Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Junyo 2017

Nwehexexeke Mwaha Muulupale

Nwehexexeke Mwaha Muulupale

“Esuwele wira nyuwo pahi muri Apwiya [Yehova]: nyuwo Mulamuli Mulupale àtthu othene”.​—ESALIMO 83:19.

ISIPO: 46, 136

1, 2. (a) Mwaha xeeni onaavara apinaatamu otheene? (b) Xeeni mwaha owo ori aya wootthuneya wa hiyo?

MWAHA muulupale wa atthu anceene olelo-va, musurukhu. Owo mwaha anuupuwela aya ni anixankela aya vanceene. Yoolukama aya otepaka wuncererya ni osuka musurukhu arina aya. Masi etthu yootepa otthuneya wa atthu akina, ti emusi aya, ekumi aya aahiiso itthu aniphavela aya ophwanya.

2 Wookhala mwaha wootepa otthuneya onivikana myaha sotheene. Mwaha owo ti ovuwihiwa okhulupale wa Yehova. Tivonto vari aya vootepa otthuneya ohiliyala mwaha owo. Akhala wira khannivaha ephoole, ninrowa oluttuweliwaka paahi ni miteko sahu sa khula nihiku aahiiso oxanka mwaha wa itthu sinnikhumelela, nto nnaliyala mwaha owo wootthuneya. Akhala wira ninnikhaliherya okhulupale wa Yehova, nnoowerya owanana mixankiho sa khula nihiku ni otepa omwaattamela Yehova.

XEENI ORI AYA MWAHA WOOTTHUNEYA?

3. Satana ovaanyinhe sai olamulelo wa Yehova?

3 Satana Diabo, oovaanyiha ehakhi ya olamulela wa Yehova. Satana oniphavela wira apinaatamu yuupuweleke wira Yehova  Namalamulela ootakhala ni ohiniphavela mureerelo ahu. Nave Satana aahimmye wira apinaatamu yaamuhakalalaka vanceene akhala wira animwiilamulela. (Maphattuwelo 3:1-5) Nave-tho, Satana aahiwootherya apinaatamu ohimyaka wira akhala wira sinimwaakhumelela mixankiho, anoohiya ororomeleya wa Muluku ni anoomukhootta okhala Namalamulela aya. (Yobi 2:4, 5) Tivonto, Yehova oheemererya okathi munceene wira ooniherye wira apinaatamu khanikhumela saana Ahilamuleliwaka ni owo.

4. Xeeni vanitthuneya aya ophukiwa mwaha wa okhulupale?

4 Ekeekhai wira Yehova onnisuwela wira ovaanyiha wa Diabo, wootha paahi. Nto xeeni Muluku ohalaka onvaha Satana okathi munceene? Waakhuliwa waya onnaahela muhina atthu otheene ari wiirimu ni vathi-va. (Musome Esalimo 83:19.) Adamu ni Eva yaahikhootta olamuleliwa ni Yehova, nto atthu anceene anitthara ephiro emosa-ru. Eyo enniwiiriha atthu akina wuupuwelaka wira Diabo ookhalana exariya. Ohinatthi ophukiwa mwaha wa okhulupale wa Yehova, khivaniweryaneya okhala murettele ni wiiraana valaponi. Masi nuumala ophukiwa mwaha owo, atthu otheene anrowa weettelaka olamulelo wa xariya wa Yehova. Nto olumwenku wotheene onookhala murettele.​—aÉfeso 1:9, 10.

5. Mwaha ola wa okhulupale, onnihela sai muhina?

5 Olamulelo wa Satana ni apinaatamu onrowa omalihiwa, nto okhulupale wa Muluku onoovuwihiwa. Nave, orumeelaka Omwene wa oMesiya, olamulelo wa Muluku onookhumela saana. Nto okathi owo, atthu oororomeleya animooniherya wira vanniweryaneya apinaatamu okhaliherya moororomeleya olamulelo wa Muluku. (Yesaya 45:23, 24) Niireke ninniphavela okhala ntoko atthu awo oororomeleya? Moohaaniherya! Akhala wira ti siiso, nrowe noone otthuneya waya mwaha ola.

