Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 2 2017

Elias Hutter ni aBiibiliya Awe Ootepa Otthuneya a eHeeberi

Elias Hutter ni aBiibiliya Awe Ootepa Otthuneya a eHeeberi

MUNNIWERYA omusoma Biibiliya a eHeeberi? Woonasa wene nnaari. Waaniheryasa khamutonko onweha. Nyuwo pooti wuncererya osiveliwa wanyu Soolempwa Sowaarya murina anyu, mwiixuttaka voohimya sa musomi EIias Hutter, yoowo aakhala eseekulu 16, ni aBiibiliya anli a eHeeberi aakumihenrye awe.

Elias Hutter aayariwe eyaakha ya 1553 epooma yaamukhaani ya oGörlitz, wAlemanha, waattamela efrontera ya oPolonia ni República Tcheca. Hutter aahisoma mattaava a khalai a wOriente Médio wUniversidade Luterana, oJena. Okathi aarina awe iyaakha 25 aahithanliwa okhala prusoore a nttaava na eHeeberi, oLeipzig. Okhala wira aari prusoore, nuuvira okathi aahipaka exikola awe oNuremberg weiwo anaxikola yaixutta aya eHeeberi, eGriki, Elatim, ni nttaava na wAlemanha, muhina mwa iyaakha 4 paahi. Khiivo exikola ekina wala universidade yaawerya opaka eyo.

“OREERA WAWE BIIBILIYA OLA”

Etiitulu ya ekaapa ya Biibiliya a eHeberi eyaakha 1587

Eyaakha ya 1587, Hutter aahitaphulela Soolempwa sa eHeeberi seiyo olelo-va sinsuweliwa okhala Wataana wa Khalai. Biibiliya owo aahisuweliwa okhala Derekh ha-Kodesh, nsina nlo naakumihiwe yoolepa ya Yesaya 35:8, nintaphulela “Ephiro ya Muluku”. Ekaapa awe yooreera yaanivarihana ni ekomentaario eni: “Itthu sotheene sinooniherya oreera wawe Biibiliya ola”. Masi etthu yaamwiiriha Biibiliya ole okhala ootepa otthuneya, waari mwaha woowi aanaakhaliherya anaxikola wiixutta eHeeberi.

Wira musuwele nthowa naya Biibiliya a eHeeberi a Hutter aari awe ootthuneya, muthokorerye moota vaamuxankiha aya naxikola omusoma Biibiliya a nttaava na eHeeberi. Nthowa noopacerya ti noowi ileetera sa eheeberi tisoovirikana, maana sinisommwa okhuma moono woolopwana orowaka moono woothiyana. Na nenli ti noowi khula nuulumo nookhalana moolumo aniphwanyaneya wanipacerya ni wanikisa, aniitthaniwa prefixo ni sufixo, yaawo ikwaha sinceene anixankiha osuwelexa nuulumo nene. Mwa ntakiheryo, muthokorerye nuulumo na eHeeberi נפשׁ (nintaphuleliwa ne’phesh), “alma”. Mwa yoolepa ya Ezekiyeli 18:4, ninlempwa ni prefixo ה (ha), nintaphulela “a”, nto nuulumo notheene ninsommwa שׁהנפ (han·ne’phesh), eyo piiyo “a alma”. Masi mutthu ohilimalenle saana elepeliwo ya nuulumo han·ne’phesh, pooti okhalaka ntoko etthu ekina yoovirikana ni נפשׁ ne’phesh.

Wira aakhaliherye anaxikola awe, Hutter aahirumeela enamuna ya vameekhaaya ya wimpirimiri. Owo aahirumeela maakina yaarina ileetera sa eheeberi sooriipa  ni soohiriipa. Nto moolumo maalupale yaalempwale ni ekoore yooriipa, vano iprefixo ni isufixo saarina ekoore yoohiriipa. Ekaruma eyo yaamukhaani yaahaakhweiherya anaxikola osuwela moolumo oopacerya a eHeeberi, nto eyo yaahaakhaliherya vanceene wiixutta nttaava nle. Inoota sa Biibiliya Tradução do Novo Mundo das Escrituras Sagradas com Referências sinnirumeela enamuna emosaru. * Nto moolumo maalupale yaalempwe ni ekoore yooriipa, nto iprefixo ni isufixo saarina ekoore yoohiriipa. Epantte yoopintariwa ya elatarato eri vasulu-va ennooniherya ekaapa yarumeeliwe ni Biibiliya a eHeeberi a Hutter mwa yoolepa ya Ezekiyeli 18:4, ni yoorumeeliwa ni Bíblia com Referências, moolumo a enoota ya yoolepa emosaru.

