Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Maio 2017

Munnimphenta Yesu Ovikana Itthu?

Munnimphenta Yesu Ovikana Itthu?

“Nyuwo Simoni, mwana a Yohani! Munnikiphenta”, ovikana iya?​—YOHANI 21:15.

ISIPO: 32, 45

1, 2. Exeeni Pedru iixuntte awe, nuumala oviriha ohiyu wotheene otothaka ihopa?

AWIIXUTTI athanu ni anli a Yesu, yaahiviriha ohiyu wotheene atothaka ihopa Ephareya ya oGalileya. Masi khiyaavanre etthu. Nto vaasiisu, Yesu yoowo vano aahihimuxiwe, aahaaphwanya awiixutti awe ophareya. Nuumala-vo, “owo ahahimerya wira: Murihele ntthavi mono wolopwana w’ekalawa: munophwanya. Awo yahirihela siso, ehinawerya opurula-tho mwaha wa ihopa saharere watta”.​—Yohani 21:1-6.

2 Yesu aahaavaha awiixutti awe iphaawu ni ihopa. Nto aahimukoha Simoni Pedru oriki: “Nyuwo Simoni, mwana a Yohani! Munnikiphenta” ovikana iya? Yesu aanisuwela wira Pedru aanisiveliwa vanceene ototha ihopa. Woonasa wene, ti etthu yaamwiirinhe Yesu omukoha Pedru akhala wira aanimphenta Yesu ni mwiixuttiho awe, ovikana ototha ihopa. Pedru aahimwaakhula Yesu oriki: “Pwiya! Nyuwo mosuwela wira kinnophentani!” (Yohani 21:15) Okhuma nihiku nne, Pedru aahiiwexexa yootaphulela ya masu a Yesu. Nave aahooniherya  omphenta wawe Kristu oluttuweliwaka muteko woolaleerya, ni okhala murumeyi oororomeleya a muloko wa eKristau.

3. Exeeni maKristau anitthuneya aya ovaha ephoole?

3 Nniixutta exeeni ni moolumo Yesu aamukonhe awe Pedru? Anniixuttiha wira nihaana ovaha ephoole wira omphenta wahu Kristu ohivukuwe. Yesu aahisuwela wira olumwenku ola, waarowa okhala wooxankiha ni wira naamukhalana soovelaveliha sa okumi. Nlikanyiho Yesu aapanke awe na mulipa-oowaala, owo aahimmye wira atthu yaale yaarowa weemererya “masu Òmwene”, yaarowa oluttuweliwaka. Masi ohoolo waya, “weteteyexa waya n’itthu sa vathí ni wototha wa muhakhu” waarowa “ovuvurya masu” nto oluttuweliwa waya itthu somunepani wanvukuwa. (Matheyo 13:19-22; Marko 4:19) Naahikhalane ephoole, soovelaveliha sa okumi pooti ovuvurya muteko oninvarela ahu Yehova. Tivonto, Yesu aaloponle awe awiixutti awe oriki: “Mwipasope, wira mirima sanyu sihilemeliwe ni sonanara ni sohapala ni sovelaveliha s’ekumi”.​—Luka 21:34.

4. Exeeni ekhanle oonikhaliherya woona akhala wira omphenta wahu Kristu ti woolipa? (Nwehe elatarato yoopacerya.)

4 Ntoko Pedru, ninnooniherya omphenta Kristu nihelaka nipuro noopacerya muteko woolaleerya mookumini mwahu. Ninrowa osuwela sai wira nlelo ninniluttuweliwa muteko ola? Niikoheke so: ‘Exeeni eniphenta aka vanceene? Etthu enikisivela vanceene omurumeela Yehova aahiiso miteko sikina?’ Wira naakhule makoho ala, nrowe nithokorerye itthu tthaaru sikhanle oovukula omphenta wahu Kristu. Itthu iyo tiiya: muteko wa mulaponi, otthekula ni itthu sa werutthuni.

