Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Janero 2016

Nvikaniheke ‘Okhalela Nthiti Ophentana Ntoko Axinna’!

Nvikaniheke ‘Okhalela Nthiti Ophentana Ntoko Axinna’!

“Mukhaleleke nthiti ophentana ntoko axinna”.AHÉB. 13:1.

ISIPO: 3, 20

1, 2. Nthowa xeeni Paulo aalepenle awe epaphelo maKristau aHeeberi?

MWAAKHA wa 61 EC, miloko sa muttetthe wa Isarayeli saanikhala ni murettele. Nnaamwi murummwa Paulo aatthukweliwe oRoma, aalipelela wira aamutaphuliwa moohipisa. Timootheyo, yoowo aari mpatthani awe a muteko, aataphuliwe ninaanoru, nto yaahimpaka palano wira yaaxukurye annaya yaakhala oYudeya. (aHéb. 13:23) Saahala iyaakha 5 paahi wira ‘Yerusalemu orukureriwe n’anakhotto’, ntoko Yesu aahimyale awe vahinatthi. Nto maKristau yaakhala oYudeya, vanceenexa muttetthe wa oYerusalemu, yahaana opaka etthu mowaakuveya. Mwaha woowi Yesu aahaahimeerya wira yahaana otthyawa mowaakuveya nuumala woona ekanyeryo ele aavahale awe.Luka 21:20-24.

2 Vano saahivira iyaakha 28 nuumala Yesu waalopola atthareli awe. Okathi owo wotheene, atthareli a Yesu yaahivilela mixankiho sinceene. (aHéb. 10:32-34) Hata vari siiso, Paulo aanisuwela wira waarowa okhumelela muxankiho muulupalexa, yoowo waarowa weehererya waamini waya. (Math. 24:20, 21; aHéb. 12:4) Nto aaphavela wira anna ale akhale oolikana wira avilele  khula muxankiho waarowa waakhumelela. Nto yahaana ovilela vanceene ni waamini woolipa wira yoopowe. (Mmusome aHéberi 10:36-39.) Tivonto, munepa wa Yehova waahimukhaliherya Paulo wira aalepele epaphelo yowaalipiha anna ni arokora yaakhala muttetthe ole. Epaphelo eyo vano eniitthaniwa eliivuru ya aHeeberi.

3. Xeeni vanireerela aya othokorerya oratteene eliivuru ya aHeeberi?

3 Olelo-va, otheene ahu nohaana ophavela wiixutta etthu ni epaphelo ela Paulo aalepenle awe maKristau aHeeberi. Mwaha wa xeeni? Mwaha woowi makhalelo ahu anoolikana ni makhalelo aya. “Mahiku òxanka” ala anikhala ahu, arumeyi a Yehova annilupatthiwa ni ovaanyihiwa. (2 Tim. 3:1, 12) Ninnooniherya wira waamini wahu ti woolipa. Anamunceene a hiyo ninkhala moomaaleleya, nihilupatthiwaka vanceene. Masi ntoko maKristau yaakhala okathi ole wa khalai, nohaana wuupuwela wira moohipisa waamini wahu onrowa weehereriwa vaalupale!Mmusome Luka 21:34-36.

4. Yoolepa ya mwaakha wa 2016 tiivi, ni xeeni eryaaya yoophwanelela?

4 Exeeni enirowa onikhaliherya wiilokiherya mwaha wa itthu sinrowa wiiraneya muhoolo moohipisa? Eliivuru ya aHeeberi, Paulo ooromola itthu sinrowa onikhaliherya olipiha waamini wahu. Etthu emosa yuulupale, eniphwanyaneya eversiikulu yoopacerya ya ekapiitulu 13. Nto eversiikulu eyo yoothanliwa wira ekhale yoolepa ya mwaakha. Yoolepa eyo ennitumererya so: ‘Nvikaniheke ophentana ntoko axinna’.aHéb. 13:1.

Yoolepa ya mwaakha wa 2016 tiila: ‘Nvikaniheke ophentana ntoko axinna’.aHéberi 13:1

ONITAPHULELA EXEENI OPHENTANA NTOKO AXINNA?