WIMPIRIMIRIWA WA BIIBILIYA A EHEEBERI A “WAATAANA WA NAANAANO”

Hutter, nave aahimpirimiri epantte ekina yeeyo olelo-va enisuweliwa okhala “Waataana wa Naanaano”, mwa mattaava 12. Epantte ela yaahikumiheriwa oNuremberg eyaakha ya 1599 ni yaahisuweliwa okhala Poliglota de Nuremberg. Hutter aaphavela wira Soolempwa sa eGriki sa eKristau sitaphuleliwe-tho mwa nttaava na eHeeberi. Nto aahihimya wira “hata aawerya oliva musurukhu munceene” wira nitaphuleliwe nttaava na eHeeberi, eyo khiyarowa okumiherya mireerelo. * Nto aahithanla otaphulela mmansawe Soolempwa sa Waataana wa Naanaano orumeelaka eGriki oroihaka weHeeberi. Nnaamwi aarina mixankiho sinceene, Hutter aahimutaphulela Biibiliya otheene muhina mwa eyaakha emosa paahi.

Niireke Biibiliya a Soolempwa sa eGriki sa eKristau aahiloka? Eyaakha ya 1891 musomi muHeeberi Franz Delitzsch, aahilepa so: “Biibiliya a eHeeberi [a Hutter] onnooniherya osuwela wawe nttaava nlo, waavikana maKristau a okathi ole, nto onniphwanela omusoma, maana ikwaha sinceene onnirumeela moolumo ookhalela”.

NIKHALIHERYO NUULUPALE

Hutter khaathaacinri mwaha wa muteko awe wootaphulela; woonasa wene aBiibiliya awe khiyaathummwale vanceene. Masi, muteko awe wookhaliherya vanceene. Mwa ntakiheryo, Biibiliya awe a eHeeberi a Waataana wa Naanaano, aahilokiheriwa ni aahimpirimiriwa eyaakha ya 1661 ni William Robertson, nave ahimpirimiriwa-tho eyaakha ya 1798 ni Richard Caddick. Vaavo aataphulela awe orumeelaka nttaava na eGriki, Hutter aahirumeela maihaneliwo Kyʹri·os (Apwiya) ni The·osʹ (Muluku) ntoko Yehova (יהוה, JHVH) mapuro naaphwanyaneya aya mwa Soolempwa sa eHeeberi ni mapuro owo aakupali awe wira aahimmwa Yehova. Ela etthu yoohakalaliha maana aBiibiliya anceene a Waataana wa Naanaano khanrumeela nsina na Muluku. Masi Biibiliya a Hutter ookhaliherya oweha wira vannitthuneya ottikiheriwa nsina na Muluku mwa Soolempwa sa eGriki sa eKristau.

Mukwaha munrowa anyu oweha nsina na Muluku, Yehova, mwa Soolempwa sa eGriki sa eKristau wala enoota ya Bíblia com Referências, muhaana wuupuwela muteko wa Elias Hutter ni aBiibiliya awe ootepa otthuneya a eHeeberi.

^ etti. 7 Nwehe enoota ya nenli ya Ezekiyeli 18:4 ni Apendise 3B a Bíblia com Referências.

^ etti. 9 Yaahikhala asomi yaamutaphulenle Biibiliya a Waataana wa Naanaano nttaava na eHeeberi. Mmosa a yaawo aari Simon Atoumanos, yoowo aari monge Bizantino eyaakha yowiiraka 1360. Musomi mukina aari Oswald Schreckenfuchs, musomi a wAlemanha eyaakha yowiiraka 1565. ABiibiliya yaataphuleliwe ni asomi ala khiyaakumiheriwe ni aarimeela.