Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Maio 2017

Ohakalala Onikhumelela Mwaha Wookhweiherya Okumi

Ohakalala Onikhumelela Mwaha Wookhweiherya Okumi

DANIEL NI MIRIAM, a wEspanha, athelanne Setembro mwaakha wa 2.000 ni yaahikhalana mireerelo sinceene. Daniel onihimya so: “Okhala wira naavara muteko waaniphwanyiha musurukhu munceene, naanilya murestauranti, orowa ilapo sikina ni owara ikuwo sa musurukhu munceene. Nave naanilaleerya ikwaha sinceene”. Masi yaahikhumelela etthu yaaturunke makhalelo ahu.

Kongresu a 2006, Daniel aahiwiriyana mwaha waarina nikoho naahimya wira: “Niireke wira ninnipaka ele eniwerya ahu wira naakhaliherye ‘yawo anroihiwa wiviwa ehitthenke’, wira aphwanye ephiro enroiha wookumini woohimala?” (Miruku 24:11) Mwaha ole wahooniherya wira nookhalana muritti woolaleya muhupi wa Biibiliya maana woopowa wa atthu onlipa ni eyo. (Miteko 20:26, 27) Daniel onnuupuwelela oriki: “Kaahoona wira mwaha ole waakihimya yoomi”. Nave-tho, mwaha ole waahooniherya wira ninnihakalala vanceene vaavo vanincererya ahu muteko oninvarela ahu Yehova. Daniel aahoona wira eyo ekeekhai, maana aaniweha ohakalala wa Miriam yoowo aari pioneera.

Mwaha ole waahimukhaliherya vanceene Daniel, nto aahoona wira aahaana opaka marukunuxo. Aahipacerya ovara iwoora vakhaani omutekoni wawe, khukhala pioneero, nto, aahoona wira owo ni Miriam yaamuhakalala vanceene akhala wira yaamurowa orumeela opuro woothowa anamalaleerya.

MIXANKIHO NUUMALA-VO, OHAKALALA

Maio a 2007, Daniel ni Miriam yaahihiya muteko aya, khuthaamela oPanamá opuro yaasuwenle aya vahinatthi. Muttetthe yaalaleerya aya waahela muhina isisiro sinceene sa oBocas del Toro ni isisiro sa Ephareya ya oCaribe. Anamunceene a muttetthe ole yaari a nloko Guaymi. Daniel ni Miriam anihimya wira yaahiwerya okhala oPanamá myeeri 8 arumeelaka musurukhu yaasunke aya.

Awo yanirowa isisiro sikina ni ekalawa aahiiso moskaleta. Annuupuwela ekwaha yoopacerya yeettale aya ikiloomo 30, aviraka mapuro ooxankiha nihiku nootepa oviha. Daniel aahitemwa vanceene mpakha ohala okhwa. Imusi sa nloko Guaymi sinnisuwela owaakhela saana aletto, otepexa wene okathi anamathelana ale yiixuntte aya masu vakhaani a nttaava na elapo ele. Moohipisa yaanaasomiha Biibiliya atthu 23.

Exeeni yaakhumelenle nuumala mireerelo saya? Daniel onihimya so: “Naahipacerya wuupuwela otthikela wEspanha. Masi naaniriipiwa murima vanceene wuupuwela waahiya atthu ale naasomiha ahu Biibiliya”. Nuuvira mweeri mmosa, yaahaakhela ihapari soohakalaliha. Nto Miriam onihimya so: “Naahilattuliwa orumeela ntoko mapioneero a vameekhaaya. Tthiri naahihakalala maana nanwerya ovikaniha okhala elapo ele!”

OHAKALALA WAYA WUULUPALE

Mwaha wa marukunuxo anipakiwa ni mutthenkeso ahu, Daniel ni Miriam aahiya orumeela ntoko mapioneero a vameekhaaya mwaakha wa 2015. Nto vano, yaarowa opaka exeeni? Awo yaahiroromela yooleiherya eri Esalimo 37:5, eni: “Mwivahererye wa Muluku n’uroromela: owo onimokhaliheryani”. Vano aaphwanya muteko onaakhaliherya ovikaniha okhala mapioneero okilaatheya, nto olelo-va, anirumeela muloko wa oVeraguas, elapo ya oPanamá.

Daniel onihimya so: “Nihinatthi okhuma wEspanha, khinaakupali wira nanwerya okhalaka ni mireerelo vakhaani. Masi olelo-va ninniwerya, nave nookhalana itthu sootthuneya”. Etthu xeeni enitepa waahakalaliha? Awo annaakhula ariki: “Waakhaliherya atthu oowiiyeviha wiixutta voohimya sa Yehova, tonniiriha ohakalala vanceene!”