Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Abril 2016

Nvikaniheke Ohiirela Mpantta Myaha sa Elapo ela Yookawanyeya

Nvikaniheke Ohiirela Mpantta Myaha sa Elapo ela Yookawanyeya

“Munvaheke Muluku ekhanlé ya Muluku”.—MATH. 22:21.

ISIPO: 33, 137

1. Ninrowa owerya sai omwiiwelela Muluku ni apinaatamu anilamulela, okathi omosaru?

BIIBILIYA onniixuttiha wira nihaana owiiwelela apinaatamu anilamulela, masi onnihimya-tho wira nihaana opacerya omwiiwelela Muluku ahinatthi apinaatamu. (Mit. 5:29; Tito 3:1) Vaniweryaneya sai? Yesu oonileela etthu enrowa onikhaliherya omusuwela ole onireerela ahu omwiiwelela. Owo ohimmye wira “munvaheke mwené [Seesari] ekhanle ya mwené: munvaheke Muluku ekhanlé ya Muluku”. [1] (Math. 22:21) Hiyo ninninvaha “mwené ekhanlé ya mwené”, vaavo vaniiwelela ahu malamulo a guvernu, waattittimiha atthu a guvernu, ni oliva mpoosito. (aRom. 13:7) Masi akhala wira namalamulela onninivekela opaka etthu ehinimusivela Muluku, hiyo nnookhootta, masi mwa nttittimiho.

2. Ninrowa wooniherya sai wira khanniirela mpantta myaha sa ipoliitika sa mulaponi?

2 Enamuna emosa ya onvaha “Muluku ekhanlé ya Muluku”, ori ohiirela mpantta myaha sa elapo. (Yes. 2:4) Okhala wira Yehova onniweemererya apinaatamu olamulela, hiyo khinnaavirikanya. Nave-tho khanniirela mpantta miteko sinikhaliherya ovuwiha elapo. (aRom. 13:1, 2) Hiyo khinneererya olokiherya iguvernu aahiiso weererya waakhaliherya anapoliitika, ni khanimmwiira mwaathanle, nnaakhala khanimphavela okhala ahooleli a epoliitika.

3. Xeeni nihiniirela ahu mpantta myaha sa mulaponi?

 3 Aakhala mathowa manceene Muluku onnikhoottiherya awe wiirela mpantta myaha sa elapo. Nthowa noopacerya okhala wira nimmutakiha Yesu, yoowo ahiirela mpantta myaha sa epoliitika wala ikhotto. (Yoh. 6:15; 17:16) Nthowa nikina ti noowi, hiyo ninkhaliherya Omwene wa Muluku. Nto okhala wira khaninkhaliherya olamulelo wa apinaatamu, yowuupuxerya ya murima ahu khenniphukela, vaavo vanilaleya ahu wira Omwene wa Muluku paahi tonrowa omaliha mixankiho sotheene sa apinaatamu. Itiini soowoka sinniirela mpantta ipoliitika sa mulaponi, nto eyo ennaakawanya atthu. Masi okhala wira khanniirela mpantta myaha sa elapo, hiyo nihiiraana ni annihu ni arokorihu olumwenku wotheene.1 Ped. 2:17.

4. (a) Ninsuwela sai wira vanirowa otepaka oxankiha ohiirela mpantta myaha sa elapo? (b) Xeeni vanireerela aya wiilokiherya ninaano va wira nihiirele mpantta myaha sa elapo?

4 Elapo enikhala ahu, pooti wira guvernu khonnikhanyererya wiirela mpantta myaha sa ipoliitika. Masi vaavo vanitepa ahu waattamela wanikisa wa olumwenku ola wa Satana, vanrowa otepaka oxankiha ohiirela mpantta myaha sa elapo. Olelo va, atthu anootepa okhala “òhimoriwa ikharari” ni “òwakuva onanariwa”, nto anrowa otepaka okawanyeya. (2 Tim. 3:3, 4) Annihu akina anniphwanya mixankiho sinceene mwaha wa marukunuxo a epoliitika elapo aya. Tivonto vanireerela aya wiilokiherya ninaano va, wira nlipiherye yoolakela ahu ya ohiirela mpantta myaha sa mulaponi, hata okhumelelaka okathi wooxankiha. Nrowe nithokorerye itthu xexe sinrowa onikhaliherya wiilokiherya.

