Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Junyo 2017

Nvaheke Efaita Mihakhu Somunepani

Nvaheke Efaita Mihakhu Somunepani

“Vavo vari muhakhu anyu, vavo-tho t’unkhalaya murim’anyu”.​—LUKA 12:34.

ISIPO: 153, 9

1, 2. (a) Mihakhu xeeni sinikhuma wa Yehova? (b) Ninrowa othokorerya exeeni mwaha ola?

YEHOVA tori Mwaneene itthu sotheene, maana topattunxe. (1 Wahala 29:11, 12) Hata vari siiso, Yehova mulipa-oovaha muulupale waavikana atthu otheene. Tthiri ninnixukhurela vanceene mwaha woonivaha mihakhu sinceene somunepani! Mihakhu iyo sinihela muhina (1) Omwene wa Muluku, (2) muteko ahu woolaleerya ni (3) ikeekhai siri mBiibiliyani. Masi naahikhalane ephoole, vakhaani-vakhaani pooti ohiya ovaha efaita mihakhu iya. Nto, wira nihiliyale efaita erina aya mihakhu iyo, nihaana wuupuwelela ni wuncererya ophenta wahu, maana Yesu aahimmye wira: “Vavo vari muhakhu anyu, vavo-tho t’unkhalaya murim’anyu”.​—Luka 12:34.

2 Ninrowa ovikaniha sai ovaha efaita mihakhu somunepani? Wira naakhule nikoho nna, nrowe nithokorerye iponto iya tthaaru, eyo piiyo, olaleerya, Omwene ni ekeekhai. Opaka eyo, enoonikhaliherya woona akhala wira ninnivikaniha oxukhurela ni ophenta mihakhu iyo somunepani.

 OMWENE WA MULUKU ONLIKANA NI MALUKU OOWAARYA

3. Mulopwana a nlikanyiho na Yesu, aapanke exeeni nuumala oweha nluku noowaarya? (Nwehe elatarato yoopacerya.)

3 Mmusome Matheyo 13:45, 46. Yesu aahilavula nlikanyiho na mulopwana aamweetta nakoso a maluku oowaarya. Nihiku nimosa, mulopwana ole aahiphwanya nluku noowaarya na musurukhu munceene naavikana maluku makina aatonko awe woona. Owo aahisiveliwa vanceene ni nluku nne mpakha otumiha itthu sotheene aarina awe wira othume. Niireke munniwerya woona moota aavaha awe efaita?

Akhala wira ninnisiveliwa vanceene Omwene ntoko mulopwana ole aavaha awe efaita nluku nle, nnoopaka khula etthu wira nikhale atthu a Omwene owo

4. Osiveliwa Omwene, onniiriha opaka exeeni?

4 Ekeekhai ya Omwene wa Muluku enlikana ni nluku nne noowaarya. Nto, nlikanyiho na Yesu ninniixuttiha exeeni? Nniixuttiha ahu tiila: akhala wira ninnisiveliwa vanceene Omwene ntoko mulopwana ole aavaha awe efaita nluku nne, nnoopaka khula etthu eniwerya ahu wira nikhale atthu a Omwene owo. (Mmusome Marko 10:28-30.) Nrowe noone moota atthu anli yaapanke aya eyo.

5. Mwaha wa Omwene, exeeni Zakeyo aalakenle awe opaka?

5 Zakeyo aari mulipa-ooliviha mpoosito. Nto aahithaaciri mwaha woowiiyerya musurukhu atthu. (Luka 19:1-9) Nihiku nimosa, Zakeyo aahimwiiwa Yesu olavulaka voohimya sa Omwene. Ele iiwale awe yaahimusivela vanceene mpakha ophavela orukunuxa murima awe. Owo aahimmye so: “Mwixuttihi, kinokawanya muhakhu aka eriyari: mpantte mukina kavahe alipa-òhawa. Kamwiyenrye mutthu, kinomutthikiherya kivikanihaka vaxexé”. Zakeyo aahaattikiherya musurukhu aya atthu aawiiyenrya awe ni aahihiya okhala nanrima.