OVUWIHIWA YEHOVA TI WOOTTHUNEYA OVIKANA WOOPOWA WAHU

6. Xeeni ori aya wootthuneya ovuwihiwa okhulupale wa Yehova?

6 Ovuwihiwa okhulupale wa Yehova ti wootepa otthuneya ovikana ohakalala wahu. Eyo khentaphulela wira woopowa wahu khahiyo wootthuneya ni wira Yehova khonnoonela vatthu. Ninsuwela sai?

Ovuwihiwa okhulupale wa Yehova ti wootepa otthuneya ovikana ohakalala ni woopowa wahu

7, 8. Ovuwihiwa okhulupale wa Muluku, onnikhaliherya sai?

7 Yehova onnaaphenta vanceene apinaatamu. Ohooniherya eyo onivahaka Mwanawe wira niphwanye okumi woohimala. (Yohani 3:16; 1 Yohani 4:9) Vaakhanle wira Yehova khonaamaleliha anatiri awe, Satana ni anammwareya akina yaamukhalana exariya. Maana Satana onihimya wira Yehova nawoothe, namalamulela oohixariya ni onaakhoottiherya itthu sooloka apinaatamu. Anamavaanyiha awo anniveeha sooleiherya sa Yehova, ariki: “Vano-nto,  ori vayi? Axitith’ihu ahòkhwa, nto itthu sothene siri ntoko saryaya okhuma opattuxiwakaru olumwenku!” (2 Pedru 3:3, 4) Yehova onrowa waamaliherya anatiri awe. Nave ohooniherya wira ovuwihiwa wa okhulupale awe onrowa ohela muhina woopowa wa apinaatamu oowiiwelela. (Mmusome Yesaya 55:10, 11.) Okhulupale wa Yehova oneetta ni ophenta. Tivonto, nikupaliki wira okathi wotheene Yehova onimwaaphentaka ni waavaha efaita arumeyi awe oororomeleya.​—Okhuma 34:6.

8 Okhala wira okhulupale wa Yehova ti wootthuneya, eyo khentaphulela wira woopoliwa wahu khorina efaita wa yena. Maana Yehova onninikhapelela vanceene. Nto, nihaana osuwela etthu yootepa otthuneya ni okhaliherya moororomeleya olamulelo wa Yehova.

YOBI AAHITURUKA MOONELO AWE

9. Exeeni Satana aamoothenrye awe Yobi? (Nwehe elatarato yoopacerya.)

9 Ti vootthuneya okhalana moonelo wooloka voohimya sa okhulupale wa Yehova. Nave ninnoona eyo nisomaka eliivuru ya Yobi. Eliivuru ela, ninnisoma wira Satana aahimootherya Yobi wira samukhumelela mixankiho, aamuhiya omurumeela Muluku. Nave Satana aahinvekela Muluku wira omuhaaxe Yobi. Nto Yehova khaarowa opaka eyo, masi aahimweemererya Satana omweehererya Yobi, oriki: “Mihakhu sawe sothene weyo wiriheke sintthunawo”. (Mmusome Yobi 1:7-12.) Moohipisa, Yobi aahipweteiwa arumeyi awe ni mihakhu sawe. Moottharelana aahileeliwa wira anaawe muloko yaahikhwa. Nto Satana aahiiriha ihasara iye okhalaka ntoko saakumiheriwa ni Muluku. (Yobi 1:13-19) Muhoolo mwaya, Satana aahimukumiherya Yobi eretta yuulupale ni yowooniha othunku. (Yobi 2:7) Nave amwaarawe Yobi ni apatthani awe araru oowootha, yaahitepiha ohaawa wa Yobi amuleelaka itthu soowereya ni sookhulumula.​—Yobi 2:9; 3:11; 16:2.

10. (a) Yobi oonihenrye sai wira aahiroromeleya wa Muluku? (b) Xeeni Yobi aatthuneya awe okhaliheriwa?

10 Niireke ovaanyiha wa Satana waari wa xariya? Nnaari. Nnaamwi Yobi saamukhumelenle ihasara suulupale, owo khanveehale Yehova. (Yobi 27:5) Masi vakhaani-vakhaani, Yobi aahiliyala mwaha wootepa otthuneya, nto onapacerya wiisuupuwela paahi. Maana aamakela ohimya wira khaapanke etthu yoohiloka. Nave Yobi aaphavela osuwela nthowa naya aahaawa awe. (Yobi 7:20; 13:24) Nto pooti wuupuwelaka wira Yobi aahikhalana exariya. Masi Yehova aahisuwela wira Yobi aahikhalana moonelo woohiloka, tivonto aamukhalihenrye awe. Aamukhalihenrye sai?

