Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 2 2017

ETetragrama, nsina na Muluku, Yehova, ni ileetera sa eHeeberi, ninsommwa okhuma moono woolopwana oroiwaka moono woothiyana

Eleetera Yaamukhaanixa ya eHeeberi, Yeeyo Enniroromeliha Vanceene

Eleetera Yaamukhaanixa ya eHeeberi, Yeeyo Enniroromeliha Vanceene

Niireke hiyo pooti ororomela wira sooleiherya sotheene sa Muluku sinimwiiraneya? Yesu aanikupali wira sinimwiiraneya, nave sowiixuttiha sawe saanilipiha waamini wa atthu yanwiriyana. Muthokorerye nlikanyiho nawe okathi aalaleerya awe vamwaako, nenlo niri Matheyo 5:18. Nlo ninhimya so: “Kinohimeryani ekhweli wira: ehimanle erimu n’ilapo ya vathí, khinrimela etthu yamukhani elempwe, nnákhala wukhani waya soruma iyo: sothene sinimwiraneya”.

Eleetera yamukhaanixa ya eHeberi ti י (yod), yeeyo eri eleetera yoopacerya ya eTetragrama, eyo piiyo, nsina na Muluku, Yehova. * Alipa-oolepa ni aFarisi yaanittittimiha vanceene khula nuulumo na Nlamulo na Muluku. Nave-tho yaanithokorerya vanceene khula eleetera ya khula nuulumo na Nlamulo nlo.

Yesu aaphavela ohimya wira erimu ni elapo pooti omala, masi itthu sotheene sa Nlamulo na Muluku hata iye sootepa oyeva sinimwiiraneya. Masi Soolempwa sinnilipiherya wira erimu yekeekhai ni elapo khenrowa omala. (Esalimo 78:69) Moolumo ala anooniherya wira khiivo etthu hata yootepa oyeva ya Nlamulo na Muluku ehinrowa wiiraneya.

Niireke Yehova Muluku onnaakhwaniherya itthu sootepexa oyeva? Aayo. Muthokorerye ela: AIsarayeli a khalai yaahileeliwa wira ahipwexeke nikhuva na enama ya Paasikha. (Okhuma 12:46) Yooruma ela yaakhala ntoko yaamukhaani. Niireke awo yaahiiwexexa nthowa naya yaakhottiheriwa aya opwexa nikhuva? Woonasa wene nnaari. Yehova aanisuwela wira yooruma ele yaari eprofesia yooniherya wira Mesiya khaarowa opwexiwa hata nikhuva nimosa, vaavo aarowa awe wiiviwa vamwirini va nihaaxeryo.​—Esalimo 34:20; Yohani 19:31-33, 36.

Moolumo a Yesu anniixuttiha exeeni? Anniixuttiha wira hiyo pooti ororomela wira sooleiherya sotheene sa Yehova sinimwiiraneya, khiivo ehinrowa wiiraneya. Tthiri eleetera yaamukhaanixa ya eHeeberi, enninroromeliha vanceene!

^ etti. 3 Eleetera yaamukhaanixa ya eGriki ti iota, nto woonasa wene enlikana ni eleetera ya eHeeberi י (yod). Wanipacerya wene Nlamulo na Moise naalempwale ni eHeeberi, nto vaavo Yesu aalavunle awe oriki: “etthu yamukhani elempwe”, woonasa wene aahimya eleetera ya eHeeberi י (yod).