6. Muthiyana mmosa opanke marukunuxo xeeni, nto exeeni emwiirinhe opaka eyo?

6 Nuumala muthiyana mmosa wiiwa voohimya sa Omwene iyaakha vakhaani sivinre, iira orupihanaka athiyanaru. Nave aari mukhulupale a mutthenkeso waakiherya ehakhi ya alopwana aahiiso athiyana anrupihana yaaworu. Vaavo aamusoma awe Biibiliya aahiixutta efaita ya Omwene wa Muluku, nave aahoona wira aahaana opaka marukunuxo maalupale mookumini mwawe. (1 aKorinto 6:9, 10) Mwaha womphenta Yehova, aahihiya orupihana athiyanaru ni okhala mukhulupale a mutthenkeso ole. Owo obatiziwe 2009, nto 2010 khukhala pioneera ookilaatheya. Okhala wira onnimphenta Yehova ovikana soophavela iye soohiloka, eyo yoomwiiriha opaka marukunuxo awo maalupale.​—Marko 12:29, 30.

7. Ninrowa ovikaniha sai olipiha ophenta wahu Omwene wa Muluku?

7 Wira nikhale atthu a Omwene wa Muluku, anamunceene a hiyo aapaka marukunuxo maalupale. (aRoma 12:2) Masi ekhotto ahu khemanle. Tivonto, niheemererye itthu ntoko ophenta mireerelo sa werutthuni aahiiso khula  etthu enivarihana ni orupihana woohiloka evukulaka ophenta wahu Omwene. (Miruku 4:23; Matheyo 5:27-29) Yehova oonivaha etthu ekina ennikhaliherya ovikaniha olipiha ophenta wahu Omwene wa Muluku.

OLALEERYA ONNOOPOLA

8. (a) Murummwa Paulo olikanyinhe sai olaleerya ni ‘muhakhu’ osukiwe mwaapu wooloko? (b) Paulo oonihenrye sai wira aanisiveliwa muteko woolaleerya?

8 Yesu oonivaha muteko woowalaleerya ni owiixuttiha atthu ihapari sooreera sa Omwene wa Muluku. (Matheyo 28:19, 20) Murummwa Paulo aahilikanyiha muteko woolaleerya ni muhakhu oheliwe mmwaapuni mwa oloko. (2 aKorinto 4:7; 1 Timótheyo 1:12) Okhala wira na atthu oohimalela, ninlikana ni myaapu iyo sa oloko. Masi muhupi onilaleya ahu onlikana ni muhakhu, maana onnaaphwanyiha okumi woohimala ale anniwiriyana. Ti maana aya Paulo ohimmye awe so: “Miyo kinnìra itthu iya sothene mwaha w’ehapari yorera, wira kiphwanele okaweliwa sorera saya”. (1 aKorinto 9:23) Paulo aahiimananiha owiixuttiha atthu Omwene wa Muluku. (Mmusome aRoma 1:14, 15; 2 Timótheyo 4:2.) Okhala wira aanisiveliwa ihapari sooreera, eyo yaahimukhaliherya olaleya hata aalupatthiwa vanceene. (1 aTesalonika 2:2) Ninrowa wooniherya sai wira ninnisiveliwa muteko woolaleerya ntoko Paulo?

Muhupi onilaleya ahu onlikana ni muhakhu, maana onnaaphwanyiha okumi woohimala ale anniwiriyana

9. Inamuna xeeni nikhanle ahu oowooniherya wira ninnisiveliwa olaleerya?

9 Enamuna emosa Paulo oonihenrya awe wira aanisiveliwa muteko woolaleerya, okhala wira aanalaleerya atthu khula opuro aaphwanya awe. Nimutakihaka Paulo ni maKristau a eseekulu yoopacerya, nave hiyo ninnaalaleerya atthu ihapari sooreera empa ni empa, mapuro oowaatta atthu, aahiiso khula opuro nnaaphwanya ahu. (Miteko 5:42; 20:20) Nave ninnirumeela inamuna soovirikana wira naalaleerye atthu. Akhala wira ninniwerya, pooti orumeela ntoko pioneero ookhaliherya aahiiso ookilaatheya. Nave-tho, pooti wiixutta nttaava nikina, othaamela muttetthe aahiiso elapo ekina wira nakhaliherye.​—Miteko 16:9, 10.

