Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Agosto 2016

Niireke Munnoona Otthuneya Waya Owiixuttiha Akina?

Niireke Munnoona Otthuneya Waya Owiixuttiha Akina?

“Itthu siniwixuttihakani ti sorera”.—MIRUKU 4:2.

ISIPO: 45, 44

1, 2. Xeeni vanitthuneya ahu owiixuttiha anna wira akhapeleleke miritti sa mmulokoni?

YESU aaniluttuweliwa vanceene olaleya Omwene. Nave aahiviriha okathi munceene wira owiixuttihe atthareli awe. Aahiwooniherya moota woolaleerya ni waakhapelela atthu a Muluku. Awiixutti ale yaahiixutta okhala ntoko makampusi yoowo onikhapelela ipwittipwitthi sawe. (Matheyo 10:5-7) Nave Filipe aahiluttuweliwa olaleerya ni owiixuttiha anaawe axithiyana ovara muteko mmosaru. (Miteko 21:8, 9) Olelo-va, nihaana owiixuttiha akina. Nthowa xeeni?

2 Miloko sinceene olumwenku wotheene, annibatiziwa atthu anceene. Atthu awo ahaana wiixuttihiwa. Nihaana waakhaliherya woona otthuneya waya omusoma Biibiliya mekhaya. Vannitthuneya owiixuttiha moota woolaleerya ni owiixuttiha atthu ihapari sooreera. Anna abatiziwe niinano ahaana wiixuttihiwa wira muhoolo akhale arummwa oorumeela ni axitokweene. Anna otheene mmulokoni anoowerya opaka eniwerya aya wira yaakhaliherye ale a niinano.Miruku 4:2.

 NWIIXUTTIHE ALE ANSIVELIWA EKEEKHAI MOOTA WOOMUSOMA BIIBILIYA

3, 4. (a) Paulo oonihenrye sai ovarihana okhanle osoma Soolempwa ni olaleerya saana? (b) Exeeni enitthuneya ahu opaka, nihinatthi waatumererya akina omusoma Biibiliya mekhaya?

3 Khula murumeyi a Yehova ohaana omusoma ni omwiixutta Biibiliya wira osuweleke yootthuna ya Muluku. Murummwa Paulo aahaatthokiherya eyo axinna ni arokora yaakhala oKolosi, ohimyaka so: “Khannihiya wolompelani. Ninninvekela Muluku wira òsuweliheni vomalela otthuna wawe”. Xeeni vaatthuneya aya anna ale osoma ni wiixutta Soolempwa? Maana opaka eyo, yanwiiriha okhala a miruku ni waakhaliherya osuwela moota ‘wowetta ntoko simphwanelaya atthu Àpwiya yasivelihaka Apwiya mwa itthu sothene’. Nave eyo yaamwaakhaliherya ovara “miteko sorera sa khula enamuna”, etthu yeeyo Yehova aaphavela awe wira epakeke, otepexa wene olaleya ihapari sooreera. (aKolosi 1:9, 10) Vaavo vanimusomiha ahu mutthu, nihaana omukhaliherya osuwela wira omusoma ni omwiixutta Biibiliya, onoomukhaliherya omurumeela Yehova.

4 Khivaniweryaneya omukhaliherya ole onimusomiha ahu Biibiliya oweha otthuneya waya omusoma Biibiliya mekhawe akhala wira hiyo khanimmusoma. Tthiri, akhala wira ninnimusoma Biibiliya ni wuupuwelela ele enisoma ahu, eyo enoonikhaliherya mookumini mwahu ni muteko woolaleerya. Mwa ntakiheryo, okathi onilaleerya ahu pooti okohiwaka nikoho noovila waakhula, masi nihaana omurumeela Biibiliya wira naakhule. Vaavo ninsoma ahu moota Yesu, Paulo ni atthu akina yaavikaninha aya moohitemwa muteko woolaleerya, nnookhala oolipa wira nivikanihe olaleerya nnaamwi sinikhumelelaka mixankiho. Nave okathi onaaleela ahu akina ele yiixuntta ahu ni moota yoosoma eyo enikhalihenrye aya, pooti owiiriha akina ophavela omusoma Biibiliya wira aphwanye mareeliho mamosaru.

