Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Abril 2016

Niireke Munnirumeela Saana Muupuwelo Anyu?

Niireke Munnirumeela Saana Muupuwelo Anyu?

OTTOOPARE aahiiso oramattha, yoowo onilemela ikiilu 1.4 onnihimmwa okhala “etthu yootepa otikiniha ephwanyiwe olumwenku ola”. Tthiri oramattha etthu yootikiniha. Nto vaavo vanitepa ahu osuwela ottoopare, nnootepaka oxukhurela miteko “sovuwa” sa Yehova. (Esal. 139:14) Vano nkahaya muupuwele etthu emosa erina aya ottoopare, eyo piiyo, owerya wuupuwela.

Muupuwelo exeeni? Disionaario mmosa onitthokiherya wira muupuwelo ti “owerya orina anyu wa woona ilatarato aahiiso moolumo mmuruni mwanyu, pooti okhala itthu isya ni soohakalaliha, aahiiso itthu sihitonko owiiraneelani”. Nto nuupuwelaka otthokiheriwa iwo, niireke khamuneemererya wira munnirumeela muupuwelo anyu khula nihiku? Mwa ntakiheryo, niireke mootoko osoma aahiiso wiiwa voohimya sa opuro ohitonko anyu ophiya? Nto niireke khamuupuwelela opuro owo moota waarya aya, nnaamwi mwahaatonko ophiya? Mwekeekhai, ninnirumeela muupuwelo ahu hata nihitonko woona, wiiwa, olawiha, ovara, aahiiso woona wunkhela wa etthu eyo.

Biibiliya onninikhaliherya wiiwexexa wira apinaatamu apakiwe aahiiso apattuxiwe alikanyihiwaka ni Muluku. (Maph. 1:26, 27) Niireke eyo khentaphulela wira okhala wene, Yehova ookhalana muupuwelo? Okhala wira Yehova oonipaka ni owerya nno, owo onniwehererya wira ninrowa orumeela muupuwelo ahu wira niiwexexe yoolakela awe. (Mus. 3:11) Ninrowa orumeela sai muupuwelo ahu wira nipake eyo, nto enamuna xeeni ya wuupuwela enitthuneya ahu osyaka?

ORUMEELA MUUPUWELO AHU MOOHILOKA

(1) Wuupuwelela itthu soohiloka aahiiso okathi woohiloka.

Wuupuwelela itthu paahi khahiyo vootthekeya. Maana opaka eyo pooti ikwaha sikina okhaliherya vanceene. Masi, okhala wira eliivuru ya Musuweli 3:1 enihimya wira “khula etthu yokhalana emar’aya”, nto enninikhaliherya wiiwexexa wira okathi mukina hiyo pooti ovara itthu soohikhalela. Mwa ntakiheryo, akhala wira ninnihiya muupuwelo ahu otthokelelaka itthu sikina nryeene mmuthukumanoni aahiiso nipakaka yoosoma ahu ya Biibiliya, niireke ninrumeela muupuwelo ahu mookhalela? Yesu aahivaha yoolopola yuulupale ooniheryaka woopiha okhanle ohiya muupuwelo ahu otthokelelaka itthu soohiloka, niire so, wuupuwelela orupihana woohiloka. (Math. 5:28) Nto itthu sinihiya ahu siviraka mmuupuweloni mwahu pooti okhala itthu sinimunanara vanceene Yehova. Opacerya wuupuwelela orupihana woohiloka pooti oniiriha ophavela oraruwa. Tivonto, musyake wuupuwela itthu saarowa owiirihani omuhiya omurumeela Yehova!

(2) Wuupuwela wira mihakhu sinoonikhapelela.

Mireerelo sa werutthuni ti sootthuneya ni sinnikhaliherya. Masi, akhala wira nnuupuwela  wira okhapeleleya ni ohakalala wekeekhai onlipa ni itthu iyo, nto nnoovara mwala. Mulipa a miruku Salomoni aalempe so: “Mihakhu s’athajiri, ntthyawelo naya: annupuwela wira ti makokoro òlipihiwa”. (Mir. 18:11) Mwa ntakiheryo, muupuwele ele yiiraneyale Setembro a 2009, elapo ya oManila, oFilipina. Mapuro manceene a elapo ele yaahisarya maasi mwaha wa epula yinceene. Niireke ale yaarina mireerelo sinceene saahiwerya waakhapelela? Mulopwana mmosa oothaciri ahaareere opweteiwa aalavunle so: “Epula ele khiyaareere ohonona, nto yahaakumiherya ohaawa ni mixankiho athaaciri ni amasikhini”. Ti vookhweya wuupuwela wira mihakhu sinniwerya onikhapelela moomalela. Masi eyo khahiyo ekeekhai.

(3) Wuupuwelela mootepana itthu waaniheryasa sihinrowa wiiraneya.

Yesu onlopola wira nihitepeke ‘wukhuwa’. (Math. 6:34) Omakela wuukhuwa pooti oxankiha muupuwelo ahu. Hiyo pooti omaliha ikuru sahu mwaha wowuupuwelela vanceene itthu iyo, niire so, mixankiho sihikhumelenle aahiiso sihinrowa-tho okhumelela. Soolempwa sinnooniherya wira wuukhuwa siiso pooti onivololiha hata onikhulumula. (Mir. 12:25) Nto ti vootthuneya ovarihela muteko miruku sa Yesu soowi nihuukhuweke mootepana, masi nthokoreryeke mixankiho sa khula nihiku.

ORUMEELA SAANA MUUPUWELO AHU

(1) Oweha sootakhala sihinatthi wiiraneya ni osyaka.

