Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Agosto 2016

Mwiirihe Ekasamento Anyu Okhumela Saana

Mwiirihe Ekasamento Anyu Okhumela Saana

“Mulopwana amphenteke mwar’awe ntoko sinìphentawe, . . . muthiyana amuttittimiheke iy’awe”.AÉFESO 5:33.

ISIPO: 36, 3

1. Nnaamwi anamathelana ahakalalaka nihiku na ekasamento aya, exeeni enrowa waakhumelela? (Nwehe elatarato yoopacerya.)

NIHIKU na ekasamento aya, anamathelana annihakalala vanceene, vaavo mulipa-onithela oninweha awe ole onrowa awe omuthela ophwaneliwe ene vanceene. Okathi yuuryana aya, ophentana waya waanitepa wunnuwa anaphavela othelana ni yaanileiheryana okhala oororomeleya mukina ni mukhwaawe. Nuumala othelana, anapacerya okhala vamosa, ahaana opaka marukunuxo wira akhaleke oowiiraana. Yehova, yoowo Opattunxe ekasamento, oniphavela wira anamathelana ahakalaleke ni akhumeleke saana, tivonto, ohaavaha miruku sooloka siri mBiibiliyani. (Miruku 18:22) Hata vari siiso, Biibiliya onnihimya wira ale anthela aahiiso otheliwa anoophwanya mixankiho, aahiiso “maxakha a vathí-va”. (1 aKorinto 7:28) Exeeni enrowa waakhaliherya anamathelana ovukula mixankiho iyo? Nave exeeni enrowa okhaliherya ikasamento sa maKristau okhumela saana?

2. Enamuna xeeni ya ophentana anamathelana anireerela aya wooniheryana?

 2 Biibiliya oniixuttiha wira ophenta tori mukhalelo muulupale. Masi sookhala inamuna sinceene sa ophenta anamathelana anireerela aya wooniheryana. Mwa ntakiheryo, awo ahaana oreerelana murima ni osivelana. Akhala wira aakhalana anamwane, ophentana vatthokoni onnitepa okhala wootthuneya. Masi akhala wira ophenta iwo oneettihiwa ni malakiheryo a Biibiliya, onniiriha ekasamento okhumela saana. Murummwa Paulo aahitthokiherya ophenta iwo oriki: “Mulopwana amphenteke mwar’awe ntoko sinìphentawe, ni wira muthiyana amuttittimiheke iy’awe”.aÉfeso 5:33.

MIRITTI SA ALE ATHELANNE

3. Ale athelanne yooniheryeke ophenta mwa enamuna xeeni?

3 Paulo olempe so: “Nyuwo, alopwana, mumphenteke mwar’inyu, sisale Kristu saphentalyawe Ekerej’awe, khuleva ekumi awe mwaha w’Ekerej’eyo”. (aÉfeso 5:25) Olelo-va, maKristau otheene annitthara ntakiheryo na Yesu, aphentanaka ntoko Yesu aaphenta awe awiixutti awe. (Mmusome Yohani 13:34, 35; 15:12, 13.) MaKristau athelanne ahaana ophentanaka vanceene, mpakha weemererya omukhwela ole athelanne aya. Masi okathi sinikhumelela aya mixankiho suulupale mukasamentoni, akina pooti woonaka wira ophentana waya kholimpe vanceene. Exeeni enrowa waakhaliherya? Ophenta wekeekhai onimwaakhaliherya, maana ole oniphenta “onnakhurunuwela atthu othene, onnakupali atthu othene, onniroromela vohihiyererya, onnivilela sothene”. Nave-tho ophenta “khummala-tho”. (1 aKorinto 13:7, 8) Anamathelana ahaana wuupuwelaka wira ammana natiri. Awo aahimya wira anrowa ophentanaka ni ororomelanaka. Wuupuwela eyo, enimwaakhaliherya ophavelasa nikhaliheryo na Yehova ni wiimananiha wira aphukeke mixankiho saya.