MOONELEKE OLAMULELO WA APINAATAMU NTOKO YEHOVA ONOONELA AWE

5. Yehova onoonela sai olamulelo wa apinaatamu?

5 Enamuna emosa ya wiilokiherya wira nihiirele mpantta myaha sa elapo, ori woonelaka olamulelo wa apinaatamu ntoko Yehova onoonela awe. Okathi ampattuxale awe pinaatamu, Yehova khanvahale ehakhi ya omulamulela pinaatamu mukhwaawe. (Yer. 10:23) Owo onniwoonela apinaatamu otheene okhala ntoko emusi emosa paahi. Masi olamulelo wa apinaatamu ohaakawanya atthu, maana anihimya wira elapo aya ti yoolokexa ovikana ilapo sikina. Hata anamalamulela awo akhalaka ntoko tooloka, masi khaniwerya omaliha mixankiho sotheene. Nave, awo ahiikhaliha awanani a Omwene wa Muluku, yoowo opacenrye olamulela mwaakha wa 1914. Moohipisa, Omwene wa Muluku onoomaliha iguvernu sotheene sa apinaatamu.Musome Esalimo 2:2, 7-9.

6. Niwooneleke sai apinaatamu anilamulela?

6 Muluku onniweemererya apinaatamu olamulela, okhala wira awo annikumiherya wiiwanana ni murettele, nnaamwi oryeene woohimalela. Nto eyo enninikhaliherya olaleerya ihapari sooreera sa Omwene wa Muluku. (aRom. 13:3, 4) Muluku onnintumererya waavekelela anamalamulela a mulaponi, wira niweryeke omukokhorela ni murettele. (1 Tim. 2:1, 2) Okathi ohinithokoreriwa ahu mwa xariya, hiyo pooti waavekela ale anihoolela mulaponi wira anikhaliherye, ntoko siirale awe murummwa Paulo. (Mit. 25:11) Nnaamwi Biibiliya ohimyaka wira Satana toneettiha olamulelo wa apinaatamu, masi khonihimya wira owo tonimweettiha khula mutthu onilamulela mulaponi. (Luka 4:5, 6) Tivonto, nihiwiiriheke atthu wuupuwela wira namalamulela fulano oneettihiwa ni Diabo. Biibiliya oniixuttiha wira nihaaveeheke akina.Tito 3:1, 2.

7. Muupuwelo xeeni onireerela ahu osyaka?

7 Ninnimwiiwelela Muluku, vaavo vahinimukhaliherya ahu namalamulela mmosa wala egrupu emosa ya epoliitika, hata vakhalaka wira muupuwelo wala moonelo aya waamuniphwanyiha mireerelo. Ikwaha sikina, eyo khenikhweya. Mwa ntakiheryo, muupuwele vaakhanle wira atthu annimurukunuwela guvernu onaahasula atthu, waahela muhina Anamoona a Yehova. Ekeekhai wira khimwaarowa okhala egrupu eyo ya  anammwareya, masi niireke vamurimani vanyu, mwaarowa waakhaliheryaka ni waalompela anammwareya ale wira akhumele saana? (aÉf. 2:2) Wira nihiirele mpantta myaha sa elapo, nohaana okasoopa muupuwelo ahu, moolumo ahu ni sowiira sahu.

MUKHALE “ÒWIPASOPA” MASI “ÒMÀLA”

8. Ninrowa okhala sai “òwipasopa”, masi “òmàla” okathi vanixankiha aya ohiirela mpantta myaha sa elapo?

8 Enamuna ya nenli enrowa onikhaliherya ohiirela mpantta elapo, ori okhala “òwipasopa ntoko enowa, òmàla ntoko ipomba”, okathi onikumana ahu mixankiho. (Mmusome Matheyo 10:16, 17.) Hiyo ninkhala “òwipasopa” vaavo vanuupuwelela ahu mixankiho sihinatthi okhumelela. Ninnikhala “òmàla”, vaavo vanivikaniha ahu ohiirela mpantta myaha sa mulaponi, hata okathi wooxankiha. Nrowe nithokorerye mixankiho kamosa-kamosa sikhanle ookhumelela, ni ele ekhanle ahu oopaka wira nivikaniheke ohiirela mpantta myaha sa elapo.

