Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Setembro 2017

“Masu a Muluku. . . T’òwerya”

“Masu a Muluku. . . T’òwerya”

“Masu a Muluku ti makumi: awo t’òwerya”.​—AHÉBERI 4:12.

ISIPO: 37, 48

1. Exeeni enookupalihani wira Nuulumo na Muluku ti noowerya? (Nwehe elatarato yoopacerya.)

ARUMEYI a Yehova annikupali wira masu a Muluku, ari mBiibiliyani, “makumi ni t’òwerya”. (aHéberi 4:12) Ninniweha moota Biibiliya orukununxe awe okumi ahu ni okumi wa atthu akina. Akina ahinatthi okhala Anamoona, yaari anawiiye, yaanilya mirette soohapala, wala yaari anamararuwa. Akina yaari atthu oovuwa wala athaaciri, masi hata vari siiso khiyaahakalala. (Musuweli 2:3-11) Ti voohakalaliha oweha wira atthu anceene yahaarina nlipelelo, vano aaphwanya nlipelelo ni okumi aya ti wooloka. Erevista Owehaweha ninnisoma sowiiraneya sa mookumini sa atthu siiso, mpantta oni “Biibiliya Onnirukunuxa Mirima sa Atthu”. Hata mutthu nuumala okhala muKristau, onitthuneya ovikaniha olipiha wataana wawe ni Yehova, okhaliheriwaka ni Biibiliya.

2. Owerya wa Nuulumo na Muluku waakhalihenrye sai atthu eseekulu yoopacerya?

2 Atthu anceene olelo-va annipaka marukunuxo maalupale  okathi aniixutta aya ekeekhai. Eseekulu yoopacerya, anna ni arokora oothanliwa ni munepa, yaahipaka marukunuxo awo. (Mmusome 1 aKorinto 6:9-11.) Olavulaka sa ale yahaarowa okela Momweneni mwa Muluku, Paulo aahincererya oriki: “Akinaku a nyuwo yetta siso”. Nuulumo na Muluku ni munepa awe wootteela waahaakhaliherya atthu ale opaka marukunuxo. Hata nuumala okhala maKristau, akina yaahittheka vaalupale, nto eyo yaahihonona ompatthani aya ni Yehova. Mwa ntakiheryo, Biibiliya onnimuromola munna mmosa oothanliwa ni munepa, aakumihiwe mmulokoni. Muhoolo mwaya, aahirukunuxa mweettelo awe, nto aahittikiheriwa mmulokoni. (1 aKorinto 5:1-5; 2 aKorinto 2:5-8) Tthiri ninnilipa murima osuwela wira anna ni arokora aawerya opaka marukunuxo manceene mwaha wa owerya wa Nuulumo na Muluku.

3. Mwaha ola ninrowa oweha exeeni?

3 Nuulumo na Muluku ti noowerya vanceene. Okhala wira Yehova oonivaha, nto nimphavela orumeelaka oratteene. (2 Timótheyo 2: 15) Mwaha ola ninrowa oweha moota nikhanle ahu oorumeela owerya wa Biibiliya (1) mookumini mwahu, (2) muteko woolaleerya, ni (3) okathi oniixuttiha ahu mmulokoni. Ele enrowa ahu wiixutta enoonikhaliherya wooniherya omphenta ni omuxukhuru Tiithi ahu a wiirimu, yoowo onniixuttiha ophwanya mureerelo.​—Yesaya 48:17.

MOOKUMINI MWAHU

4. (a) Nipakeke exeeni wira Nuulumo na Muluku nipake marukunuxo mookumini mwahu? (b) Muniphwanya sai okathi wira mmusome Biibiliya?

4 Wira Nuulumo na Muluku nipake marukunuxo mookumini mwahu, nihaana wiimananiha osoma khula nihiku. (Yoxuwa 1:8) Anamunceene a hiyo nihaatteliwa miteko, masi niheemererye etthu, ohela muhina miritti sahu, onooceeliha omusoma Biibiliya. (Mmusome aÉfeso 5:15, 16.) Pooti ophavelasa okathi voosiisu, othana wala ohiyu. Nikhalaneke moonelo mmosaru wa nasaalimo, oni: “Kinniphenta vanjene ikano sanyu: kinnitthokelela seiyo nihiku ti nihiku”.​—Esalimo 119:97.

Niheemererye etthu, ohela muhina miritti sahu, onooceeliha ­omusoma Biibiliya

5, 6. (a) Xeeni vanitthuneya aya wuupuwelela ele enisoma ahu? (b) Ele enuupuwelela ahu enrowa onikhaliherya sai? (c) Onookhaliheryani sai omusoma Biibiliya ni omuupuwelela?