4, 5. (a) Tuuvi ori muritti wa mulopwana oothela vatthokoni? (b) Muthiyana ootheliwa omooneleke sai iyawe ntoko muhooleli a etthoko? (c) Marukunuxo xeeni anamathelana amosa yaatthuneya aya opaka?

4 Paulo ootthokiherya miritti sa mulopwana oothela ni muthiyana ootheliwa, oriki: “Muthiyana amwiweleleke iy’awe, ntoko t’Apwiya. Mulopwana ti murima [muru, (Tradução do Novo Mundo)] wa mwar’awe, sisale Kristu sikhanlyawe murima [muru, NM] w’Ekereja”. (aÉfeso 5:22, 23) Ela khenitaphulela wira mulopwana tootthuneya onvikana mwaarawe. Yehova aahihimya muteko wootthuneya orina awe muthiyana vatthokoni, oriki: “Khivamurèrenle mutthu [mulopwana, NM] okhala mekhawe. Kintthuna ompattuxerya mukhaliheryo womphwanela”. (Maphattuwelo 2:18) Muthiyana ootheliwa ohaana omukhaliherya iyawe okhala muhooleli a etthoko ooloka. Nave mulopwana oothela ohaana otakiha ophenta wa Yesu, yoowo ori muru wa muloko. Mulopwana oniira siiso, mwaarawe onnilipa ni vannimukhweela omuttittimiha ni omukhaliherya.

“Ninniiraana vanceene ntoko anamathelana vaavo vanipaka ahu itthu ntoko Yehova simphavela awe”

5 Cathy, yoowo otheliwe ni Fred, onihimya so: “Kihinatthi otheliwa, miyo nkaarina miritti sinceene ni kaikhapelela mmensaka paahi. Nuumala otheliwa, kaahaana opaka marukunuxo maalupale, maana kaahaana olipana iyaka. Khivanikhweya opaka eyo, masi enninikhaliherya wiiraana ni ovara itthu vamosa, ntoko Yehova simphavela awe”. [1] (Nwehe enoota.) Fred onihimya so: “Vannikivila opaka soothanla. Nto vannitepa okivila opaka soothanla sa atthu anli.  Masi otthara malakiheryo a Yehova, ovekela ni owiriyana saana muupuwelo wa mwaaraka, vannikikhaliherya opaka sothanla sa khula nihiku. Vano kinnoona wira naatthu oowiiwanana!”

6. Moota xeeni ophenta onikhaliherya aya ophuka myaha sinkhumelela mukasamentoni?

6 Ikasamento pooti olipa akhala wira anamathelana ‘annivilelana, [ni] olevelelana imara sothene sintthekelanaya’. Okhala wira alipa-oottheka, awo annivonya. Okathi anivonya aya, awo pooti wiixutta ni soovonya saya, elevelelanaka ni ophentana mwekeekhai. Ophenta moota owo “onnimaleliha wìwanana w’atthu”. (aKolosi 3:13, 14, Biblia Solempwa sa Muluku) Anamathelana anoowerya wooniherya ophenta moota owo, avilelanaka, oreerelana murima ni ‘ohùpuwela sotakhala sinirelanaya’. (1 aKorinto 13:4, 5) Okathi anivaanyihana aya, anamathelana ahaana ophuka myaha iyo moohipisa, nihiku nenno. (aÉfeso 4:26, 27) Vanitthuneya wiiyeviha ni olipa murima wira mutthu ohimye so: “Mukilevelele wootthekelani”, masi wira siiso onnikhaliherya ophuka myaha ni owiiraaniha anamathelana.

TI VOOTTHUNEYA OREERELANA MURIMA

7, 8. (a) Miruku xeeni Biibiliya onaavaha awe anamathelana voohimya sa okumanela? (b) Xeeni vanitthuneya aya anamathelana wooniheryana ophentana waya?