10. Mireerelo xeeni Irene ophwannye awe mwaha wa wiimananiha olaleya ihapari sooreera?

10 Irene, murokora oohitheliwa a wEstados Unidos, aaphavela waalaleerya ihapari sooreera atthu a nttaava na oRússia. Tivonto, mwaakha wa 1993, owo aahikela egrupu ya atthu yaalavula nttaava nne, Epooma ya oNova York. Okathi ole, egrupu ele yaarina anamalaleerya 20 paahi. Nuuvira iyaakha 20, Irene onihimya so: “Nlelo nkinilavula saana nttaava nne”. Hata vari siiso, Yehova aahimukhaliherya yena, anna ni arokora akina wira yaalaleerye atthu anilavula nttaava nne. Nto olelo-va, sookhala miloko 6 sa nttaava na oRússia Epooma ya oNova York. Irene ohaasomiha Biibiliya atthu anceene, nto 15 a yaawo aabatiziwa. Akina axitokweene, mapioneero ni akina anrumeela oBetheli. Irene onihimya wira: “Vaavo kinuupuwelela aka soolukama sikina kaaphavela aka,  kinnoona wira khiivo yoolukama yaarowa okiphwanyiha ohakalala wekeekhai”. Tthiri, Irene onnivaha efaita muteko awe woolaleerya!

Niireke munnivaha efaita muteko anyu woolaleerya? (Nwehe ittima 11, 12)

11. Exeeni enikhumelela akhala wira ninnivikaniha olaleerya hata nilupatthiwaka?

11 Akhala wira ninnivaha efaita muteko ahu woolaleerya, nnoomutakihaka murummwa Paulo ni nnoovikanihaka olaleerya hata nilupatthiwaka. (Miteko 14:19-22) Mwa ntakiheryo, iyaakha sa 1930 ni 1944, annihu yaahilupatthiwa vanceene elapo ya wEstados Unidos. Hata yaalupatthiwa, awo yaahivikaniha olaleerya. Vaavo makhulupale aneettiha elapo yeerenrye aya waakhoottiherya olaleerya, annihu yaahiroiha otribunaali myaha iye nto yaahikanyari irasau sinceene. Mwaakha wa 1943, Munna Knorr aahilavula mwaha mmosa annihu yaakanyanri aya otribunaali ya Supremo Corte, wEstados Unidos. Nave aahimmye wira, etthu yiirinhe oroiha myaha iye Etribunaali ele, okhala wira annihu yaanivikaniha olaleerya hata yaakhoottihiwa. Nave aahimmye wira, okhala wira anna yaahivikaniha olaleerya olumwenku wotheene, eyo enooniherya wira olupatthiwa iwe khiwaakhumenle saana. Nave annihu a ilapo sikina yaahikanyari myaha simosaru. Akhala wira ninnisiveliwa muteko woolaleerya, khannihiya olaleerya mwaha woolupatthiwa.

12. Exeeni elakenle anyu opaka?

12 Akhala wira ninnivaha efaita muteko ahu woolaleerya, khaninrowa ophavela paahi ovara iwoora sinceene. Masi ninrowa opakaka khula etthu eniwerya ahu wira nimalelihe “olaleya ehapari yorera”. (Miteko 20:24; 2 Timótheyo 4:5) Nto nihaana owiixuttiha atthu muhakhu mukina wa Muluku. Vano nrowe nthokorerye muhakhu owo.

IKEEKHAI NIIXUNTTA AHU

13, 14. ‘Mihakhu’ xeeni Yesu olavunle awe Matheyo 13:52, nto ninrowa wuncererya sai?

