Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 2 2017

OPraslin, oSeicheles, opuro yoowo Muhooleli a anakhotto aitthaniwa Gordon, aaphwanyale awe ejardim awe ya wEdeni, mwaakha wa 1881

Eparayiisu Valaponi Ethiru Wala Ekeekhai?

Eparayiisu Valaponi Ethiru Wala Ekeekhai?

Eparayiisu! Iliivuru sinceene sinnooniherya ifootu sa mapuro ooreera, saatumereryaka atthu orowa mapuro awo anlikana ni “eparayiisu”, wira yaphumuryeke ni oliyala mixankiho sotheene. Masi ntoko ninsuwela ahu, okathi atthu awo anitthikela aya owaani, nlelo anniphwanya mixankiho seiye yaahiyale aya ottuli.

Khuuvo oniwerya okhootta wuupuwelela eparayiisu. Hiyo nihaana wiikohaka so: ‘Niireke “eparayiisu” muupuwelo paahi? Akhala wira, muupuwelo paahi, nto xeeni atthu onaasivela aya vanceene? Nave niireke onimwiiraneya?’

OSUWELIWA WA EPARAYIISU

Mwa iseekulu sinceene, apinaatamu yaanixankiheya vanceene ni muupuwelo wa eparayiisu. Anamunceene annisuwela eparayiisu mwaha wa moolumo a Biibiliya anihimya wira Muluku aahipaka “ematta wEdeni, epantte enikhuma nsuwa”. Etthu xeeni yookuxa murima ejardim ele yaarina aya? Yoolepa ele enihimya so: “Apwiya Muluku yahimeliha mmatta memmo mirí sa khula enamuna, sarèra wona, sasiva olya mihokorokho saya”. Ejardim ele yaari yoohakalaliha ni yooreera. Ejardim ele yaari yookuxa murima maana waahikhala “mwirí w’ekumi mmatta eriyari”.—Maphattuwelo 2:8, 9.

Nave-tho yowiiraneya ya Maphattuwelo enniromola miro mixexe saavira ejardim ele. Miro miili ti sinnisuweliwa olelo-va okhala Tigri (wala, Hiddekel) ni Eufrate. (Maphattuwelo 2:10-14) Miro iyo miili saanikhoowa siviraka elapo ya oPersia, weiwo olelo-va onisuweliwa okhala wIraque, weiwo khalai waari epantte ya oPersia.

Ti nthowa naya nnoona ahu wira eparayiisu valaponi enniirela mpantta yoolema ya atthu a oPersia. Etapeti ya oPersia, yeeyo eri oMuseu ya oFiladelfia, oPensilvânia, EUA, enooniherya ejardim yootekeleliwa yeeyo erina miri, ni edesenyu ya ekuwo yoottotthiwa ni ifilori. Mwa nttaava na ePersa noolumo noowi “ejardim yootekeleliwa”, nintaphulela “eparayiisu”, nave-tho idesenyo siri vakwaturuni sinnivarihana ni moota Biibiliya onitthokiherya awe makhalelo a ejardim ya wEdeni, yeeyo yaari yootepexa oreera.

Tthiri myaha voohimya sa eparayiisu sinnilavuliwa mwa mattaava manceene moolumwenkuni. Vaavo apinaatamu yaathaama aya erowaka mapuro makina, yaanuupuwelela yoohimmwa ya eparayiisu, nto nuuvira okathi, yaahipacerya otakaaheriwa ni ithale ni myaha soopakeleliwa. Hata olelo-va, atthu anceene anniitthana mapuro ooreera okhala eparayiisu.

OPHAVELASA EPARAYIISU

Anamatokosa akina eneetta ilapo soovirikana yaahihimya wira yaahiphwanya opuro waari eparayiisu ya khalai. Mwa ntakiheryo, vaavo Charles Gordon, mukhulupale a anakhotto a wInglaterra, aaxukunrye awe elapo ya oSeicheles eyaakha ya 1881, aahitikiniheya ni oreera wa opuro oniiriwa Vale de Maio, nto aahihimya wira ele yaari ejardim ya wEdeni. Opuro owo olelo-va wookhalihiwa Patrimônio Mundial. Eyaakha ya 1492, Mulipa-ooweetta mphareya a wItalia, Cristóvão Colombo, aahiikoha akhala wira aahanle vakhaani ophwanya eJardim ya wEdeni vaavo aaphiyale awe esisiro Hispaniola, vano onisuweliwa okhala oRepública Dominicana ni oHaiti.