7 Biibiliya onnivaha malakiheryo ooloka aniwerya waakhaliherya anamathelana okhalana moonelo wooloka voohimya sa okumanela mukasamentoni. (Mmusome 1 aKorinto 7:3-5.) Anamathelana ahaana othokoreryaka moonelo ni soophavela sa ole athelanne aya. Akhala wira mulopwana oothela khonaareerela murima amwaarawe, pooti onvila muthiyana owo ophwanya ohakalala okathi anikumanela aya. Alopwana oothela ahaana waathokorerya axaaraya ‘asuwelaka wira makhalelo àthiyana t’òttèttheya’. (1 Pedru 3:7) Atthu athelanne ahikhanyereryaneke okumanela, masi otheene aya ahaana wiiwanana okathi owo. Ikwaha sinceene, okathi anamathelana anikumanela aya, mulopwana pooti ohipisa okhala oolikana wira okumanele, masi muthiyana pooti otthuneyaka okathi wira okhale oolikana. Tivonto, vannitthuneya olipelela wira otheene aya akhale oolikana.

8 Biibiliya khonivaha malamulo ooluluwanya aahiiso mukano voohimya sa moota ale athelanne anrowa aya wooniheryanaka ophentana waya. Masi onniromola matakiheryo a wooniherya ophentana. (Nsipo nʼOphentana 1:2; 2:6) MaKristau oothelana ahaana othokoreryana saana ni ophentana mukina ni mukhwaawe.

9. Xeeni ophavela orupihana ni mutthu ohithelanne ahu ohineemereriwa aya?

9 Akhala wira ninnimphenta Muluku ni mukhwiihu, khinnipaka etthu yaarowa ohonona ekasamento ahu. Atthu akina annihonona ekasamento aya mwaha woosiveliwa oweha epornografia. Nihaana osyaka khula etthu yaarowa oniiriha oweha epornografia aahiiso ophavela orupihana woohiloka. Nave-tho nihaana osyaka opaka etthu yaarowa oniiriha olavulihana aahiiso owehana  moovekana ni mutthu ohithelanne ahu. Okhala wira eyo enooniherya ohikhalana niphento. Nihaana wuupuwela wira Muluku onnisuwela etthu enuupuwela ahu ni ele enivara ahu. Wuupuwela eyo enoonikhaliherya olipiha ophavela wahu omuhakalaliha ni ovikaniha ororomeleya wa ole othelanne ahu.Mmusome Matheyo 5:27, 28; aHéberi 4:13.

OKATHI SINIKHUMELELA AYA MIXANKIHO MUKASAMENTONI

10, 11. (a) Exeeni eniiraneya ni ikasamento sinceene? (b) Biibiliya onihimya exeeni voohimya sa ovalaana? (c) Exeeni enrowa waakhaliherya anamathelana ohaakuvela ovalaana?

10 Vaavo anamathelana ahiniphuka aya mixankiho saya, akina annithanla ovalaana aahiiso omwalana. Ilapo sikina, mwaattelo wa anamathelana animwalana onnivikana ale ahanle ahimwalanne. Eyo kheniiraneya vanceene ni maKristau eekeekhai. Masi anamathelana anceene maKristau annikumana mixankiho mukasamentoni mwaya.