9. Okathi onivaanela ahu ni atthu akina, nikhalaneke ephoole ni xeeni?

9 Ovaanela. Nohaana okhalana ephoole okathi atthu anipacerya aya ovaanela myaha sa epoliitika. Mwa ntakiheryo, okathi onilavula ahu ni mutthu voohimya sa Omwene wa Muluku, hiyo khaninrowa ohimya wira ninnikupali wala ovaanya moonelo wala muupuwelo wa egrupu aahiiso muhooleli mmosa a epoliitika. Ohiya olavula itthu apinaatamu aniphavela aya opaka wira amalihe mixankiho sotheene, nwooniheryeke mBiibiliyani moota Omwene wa Muluku onrowa aya olokiherya itthu sotheene valaponi. Akhala wira atthu aniphavela olavula voohimya sa mwaha mmosa, ntoko othelana alopwanaru wala athiyanaru aahiiso oyiiha erukulu, nto muhaana waaleela ele Nuulumo na Muluku nnihimya aya, ni mwaatthokiherye moota muniimananiha anyu weettela. Yakhala atthu anihimya wira malamulo makina a guvernu ahaana oturukiwa, hiyo khaninkhaliherya, masi-tho khinnaakhanyererya atthu awo wira aturuke muupuwelo aya wala atthareke moonelo ahu.

10. Nipakeke exeeni wira nivikaniheke ohiirela mpantta myaha sa elapo, okathi oniwiriyana ahu wala oweha ihapari?

10 Ikaruma sinilaleya ihapari. Okathi mukina sinnilavuliwa ihapari sinikhaliherya vanceene mpantta mmosa wa epoliitika. Ela ennoonaneya vanceenexa ilapo seiye guvernu okhanle awe tonihoolela mitthenkeso sinilaleya ihapari. Nto akhala wira mitthenkeso iyo sinilaleya ihapari sinnikhaliherya mpantta mmosa wa epoliitika, nihaana wiipasoopa wira nihitthareke muupuwelo aya. Mwa ntakiheryo, mwiikoheke so: ‘Kiireke vannikisivela onwiriyana mulipa onilavula ihapari mmosa, maana yena onilavula ekeekhai voohimya sa epoliitika’. Wira nvikanihe ohiirela mpantta myaha sa elapo, muhaana osyaka owiriyana wala oweha ihapari sinikhaliherya mpantta mmosa wa epoliitika. Ohiya vo, mphaveleke ihapari sihinikhaliherya mpantta mmosa wa epoliitika. Nuumala vo, mulikanyiheke etthu eyo eniwiriyana anyu ni “molumo èkekhai” ari mBiibiliyani.2 Tim. 1:13.

11. Moota xeeni vanrowa aya okhala vooxankiha ohiirela mpantta myaha sa elapo, akhala wira ninnivarexexa itthu sa werutthuni?

11 Ophavela muhakhu. Akhala wira ninnithokorerya musurukhu ni mihakhu sahu okhala itthu sootepexa otthuneya, nto vanoovila ovikaniha ohiirela mpantta myaha sa elapo. Nuuvira mwaakha wa 1970, Anamoona a Yehova anceene a oMalawi, yahaana oleva itthu sotheene yaarina aya, okhala wira yaanikhootta wiirela mpantta epartido. Masi moothananiha, akina khiyaawenrye oleva mireerelo saya. Murokora mmosa oniitthaniwa Rute, onnuupuwelela oriki: “Akina yaahirowa ni hiyo opuro ole woomoleliwe ahu, masi muhoolo mwaha yaahikela epartido, khihokolowela owaani, maana khiyaaphavela ovilela mixankiho saakhanle opuro ole waaroihiwe ahu”. Masi arumeyi anceene a Yehova khaniira siiso. Awo annivikaniha ohiirela mpantta myaha sa elapo, hata eyo  etaphulelaka othoiwa musurukhu wala opweteiwa mireerelo saya.aHéb. 10:34.

12, 13. (a) Yehova oniwoonela sai apinaatamu? (b) Ninrowa osuwela sai wira noopacerya wiixinnuuha mwaha wa elapo ahu?