5. Muhimye malakiheryo a moota wowaakhaliherya ale a niinano okhalana yoolema ya omusoma Biibiliya mekhaya.

5 Nyuwo pooti wiikoha so: ‘Kinrowa omukhaliherya sai ole onimusomiha aka, omusoma Biibiliya khula nihiku?’ Waaniheryasa nyuwo pooti omooniherya moota woolokiherya ittima sa eliivuru enimusomiha anyu. Nave pooti omulakiherya wira osomeke soohimmwa sikina siri apendise a eliivuru Biibiliya Oniixuttiha Exeeni Tthiri?, ni oweha soolepa siromoliwe. Moottharelana, pooti omooniherya moota woolokiherya mithukumano wira okomentariki. Mmutumererye osoma khula erevista Owehaweha ni  Despertai! Mwa ntakiheryo, pooti omurumeela Watchtower Library ni EBIBLIOTEKA ONLAINE ya Torre de Vigia, wira mmooniherye moota woophwanya waakhuliwa wa makoho anivarihana ni Biibiliya. Vaavo vaneererya awe inamuna iya soovirikana sa yoosoma awe, owo onoosiveliwaka ni ophavela wiixutta itthu sikina.

6. (a) Munrowa omukhaliherya sai ole onimusomiha anyu osiveliwa omusoma Biibiliya? (b) Exeeni enrowa waakhaliherya ale anaasomiha ahu otepaka osiveliwa omusoma Biibiliya?

6 Vaavo vanimusomiha ahu mutthu, nimphavela wira oone wira Biibiliya ta faita okhala wira onoomukhaliherya omusuwela saana Yehova. Ohiya omukhanyererya wira omusomeke Biibiliya, hiyo nihaana omukhaliherya wira osiveliweke ni yoosoma eyo. Avikaniha omwiixutta Biibiliya, onrowa otepaka osiveliwa ntoko nasaalimo yoowo aahimmye so: ‘Vano miyo, oreriwa waka owattamelani. Apwiya, miyo kinnotthyawelelani, wira kilaleye miteko sanyu sothene’. (Esalimo 73:28) Mwekeekhai, munepa wa Yehova onoomukhaliherya mutthu oniphavela omwaattamela yena.

NWIIXUTTIHEKE ALE A NIINANO MOOTA WOOLALEERYA NI WIIXUTTIHA

7. Yesu aakhalihenrye sai awiixutti awe olaleya ihapari sooreera? (Nwehe elatarato yoopacerya.)

7 Nnoowerya wiixutta itthu sinceene nthokoreryaka moota Yesu aawiixuttinha awe arummwa awe. Yesu aanilaleerya hoothe wira aweheke moota aalaleerya awe atthu. Nave owo aahaavaha malakiheryo ootthuneya voohimya sa olaleerya. (Matheyo, ekapitulu 10) [1] (Nwehe enoota.) Moohipisa, arummwa yaahiixutta ni Yesu moota wowiixuttiha atthu ekeekhai. (Matheyo 11:1) Nrowe niwehe itthu piili sikhanle ahu oowaakhaliherya ale a niinano okathi onilaleerya aya.

8, 9. (a) Yesu aalavulana sai khula mutthu aamulaleerya awe? (b) Ninrowa waakhaliherya sai anamalaleerya a niinano omutakiha Yesu okathi onivaanela aya ni atthu?