11 Biibiliya onnivaha malakiheryo ala: “Muthiyana otheliwe ahimwalané [“ovalaana”, NM] n’iy’awe. Masi amwalaná[“ovalaana”, NM], ahitheliweké-tho ni mulopwana mukina: ohiya vo, atthikelane n’iy’awe. Siso-tho, mulopwana ahimwalané [“ovalaana”, NM] ni mwar’awe”. (1 aKorinto 7:10, 11) Anamathelana akina pooti wuupuwelaka wira mixankiho saya sootepa wunnuwa, nto anoona wira ahaana ovalaana. Masi Yesu aahooniherya wira ovalaana khahiyo etthu yaamukhaani. Maana nuumala oromola malakiheryo a Muluku voohimya sa ekasamento, owo aahincererya oriki: “Yeyo Muluku ephitanyalyawe mutthu ahimwalanyihé-tho”. (Matheyo 19:3-6; Maphattuwelo 2:24) Tivonto Yehova oniphavela awe wira mulopwana ni mwaarawe akhaleke vamosa. (1 aKorinto 7:39) Otheene ahu nihaana osuwela wira nnookohiwa ni Yehova mwaha wa miteko sahu. Osuwela eyo enoonikhaliherya ophuka mixankiho sahu moohipisa aahiiso sihinatthi otepa.

Anamathelana maKristau anniwerya ophuka mixankiho saya, okhala wira anneemererya malakiheryo a Muluku

12. Etthu xeeni ekhanle owiiriha anamathelana wuupuwela ovalaana?

12 Xeeni ikasamento sinceene sirina aya mixankiho? Woonasa wene atthu akina, ekasamento aya kheneetta ntoko saalipelela aya, tivonto anninyoonyiheya aahiiso onanariwa. Ikwaha sikina, mixankiho sinnikhumelela mwaha woovirikana ihuweliwo aahiiso mikhalelo saya. Mixankiho sa amusi, ohiiwanana mwaha wa moota woorumeela musurukhu, ni waahuwa anamwane, onnikumiherya mixankiho mukasamentoni. Masi, ti voohakalaliha oweha wira anamathelana anceene maKristau, anniwerya ophuka mixankiho saya, okhala wira anneemererya malakiheryo a Muluku.

13. Mathowa xeeni ooloka aniwiiriha anamathelana ovalaana?

13 Aakhala mathowa ooloka aniwiiriha anamathelana ovalaana. Ntoko ohiphavela omukhapelela ole othelanne aya, omuhaaxa vanceene, omukhoottiherya omurumeela Yehova. Nto itthu iyo sinniwiiriha akina  othanla ovalaana. Okathi sinikhumelela aya mixankiho iyo, mutthu owo onihasuliwa pooti ovekela nikhaliheryo na axitokweene. Mwaha wa okhalana sookumanana sinceene, axitokweene awo pooti waakhaliherya ovarihela muteko mookumini mwaya malakiheryo a Muluku. Vaavo mmosa a anamathelana onvekela awe munepa wootteela wa Yehova, eyo enimwaakhaliherya ovarihela muteko malakiheryo a Biibiliya ni okhalana mikhalelo sa eKristau. (aGalasia 5:22, 23) [2]—Nwehe enoota.

14. Biibiliya onihimya exeeni sa maKristau athelanne ni mutthu ohinimukokhorela Yehova?

14 Biibiliya onnooniherya mathowa ooloka aniweemererya anamathelana ovikaniha okhala vamosa akhala wira mmosa a anamathelana awo khonimukokhorela Yehova. (Mmusome 1 aKorinto 7:12-14.) Ole oohaamini “onnakheliwa” aahiiso okhalihiwa oowaarya mwaha wa ole othelanne awe onimurumeela Muluku. Nave anaaya ‘annakheliwa’ aahiiso othokoreriwa okhala oowaarya, maana annikhapeleliwa ni Muluku. Paulo onnaalipiha anamathelana oriki: “Mano nyuwo, muthiyana obatiziwe, munsuwela sai mwaweryaka omòpola iy’anyu? Walá nyuwo, mulopwana obatiziwe, munsuwela sai mwaweryaka omòpola mwar’inyu?” (1 aKorinto 7:16) Aakhala matakiheryo manceene ooloka a alopwana ni athiyana maKristau amukhalihenrye ole othelanne aya okhala murumeyi a Yehova.

15, 16. (a) Miruku xeeni Biibiliya onaavaha awe athiyana maKristau yaawo atheliwe ni mutthu ohinimurumeela Muluku? (b) MuKristau opakeke exeeni vaavo ole othelanne awe ‘ohibatiziwe’ onithanla awe ovalaana?