13 Ikeekhai sotheene niixuntte ahu, muhakhu mukina wa neeraru nivahiwa ahu ni Yehova. Nto Yehova tori Mwaneene ekeekhai. (2 Samuweli 7:28; Esalimo 31:6) Okhala wira Yehova Tiithi oovaha, owo oonivaha ikeekhai  iyo. Vaavo vanimusoma ahu Biibiliya ni soolaleiwa sa mutthenkeso ahu, orowa okongresuni, wasembeleyani ni mithukumano sa khula esumana, ninniixutta ikeekhai sinceene. Akhala wira nnoovikaniha wiixutta ikeekhai iyo, ninrowa otepaka wuncererya ‘mihakhu’ aahiiso ikeekhai “sa nanano ni sa khalai”. (Mmusome Matheyo 13:52.) Yehova onoonikhaliherya wuncererya ‘muhakhu’ ahu, akhala wira nnoophavelasa ikeekhai ntoko mihakhu sivithiwe. (Musome Miruku 2:4-7.) Ninrowa owerya sai opaka eyo?

14 Omusoma Biibiliya, otokosa ni osoma soolaleiwa sa mutthenkeso ahu, onoonikhaliherya ophwanya ikeekhai sa “nanano” seiyo nihaasuwela ahu. (Yoxuwa 1:8, 9; Esalimo 1:2, 3) Erevista yoopacerya Watch Tower, yeeyo yaakumiheriwe Julyo a 1879, yaahilikanyiha ikeekhai ni ifilori siri vamiiwani. Wira mutthu ophwanye ifilori iyo, ohaana ovaha ephoole orowaka opuro siri aya. Nuumala ophwanya efilori emosa, onnivikaniha ophavela sikina. Maana onnisuwela wira opaka eyo enoomukhaliherya ophwanya ifilori sikina. Moolikanasa, nihaana ovikaniha ophavela osuwela ikeekhai sikina. Wira niwerye opaka eyo, nihaana okhalela nthiti ophavelasa ikeekhai iyo.

15. Ikeekhai xeeni siniihaniwa okhala sa “khalai”, sinivaha ahu efaita yuulupale?

15 Okathi nimpacerya ahu omusoma Biibiliya, ninniixutta ikeekhai soohakalaliha. Okhala wira ikeekhai iyo ti etthu nipacenrye ahu osuwela, nto siniihaniwa okhala sa “khalai”. Ikeekhai xeeni sinihimmwa? Yoopacerya, nihiixutta wira Yehova tori Mpattuxa ahu ni wira ookhalana yoolakela wa apinaatamu. Ohiya-vo, nihiixutta wira Muluku oomuruma Mwanawe valaponi wira okhwe ntoko mukuttho wira onoopole etampi ni okhwa. Nave, nihiixutta wira Omwene wa Muluku onrowa omaliha ohaawa ni wira ninrowa okhalaka mahiku otheene valaponi-va moohakalala ni murettele.​—Yohani 3:16; Wisupulula 4:11; 21:3, 4.

16. Exeeni enireerela ahu opaka akhala wira wiiwexexa wahu ikeekhai sa Biibiliya onnilokiheriwa?

16 Okathi mukina, pooti olokiheriwa moota nniiwexexa ahu soolepa aahiiso iprofesia sa Biibiliya. Akhala wira eyo enimwiiraneya, ti vooloka ophavelasa woona ele elokiheriwe ni wuupuwelela oratteene mwaha owo. (Miteko 17:11; 1 Timótheyo 4:15) Nto yoophavela ahu khahiyo osuwela ovirikana okhanle eriyari ya ele naasuwela ahu khalai ni enisuwela ahu vano, masi nihaana ovaha ephoole wira noone itthu sikina sivukuliwe aahiiso sincereriwe sa wiiwexexa wa niinaano. Akhala wira nnoophavelasa oratteene, eyo enoonikhaliherya ophwanya ikeekhai isya sa mBiibiliyani. Xeeni vari aya vootthuneya wiimananiha?