11, 12. Yehova aamukhalihenrye sai Yobi? Nto Yobi oonenle sai?

11 Eliivuru ya Yobi ekapiitulu 38 mpakha 41, ninniphwanya moolumo Yehova aamulenle awe Yobi. Masi Yehova khaamulenle Yobi nthowa naya aahaawa awe. Ohiya-vo, Yehova aaphavela omukhaliherya Yobi woona wira aahitepa oyeva ailikanyiha ni Muluku. Owo aahimuleela Yobi wira saahikhala myaha sootepa otthuneya ovikana mixankiho sa Yobi. (Mmusome Yobi 38:18-21.) Moolumo a Yehova yaahimukhaliherya Yobi oturuka moonelo awe.

12 Nuumala Yobi ohaana vanceene, niireke waari woohixariya Yehova omukhaliherya mwa enamuna ele? Nnaari. Okhala  wira Yobi khuupuwela siiso. Nave Yobi aahiiwexexa etthu ene ni oxukhurela nikhaliheryo na Yehova. Owo aahimmye so: “Sothene sihimyalyaka: kottharuwa, kìyevihaka vantthupini ni vatturwani”. (Yobi 42:1-6) Wanipacerya, mmiravo iitthaniwa Elihu aahimukhaliherya Yobi oturuka muupuwelo awe. (Yobi 32:5-10) Nuumala Yobi owiriyana miruku sa Yehova, owo aahituruka moonelo awe. Nto Yehova aahaaleela akina wira aanisiveliwa ni Yobi mwaha wa ororomeleya wawe.​—Yobi 42:7, 8.

13. Miruku Yehova anvanhe awe Yobi, saamukhalihenrye sai?

13 Miruku Yehova anvanhe awe Yobi saahimukhaliherya hata nuuvira mixankiho sawe. Maana Biibiliya onihimya wira: “Apwiya yahireriha makhalelo masyá a Yobi vovikana mukhalelo wa khalai”. Ohoolo waya, Yobi “ahiyareliwa-tho an’awe axilopwana athanu nanli n’an’awe axithiyana araru”. (Yobi 42:12-14) Nnaamwi Yobi aaphenta anamwane aatthuveliwa awe, nlelo owo aaniwuupuwela ale yaakhwiiye. Waaniheryasa, khaaliyanle ihasara sotheene saamukhumelenle yena ni etthoko awe. Hata Yobi aasuwenle nthowa niirinhe weehereriwa, pooti wira aahixanka, uupuwelaka nthowa naya Muluku eemerenrye awe wira ohaaxiwe vanceenexa. Akhala wira Yobi uupuwela siiso, aahaana wuupuwela ele Yehova aamulenle awe. Maana eyo yammulipiha ni omukhaliherya okhalana moonelo wooloka.​—Esalimo 94:19.

Niireke ninniwehexexa okhulupale wa Yehova ohiya mixankiho sahu? (Nwehe ettima 14)

14. Exeeni eniixutta ahu ni itthu saamwiiranenle Yobi?

14 Wuupuwelela itthu saamwiiranenle Yobi, pooti onikhaliherya oturuka muupuwelo ahu ni onlipiha. Eliivuru ya Yobi eniirela mpantta soolempwa sa Yehova, seiyo “silepeliwe wira nixuttihiwe, wira niphwanyé ororomela, nilipihiwaka ni nthiti, nihakalalihiwaka ni Solempwa sa Muluku”. (aRoma 15:4) Nave ninniixutta wira nihaana osyaka otepa wuupuwelela paahi mixankiho sahu, nnaliyala wuupuwelela otthuneya  waya ovuwihiwa okhulupale wa Yehova. Ntoko Yobi, nihaana okhaliherya okhulupale wa Yehova, nivikanihaka ororomeleya wa Yehova hata nihaawaka.