MPWEHE MUTEKO WA MULAPONI OPURO WOOREERELA

5. Muritti xeeni arina aya ahooleli a itthoko?

5 Pedru khaatotha ihopa mwaha woomusivela paahi. Masi muteko ole waanimukhaliherya olyiha emusi awe. Nave-tho, olelo-va Yehova ohaavaha ahooleli a itthoko muritti wookhapelela itthoko saya. (1 Timótheyo 5:8) Nto ahaana wiimananiha wira awerye opaka eyo. Masi, mahiku ala ookiserya muteko wa mulaponi pooti oxankiha vanceene.

6. Xeeni muteko wa mulaponi onixankiha aya?

6 Olelo-va, khareere atthu aniphavela muteko, masi khoniphwanyaneya. Mwaha wa yeeyo, khareere atthu aniimananiha wira aphwanye muteko. Anamunceene anneemererya ovikaniha ovara muteko nuumala okathi wa muteko, hata arowaka oliviwa musurukhu vakhaani. Olelo-va, mapatarau aniphavela ovareliwa muteko munceene ni anamuteko vakhaani. Tivonto, anamuteko awo annikhulumuwa, onyoonyiheya ni owereiwa. Anamunceene annixanka yoovaka woomoliwa muteko akhala wira khanipaka ele patarau aya onaavekela awe.

MaKristau annimpweha Yehova nipuro noopacerya, ohiya atthu akina

7, 8. (a) Ti pani onimuhela ahu nipuro noopacerya? (b) Muteko awe munna oTailândia omwiixuttinhe exeeni?

7 Ntoko maKristau, hiyo ninnimuhela Yehova nipuro noopacerya mookumini  mwahu, ohiya atthu akina aahiiso mapatarau ahu. (Luka 10:27) Muteko wa mulaponi onninikhaliherya ophwanya itthu sinnithowa ni ovara muteko ahu woolaleerya. Masi naahiivahe ephoole, muteko ahu pooti ovuvurya miteko sahu somunepani. Yookumanana ya munna a oTailândia, enniniixuttiha etthu yuulupale. Owo aahimmye wira: “Waanikisivela vanceene muteko aka a waalokiha akomputador, masi kaaniviriha okathi munceene kivaraka. Nto, nkaakhalana okathi wira kivareke miteko sa Muluku. Tivonto, wira kipwehe nipuro noopacerya Omwene, kaahaana ohiya muteko ole”. Exeeni munna ole aapanke awe?

8 Owo onitthokiherya oriki: “Waahivira mwaakha kuupuwelelaka mwaha ole. Nto kaahithanla omutumiha sorveti mustradani. Wanipacerya, kaahikhulumuwa mwaha woowi nakoso kheetta saana. Okathi kaakumana aka ni ale kaavarana aka muteko, yaanikinyohola ariki: exeeni ekiirinhe woona wira fataari omutumiha sorveti ohiya ovara muteko wowaalokiha akomputador opuro orina ar-condicionado? Kaahinvekela Yehova, wira okikhaliherye okhalana okathi wira kivareke miteko somunepani. Moohipisa, itthu saahipacerya oloka. Nuumala osuwela enamuna ya sorveti aasivela ale kaatumiherya aka, nto eyo yaahikiiriha ompaka sorveti oosivexa. Moohipisa, khula nihiku kaanimmaliha omutumiha. Tthiri, kookhalana musurukhu ovikana okathi kaalokiha aka akomputador. Nave kinnihakalala vanceene, mwaha woowi nkininyoonyiheya ni oxanka ntoko okathi kaalokiha aka akomputador. Etthu yootepa otthuneya, kinnoona wira kootepa omwaattamela Yehova”.​—Mmusome Matheyo 5:3, 6.

Kiireke kinisiveliwa vanceene ni muteko wa mulaponi ovikana wa Muluku?