5. Onitaphulela exeeni ophentana ntoko anna?

5 Onitaphulela exeeni ophentana ntoko anna? Nuulumo na eGriki noowi phi·la·del·phiʹa, nintaphulela “osiveliwa ni munna”. Ophentana ntoko anna onihela muhina mutthu osiveliwa ni wataana vaalupale ni mutthu mukina, ntoko mmusi wala mpatthani oororomeleya. (Yoh. 11:36) Hiyo khanniipakelela okhala anna ni arokora, masi na anna ni arokora tthiri. (Math. 23:8) Ophenta moota owo onnitthokiheriwa oratteene ni moolumo ala: “Mphentaneke ntoko axinna, murerelanaka murima, mulipiheryeke ottittimihana mukina ni mukhw’awe”. (aRom. 12:10) Ophentana ntoko anna vamosa ni ophenta wa eKristau, onniwiiriha arumeyi a Muluku okhala oowiiraana.

6. MaKristau a ekeekhai anoona wira ophentana ntoko axinna onitaphulela exeeni?

6 Musomi mmosa ohimmye so: “Nuulumo noowi ‘ophentana ntoko anna’ nnaattela okhumelela muliivuruni mwa eKristau”. AYuda khalai, yaarumeela nuulumo noowi “munna”, amuhimyaka mmusi aya wala mutthu mukina oohikhala mmusi aya, masi oryeene muYuda. Masi hiyo ninnimuthokorerya khula muKristau a ekeekhai okhala munna, hata ohikhanle a nloko nahu wala elapo ahu. (aRom. 10:12) Yehova onniniixuttiha ophentana ntoko axinna. (1 aTes. 4:9) Xeeni vanitepa aya otthuneya ovikaniha ophentana ntoko axinna?

XEENI VARYAAYA VOOTTHUNEYA OVIKANIHA OPHENTANA NTOKO ANNA?

7. (a) Nthowa xeeni nuulupale ninniiriha waaphenta annihu? (b) Muhimye nthowa nikina ninniiriha ophavelaka wuncererya ophentana wahu.

7 Nthowa nuulupale ninniiriha waaphenta annihu, mwaha woowi Yehova onniruma siiso. Khivaniweryaneya omphenta Muluku akhala wira khanimphavela waaphenta annihu. (1 Yoh. 4:7, 20, 21) Ohiya-vo, ninniphavela okhaliheryana vanceenexa mahiku ala  ooxankiha. Paulo aanisuwela wira maKristau makina aHeeberi, moohipisa yaamuhiya inupa saya ni mireerelo saya. Yesu aahitthokiherya mixankiho saarowa waakhumelela anna awo. (Mar. 13:14-18; Luka 21:21-23) Nto sihinatthi ophiya mixankiho iyo, maKristau ale yahaana olipiha ophentana waya.aRom. 12:9.

8. Exeeni enitthuneya opaka nenna-va, ahinatthi opacerya maxakha maalupale?

8 Moohipisa, anoopacerya maxakha maalupale. (Mar. 13:19; Wis. 7:1-3) Tivonto, vannireerela wiiwelela yoolopola ela eni: “Nyuwo atthu a nloko naka, mutthikele owannyu: mwiwaleleke mpa mwinyu, mulipihe masele. Mwipitheke okathi vakhani, mpakha ovira oviruwa w’Apwiya”. (Yes. 26:20) Nuulumo noowi “mpa”, woonasa wene sinihimmwa miloko sahu. Awo ti mapuro anithukumana ahu ni annihu wira nimukokhoreleke Yehova. Masi khivaniphiyerya paahi othukumana khula okathi. Paulo aahiwuupuxerya maKristau aHeeberi wira yahaana ottottela mureerelo mithukumano iyo wira nilipiheryaneke “ophenta n’uvara miteko sorera”. (aHéb. 10:24, 25) Nohaana olipiherya ophentana wahu nenna-va, okhala wira onoonikhaliherya ovilela mixankiho sinrowa onikhumelela muhoolo.

9. (a) Eparakha xeeni erina ahu olelo-va, wira nooniherye ophentana ntoko axinna? (b) Muhimye matakiheryo anooniherya wira arumeyi a Yehova anniphentana.

9 Hata niinano-va ahipacenrye aya maxakha maalupale, nohaana olipiha ophentana wahu. Annihu anceene anniphwanyiwa ni mixankiho soovirikana, ntoko itetere, osarya maasi, munamukhaya, wala ihasara sikina sa ephattu. Anna akina annilupatthiwa ni onyokhiwa. (Math. 24:6-9) Nave-tho annihu annithoiwa musurukhu mwaha wa okhalaka olumwenku ola woosarya ananrima. (Wis. 6:5, 6) Nto vaavo mixankiho iyo sinitepa aya wuncerereya, ninnikhalana eparakha ya wooniherya waaphenta wahu annihu. Hata ‘ophentana w’atthu anjene ovukuwaka’, hiyo nohaana otepa ophentanaka ntoko axinna.—Math. 24:12. [1]

NINROWA OVIKANIHA SAI WAAPHENTA ANNIHU?

