Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Março 2017

Niireke Munoovarihela Muteko ni Murima Wotheene Itthu Silempwale?

Niireke Munoovarihela Muteko ni Murima Wotheene Itthu Silempwale?

“Itthu iya . . . sahilempwa wira sinlopole hiyo, okhala wira omala wa mahiku wonattamela”.​1 AKORINTO 10:11.

ISIPO: 11, 29

1, 2. Xeeni vanitthuneya ahu othokorerya sowiiraneya sa mamwene maxexe a oYuda?

VAAKHANLE wira monweha mutthu eettaka mphironi, nto otherekuwa ni khumora, niireke khimwaarowa ovaha ephoole okathi onivira anyu ephiro eyo? Tthiri mwanvaha ephoole. Mwa enamuna emosaru, othokorerya soovonya atthu akina apanke aya mookumini mwaya, onoonikhaliherya osyaka opaka soovonya simosaru. Mwa ntakiheryo, hiyo nnoowerya wiixutta ni soovonya sa atthu yaale aniromoliwa mBiibiliyani.

2 Mamwene maxexe a oYuda naathokorenrye ahu mwaha ovinre, yaahimurumeela Yehova ni murima wotheene. Hata vari siiso, awo yaahipaka soovonya suulupale. Soovonya saya soolempwa mBiibiliyani, nto nnoowerya wuupuwelela ni wiixutta itthu sootthuneya. Itthu saawiiranenle sinniixuttiha exeeni, nave ninrowa osyaka sai opaka soovonya simosaru?​—Mmusome aRoma 15:4.

 OROROMELA MIRUKU SA APINAATAMU ONNIKUMIHERYA MAXAKHA

3-5. (a) Nnaamwi Asa aamurumeela Yehova ni murima wotheene, yoovonya xeeni aapanke awe? (b) Xeeni Asa ohalaka waaroromela apinaatamu okathi aaronwe awe owana ni Bayexa?

3 Wanipacerya, nrowe nithokorerye yowiiraneya ya Asa. Okathi anakhotto emilyau emosa a wEthiyopia yaarwiiye aya otuphela muttetthe wa oYuda, Asa aahimuroromela Yehova. Masi, Asa khaamuroromenle Yehova okathi Bayexa, mwene a wIsarayeli, aapacenrye awe olipiha muttetthe wa oRama, yoowo waari waattamela omwene wa oYuda. (2 Wahala 16:1-3) Asa aahiiroromela mmensawe khunvaha mihakhu sawe mwene a wAsiria wira omukhaliherye. Nto, vaavo Asiria yaatuphenle aya mittetthe sa wIsarayeli, Bayexa “ahihiya miteko s’olipiha oRama”. (2 Wahala 16:5) Wanipacerya, pooti wira Asa oona wira aahipaka yoothanla yooloka!

4 Ankhi Yehova? Owo khaasiveliwe ni Asa, maana khaamuroromenle, nave aahimuruma profeta Hanani wira amuttaruxe Asa. (Mmusome 2 Wahala 16:7-9.) Hanani aahimuleela Asa wira: “Okhuma olelo mpakha oholo, munophwanya ikhotto”. Asa aahipacerya olamulela muttetthe wa oRama, nto muhoolo mwaya, owo ni atthu awe yaahiwana ikhotto sinceene!

5 Mwaha ovinre, nihiixutta wira Yehova aahisiveliwa ni Asa. Nnaamwi Asa aari oohimalela, Muluku aahiweha wira Asa aanimurumeela ni murima wotheene. (1 Mamwene 15:14) Hata vari siiso, okhala wira Asa aahipaka yoothanla yoohiloka, nto aahiphwanya maxakha. Exeeni yaamwiirinhe wiiroromela ni waaroromela atthu akina ohiya omuroromela Yehova? Waaniheryasa, Asa uupuwela wira anwerya orumeela osuwela wawe owana wira oxintte ekhotto ele. Aahiiso pooti wira aawiriyanne miruku soohiloka sa atthu akina.