9. Exeeni enrowa onikhaliherya ovikaniha okhalana moonelo wooloka voohimya sa muteko wa mulaponi?

9 Yehova onnixukhurela vaavo vaniimananiha ahu ovara muteko. Ovara muteko mooluttuweliwa, onniniphwanyiha mureerelo. (Miruku 12:14) Masi nihaana ovaha ephoole wira muteko ahu wa mulaponi ohikhale wootepa otthuneya ovikana muteko wa Yehova. Olavulaka sa itthu sinnithowa, Yesu aahimmye so: “Mpajeryeke ophavela Omwene wa Muluku ni wiwelela otthuna wawe. Vano sikina sothene Muluku onimophwanyihani ni wunjererya”. (Matheyo 6:33) Masi, exeeni enrowa onikhaliherya okhalana moonelo wooloka voohimya sa muteko wa mulaponi? Nihaana wiikoha so: ‘Kiireke kinivaha efaita muteko aka wa mulaponi nto kinanyoonyeriwa muteko wa Muluku?’ Wuupuwelela nikoho nna, onoonikhaliherya oweha ele eniphenta ahu vanceene.

10. Etthu xeeni yuulupale Yesu iixuttinha awe?

10 Yesu ooniixuttiha ele enitthuneya ahu opweha nipuro noopacerya. Okathi omosa, Yesu aahirowa omuxukurya Martha ni Maria. Moohipisa, Martha aahipacerya olokiherya yoolya wira onvahe Yesu, masi Maria aarookilaathi onanwiriyana Yesu. Nto Martha aahipacerya wunlaseya okhala wira Maria khaamukhaliherya. Yesu aahimuhimeerya Martha  wira: “Maria òthanla mpantte worerexa, ohinrowawe-tho wakhiwa”. (Luka 10:38-42) Yesu aahiixuttiha etthu yuulupale. Wira nisyake oxankiheya ni itthu sinnithowa ni wooniherya wira ninnimphenta Kristu, nihaana othanla “mpantte worerexa”. Eyo enitaphulela wira nihaana opweha nipuro noopacerya wataana wahu ni Yehova ohiya itthu sinnithowa.

MOONELO WOOLOKA VOOHIMYA SA OTTHEKULA

11. Biibiliya onihimya exeeni sa omumula ni ovira epheyo?

11 Okhala wira ninnaatteliwa miteko, okathi mukina nihaana omumula ni ovira epheyo. Biibiliya onihimya wira: “Etthu yorera emuhalenle mutthu, olya n’uwurya n’upuha ni sorera siphwanyalyawe”. (Musuweli 2:24) Yesu aanisuwela wira awiixutti awe yaahaana omumula. Mwa ntakiheryo, nuuvira okathi munceene alaleeryaka, Yesu aahaaleela wira: “Nyuwano murwé wiphini, nipuro nihinviraviriwa: mwamumule vakhani”.​—Marko 6:31, 32.

12. Xeeni vanitthuneya ahu ovaha ephoole okathi oniviriha ahu nitthekulaka? Nvahe ntakiheryo.

12 Otthekula onninikhaliherya ophumurya ni ovira epheyo. Masi nihaana okhalana ephoole wira wiihakalaliha ohitepe okhala wootepa otthuneya mookumini mwahu. Eseekulu yoopacerya, atthu anceene yaahikhalana moonelo ola: “Nilyeke, niwuryeke, okhala wira melo nnimokhwa!” (1 aKorinto 15:32) Olelo-va, atthu anceene arina muupuwelo mmosaru. Mwa ntakiheryo, mmiravo mmosa onikhala mpantta onikela nsuwa wEuropa, aahipacerya orowa omithukumanoni sa Anamoona a Yehova. Masi okhala wira aanisiveliwa vanceene otthekula, aahihiya orowela mithukumano iyo. Muhoolo mwaya, aahoona wira ophavela otthekula paahi waanimukumiherya mixankiho. Nto aahitthikela omusoma Biibiliya, nuuvira okathi aahipacerya olaleya ihapari sooreera. Nuumala obatiziwa, owo onihimya so: “Kinnithanana mwaha woowi kooviriha okathi munceene kihoonale wira omurumeela Yehova, tonikumiherya ohakalala wuulupale ovikana matthekulelo a olumwenku ola”.