15. Exeeni eniiraneya vaavo ninroromeleya ahu hata nihaawaka?

15 Itthu saamukhumelenle Yobi sinnooniherya wira okathi sinniphwanya aya mixankiho, khontaphulela wira Yehova oonanariwa ni hiyo. Maana mixankiho sinninivaha eparakha yookhaliherya okhulupale wa Yehova. (Miruku 27:11) Vaavo ninvilela ahu moororomeleya, ninnimusiveliha Yehova ni nlipelelo nahu voohimya sa muhoolo, ninnilipa. (Mmusome aRoma 5:3-5.) Itthu saamukhumelenle Yobi sinnooniherya wira “Muluku t’òkhupanyerya ni t’òsareya othunku”. (Yakobo 5:11) Akhala wira ninnikhaliherya okhulupale wa Yehova, owo onrowa onitthuvela. Osuwela eyo, enninikhaliherya “okhalana nthiti n’uvilela mohawani mothene”.​—aKolosi 1:11.

NVIKANIHE OWEHEXEXA

16. Xeeni vanireerela aya osuwela wira ovuwihiwa okhulupale wa Yehova ti wootepa otthuneya?

16 Ekeekhai wira khivanikhweya owehexexa ovuwihiwa okhulupale wa Yehova, okathi onihaawa ahu. Nave, mixankiho saamukhaani pooti okhala suulupale, akhala wira ninnuupuwelela vanceene. Tivonto, okathi wotheene nihaana wuupuwelela otthuneya waya okhaliherya okhulupale wa Yehova hata nihaawaka.

Oluttuweliwa miteko sa Yehova onoonikhaliherya wuupuwelela itthu sootepa otthuneya

17. Oluttuweliwa miteko sa Yehova, onnikhaliherya sai owehexexa itthu sootepa otthuneya?

17 Oluttuweliwa miteko sa Yehova onoonikhaliherya wuupuwelela itthu sootepa otthuneya. Mwa ntakiheryo, murokora oniitthaniwa Renee aahikhalana mixankiho sinceene, ntoko ophuleya mitika sinivira ephome mmuru, woona owereya ni kanser. Okathi aari awe oxipitaali, aahaalaleerya anamuteko, aretta akina ni ale yaarwa oxukurya. Ekwaha emosa vaavo Renee aari awe oxipitaali isumana piili nnimeya, owo  aahiviriha iwoora 80 olaleeryaka. Nnaamwi Renee aasuwela wira aarowa okhwa, khaliyanle itthu sootepa otthuneya. Okhaliherya okhulupale wa Yehova waahimwiiriha okhalana murettele.

18. Yowiiraneya ya Jennifer, enniixuttiha exeeni sa okhaliherya okhulupale wa Yehova?

18 Nave, nnoowerya okhaliherya okhulupale wa Yehova okathi ninwanana ahu mixankiho sa khula nihiku hata siri ene saamukhaani. Murokora Jennifer, aahiviriha mahiku mararu ori ene wareporto ophavelaka orowa owannyawe. Okhala wira iviyau iye khiseetta mahiku ale, Jennifer aahixanka ni ovela-vela. Nave aahipacerya wiikhupanyerya. Jennifer, aahinvekela Yehova wira omukhaliherye waalaleerya ihapari sooreera atthu yaawehererya weetta mukwaha, yaawo yaari mapuro ale. Nto aahiwerya waalaleerya ni waakawela iliivuru atthu anceene. Jennifer onihimya wira: “Kinnoona wira Yehova onnikivaha mareeliho hata akiphwanyaka maxakha ni onnikivaha ikuru wira kilaleleye nsina nawe mpakha vaniwerya aka”.

19. Exeeni enaasuwanyeiha anamakokhorela eekeekhai?

19 Atthu a Yehova paahi, tanisuwela wira okhulupale wa Yehova ti wootthuneya. Eyo ti etthu enaasuwanyeiha anamakokhorela eekeekhai. Tivonto, khula mutthu ohaana omananiha wira okhaliherye okhulupale wa Yehova.

20. Yehova onoonela sai itthu sotheene munipaka anyu wira mukhaliherye okhulupale awe?

20 Vaavo munivikaniha anyu ovilela ni omurumeela Yehova moororomeleya, munnikhaliherya okhulupale awe, nto owo onnoona ni onnivaha efaita wiimananiha wanyu. (Esalimo 18:26) Mwaha onittharelana, onrowa wooniherya mathowa makina anooniherya otthuneya waya okhaliherya okhulupale wa Yehova ni moota woopaka eyo moomalela.