17, 18. Moota xeeni munepa wootteela onnikhaliherya aya?

17 Yesu aahimmye wira munepa wa Muluku onoonikhaliherya wuupuwelela itthu siixuntte ahu khalai. (Yohani 14:25, 26) Moota xeeni eyo ennikhaliherya aya okathi ninlaleya ahu ihapari sooreera? Nkahaya moone ele yiiraneyale ni munna oniihaniwa Peter. Mwaakha wa 1970, owo aarina iyaakha 19 nto mahiku ala onirumeela eBetheli ya wInglaterra. Olaleeryaka empa ni empa, Peter aahimphwanya mulopwana a iyaakha 50 ahaamettha ereru. Aahimukoha akhala wira aaniphavela omwiiwexexa Biibiliya. Mulopwana ole aari mukhulupale iixuttiha ikano sa aYuda. Nto aahinyoonyiheya mwaha wonweha mmiravo ophavelaka omwiixuttiha Biibiliya. Nto mulopwana ole aahimweehererya Peter omukohaka  wira: “Nyuwo mmiravo, eliivuru ya Daniyeli yaalempwale ni nttaava xeeni?” Peter aahimwaakhula oriki: “Mpantta mukina waalempwale ni Aramaiko”. Peter onihimya wira: “Nnaamwi mulopwana ole aatikinihiwe moota kaakhunle aka, miyo kaatempe otikinihiwa! Maana nkaasuwela oratteene. Nto nuumala otthikela owaani, kaahitokosa mwaha ole kirumeelaka irevista Owehaweha ni Nvenye!, sa myeeri vakhaani sivinre nto kaahiphwanya mwaha waatthokiherya wira eliivuru ya Daniyeli yaalempwe ni nttaava na Aramaiko”. (Daniyeli 2:4) Mwekeekhai, munepa wootteela onoowerya onikhaliherya wuupuwelela itthu niixuntte ahu.​—Luka 12:11, 12; 21:13-15.

18 Akhala wira ninnivaha efaita ni oxukhurela ekeekhai niixuntte ahu voohimya sa Yehova, ninrowa ovikanihaka wuncererya muhakhu ahu. Vaavo ninvikaniha ahu opaka eyo, enoonikhaliherya owiixuttiha atthu akina.

MUKHAPELELE MIHAKHU SANYU

19. Xeeni nintthuneya ahu okhapelela mihakhu sahu somunepani?

19 Mwaha ola, nihiixutta otthuneya waya ovaha efaita mihakhu sahu somunepani. Masi, nihaana wiivaha ephoole wira nihimweemererye Satana ni olumwenku awe otteettheihaka ophenta wahu ikeekhai iyo. Akhala wira khannivaha ephoole, hiyo pooti ohapuxiwa ni itthu iya: muteko ninleiheriwa ahu oliviwa musurukhu munceene, oloha nrina ene okumi wa vasulu-sulu aahiiso ophavela wooniherya mihakhu sahu. Murummwa Yohani oonilopola wira moohipisa olumwenku ola ni itthu sotheene onivaha aya sinoomala. (1 Yohani 2:15-17) Tivonto, nihaana ovikaniha oxukhurela mihakhu sahu somunepani ni okhapelela.

20. Exeeni mulakenle anyu opaka wira mukhapelele mihakhu sanyu somunepani?

20 Muhimweemererye mutthu aahiiso etthu ekina evukulaka osiveliwa wanyu Omwene wa Muluku. Nto nvikaniheke olaleerya mooluttuweliwa ni muhihiye ovukuwaka osiveliwa wanyu muteko woolaleerya. Tivonto, nvikanihe otokosa ikeekhai sa mBiibiliyani. Mwapaka eyo, enimookhaliheryani ‘withukumanyerya wirimu muhakhu ohinihononeya, weiwo nawiye ohiniphiyawe-wo nnákhala owexe ohinlyaya. Vekekhai, vavo vari muhakhu anyu, vavo-tho t’unkhalaya murim’anyu’.​—Luka 12:33, 34.