10. Exeeni enirowa ahu othokorerya vano?

10 Nnaamwi nivirihaka mixankiho sinceene, ninrowa ovikaniha sai waaphenta annihu? Ninrowa owooniherya sai annihu wira ninnaaphenta moota owo? Nuumala murummwa Paulo ohimya wira “mukhalele nthiti ophentana ntoko axinna”, onnihimya-tho itthu sikina sinimukhaliherya muKristau wooniherya ophenta moota owo. Nrowe nthokorerye itthu thanu namosa.

11, 12. Onitaphulela exeeni owaakhela aletto? (Nwehe elatarato yoopacerya.)

11 “Muhihiyé owakhela aletto”. (Mmusome aHéberi 13:2.) Nuulumo noowi “owakhela aletto” nintaphulela “waareerela murima amalapo”. Eyo ennuupuxerya Abrahamu ni Lothi. Alopwana awo, yahaareerela murima atthu yaaxukurya, hata yahaasuwela. Muhoolo mwaya, yaahisuwela wira aletto ale yaari malaikha. (Maph. 18:2-5; 19:1-3) Paulo onniromola matakiheryo awo, wira aatumererye maKristau aHeeberi wooniherya waaphenta annaya, awaakhelaka aletto.

12 Ninrowa wooniherya sai owaakhela aletto? Hiyo pooti waalattula anna ni arokora orwa vatthokoni vahu wira alye etthu, wala nilipihane. Owaakhela aletto khonitaphulela waapeya eyoolya yinceene wala  ya musurukhu munceene. Khanimphavela waalattula paahi yaale ninsuwela ahu wira anoonilattula-tho. (Luka 10:42; 14:12-14) Yoolakela ahu, ophavela olipihana ohiya ophavela wooniherya paahi! Hata nihimusuwelaka oratteene mutokweene a esirkwitu ahu ni mwaarawe, niireke ninnaalattula vatthokoni vahu? (3 Yoh. 5-8) Nnaamwi naatteliwe miteko sa khula nihiku, masi nihiliyaleke “owakhela aletto”!

13, 14. Ninrowa owerya sai ovikaniha ‘owupuwela alipa-òtthukweliwa’?

13 “Nwupuweleke alipa-òtthukweliwa”. (Mmusome aHéberi 13:3.) Paulo khahiyo aahimya atthu otheene atthukweliwe mukhatteya. Aahimya anna yaale yaatthukweliwe mwaha wa waamini waya. Paulo aalempe moolumo awo sivinre ene iyaakha 4 otthukweliwe ene. (aFil. 1:12-14) Owo aahaattottopela anna mwaha wa waareerela murima ale yaatthukweliwe. (aHéb. 10:34) Anna akina yaahimukhaliherya Paulo oryeene mukhatteya, masi maKristau ale aHeeberi, yaakhala ottaiwene. Nto yaarowa omukhaliherya sai? Yammukhaliherya anvekelelaka.aHéb. 13:18, 19.

14 Olelo-va, noovalaana ni annihu mwaha woowi aatthukweliwa mukhatteya. Anna anikhala muttetthe yoowo anniwerya waakhaliherya mmensaya, masi hiyo khaninwerya wira siiso. Masi hiyo pooti waareerela murima ni owooniherya waaphenta wahu, nihaaliyalaka ni naavekelelaka wira Yehova aakhaliherye. Mwa ntakiheryo, niireke ninniwuupuwela anna, arokora ni ikwaha sikina anamwane anceene atthukweliwe elapo ya wEritreia, waahela muhina anna araru, Paulos Eyassu, Isaac Mogos, ni Negede Teklemariam, yaawo avikanne iyaakha 20 nlelo aryeene mukhatteya?

15. Ninrowa wooniherya sai wira ‘ninnittittimiha othelana’?

15 “Othelana ottittimihiweke n’atthu othene”. (Mmusome aHéberi 13:4.) Nave-tho ninrowa wooniherya waaphenta annihu, nivikanihaka okhalana mweettelo wooloka. (1 Tim. 5:1, 2) Nto akhala wira naamurupihana voohiloka ni munna wala murokora, hata mutthu a vatthokoni vawe, nto naarowa omukumiherya mixankiho mutthu owo ni emusi awe. Nto ororomelana wahu waamuhononeya. (1 aTes. 4:3-8) Nkahaya muupuwele moota muthiyana aarowa awe okhala, nuumala osuwela wira aiyawe anniweha epornografia. Niireke aamoonaka wira iyawe onnimphenta ni onnittittimiha othelana waya?Math. 5:28.