8 Moota woovaanela ni atthu. Khahiyo wira okathi wotheene Yesu aalavula ni muttitthi wa atthu paahi. Ikwaha sikina, owo aahilavula ni khula mutthu moopatthaneya. Mwa ntakiheryo, Yesu aahivaanela mookuxa murima ni muthiyana ole aarwiiye orika maasi ehime yaari waattamela epooma ya oSikari. (Yohani 4:5-30) Nave-tho, Yesu aahilavula ni Matheyo yoowo iihaniwa-tho Levi, mulipa-ooliviha mpoosito, ni aahimwiirela wira okhale naxikola awe. Matheyo aaheemererya nto muhoolo mwaya aahimulattula Yesu ni akina orowa olya owannyawe. Opuro ole, Yesu aahilavula ni atthu anceene.—Matheyo 9:9; Luka 5:27-39.

Vaavo ninlavulana ahu atthu moopatthaneya ni waareerela murima, atthu awo anoophavelaka owiriyana ele enihimya ahu

9 Nave-tho, Yesu aahilavula moopatthaneya ni Natanayeli, hata Natanayeli aalavunle itthu soohiloka voohimya sa atthu a oNazarethi. Okhala wira Yesu aahilavula moopatthaneya, Natanayeli aahirukunuxa muupuwelo awe voohimya sa Yesu, yoowo aakhumme elapo ya oNazarethi. Nto Natanayeli aaniphavela ovikaniha wiixuttihiwa ni  Yesu. (Yohani 1:46-51) Ntakiheryo na Yesu, ninniniixuttiha wira okathi onilavula ahu ni atthu moopatthaneya ni waareerela murima, atthu awo anoophavelaka owiriyana ele enihimya ahu. [2] [Nwehe enoota.] Vaavo vaniwiixuttiha ahu ale a niinano olavula moota owo, anrowa otepaka osiveliwa olaleerya.

10-12. (a) Yesu aakhalihenrye sai atthu akina osiveliwa ihapari sooreera? (b) Ninrowa waakhaliherya sai anamalaleerya a niinano olokiherya inamuna saya sa wiixuttiha ikeekhai sa mBiibiliyani?

10 Nwiixuttiheke ale aniphavela owiriyana. Yesu aari mutthu oowaatteliwa miteko. Masi okathi atthu yaaphavela aya onwiriyana, owo aahiviriha okathi munceene naawo ni aahiwiixuttiha itthu sinceene. Mwa ntakiheryo, nihiku nimosa muttitthi wa atthu waahithukumana mukerekhere wa ephareya wira anwiriyaneke Yesu. Tivo, Yesu ni Pedru yaahisuseriha ekalawa ele mukerekhere mwa ephareya, nto Yesu khupacerya owiixuttiha atthu. Nuumala-vo, aahiphavela omwiixuttiha Pedru etthu. Yesu aahipaka mwiiriirya, khwiiriha okela ihopa sinceene muntthavini mwa Pedru. Vano aahimuhimeerya Pedru wira: “Okhuma olelo vava munokhala mutothi àtthu”. Moohipisa, Pedru ni ale aarina awe “yahikumiha ikalawa saya mmàsini, yahihiya sothene”, khumutthara Yesu.—Luka 5:1-11.

11 Nave Nikodemo aaniphavela wiixuttihiwa vanceene ni Yesu. Masi okhala wira Nikodemo aari muulupale a eSineedrio, aanoova owehiwa ni atthu olavulaka ni Yesu. Tivo, aahimuxukurya Yesu ohiyu. Yesu khaamomonle masi aahiviriha okathi nuuwo omutthokiheryaka ikeekhai sootthuneya. (Yohani 3:1, 2) Imaara sotheene, Yesu aanirumeela okathi awe wira owiixuttihe atthu ekeekhai ni olipiha waamini waya. Moolikanasa, nihaana waaxukurya atthu okathi oniphavela aya, ni oviriha okathi munceene naakhaliheryaka omwiiwexexa Biibiliya.