Soolempwa sinnitumererya okhala atthu a miruku ni wuupuwela itthu siniwerya okhumelela. (Mir. 22:3) Nirumeelaka muupuwelo ahu, nnoowerya woona itthu sootakhala siniwerya okhumelela ni opaka soothanla sooloka. Mwa ntakiheryo, akhala wira munilattuliwa ofestani, munrowa orumeela sai muupuwelo anyu wira moone akhala wira munoorowa aahiiso nnaari? Muhaana othokorerya itthu iya: atthu akavi alattuliwe ofestani iwo, nipuro ninrowa opakiwa efesta eyo ni okathi ene, nto khiyaikoha so: Etthu xeeni ekhanle ookhumelela opuro owo? Niireke onrowa okhala otthekula wooloka moovarihana ni malakiheryo a Biibiliya? Mwiira siiso, munoowerya oweha mmuupuweloni mwanyu moota itthu sinrowa aya okhala. Murumeele muupuwelo anyu wira mpake soothanla sooloka ni osyaka itthu saarowa ohonona mukhalelo anyu womunepani.

(2) Muupuwelele moota woophuka mixankiho suulupale.

Nave wuupuwelela onihela muhina “owerya orina ahu wira niwanane ni weettiherya muxankiho”. Akhala wira nyuwo moonyoonyiheya ni munna aahiiso murokora mmulokoni, munrowa opaka exeeni wira mulavulane  mwa murettele munna wala murokora owo? Aakhala makoho anireerela opaka. Kimulavulihe sai munna aahiiso murokora ole? Okathi xeeni onireerela olavula mwaha ola? Kirumeele moolumo xeeni aahiiso kilavule moota xeeni? Murumeelaka muupuwelo anyu munoowerya wuupuwelela moota woophuka mwaha owo ni othanla enamuna yaarowa owiirihani okhumela saana ni ophuka mwaha owo. (Mir. 15:28) Wuupuwelela siiso wira mphuke mwaha okhumelenle onookumiherya murettele mmulokoni. Eyo ti enamuna yooloka ya orumeela muupuwelo.

(3) Mulokiheryeke saana enamuna enimusoma anyu ni omwiixutta Biibiliya.

Ti vootthuneya omusoma Biibiliya khuta nihiku. Masi sookhala itthu sinitthuneya ohiya omusoma paahi. Nihaana ophavela osuwela ele eniixutta ahu ni masu asomme ahu mBiibiliyani, ni omananiha ovarihela muteko mookumini mwahu. Wiiwexexa wahu iphiro sa Yehova ohaana wuncereriwa ni omusoma wahu Biibiliya. Wuupuwelela onoonikhaliherya opaka eyo. Moota xeeni? Nkuupuwelani eliivuru Mutakiheke Waamini Waya. Osoma soohimmwa siri eliivuru ela pooti wuncererya muupuwelo ahu, enikhaliheryaka woona opuro waakhala aya ni mahuweliwo aya atthu anihimmwa mBiibiliyani. Ninniwerya woona itthu saari opuro ole, itthu saaruma, itthu sankhela, ni woona moonelo aya. Opaka eyo enninikhaliherya wiixutta itthu sooloka, ni ophwanya soohimmwa soolipiha sa Biibiliya, waaniheryasa nuupuwela ahu wira naanisuwela saana. Orumeela muupuwelo ahu moota ola okathi onimusoma ahu ni omwiixutta Biibiliya, onoonikhaliherya vanceene.

(4) Wunnuuherya ni wooniherya othunku.

Othunku mukhalelo wooloka onihimmwa wira onitaphulela woona owereya vamurimani vahu, etthu eninwereya mutthu mukina. Okhala wira Yehova ni Yesu annooniherya othunku, nto nihaana waatakiha. (Okhum. 3:7; Esal. 72:13) Ninrowa wooniherya sai mukhalelo ola? Enamuna emosa yuulupale wira nooniherye mukhalelo ola ti orumeela muupuwelo ahu. Pooti wira khetonko onikhumelela ele enimwiiraneela munna aahiiso murokora owo. Masi nyuwo pooti wiikoha so: ‘Kaari mwa miyo kirina muxankiho ole, kaarowa woonela sai? Nikhaliheryo xeeni naarowa aka ophavela?’ Orumeela muupuwelo ahu wira naakhule makoho ala, onoonikhaliherya owoonela othunku akina. Tthiri, wooniherya othunku onninikhaliherya vanceene ntoko maKristau, hata okathi onilaleerya ahu ni opatthana ni annihu.

(5) Muupuweleleke moota sinrowa anyu okhalaka elapo esya.

Biibiliya ookhalana soohimmwa sinceene sa moota sinrowa aya okhala okumi elapo esya. (Yes. 35:5-7; 65:21-25; Wis. 21:3, 4) Nto iliivuru sahu sinnooniherya soohimmwa iyo sirumeelaka ilatarato sooreera. Moota xeeni? Maana ilatarato iyo sinnikhaliherya muupuwelo ahu ni oniiriha osiveliwa waakhela mareeliho awo. Khuuvo pinaatamu onisuwela saana owerya orina aya mukhalelo ola, onvikana Yehova yoowo opanke muupuwelo. Orumeela muupuwelo ahu wira noone sooleiherya sa Muluku onninikhaliherya okupali wira sinrowa wiiraneya ni onninikhaliherya ovikaniha ororomeleya hata nikumanaka mixankiho olelo-va.

Moophenta, Yehova oonivaha etthu ela yootepa otthuneya, eyo piiyo, muupuwelo. Nto muupuwelo ahu onoowerya onikhaliherya omurumeela saana Muluku okathi wotheene. Tivonto, nihaana omuxukhurela ole Onivahale muupuwelo nrumeelaka oratteene mahiku otheene.