Eliivuru Mapping Paradise, yeeyo enilavula myaha sa vano, ennihimya itthu sinceene saalempwale mmaaphani a khalai oowiiraka 190, maapha manceene animooniherya Adamu ni Eva wEdeni. Eriyari ya maapha awo, aakhala maapha a eseekulu 13 soolempwa sa Beatus of Liébana. Osulu waya yookhala ekaaxa erina eparayiisu variyari. Eriyari ya ejardim eyo sinnikhoowa miro 4, siniitthaniwa “Tigris”, “Eufrates”, “Pison”, ni “Geon”. Khula nlootho woonasa wene nintaphulela wuulaana wa eKristau ipantte 4 sa elapo. Ilatarato iyo sinnooniherya wira nnaamwi wahaasuweliwa opuro waari eparayiisu yoopacerya, atthu annivikaniha wuupuwelela eparayiisu.

 Eyaakha ya 1670, mulipa-onilepa ipoema a wInglater-ra, John Milton, aahilepa epoema yaalavula sa O Paraíso Perdido, yeeyo yaatthokiherya itthu sihimmwale ni Maphattuwelo, voohimya sa etampi ya Adamu ni woomoliwa waya ojardim ya wEdeni. Owo aahilavula sa yooleiherya ya Muluku ya waavaha apinaatamu okumi ohinimala, oriki: “Elapo enrowa okhala eparayiisu”. Muhoolo mwaya, John Milton, aahilepa-tho epoema ekina yaitthaniwa Paraíso Recuperado.

VANO EPARAYIISU VALAPONI KHENITHOKORERIWA

Tthiri nlelo apinaatamu aakhalana muupuwelo wa eparayiisu yaarimenle. Nto xeeni olelo-va ohinicaleliwa aya? Eliivuru Mapping Paradise ehimmye so: “Asomi a itiini  .  khaniimananiha osuwela opuro waari eparayiisu”.

Mukerexa, atthu aniixuttihiwa wira anrowa waakhela okumi wiirimu, ohiya oparayiisu valaponi-va. Esalimo 37:29 enihimya so: “Anaxariya animwakhela elapo yohiyeriw’aya: anrowa okhalaka-mo mahiku othene”. Okhala wira olumwenku olelo-va khahiyo eparayiisu, nto nroromeleke wira elapo enookhala eparayiisu? *

EKEEKHAI VOOHIMYA SA EPARAYIISU VALAPONI

Yehova Muluku, yoowo aapanke eparayiisu yoopacerya, ooleiherya olokiherya elapo wira ekhale-tho eparayiisu sintoko ele yaarimenle. Moota xeeni? Muupuweleke wira Yesu ooniixuttiha ovekela so: ‘Omwene anyu orwe; otthuna wanyu wireye ntoko wirimu siso vathí-va’. (Matheyo 6:10) Namalamulela a Omwene owo ti Yesu Kristu, yoowo onrowa oranttela iguvernu sotheene sa apinaatamu. (Daniyeli 2:44) Okathi Omwene owo onrowa aya waalamulelaka apinaatamu, Muluku onoottikiherya eparayiisu valaponi.

Vahinatthi Daniyeli ohimya masu ala, profeta Yesaya aahuupuxeriwa ni Muluku wira olepe moota itthu saarowa aya okhala mParayiisu, okathi itthu sotheene sinaahaaxa apinaatamu olelo-va sinrowa aya omala. (Yesaya 11:6-9; 35:5-7; 65:21-23) Nnootumereryani wira mwiivahe okathi vakhaani musome mBiibiliyani mwanyu iversu iya siromoliwe. Mwapaka eyo enoolipiha nroromelo nanyu noowi Muluku onimwaatthuvela apinaatamu oowiiwelela. Nto okathi owo, atthu anrowa okhalaka mparayiisu, nave-tho anrowa okhala apatthani a Muluku, moovirikana ni Adamu.—Wisupulula 21:3.

Exeeni ennikupaliha wira eParayiisu valaponi khahiyo etthu ya ethiru, masi enimwiiraneya tthiri? Mwaha woowi Biibiliya onihimya so: “Erimu ti yawaya Apwiya: vano elapo, Apwiya ahàvaha atthu”. Etthu ekina ennikupaliha tiila: “Muluku, ori òhòtha, ahilaiherya ekum’iyo olumwenku ohinatthi opattuxiwa”. (Esalimo 115:16; Tito 1:2) Tthiri ninnihakalala osuwela wira Biibiliya onnileiherya eParayiisu ya mahiku otheene!

^ etti. 15 Nave eKurani, eveersu 105 ya esurata 21, Al-Anbiya’ [Maprofeta], enihimya so: “Anaxariya ari arumeyi aka animwaakhela elapo”