12 Vaavo ninvara ahu vamosa ni anamalaleerya a niinano, nihaana owiixuttiha moota wootthikela waaxukurya ale ansiveliwa ekeekhai wira yaakhaliherye. Nihaana waalattula wira nrowe vamosa waaxukurya ale yaasiveliwe ekeekhai ni wiiriha soosoma sa Biibiliya. Mwa enamuna eyo, awo anoosuwela moota woowiixuttiha atthu akina ni woona moota onihakalaliha aya waakhaliherya akina wiixutta ekeekhai voohimya sa Yehova. Nuumala-vo, anamalaleerya awo a niinano anrowa osiveliwaka otthikela waaxukurya ale yaalalenrye aya wira yaasomiheke Biibiliya. Awo animwiixutta opixa murima ni ohaakuvela okhulumuwa akhala wira khanaaphwanya ale yaavanelanne aya.—aGalasia 5:22; nwehe ekaaxa eni: “Owo Khooceyale”.

NWIIXUTTIHE ALE A NIINANO WAARUMEELA ANNA A MMULOKONI

13, 14. (a) Munoonela sai matakiheryo ari mBiibiliyani a atthu yiimananiha waakhaliherya akina? (b) Mwa inamuna xeeni mukhanle anyu oowiixuttiha anamalaleerya a niinano ni amiravo akina owooniherya niphento anna ni arokora?

13 Yehova oniphavela wira arumeyi awe aphentaneke ntoko anna ni arokora, nave arumeelaneke mukina ni mukhwaawe. (Mmusome Luka 22:24-27; 1 Pedru 1:22.) Biibiliya onnooniherya wira Yesu aahileva itthu sinceene, ohela muhina okumi awe, wira aakhaliherye atthu. (Matheyo 20:28) Tabithá “àvira awirelaka sorera atthu othene ni àkhaliheryaka”. (Miteko 9:36, 39)  Nave-tho, Maria ‘anavarela muteko’ anna ni arokora ooRoma. (aRoma 16:6) Ninrowa waakhaliherya sai ale a niinano woona otthuneya waya waakhaliherya anna ni arokora?

Nwiixuttihe ale a niinano waaphenta ni waarumeela anna ni arokora (Nwehe ittima 13, 14)

14 Nihaana waavekela wira nrowe vamosa waakhaliherya anna ni arokora oowuuluvala ni ale aniwereiwa. Vaavo anamuyari anrowa aya waaxukurya anna awo, ahaana waakuxa anaaya vaareerelaka. Nave axitokweene ahaana waavekela amiravo aahiiso anamalaleerya asya ovara vamosa okathi onaavaha aya yoolya ale oowuuluvala ni okathi anilokiherya aya ipa sa anna awo. Nto vaavo amiravo ni anamalaleerya asya anoona aya moota anna ni arokora anikhapelelana aya, awo animwiixutta opaka etthu emosaru. Mwa ntakiheryo, okathi aalaleerya awe mittetthe saamukhaani, mutokweene mmosa anaaxukurya ikwaha sinceene anna yaakhala opuro ole wira osuwele moota yaari aya. Munna mmosa mmiravo aaniphavela wiixutta etthu ni ntakiheryo nooloka na mutokweene ole ni wuupuwela moota aarowa awe waakhaliherya anna ni arokora.—aRoma 12:10.

15. Xeeni varyaaya vootthuneya axitokweene osiveliwa orowa vahoolo wa anna a mmulokoni?

15 Yehova ohaavaha alopwana muritti wa wiixuttiha Nuulumo na Muluku mmulokoni. Tivonto, ti vootthuneya anna woona otthuneya waya wiixuttiha saana okathi anilavula aya myaha. Akhala wira nyuwo mwa mutokweene, woonasa wene munnisiveliwa onwiriyana murummwa oorumeela, vaavo onilavula awe mwaha ni ophavela omukhaliherya moota woolokiherya saana. (Nehemiya 8:8) [3]—Nwehe enoota.

16, 17. (a) Paulo oonihenrye sai ophavela orowa vahoolo wa Timootheyo? (b) Axitokweene anrowa owiixuttiha sai arummwa oorumeela wira akhale amakampusi mmulokoni?