Okathi wotheene, nihaana omuroromela Yehova, ohiya muupuwelo ahu

6. Exeeni eniixutta ahu ni soovonya sa Asa? Nvahe ntakiheryo.

6 Soovonya sa Asa, sinniixuttiha exeeni? Nniixutta wira okathi wotheene, nihaana omuroromela Yehova, ohiya muupuwelo ahu. Nave, nihaana onvekela Yehova nikhaliheryo, hata muxankiho ahu oryeene muulupale aahiiso mwaamukhaani. Nihaana wuupuwela ela: Niireke nniiroromela mmansihu neereryaka ophuka mixankiho sahu, nittharihelaka murima ahu? Aahiiso, niireke okathi wotheene nimpacerya toko oweha ele Biibiliya enihimya awe, nto nuumala-vo nneererya otthara malakiheryo awe wira niphuke muxankiho owo? Mwa ntakiheryo, nkahaya muupuwele vaakhanle wira mmusi inyu onnookhoottiheryani orowa omuthukumanoni aahiiso muthukumano muulupale wa esirkwiitu. Niireke munonvekela Yehova wira ookhaliheryeni woona etthu enireerela opaka? Aahiiso nuumala ovira okathi munceene muhivaraka muteko, vano mutthu mukina onahimya wira okhalana muteko. Niireke munoomuleela wira khula esumana mookhalana  mithukumano, hata musuwelaka wira pooti ohiweemereryani okela muteko owo? Hata nikumanaka muxankiho, nihaana wuupuwela masu a nasaalimo ani: “Mwivahererye wa Muluku n’uroromela: owo onimokhaliheryani”.​—Esalimo 37:5.

EXEENI ENROWA OKHUMELELA NAATHANLA APATTHANI OOHILOKA?

7, 8. Soovonya xeeni Yosafati aapanke awe, ni exeeni yaamukhumelenle? (Nwehe elatarato yoopacerya.)

7 Vano nrowe nithokorerye ntakiheryo na Yosafati, mwaana a Asa. Yosafati aahikhalana mikhalelo saamusivela Yehova. Nto okathi aamuroromela awe Yehova, Yosafati aahipaka itthu sinceene sooloka. Masi, owo aahipaka-tho soothanla soohiloka. Mwa ntakiheryo, aahimutheliha mwanawe mwaamulopwana mwaana mwaamuthiyana a Mwene ootakhala Akhabi. Muhoolo mwaya, Yosafati aahitakaahana ni Akhabi wira yawane ni Asiria, nnaamwi profeta Mikeya aamuloponle wira ohipake eyo. Okhottoni, Asiria yaahimutuphela Yosafati aphavelaka omwiiva. (2 Wahala 18:1-32) Okathi aatthikenle awe oYerusalemu, profeta Yehu aahimuleela wira: “Nyuwo momukhaliherya mutthu òtakhala murima! Nyuwo munimphenta nwanani Àpwiya!”​—Mmusome 2 Wahala 19:1-3.

8 Niireke Yosafati aahiixutta etthu ni ele yaamwiiranenle vamosa ni yoolopola ya profeta ole? Nnaari. Nnaamwi aavikaninhe omphenta Yehova ni aaphavela omusiveliha, Yosafati aahipatthana ni mutthu ahaaphavela omukokhorela Yehova. Mutthu ene aari Mwene Akhaziya, mwaana a Akhabi. Yosafati ni Akhaziya yaahipaka ikalawa hoothe. Masi ikalawa iye saahihononeya ahinatthi orumeela.​—2 Wahala 20:35-37.

9. Exeeni enrowa onikhumelela nakhalana apatthani oohiloka?

 9 Exeeni nniixutta ahu ni ele yaamwiiranenle Yosafati? Owo aahipaka itthu sooloka ni ‘àhaphavela Apwiya ni murim’awe wothene’. (2 Wahala 22:9) Hata vari siiso, owo aaniviriha okathi munceene okhalaka ni atthu yahamphenta Yehova, nto eyo yaahimukumiherya mixankiho sinceene mookumini mwawe. Tthiri, owo aahanle vakhaani wiiviwa. Muupuweleke miruku iya sa mBiibiliyani sini: “Onetta n’asuweli onokhala musuweli: onetta n’alolo onophwanya otakhaliwa”. (Miruku 13:20) Hiyo ninniphavela waaleela atthu akina voohimya sa Yehova. Masi, ti vowoopiha okhalana apatthani ahinimurumeela Yehova.

Niireke munnaamini wira Muluku onrowa wookhaliheryani omphwanya ole onireerela anyu othelana?

10. (a) Akhala wira nimphavela othela aahiiso otheliwa, exeeni Yosafati onniixuttiha awe? (b) Exeeni enireerela ahu wuupuwelela?

10 Mwa ntakiheryo, vakhala wira nimphavela othela aahiiso otheliwa, etthu xeeni Yosafati onniixuttiha awe? Woonasa wene, noopacerya osiveliwa ni mutthu ohinimphenta Yehova. Nave pooti wira khannimphwanya mutthu oothelana yoowo onimurumeela Yehova. Aahiiso amusi ihu pooti omakela onileela wira nihaana othela aahiiso otheliwa nihinatthi wuuluvala. Ekeekhai wira Yehova onipattunxe wira nsivelaneke. Masi, ninrowa opaka exeeni akhala wira khannimphwanya mutthu onireerela ahu othelana? Etthu enrowa onikhaliherya ti wuupuwelela ele yaamwiiranenle Yosafati. Owo aahinvekela nikhaliheryo Yehova. (2 Wahala 18:4-6) Masi vaavo aapatthanne awe ni Akhabi, yoowo ahamphenta Yehova, Yosafati khaiwelenle nlopolo na Yehova. Yosafati aahaana wuupuwela wira “Apwiya anniweha ilapo sothene wira yakhaliherye ale anaroromela ni murim’aya wothene”. (2 Wahala 16:9) Nave-tho, nihaana wuupuwela wira Yehova onniphavela onikhaliherya. Maana owo onnisuwela mukhalelo ahu ni onniniphenta. Niireke munnaamini wira Muluku onrowa wookhaliheryani omphwanya ole onireerela anyu othelana? Mukupaliki wira onimookhaliheryani!