5 Masi, omusoma Biibiliya paahi khivaniphiyerya. Nihaana wuupuwelela saana ele enisoma ahu. (Esalimo 1:1-3) Eyo enoonikhaliherya weettela miruku sa Biibiliya mookumini mwahu. Nto okathi onimusoma ahu Biibiliya oowimpirimiriwa wala nirumeelaka ekaruma ekina, nihaana omweemererya wira owo onikhaliherye opaka marukunuxo mookumini mwahu.

6 Nuupuweleleke sai ele enisoma ahu mBiibiliyani? Okathi onimusoma ahu, nihaana omumulela osoma vakhaani, nto niikoheke so: ‘Etthu ela enikiixuttiha exeeni voohimya sa Yehova? Kinivarihela sai muteko mookumini mwaka? Marukunuxo xeeni nlelo anireerela aka opaka?’ Vaavo  nnuupuwelela ahu ele enisoma ahu mBiibiliyani ni onvekela Yehova, nto ninrowa ophavelaka ovarihela muteko mookumini mwahu. Nto-vo, Biibiliya onoowerya opaka marukunuxo mookumini mwahu.​—2 aKorinto 10:4, 5.

MUTEKO WOOLALEERYA

7. Ninrowa orumeela sai oratteene Nuulumo na Muluku okathi onilaleerya ahu?

7 Hiyo nihaana orumeela Nuulumo na Muluku ikwaha sinceene okathi onilaleerya ahu ni wiixuttiha. Munna mmosa ohimmye so: “Vaakhanle wira munilaleerya ni Yehova, empa ni empa, niireke mwaarowa olavulaka mekhinyu, wala mwammuhiya Yehova wira-tho olavule?” Omusoma Biibiliya okathi onimulaleerya ahu mutthu, onlikana ni omuhiya Yehova wira olavule ni mutthu owo. Yoolepa yoothanleliwa oratteene yookhalana owerya ovikana moolumo ahu. (1 aTesalonika 2:13) Niireke munniimananiha omusoma Biibiliya ikwaha sinceene okathi onilaleerya anyu?

Omusoma Biibiliya okathi onimulaleerya ahu mutthu, onlikana ni omuhiya Yehova wira olavule ni mutthu owo

8. Ohiya osoma soolepa paahi, nihaana opaka-tho exeeni?

8 Masi khivaniphiyerya paahi waasomela Biibiliya ale anaalaleerya ahu. Anamunceene olelo-va khanimwiiwexexa saana Biibiliya. Eyo yaaniiraneya-tho eseekulu yoopacerya. (aRoma 10:2) Nihuupuweleke wira mwaneene etthoko onniiwexexa yoolepa esomme ahu. Hiyo pooti omukhaliherya yena, nitthikelaka osoma moolumo ootthuneya a yoolepa eyo, ni omutthokiherya yootaphulela aya. Nto niira siiso, Nuulumo na Muluku nnimwaavara murima atthu awo.​—Mmusome Luka 24:32.

9. Ninrowa waakhaliherya sai atthu omuttittimiha Biibiliya? Nvahe ntakiheryo.

9 Moolumo anilavula ahu nihinatthi osoma yoolepa emosa pooti omukhaliherya mwaneene etthoko omuttittimiha Biibiliya. Mwa ntakiheryo pooti ohimya so: “Nrowe niwehe ele Mpattuxa ahu onihimya awe”. Akhala wira ninlavula ni mutthu ohineettela etiini ya eKristau, hiyo pooti ohimya so: “Nrowe niwehe ele Soolempwa Sowaarya sinihimya aya”. Namphwanya mutthu ohineettela etiini, hiyo pooti omukoha so: “Mootoko wiiwa moolumo ala a khalai?” Nuupuweleke wira khula mutthu ookhalana makhalelo awe ni sookupali sawe, tivonto nihaana ophavelasa moolumo anrowa onvara murima.​—1 aKorinto 9:22, 23.

10. (a) Exeeni yaamukhumelenle munna mmosa? (b) Niireke mootoko oweha owerya wa Nuulumo na Muluku okathi onilaleerya anyu?

10 Anamunceene aaweha wira orumeela Nuulumo na Muluku onnikhaliherya vanceene ovara mirima sa atthu anaalaleerya aya. Mwa ntakiheryo, munna mmosa aahimuxukurya mulopwana mmosa oowuuluvala, yoowo aasoma irevista sahu okhuma khalai. Nihiku nimosa, ohiya paahi omuhiyerya erevista esya Owehaweha, munna owo aahilakela osoma yoolepa emosa. Aahimusoma 2 aKorinto 1: 3, 4, yoowo onimuhimya  Yehova okhala ‘Tithi a ikharari ni Muluku onnihakalaliha [onlipiha] . . . mohawani mwahu mothene’. Moolumo ala yaahivara murima wa mulopwana ole, nto aahinvekela wira osome-tho iversu iye. Mulopwana ole aahihimya wira owo ni mwaarawe yaaniphavela olipihiwa vanceene. Mwaha wa yoolepa ela, owo aaniphavela wiixutta itthu sikina sa mBiibiliyani. Orumeela Nuulumo na Muluku okathi onilaleerya ahu onnikumiherya mireerelo sinceene!​—Miteko 19:20.