13. (a) Nvahe ntakiheryo nnooniherya otthuneya waya ovaha ephoole okathi oniviriha ahu nitthekulaka. (b) Exeeni enrowa onikhaliherya okhalana moonelo wooloka voohimya sa otthekula?

13 Nave otthekula wahaana onikhaliherya ophumurya ni onivaha ikuru. Nto, ovireke okathi mikavi nitthekulaka? Wira naakhule nikoho nlo, nihaana wuupuwelela ela: Atthu anceene waasivela okhuura eboolu ni irapusatu. Masi ninnisuwela wira omakela okhuura itthu iyo, pooti onikumiherya iretta. Akhala wira nimphavela okhalana ekumi yooloka, nihaana olya yoolya enikhaliherya erutthu ahu. Moolikanasa, akhala wira ninniviriha okathi munceene nitthekulaka paahi, pooti ohonona wataana wahu ni Yehova. Exeeni enrowa onikhaliherya osuwela akhala wira nookhalana moonelo wooloka voohimya sa otthekula? Nihaana othanla esumana emosa ni olepa okathi onivira nivaraka miteko sa Yehova, ntoko orowa omithukumanoni, olaleerya ni omusoma Biibiliya. Nave, esumana emosaru nihaana olepa okathi onivira ninwehaka televisau, boola ni oweetta axooku. Nalikanyiha vale, mpantta xeeni okathi ohireere aya waatta? Niireke mpantta wa miteko sa  Muluku aahiiso sa werutthuni? Niireke yookhala enireerela ahu opaka?​—Mmusome aÉfeso 5:15, 16.

14. Exeeni enrowa onikhaliherya othanla matthekulelo ooloka?

14 Yehova oonivaha eparakha yoothanla matthekulelo ahu, nave ahooleli a itthoko ahaana othanla matthekulelo a itthoko saya. MBiibiliyani, Yehova oovaha malakiheryo anooniherya moonelo awe. Malakiheryo awo anninikhaliherya opaka soothanla sooloka. * (Nwehe enoota.) Matthekulelo ooloka ti “sovaha sa Muluku”. (Musuweli 3:12, 13) Ekeekhai wira khula mutthu ookhalana enamuna ya otthekula enimusivela. (aGalasia 6:4, 5) Masi, nihaana ovaha ephoole okathi onipaka ahu soothanla. Yesu aahimmye wira: “Tthiri, vavo vari muhakhu anyu, vavo-tho t’uri murim’anyu”. (Matheyo 6:21) Omphenta wahu Yesu, yoowo ori Mwene ahu, onniniiriha wuupuwelela, olavula ni ovara itthu sinooniherya wira Omwene tori wootepa otthuneya ovikana itthu sikina.​—aFilipi 1:9, 10.

OSYAKA WUNLELA MUHAKHU

15, 16. (a) Moota xeeni wunlela muhakhu ori aya muraakho? (b) Miruku xeeni Yesu aavanhe awe voohimya sa itthu sa werutthuni?

15 Anamunceene olelo-va, aniphavela okhalana ikuwo, aselulari, akomputador ni itthu sikina sa musurukhu munceene. Atthu awo waasivela itthu sa werutthuni, niire so, etthu yootepa otthuneya mookumini mwaya musurukhu ni mireerelo paahi ovikana itthu sikina. Ntoko muKristau, etthu xeeni munoona anyu okhala yootepa otthuneya?  Mwiikoheke so: ‘Kinniviriha okathi munceene kuupuwelaka ikaaro sikumiheriwe niinano ni ikuwo, ohiya olokiherya mithukumano sa mmulokoni? Kiireke kinniviriha okathi munceene kivaraka miteko saka, nto kihinakhalana okathi wa ovekela ni omusoma Biibiliya?’ Naahiivahe ephoole, ophenta itthu sa werutthuni pooti okhala etthu yootepa otthuneya ovikana omphenta wahu Kristu. Nto nihaana wuupuwelela masu a Yesu ani: “Mwipasope: muhikhalé atthu òwùnlela muhakhu”. (Luka 12:15) Exeeni yaamwiirinhe Yesu ohimya masu ala?