Nihaana osyaka osiveliwa ni mutthu ohinimukokhorela Yehova (Nwehe ettima 10)

MUHIHIYE MURIMA ANYU WIIXINNUWIHAKA

11, 12. (a) Exeeni Ezekiya aapanke awe yooniherya etthu yaari vamurimani vawe? (b) Xeeni Yehova ohalaka omulevelela Ezekiya?

11 Ntakiheryo na Ezekiya ninniixuttiha exeeni? Yehova aahimukhaliherya Ezekiya wira oone ele tthiri yaari vamurimani vawe. (Mmusome 2 Wahala 32:31.) Okathi Ezekiya ahaareere awe owereiwa, Muluku aahimuleela wira aamunvoniha aahiiso ompenuxa ni aahinvaha ekanyeryo wira omukupalihe. Yehova aahiiriha muuttutthi otthikela ottuli mavalo muloko. Muhoolo mwaya, vaakhala ntoko wira makhulupale a oBabilonia yaaphavela osuwela itthu sikina sa yootaphulela ya ekanyeryo ele, nto yaahaaruma atthu aya wira yamukohe  Ezekiya. (2 Mamwene 20:8-13; 2 Wahala 32:24) Yehova khaamulenle Ezekiya moota aarowa awe waathokorerya atthu ale. Biibiliya onihimya wira Yehova “ahimunyanyala”, wira oone ele aarowa awe opaka. Ezekiya aahiwooniherya atthu ale a oBabilonia mihakhu sawe sotheene. Eyo yahooniherya ele yaari vamurimani va Ezekiya. Moota xeeni?

12 Mooriipiha murima, Ezekiya aahiixinnuwiha. Tivonto, hata aakhaliheriwe, owo ‘khaxukhunru Apwiya’. Biibiliya khonihimya etthu yaamwiirinhe oturuka mukhalelo awe. Waaniheryasa mwaha woowi aahaaxintta Asiria aahiiso okhala wira Yehova aahinvoniha wala ompenuxa. Nave pooti wira waari muhakhu ni ovuwa aarina awe. Nnaamwi Ezekiya aamurumenle Yehova ni murima wotheene, okathi mukina owo aahiixinnuwiha, nto Yehova khaasiveliwe. Masi, ohoolo waya: “Ezekiya ahihiya wisona wa murim’awe, khwiyeviha”, nto Muluku aahimulevelela.​—2 Wahala 32:25-27; Esalimo 138:6.

Moonelo ahu onimooniherya etthu eri vamurimani vahu

13, 14. (a) Etthu xeeni yaarowa wooniherya ele eri vamurimani vahu? (b) Nooneleke sai vaavo atthu akina annittottopela aya?

13 Soovonya ni ntakiheryo na Ezekiya ninniixuttiha exeeni? Muupuweleke wira Ezekiya aahiixinnuwiha nuumala Yehova omukhaliherya waaxintta Asiria ni onvohina aahiiso ompenuxa. Nto, okathi itthu sineetta aya saana aahiiso ninttottopeliwa ahu, ninrowa opaka exeeni? Moonelo ahu onimooniherya etthu eri vamurimani vahu. Mwa ntakiheryo, pooti wira munna oomananiha olokiherya mwaha wira alavule nipuro nowaatta atthu. Nto atthu anceene annimuttottopela mwaha woolavula saana mwaha ole. Ninrowa woonela sai?

14 Okathi wotheene nihaana wuupuwela ele Yesu aahimmye awe oriki: “Siso-tho nyuwo: mwavará miteko sothene sirummwanyu, mwireke: ‘Hiyo n’àrumeyí pahi: nivanré miteko sarinahu ovara’”. (Luka 17:10) Muupuweleke wira okathi Ezekiya aixinnuwinha awe, owo khaaxukhurenle moota Yehova aamukhalihenrye awe. Tivonto, okathi onipaka ahu mwaha nto atthu akina ananittottopela, exeeni enrowa onikhaliherya ovikaniha wiiyeviha? Nihaana wuupuwelela itthu Yehova onipakenle awe. Nave nihaana omuxukhurela mwaha woonikhaliherya. Tthiri Yehova oonivaha Biibiliya ni munepa awe wootteela wira niweryeke olavula saana mwaha.

