaya, nave-tho anophwanya ekumi ehinimala”. (Matheyo 19:29) Otheene ale animutthara Yesu animwaaphwanya atithi aya, amamaya, axinnaya, axirokoraya ni anaaya mmulokoni olelo-va. Mwekeekhai ninniphwanya itthu sa faita ovikana wiimananiha onipaka ahu mwaha wa Omwene wa Muluku.

‘OLIPIHA MIRIMA SAHU NTOKO NANKURA’

6. Xeeni Yehova onileiherya awe waatthuvela arumeyi awe?

6 Nave-tho, ninniphwanya mareeliho manceene olelo-va, ni ninnilipelela mareeliho maalupale muhoolo. (1 Timótheyo 4:8) Yehova onnileiherya waatthuvela arumeyi awe oororomeleya, maana onnisuwela wira ennaakhaliherya ovilela okathi wa mixankiho. Okupali wira Yehova “onnatthuvela ale animphavela”, onninikhaliherya ovikaniha ororomeleya.aHéberi 11:6.

7. Moota xeeni nlipelelo nahu ninlikana aya ni nankura?

7 Mwaha Yesu aalavunle awe Vamwaako, owo aahimmye so: “Mutthapeke, mutteliweke murima, okhala wira otthuveliwa wanyu wirimu onokhala wulupale. Tthiri ti siso salupatthiwaya maprofeta a khalai muhinatthi nyuwo”. (Matheyo 5:12) Arumeyi akina a Muluku anrowa waakhela etthuvo aya wiirimu. Masi akina, anrowa okhalaka mahiku otheene mparayiisu valaponi. Tivonto, Yesu aahimmye awe wira: “Mutthapeke, mutteliweke murima”. (Esalimo 37:11; Luka 18:30) Tthiri, otheene ahu, “nroromelo nlo ninnilipiha mirima sahu, ntoko nankura onemexawe ekalawa”. (aHéberi 6:17-20) Ntoko nankura oneemexa awe ekalawa okathi wa munamukhaya, okhalana nlipelelo noolipa, nnoonikhaliherya ohimora. Nave nnoonivaha ikuru wira nivilele okathi wa mixankiho.

Yehova onnileiherya waatthuvela arumeyi awe oororomeleya, maana onnisuwela wira ennaakhaliherya ovilela okathi wa mixankiho

8. Nlipelelo ninvukula sai oxanka?

8 Nlipelelo nahu pooti onikhaliherya ovukula oxanka. Ntoko balsamu onivukula awe owereya, sooleiherya sa Muluku pooti ovukula oxanka wahu. Tthiri ti voomaaliha osuwela wira Yehova onoonikhapelela akhala wira nnoomureya muritti ahu. (Esalimo 55:23) Nnoowerya okupali wira Muluku onooniirela “itthu sulupalexa, sintepa ovikana iye sininvekelahu”. (aÉfeso 3:20) Yehova onoonikhaliherya ohiya vakhaani paahi, masi onrowa oniirela “itthu sulupalexa, sintepa ovikana iye sininvekelahu”!

9. Exeeni ennikupaliha wira Yehova onrowa onireeliha?

 9 Wira nitthuveliwe, nihaana omwaamini Yehova ni wiiwelela malakiheryo awe. Moise aahaaleela aIsarayeli wira: “Apwiya Muluku anyu anniphavela worerihelani n’uwerya mulaponi anrowaya wovahani, wira ekhalé yawinyu, mukhaleke-mo. Tivó khavo eriyari anyu onrowa othoiwa, mwawiriyanakaru orattene masu Àpwiya Muluku anyu, mwettelakaru ni murim’anyu wothene ikano iya sothene sinorumakani olelo. Mwirá siso, Apwiya Muluku anyu animorerihani ntoko sohimenryayani”. (Otumererya 15:4-6) Niireke munnikupali tthiri wira Yehova onrowa wooreelihani mwavikaniha omurumeela moororomeleya? Tthiri aakhala mathowa aniwiirihani okupali.

YEHOVA AAHAATTHUVELA

10, 11. Yehova aamutthuvenle sai Yosefe?

10 Biibiliya oolempwe wira onikhaliheryeke. Nave ninniphwanya matakiheryo anooniherya moota Muluku aatthuvenle awe arumeyi awe khalai. (aRoma 15:4) Yosefe ntakiheryo nooloka na atthu yaatthuveliwe. Wanipacerya axinnawe yaahimutumiha ntoko epottha. Ohoolo waya, pwiya awe aahimootherya khumurihela mukhatteya wEjiitu. Niireke okathi Yosefe aaryaawe mukhatteya aahinyanyaliwa ni Yehova? Nnaari! Maana Biibiliya onihimya wira: “Vano Apwiya yahikhala ni Yosefe” ni “Apwiya yari ni yowo: tthiri Apwiya yanimukhaliherya wira miteko sawe sothene sokololoweke”. (Maphattuwelo 39:21, 23) Hata okathi wa mixankiho, Yosefe aahipixa murima owehereryaka okhaliheriwa ni Muluku.