OKATHI ONIIXUTTIHA AHU MMULOKONI

11. Muritti xeeni arina aya anna aniixuttiha mmulokoni?

11 Hiyo onisivela orowela mithukumano sa mmulokoni, asembeleya ni akongresu. Nthowa nuulupale ninniiriha othukumana ori omukokhorela Yehova. Nave-tho ninnittottela mureerelo ele eniixutta ahu. Tivonto, anna ale anniixuttiha mmulokoni aakhalana eparakha ni muritti muulupale. (Yakobo 3:1) Ele eniixuttiha aya anna awo ehaana okhuma mBiibiliyani. Akhala wira mookhalana eparakha ya wiixuttiha mmulokoni, munrowa orumeela sai owerya wa Biibiliya wira ovare murima wa alipa-oowiriyana?

12. Mulipa-oolavula mwaha opakeke exeeni wira mwaha awe ovarihaneke ni Biibiliya?

12 Okathi onilavula anyu mwaha, muhaana ottittimiherya vanceene Nuulumo na Muluku. (Yohani 7:16) Tivonto, mukhalane ephoole wira enamuna munilavula anyu mwaha anyu, malikanyiho ni sowiiraneya munirumeela anyu, siwiiriheke atthu omuttottopela  Biibiliya, ohiya nyuwo. Nave-tho muupuweleke wira omusoma Biibiliya onnivirikana ni omwiixuttiha Biibiliya. Tthiri akhala wira ninnisoma soolepa sinceene, atthu pooti waakuva oliyala. Nto muhaana othanla saana soolepa muniphavela anyu osoma. Mphaveleke okathi wira musome, mutthokiherye, nvahe malikanyiho ni wooniherya ovareleya waya muteko. (Nehemiya 8:8) Mwaha anyu wakhalana esbosu, muhaana osoma saana esbosu eyo ni soolepa sotheene siri memmo okathi muniilokiherya anyu. Nwehe moota moolumo a esbosu anivarihana aya ni yoolepa eri memmo. Nto muthanle yoolepa emosa wira mwiixuttihe eponto emosa. (Nyuwo pooti ophwanya malakiheryo ooloka, yoosoma 21 mpakha 23 ya eliivuru Beneficie-se da Escola do Ministério Teocrático.) Vootepaxa otthuneya, muhaana onvekela Yehova wira ookhaliheryeni waaleela akina ele mutokonse anyu mBiibiliyani.​—Musome Miruku 3:13, 14.

13. (a) Murokora mmosa aakhaliheriwe sai ni yoolepa aiwale awe mmuthukumanoni? (b) Ninrowa wooniherya sai wira ninnivaha efaita ni ophenta Nuulumo na Yehova?

13 Okathi murokora mmosa a wAustralia aari awe mwaana, saahimukhumelela itthu sinceene sooxankiha. Hata nuumala opacerya omurumeela Yehova, owo khaakupali vanceene wira Yehova aanimphenta. Nihiku nimosa mmuthukumanoni, murokora owo aahiiwa esommwaka yoolepa emosa yanvanre murima. Owo aahuupuwelela ni otokosa yoolepa ele, ni aahiphwanya ereferensiya yaaromola yoolepa ekina ya  Biibiliya. Nuumala-vo aahiweha wira aaniphentiwa ni Yehova. * (Nwehe enoota.) Niireke mootoko wiiwa esommwaka yoolepa emosa mmulokoni, wasembeleyani wala okongresuni, yeeyo yoovanreni murima vanceene sintoko murokora ole?​—Nehemiya 8:12.

14. Ninrowa wooniherya sai wira ninnivaha efaita ni ophenta Nuulumo na Yehova?

14 Tthiri ninnimuxukhurela Yehova mwaha woonivaha Nuulumo nawe, Biibiliya! Owo ooleiherya wira masu awe annikhala mahiku otheene. (1 Pedru 1:24, 25) Nto nihaana ovikaniha omusoma Biibiliya moohihiyererya, weettela ele nniixutta ahu ni orumeela malakiheryo awo wira naakhaliherye atthu akina. Okathi nimpaka ahu eyo, ninnooniherya wira tthiri ninniphenta ni ovaha efaita Nuulumo na Muluku, omuhela muhina ole okumiherye, Yehova Muluku.

^ etti. 13 Nwehe ekaaxa Eni: “ Murukunuxo Muulupale”.