12 Wiixinnuuha. Ninniwiiwa atthu anceene yiittoottopaka mwaha wa nikhuli naya, nihimo, makhalelo, muttetthe wala elapo aya. Masi Yehova khonuupuwela wira mutthu wala egrupu emosa ya atthu ti yootepexa otthuneya ovikana ekina. Otheene ahu nnoolikana vamaithoni vawe. Yehova oonivaha makhalelo anivirikana wa khula mutthu, nto eyo etthu yoohakalaliha. Owo khoniphavela wira nihiye makhalelo a elapo ahu. Nave khoniphavela-tho wira nuupuweleke wira hiyo na atthu ootthuneyexa waavikana akina.aRom. 10:12.

13 Nihiixinnuuheke mwaha wa elapo ahu, nto khiyuupuwela wira elapo ahu ti yoolokexa ovikana ilapo sotheene. Akhala wira ninnipacerya wuupuwela siiso, vanoovila ovikaniha ohiirela mpantta myaha sa elapo. Eyo ti etthu yiiraneyale eseekulu yoopacerya. Anna akina yaari aHeeberi, khiyaathokorerya mwa xariya anaamukhweli aGriki. (Mit. 6:1) Ninrowa osuwela sai wira noopacerya wiixinnuuha moota owo? Akhala wira munna wala murokora onikhuma opuro mukina onnoovahani miruku, niireke wira munnaakuvela wuupuwela so: ‘Nno, hiyo ninnisuwela opaka itthu saana’, nto nuumala vo khiyakhootta miruku sivahiwe anyu? Akhala wira ti siiso, muhaana wuupuwela miruku iya sootthuneya: “Mwiyeviheke, khula mutthu awonelaka vatthu akhw’awe vowivikana mmansawe”.aFil. 2:3.

YEHOVA ONIMOOKHALIHERYANI

14. Nivekelo ninrowa onikhaliherya sai, ni ntakiheryo xeeni na Biibiliya nnooniherya eyo?

14 Enamuna ya neeraru enrowa onikhaliherya ohiirela mpantta elapo, ori omuroromela Yehova. Munvekeleke munepa awe wootteela, yoowo onrowa wookhaliheryani okhala oovilela ni wiihiiha. Mikhalelo iyo sinimookhaliheryani, okathi anamalamulela anrowa aya owiirelani etthu moohixariya. Munvekeleke miruku Yehova wira nweryeke oweha etthu yaarowa wooxankihani ovikaniha ohiirela mpantta myaha sa elapo. Munvekeleke Yehova wookhaliheryani opaka etthu yooloka. (Yak. 1:5) Nyuwo pooti otthukweliwa mukhatteya wala ohukhummwa mwa enamuna ekina, mwaha wa okhala oororomeleya wa Yehova. Eyo yiiraneya, munvekeleke Yehova olipa murima, wira nweryeke waatthokiherya akina oratteene, etthu eniwiirihani ohiirela mpantta myaha sa mulaponi. Mukupaliki wira Yehova onimookhaliheryani ovilela.Musome Miteko 4:27-31.

15. Biibiliya onrowa onikhaliherya sai ohiirela mpantta myaha sa elapo? (Nwehe-tho ekaaxa eni “Biibiliya Ohaakhaliherya Ovikaniha Ohiirela Mpantta Myaha sa Elapo”.)

15 Yehova oonivaha Biibiliya wira onilipiheke. Muupuweleke iversiikulu sinrowa wookhaliheryani ohiirela mpantta myaha sa mulaponi. Mweereryeke osuwela soolepa iyo, okhala wira sinimookhaliheryani okathi ohinrowa anyu omukuxa Biibiliya. Nuulumo na Muluku pooti wookhaliheryani olipiha nroromelo nanyu voohimya sa anatiri a muhoolo. Nohaana okhalana nroromelo nlo wira niweryeke ovilela olupatthiwa. (aRom. 8:25) Muthanleke iversiikulu siniromola itthu sooreera simphavela anyu wira siiraneye elapo esya, nto muupuweleke muryeene weiwo.