11 Muhoolo mwaya, Farawo aahimutaphula Yosefe mukhatteya, khumukhaliha mukhulupale oowerya ni a nenli wEjiitu. (Maphattuwelo 41:1, 37-43) Vaavo Yosefe ni amwaarawe yaayanre aya anamwane aaxilopwana anli, “Yosefe ahinvaha mwana òpajerya nsina na Manasé, ìraka: ‘Muluku òkitthuvela mwaha wa sohawa saka ni mwaha w’etthoko yothene y’atithi aka’. Vano ahinvaha mwana anenli nsina n’Efrayimi, ìraka: ‘Muluku t’okiyarihale mulaponi m’ohawa waka’”. (Maphattuwelo 41:51, 52) Yehova aahimutthuvela Yosefe mwaha wa ororomeleya wawe ni aahiwerya owoopola aIsarayeli ni atthu a wEjiitu okathi wa etala yuulupale. Yosefe aanisuwela wira aari Yehova aamutthuvela ni aamureeliha.Maphattuwelo 45:5-9.

Yesu aahihakalala ni aahiwerya otteeliha nsina na Muluku

12. Moota xeeni Yesu aavikaninhe awe ororomeleya okathi eehereriwa awe?

12 Nave, Yesu Kristu aahivikaniha omwiiwelela Muluku okathi eehereriwa awe, nto Yehova aahimutthuvela. Exeeni yaamukhalihenrye Yesu, ovikaniha ororomeleya? Biibiliya onitthokiherya wira: “Owo atthunne, amutteliwa murima, ntoko saphwanelawe: nto ahivilela wiviwa” vamwirini wa nihaaxeryo, “ahithokoreryaka wuliwa muru”. (aHéberi 12:2) Tthiri Yesu aahihakalala ni aahiwerya otteeliha nsina na Muluku. Nave  Yesu ootthuveliwa maana oheemereriwa ni Tiithi awe ni oovahiwa iparakha sinceene. Biibiliya onihimya wira: “tivó vakilanthyawe mono wolopwana w’ehije ya Muluku”. Nave onincererya oriki: “Muluku ònvuwiha vanjene, khunvaha nsina novikana masina othene”.aFilipi 2:9.

YEHOVA KHONLIYALA MITEKO SAHU

13, 14. Yehova onoonela sai itthu nnimpakela ahu?

13 Nikupaliki wira Yehova onnivaha efaita khula etthu enipaka ahu wira nimurumeele. Owo onnisuwela okathi ohiniikupali ahu aahiiso nnoona ahu wira khanniwerya opaka etthu. Muluku onninikhapelela vaavo ninxanka ahu sa moota woophwanya muteko aahiiso okhapelela emusi ahu. Nave onnisuwela okathi nihinwerya ahu opaka itthu sinceene ntoko naaphavela ahu mwaha wa owereyasiwa aahiiso okhulumuwa. Tivonto, nikupaliki wira Yehova, onnivaha efaita ororomeleya wahu hata nikumanaka mixankiho.Mmusome aHéberi 6:10, 11.

14 Nave muupuweleke wira Yehova ‘onniwìwa ale aninvekela’. Tthiri nikupaliki wira okathi oninvekela ahu, owo onniniwiriyana. (Esalimo 65:3) Nto ‘Tith’ihu, ni Yesu Kristu Pwiy’ahu, onivaha eparakha ni murettele’, onrowa onivaha khula etthu ennithowa wira nivikaniheke omwaattamela. Okathi mukina Muluku pooti waarumeela anna ni arokora wira anikhaliherye. (2 aKorinto 1:3) Yehova onnisiveliwa nawoonelaka othunku atthu akina. Biibiliya onihimya wira: “Oninvaha mmasikhini, onnimoliha Muluku, yowo onrowa omutthuvela”. (Miruku 19:17; Matheyo 6:3, 4) Tivonto, vaavo nnaareerela ahu murima ni waakhaliherya anna ni arokora, Yehova onithokorerya ntoko nnoomukophiha. Nave onnaaleiherya waatthuvela ale anaareerela murima akhwaaya.