16 Vannitthuneya owiixuttiha anna anceene wira akhale amakampusi mmulokoni. Paulo aahimwiixuttiha Timootheyo ni omutumererya wira owiixuttiheke akina. Paulo aahimmye so: “Mwilipihe n’iparakha erinahu mwa Yesu Kristu. Ikekhai sikìwalyanyu kihimyaka oholo w’anamona anjene, mwalèle atthu òroromeleya, wira yala esuweleke owixuttiha-tho atthu akina”. (2 Timótheyo 2:1, 2) Timootheyo aahiixutta itthu sinceene ni Paulo, yoowo aari mutokweene ni murummwa, itthu ntoko moota woolokiherya wiixuttiha wawe ni moota wowaakhaliherya akina mmulokoni.—2 Timótheyo 3:10-12.

17 Paulo aahiviriha okathi munceene oryeene ni Timootheyo okhala wira aaphavela wira osuwelexe akhala wira Timootheyo aahiixutta saana. (Miteko 16:1-5)  Axitokweene pooti omutakiha Paulo yaakuxaka arummwa oorumeela okathi anaaxukurya aya anna. Opaka eyo, enimwaakhaliherya arummwa oorumeela woona moota axitokweene aniwiixuttiha aya akina, moota anipixa aya murima, ophenta, ni omuroromela Yehova vaavo vanikhapelela aya muloko.—1 Pedru 5:2.

OWIIXUTTIHA AKINA TI VOOTTHUNEYA

18. Xeeni owiixuttiha akina muteko wa Yehova vanitthuneya ahu ovaha efaita yuulupale?

18 Mahiku ala ookiserya, ti vootthuneya owiixuttiha anamalaleerya anceene a niinano moota woolokiherya inamuna saya soolaleerya. Nave-tho, vannitthuneya anna wiixutta moota wookhapelela muloko. Yehova oniphavela wira arumeyi awe otheene yiixuttihiweke oratteene, nto oonivaha eparakha eyo wira naakhaliheryeke ale a niinano. Tivonto, ti vootthuneya wiimananiha wira niwiixuttihe akina, ntoko siira awe Yesu ni Paulo. Nihaana owiixuttiha anna anceene mwaha woowi muteko woolaleerya khoreere, olumwenku ola ohinatthi omala.

19. Xeeni vanitthuneya anyu okupali wira mwaimananiha owiixuttiha akina miteko sa Yehova, munookhumela saana?

19 Owiixuttiha ale a niinano onivekela okathi munceene ni wiimananiha. Masi nikupaliki wira Yehova ni Yesu anoonikhaliherya osuwela moota wowiixuttiha akina mwa enamuna yootepexa oloka. Ninrowa ohakalala waaweha ale aniwiixuttiha ahu yiimananihaka vanceene ovara ‘miteko’ mmulokoni aahiiso muteko woolaleerya. (1 Timótheyo 4:10) Okathi omosaru, nihaana ovikaniha opaka eniwerya ahu wira nrowe vahoolo momunepani, olokiherya mikhalelo sahu sa eKristau, ni ovikaniha omwaattamela Yehova.

^ [1] (ettima 7) Mwa ntakiheryo Yesu aahaaleela awiixutti awe (1) wira alaleyeke Omwene; (2) ororomela wira Muluku aamwaavaha yoolya ni soowara; (3) osyaka onyakulihana; (4) omuroromela Muluku okathi woolupatthiwa; ni (5) ohoova ele atthu yaarowa aya owiiriha.

^ [2] (ettima 9) Eliivuru, Beneficie-se da Escola do Ministério Teocrático, ipaaxina 62-64, ennivaha malakiheryo ooloka voohimya sa moota woolavulana saana atthu anaalaleerya ahu.

^ [3] (ettima 15) Eliivuru Beneficie-se da Escola do Ministério Teocrático, ipaaxina 52-61, ennitthokiherya moota woolokiherya myaha sa atthu otheene mmulokoni.