MWIIXUTTEKE ETTHU NI ARUMEYI OOROROMELEYA A YEHOVA

16, 17. Matakiheryo a arumeyi oororomeleya a Muluku, yaawo yaakhoottale wiirela mpantta myaha sa elapo, anrowa wookhaliheryani sai? (Nwehe elatarato yoopacerya.)

16 Etthu ya neexexe enrowa onikhaliherya ovikaniha ohiirela mpantta myaha sa elapo, ori wuupuwelela matakiheryo a arumeyi oororomeleya a Yehova. Biibiliya onnaaromola atthu anceene yoonihenrye olipa murima ni yaathanlale opaka itthu saakhalihenrye ohiirela mpantta  myaha sa mulaponi. Mmuupuwele Xadraki, Mexaki ni Abedi-Nego, yaawo yaakhontte okokhorela elatarato yaathoonyerya omwene wa oBabilonia. (Mmusome Daniyeli 3:16-18.) Yowiiraneya ela, ennaakhaliherya Anamoona anceene olelo va, olipa murima ni okhootta okokhorela ebandera ya elapo anikhala aya. Yesu aahikhootta wiirela mpantta myaha sa epoliitika ni myaha sikina sinaakawanya atthu. Aanisuwela wira ntakiheryo nawe nooloka, nanwerya waakhaliherya awiixutti awe. Owo aahimmye so: “Mulipihe murima: miyo koxintta elapo ela ya vathí”.Yoh. 16:33.

17 Olelo va, Anamoona a Yehova anceene annivikaniha ohiirela mpantta myaha sa elapo. Akina yaahihasuliwa vanceene, otthukweliwa mukhatteya, ni wiiviwa mwaha wa ororomeleya waya wa Yehova. Ntakiheryo naya nnoonikhaliherya olipa murima. Munna mmosa a oTurkia, ohimmye so: “Franz Reiter aari munna mwammiravo, yoowo ookotthiwe mwaha wokhootta okhala toropa a Hitler. Epaphelo aalepenle awe amamawe ohiyu wookiserya ohinatthi okhwa, aahooniherya waamini woolipa ni omuroromela Yehova, nto miyo kaaphavela otthara ntakiheryo nawe okathi kaarowa aka okumana muxankiho ntoko owo”. [2]

18, 19. (a) Anna a muloko anyu anrowa wookhaliheryani sai ohiirela mpantta myaha sa elapo? (b) Yoolakela anyu tiivi?

18 Anna ni arokora a muloko anyu animookhaliheryani ohiirela mpantta myaha sa mulaponi. Mwaasuweliheke axitokweene okathi onikhalana anyu mixankiho ntoko iyo. Awo animoovahani miruku sinikhuma mBiibiliyani. Nave-tho anna yasuwela vale muxankiho orina anyu, awo animoolipihakani. Mwaaleele wira yoovekelelekeni. (Math. 7:12) Munoophwanya elista ya masina a anna ni arokora atthukweliwe mukhatteya, mwaha ori esaite jw.org. Murowe opuro oni IMPRENSA > CASOS JURÍDICOS, nto munoophwanya epantte eni: “Testemunhas de Jeová presas por causa de sua fé—por região”. Muthanle masina vakhaani, ni munvekeleke Yehova wira aakhaliherye anna awo olipa murima ni ovikaniha ohiirela mpantta myaha sa elapo.aÉf. 6:19, 20.

19 Vaavo vanaattamela ahu wanikisa, pooti olipelelaka otepa okhanyereriwa ni anamalamulela a elapo wira niireleke mpantta myaha sa mulaponi. Tivonto vanitepa aya otthuneya wiilokiherya ninaano va, wira nivikaniheke ohiirela mpantta myaha sa elapo ela yookawanyeya!

^ [1] (ettima 1) Yesu aahimya anamalamulela a mulaponi, vaavo aamuromonle awe Seesari. Okathi ole, Seesari taari namalamulela ni taari mukhulupale ootthuneyexa eriyari ya apinaatamu otheene.

^ [2] (ettima 17) Nwehe eliivuru Testemunhas de Jeová—Proclamadores do Reino de Deus, epax. 662, ni ekaaxa eni: “Owo Okhwiiye Mwaha Wonvuwiha Muluku”, epax. 150 ya eliivuru Omwene wa Muluku Onnilamulela!