OTTHUVELIWA VANO NI MAHIKU OTHEENE

15. Etthuvo xeeni enilipelela anyu? (Nwehe elatarato yoopacerya.)

15 MaKristau oowoottihiwa annilipelela waakhela “ekhara ya xariya”, anitthuveliwa aya ni Yesu. (2 Timoteyo 4:7, 8, Waataana wa Naanaano) Masi nihuupuweleke wira nlipelelo nahu khanrina efaita wa Muluku okhala wira ti noovirikana ni atthu akina. Atthu imilyau sinceene a “ipwittipwitthi sikina”, annilipelela otthuveliwa ni okumi woohimala mparayiisu valaponi. Tthiri atthu awo anrowa okhalana “murettele womalela”.Yohani 10:16; Esalimo 37:11.

16. Masu xeeni oolipiha ari 1 Yohani 3:19, 20?

16 Ikwaha sikina hiyo pooti woona wira khaninwerya opaka itthu sinceene ntoko naaphavela ahu, aahiiso oxanka nuupuwelaka wira Yehova khonisiveliwa ni itthu vakhaani sinipaka ahu. Nave pooti wuupuwelaka wira khaninreerela otthuveliwa etthu. Masi nihikhala-khale nliyalaka wira: “Muluku ti mulupale ovikana murim’ahu: owo onnisuwela sothene”. (Mmusome 1 Yohani 3:19, 20.) Hiyo nimmurumeela Yehova mwaha womphenta ni omwaamini, tivonto ninkupali ahu wira onrowa onitthuvela, nnaamwi okathi mukina noonaka wira itthu sinipaka ahu khasirina efaita.Marko 12:41-44.

17. Mareeliho xeeni anaakhela ahu olelo-va?

17 Mahiku ala ookiserya a olumwenku ola wootakhala wa Satana, Yehova  onnaareeliha atthu awe. Onnaakhaliherya atthu awe okhalana osuwela wekeekhai, murettele ni wiirela mpantta emusi yowiiraana ya olumwenku wotheene. (Yesaya 54:13) Ntoko Yesu oleihenrye awe, Yehova onnintthuvela vano onivahaka emusi yoophenta ya anna ni arokora a olumwenku wotheene. (Marko 10:29, 30) Nave-tho, ale animphavela Muluku annitthuveliwa ni murettele wekeekhai, ohakalala ni otteeliwa murima.aFilipi 4:4-7.

18, 19. Arumeyi a Yehova anoonela sai itthuvo anaakhela aya?

18 Arumeyi a Yehova olumwenku wotheene, annaakhela mareeliho manceene anikhuma wa Tiithi ihu. Mwa ntakiheryo, Bianca a wAlemanha onihimya so: “Kinnimuxukhuru vanceene Yehova mwaha wookikhaliherya mixankiho saka sa khula nihiku. Moolumwenkuni atthu khareere oxanka ni kharina nlipelelo. Masi ovara muteko ni Yehova onnikiiriha okhala oovareleleya mmatatani mwawe. Hata vahikhweyaka omurumeela, owo onnikireeliha vanceene”.

19 Nave nkahaya muupuwele yowiiraneya ya murokora Paula, orina iyaakha 70 a oCanada, yoowo orina eretta eniitthaniwa espinha bífida, niire so, eretta enirakaliha muthana. Owo onihimya wira okhala wira khoniwerya weetta, khontaphulela wira khoniwerya olaleerya. Maana onincererya oriki: “Kinnirumeela inamuna soovirikana ntoko olaleerya ni telefoni ni olaleerya mohiilokiherya. Etthu enikikhaliherya okhala wira kookhalana ekaderno, kinlepa aka soolepa ni malakiheryo a iliivuru sahu, wira kiweheke okathi mukina. Ekaderno aka koovaha nsina noowi: ‘Ekaderno ya Wuupuwelela’. Owuupuwelela anatiri a Yehova, anninikhaliherya okathi onikhulumuwa ahu. Okathi wotheene, Yehova onninikhaliherya nnaamwi nikhalanaka mikhalelo soovirikana”. Woonasa wene mukhalelo anyu woovirikana ni Bianca aahiiso Paula. Hata vari siiso, nyuwo pooti wuupuwela moota Yehova onootthuvelaweni ni onaatthuvela awe atthu akina. Tthiri, ti vooloka wuupuwela moota Yehova onootthuvelaweni vano ni moota onrowa awe wootthuvelani muhoolo!

20. Exeeni enlipelela ahu navikaniha omurumeela Yehova moororomeleya?

20 Muhikhala-khale muliyalaka wira ovekela ni murima wotheene “onimophwanyihani otthuveliwa wulupale”. Mukupaliki wira ‘mwettela otthuna wa Muluku’, munrowa ‘ophwanya etthu yohimenryaweni’. (aHéberi 10:35, 36) Tivonto, nrowe nivikaniheke olipiha waamini wahu ni opaka eniwerya ahu wira nimurumeeleke Yehova. Tthiri, nikupaliki wira Yehova onrowa onitthuvela!Mmusome aKolosi 3:23, 24.