16. Ohakalala ni itthu sirina ahu onnikhaliherya sai wooniherya ophentana ntoko axinna?

16 “Muhakalaleke n’itthu sirinanyu”. (Mmusome aHéberi 13:5.) Ohakalala onirwa mwaha wa omuroromela Yehova. Onninikhaliherya okhalana moonelo wooloka voohimya sa mireerelo sa werutthuni. (1 Tim. 6:6-8) Onninikhaliherya-tho osuwela wira wataana wahu ni Yehova ni annihu a eKristau etthu yootepa otthuneya ovikana musurukhu ni itthu sikina. Mutthu onihakalala ni itthu sirina awe khoninlaseya, wala waavya mathowa; nnakhala khahiyo nanrima, maana mikhalelo iyo sinnihonona ophentana wahu ntoko axinna. Masi ohakalala ni itthu sirina ahu, onniniiriha okhala atthu oovaha.1 Tim. 6:17-19.

17. Olipa murima onnikhaliherya sai wooniherya ophentana ntoko axinna?

17 ‘Muhòveke etthu’. (Mmusome aHéberi 13:6.) Omuroromela Yehova onniniiriha olipa murima, hata niphwanyiwaka ni mixankiho sinceene. Nto olipa murima iwo,  onninikhaliherya okhalana moonelo wooloka. Ophentana wahu, vamosa ni moonelo wooloka orina ahu, onooniiriha waalipihaka annihu. (1 aTes. 5:14, 15) Hata okathi wa maxakha maalupale, hiyo nnoowerya ‘olipiha murima ni ovenxa miru sahu’, nisuwelaka wira woopoliwa wahu ori vakhiviru.Luka 21:25-28.

Munnixukhurela muteko axitokweene annivarela aya? (Nwehe ettima 18)

18. Ninrowa ovikaniha sai waaphenta axitokweene a muloko ahu?

18 ‘Nwupuweleke aholeli anyu’. (Mmusome aHéberi 13:7, 17.) Axitokweene a muloko ahu annirumeela okathi aya wira anikhaliherye, ahilipelelaka waakhela etthu. Okathi onuupuwelela ahu wiimananiha waya iwo, nto waaphenta wahu onnincerereya. Nto khanimphavela opaka etthu yaarowa owiiriha wunlaseya wala oriipiwa murima. Ohiya-vo, nimphavela ‘wattittimiha vanjene ni waphenta mwaha wa muteko onvaraya’.1 aTes. 5:13.

MUTEPEKE WIRA SIISO

19, 20. Ninrowa wooniherya sai wira ninnitepa ophentana ntoko axinna?

19 Arumeyi a Yehova annisuweliwa okhala atthu aniphentana. Eyo yaniiraneya hata okathi yoole aakhala awe murummwa Paulo. Tivonto Paulo onnitumererya awe wira ‘nitepeke okelela oholo’, niphentanaka. (1 aTes. 4:9, 10) Otheene ahu nohaana wiimananiha ovikaniha wira siiso!

20 Vaavo vaniweha ahu yoolepa ya mwaakha, nuupuweleleke makoho ala: Kooniheryeke sai owaakhela aletto? Kinrowa owuupuwela sai anna ni arokora atthukweliwe mukhatteya? Kiireke kinnittittimiha othelana? Exeeni enirowa okikhaliherya ohakalala ni itthu sirina aka? Kinrowa wunnuuherya sai omuroromela waka Yehova? Kooniheryeke sai owiiwelela ale anihoolela mmulokoni? Navarerya oratteene makoho ala 6, nto yoolepa ya mwaakha khenrowa okhala ntoko nikula nipwehiwe vaxirini paahi, masi enoonikhaliherya wiiwelela moolumo a Paulo ani: ‘Nvikaniheke ophentana ntoko axinna’.aHéb. 13:1.

^ [1] (ettima 9) Soohimmwa sikina sa moota Anamoona a Yehova anooniherya aya ophentana ntoko anna okathi wa mixankiho, nwehe A Sentinela a 15 a Julyo, ipaax. 8-9, ni eliivuru Testemunhas de Jeová—Proclamadores do Reino de Deus, muru 19.