Khivaniweryaneya omurumeela Yehova ni murima wotheene, okathi omosaru nnaphavela itthu sa werutthuni

16 Yesu aahimmye wira: “Khavo onwerya warumela mamwene manli”. Nave aahincererya oriki: “Khamunwerya omurumela Muluku vamosá ni muhakhu”. Khivaniweryaneya omurumeela Yehova ni murima wotheene okathi omosaru nnaphavela itthu sa werutthuni. Yesu aahitthokiherya wira ‘nnomunyokha mmosá, nimphenteke mukina pahi’ aahiiso ‘nnomurumela mmosá, mukina nimuthanyeke’. (Matheyo 6:24) Okhala wira naalipa-oottheka, nihaana ovikaniha wiimananiha owanana “makhalelo ahu òtakhala”, yaawo anihela muhina wunlela muhakhu.​—aÉfeso 2:3.

17. (a) Exeeni eniwiiriha atthu akina waavila okhalana moonelo wooloka voohimya sa itthu sa werutthuni? (b) Exeeni enrowa onikhaliherya osyaka wunlela muhakhu?

17 Okhala wira anamunceene aniphavela paahi itthu sinaahakalaliha, nto vannaavila okhalana moonelo wooloka ni itthu sa werutthuni. (Mmusome 1 aKorinto 2:14.) Tivonto, vannaavila osuwela ele eri yooloka ni yoohiloka. (aHéberi 5:11-14) Ophavela itthu sa werutthuni pooti otepa wunnuwa vamurimani vaya. Nto vaavo anitepa aya ophwanya, anootepa ophavelasa. (Musuweli 5:10) Masi etthu xeeni enrowa onikhaliherya osyaka muupuwelo owo? Omusoma Biibiliya khula nihiku, onoonikhaliherya osyaka wunlela muhakhu. (1 Pedru 2:2) Okhala wira Yesu aahikhalana osuwela wa Yehova, eyo yaahimukhaliherya okhootta sooweha sa Diabo. (Matheyo 4:8-10) Olelo-va, akhala wira nimphavela osyaka wunlela muhakhu, nihaana ovarihela muteko miruku sa Yehova mookumini mwahu. Nto opaka eyo nnimooniherya wira ninnimphenta vanceene Yesu ovikana itthu sa werutthuni.

Etthu xeeni eri yootepa otthuneya mookumini mwanyu? (Nwehe ettima 18)

18. Exeeni elakenle anyu opaka?

18 Okathi Yesu aamukonhe awe Pedru wira: “Munnikiphenta” ovikana iya? Owo aaphavela omwiixuttiha Pedru wira aahaana opweha nipuro noopacerya omurumeela Yehova. Nwehe wira nsina na Pedru nintaphulela “Mwalá”. Tthiri, mikhalelo sooloka sa Pedru pooti olikanyihiwa ni mwala. (Miteko 4:5-20) Nave, olelo-va nimphavela wira omphenta wahu Kristu okhale woolipa. Tivonto, nihaana opweha opuro wooreerela muteko wa mulaponi, otthekula ni itthu sa werutthuni. Eyo enoonikhaliherya olavula ntoko Pedru, yoowo aahimmye wira: “Pwiya! Nyuwo mosuwela wira kinnophentani!”

^ etti. 14 Nwehe mwaha oni: A sua recreação é benéfica?erevista A Sentinela, 15 a Outubro, 2011 ipaaxina 9-12, ittima 6-15.