15 Murummwa Pedru aahaavaha miruku athiyana maKristau wira ahaana owiiwelela axiiyaya. Owo aahimmye so: “Siso, yakhala wira aiy’anyu khanamini masu a Muluku, ephwanyihiweke wamini ni mwettelo anyu worera. Nyuwo khamumphavela olavula, okhala wira awo animona mwettelo  anyu worera ni wottittimiheya”. Ohiya omakela omulaleerya iyawe okathi wotheene, murokora pooti omukhaliherya weemererya ekeekhai vaavo vanooniherya awe “orera wa murima womàla ni wa murettele. Orera weiwo ti wulupale vamaithoni va Muluku”.1 Pedru 3:1-4.

16 Ankhi akhala wira ole ohinaamini oniphavela ovalaana ni ole othelanne awe? Biibiliya onihimya wira: “Mulopwana ohibatiziwe walá muthiyana ohibatiziwe atthuná omwalana [“ovalaana”, NM], weso emwalaneke [“ovalaana”, NM]. Itthu sisa, ole obatiziwe khankhanyererihiwa, mana Muluku ònìhanela murettele”. (1 aKorinto 7:15) Nnaamwi ovalaana oruuhaka murettele, muKristau othenle aahiiso otheliwe, khoneemereriwa othela wala otheliwa ni mutthu mukina moovarihana ni Biibiliya. Masi khivanitthuneya omukhanyererya ole othelanne awe ohinaamini wira ohikhume vatthokoni. Nuuvira okathi, ole ohinaamini pooti ophavela otthikelana. Waaniheryasa muhoolo, ole ohinaamini pooti ophavela omurumeela Yehova.

EXEENI ENITTHUNEYA OPWEHA NIPURO NOOPACERYA MUKASAMENTONI?

Vaavo vanipweha ahu nipuro noopacerya omukokhorela wahu Yehova, onnincererya ohakalala wahu mukasamentoni (Nwehe ettima 17)

17. Exeeni anamathelana maKristau anitthuneya aya opweha nipuro noopacerya?

17 Okhala wira ninkhala “okathi wokiserya” hiyo ninnihaawa mwaha wa ‘mahiku [ala] òxankiha’. (2 Timótheyo 3:1-5) Ti maana aya vanitthuneya ahu olipiha wataana wahu ni Yehova. Paulo aalempe wira: “Okathi onnihalela ori vakhani. Okhuma olelo mpakha oholo, ale athelanne ekhaleke ntoko khathenle; . . . ale ampuha itthu sa vathí-va ekhaleke ntoko khampuha”. (1 aKorinto 7:29-31) Paulo khaaphavela ohimya wira anamathelana ahithokoreryaneke. Masi okhala wira ninkhala mahiku ookiserya, nihaana opweha nipuro noopacerya omukokhorela wahu Yehova.Matheyo 6:33.

18. Vaniweryaneya sai maKristau okhalana ekasamento yoohakalaliha ni yooloka?

18 Mahiku ala ooxankiha, ikasamento sinceene khasinikhumela saana. Niireke vanniweryaneya okhalana ekasamento yoohakalaliha ni yookhumela saana? Aayo. Masi eyo enniweryaneya akhala wira ninnivikaniha omwaattamela Yehova, arumeyi awe, weettela malakiheryo a Biibiliya ni weemererya weettihiwa ni munepa wootteela wa Yehova. Niira siiso, ninrowa ottittimiha ele “Muluku ephitanyalyawe”.Marko 10:9.

^ [1] (ettima 5) Masina aaturukiwa.

^ [2] (ettima 13) Nwehe eliivuru eni: “Mukhaleke Mophentani Mwa Muluku”, apendise oni: “Moonelo wa Biibiliya Voohimya sa Omwalana ni Ovalaana”.