MPAKEKE SOOTHANLA MULAKIHERIWAKA NI YEHOVA

15, 16. Exeeni Yosiya aapanke awe yaamwiirinhe wiiviwa?

15 Ankhi ntakiheryo na Yosiya ninniixuttiha exeeni? Nnaamwi Yosiya aari mwene ooloka, owo aahipaka yoovonya yaamwiirinhe wiiviwa. (Mmusome 2 Wahala 35:20-22.) Exeeni yaakhumelenle? Yosiya aaphavela owana ni Neko, mwene a wEjiitu, nnaamwi Neko ahaaphavela owana ni yena. Tthiri, Neko aahimuleela Yosiya wira khaaphavela owana ni yena.  Biibiliya onihimya wira masu a mwene Neko “yakhuma mwano mwa Muluku”. Masi Yosiya aahirowa owana ni Neko nto aahiiviwa. Xeeni Yosiya ohalaka orowa owana ni Neko? Biibiliya khonihimya etthu ene.

16 Yosiya aahaana omukoha Yehova akhala wira Neko aahimya ekeekhai. Moota xeeni? Yosiya aahaana omukoha Yeremiya, profeta a Yehova. (2 Wahala 35:23, 25) Nave-tho, Yosiya aahaana ovarerya mwaha ole. Mwene Neko aarowa oKarkemixi owana ni nloko nikina, ohiya owana ni Yerusalemu. Neko kheerenrye onveeha Yehova ni atthu awe. Yosiya khuupuwenle saana itthu iyo ohinatthi opaka yoothanla. Exeeni eniixutta ahu? Okathi onikhalana ahu muxankiho nnaphavela opaka yoothanla, nihaana opacerya osuwela ele Yehova oniphavela awe wira nipake.

17. Okathi onikhalana ahu mixankiho, ninrowa osyaka sai ovonya ntoko Yosiya?

17 Okathi onipaka ahu yoothanla, nihaana toko wuupuwelela malakiheryo a Biibiliya anrowa onikhaliherya ni woona moota woovarihela muteko. Okathi mukina pooti otthuneyaka otokosa iliivuru sahu aahiiso omukoha mutokweene wira onivahe miruku. Owo pooti onikhaliherya wuupuwelela malakiheryo makina a Biibiliya. Nkahaya muupuwele ela: Murokora mmosa otheliwe ni mutthu ohikhanle Namoona. Owo onnithanla nihiku noorowa olaleerya. (Miteko 4:20) Masi nihiku nenno nithanlale awe orowa olaleerya, iyawe onnimukhoottiherya. Owo onihimya wira oniphavela oviriha okathi munceene hoothe, ni orowa opasiyari. Nto murokora owo onnivarerya iversiikulu sa Biibiliya wira simukhaliherye opaka yoothanla mwa miruku. Nave onnoona wira ohaana omwiiwelela Muluku ni wiiwelela yooruma ya Yesu ya waapaka awiixutti. (Matheyo 28:19, 20; Miteko 5:29) Nave-tho, onnuupuwela wira muthiyana ohaana owiiwelela aiyawe ni wira arumeyi a Muluku ahaana waareerela murima akhwaaya. (aÉfeso 5:22-24; aFilipi 4:5) Vano, niireke iyawe oneererya omukhoottiherya olaleerya paahi aahiiso oniphavela tthiri oviriha okathi ni mwaarawe nihiku nne? Okhala wira na arumeyi a Yehova, hiyo nimphavela opaka soothanla sooloka ni omusiveliha Muluku.

MMURUMEELEKE YEHOVA NI MURIMA WOTHEENE NI MUHAKALALEKE

18. Exeeni eniixutta anyu wuupuwelela matakiheryo ala maxexe a mamwene a oYuda?

18 Okathi mukina, hiyo-tho pooti ovonya ntoko mamwene ale maxexe a oYuda. Waaniheryasa, (1) ororomela muupuwelo ahu, (2) waathanla apatthani oohiloka, (3) wiixinnuwiha, aahiiso (4) opaka soothanla nihinatthi othokorerya moonelo wa Muluku. Hata vari siiso, nihuupuweleke wira khaninkhala-khala nimusivelihaka Yehova. Maana Yehova onnoona itthu sooloka nimpaka ahu ntoko oonale awe sa mamwene ale maxexe. Nave, Yehova onnoona wira ninnimphenta vanceene ni ninniphavela omurumeela ni murima wotheene. Nto, oonivaha matakiheryo ala wira anikhaliheryeke osyaka opaka soovonya suulupale. Tivonto, nrowe nuupuwelele sowiiraneya sa mamwene ala aromoliwe mBiibiliyani ni omuxukhurela Yehova onivanhe matakiheryo ala!