Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Julyo 2017

Makoho Anikohiwa ni Ale Anisoma Irevista Sahu

Makoho Anikohiwa ni Ale Anisoma Irevista Sahu

Niireke muKristau ohaana okhalana kapwitthi aahiiso pistola wira iixaakihaneke?

MaKristau annitthara malakiheryo a Biibiliya vaavo anithanla aya enamuna anrowa aya wiixaakiha. Malakiheryo awo annooniherya wira ti voohiloka maKristau orumeela ikaruma sa ekhotto, ntoko, ikapwitthi, apistola ni ikaruma sikina siniiva wira yiixaakihe. Nrowe nuupuwelele iponto sinittharelana:

Yehova onnithokorerya okumi wa pinaatamu okhala woowaarya. Nasaalimo Davidi aahimmye wira: Yehova ti “maphattuwelo èkumi”. (Esalimo 36:10) Tivonto, akhala wira muKristau onnithanla wiixaakiha aahiiso waakiherya mireerelo sawe, ohaana osyaka omwiiva mutthu wira ohikhalane nthowa na ephome.​—Otumererya 22:8; Esalimo 51:16.

Ekeekhai wira khula ekaruma mutthu onirumeela awe wira iixaakihe pooti omwiiriha okhalana nthowa na ephome. Masi, ikapwitthi waakuva omwiiva mutthu, hata mutthu owo olakenle ene aahiiso nnaari. * (Nwehe enoota.) Tthiri, vaavo namatuphela onimoona awe kapwitthi pooti otepa onanariwa, ni itthu pooti otepa mpakha mmosa a atthu awo omwiiva mukhwaawe.

Ohiyu Yesu aarowa awe wiiviwa, ahaalela atthareli awe wira akuxe ikatana saya, masi eyo khiyaataphulela wira yaarowa wiixaakihanaka. (Luka 22:36, 38) Masi Yesu khaaphavela owiixuttiha wira yaahaana orumeela ikatana wira yiixaakihe, hata okathi yoole muttitthi waarwiiye aya ni ikopo ni ikatana wira onvare Yesu. (Luka 22:52) Nuumala Pedru ophwata niyaru na murumeyi a mukhulupale aanamukuttho, Yesu aahimuleela wira: “Mwixathi ekatan’anyu mwaryaya”. Nuumala-vo Yesu aahihimya malakiheryo anitthariwa ni maKristau olelo-va: “Othene ale anrumela ekatana, anokhwa ekatana yeyo”.​—Matheyo 26:51, 52.

Ntoko Mikeya 4:3 aahimmye awe vahinatthi, atthu a Muluku “anokuxa iyuma saya s’ekhotto, ehané ihipa: anorukunuxa mavak’aya, ehané ihekó”. MaKristau eekeekhai annisuwela wira ahaana okhala atthu a murettele. Awo annitthara yooruma Muluku aamuupuxenrye awe murummwa Paulo olepa wira: “muhilivé yotakhala enìreliwanyu ni yotakhala ekina”, nto mwiimananiheke “wira sorera oholo w’atthu othene”. (aRoma 12:17, 18) Hata okathi Paulo aakumana awe mixankiho, ohela muhina “sowopiha . . . s’alavilavi”, owo khaavonyola malamulo a Muluku ophavelaka wiixaakiha. (2 aKorinto 11:26) Ohiya-vo, Paulo aamuroromela Muluku ni aanisuwela wira miruku sa mBiibiliyani ti ‘s’òttittimiheya ovika iyuma s’ekhotto’.​—Musuweli 9:18.

MaKristau annivaha efaita okumi ovikana itthu sa werutthuni. Ninnisuwela wira ekumi ya mutthu “khinlipana ni watta wa mihakahu sirinawe”. (Luka 12:15) Akhala wira olavula moopatthaneya ni natarau orina kapwitthi khonikhaliherya, hiyo ninnitthara malakiheryo a Yesu ani: “Muhiwunlelé ikuhu ale aniwirelani sotakhala”. Eyo pooti otaphulela omuhiyerya etthu okunxe awe. (Matheyo 5:39, 40; Luka 6:29) * (Nwehe enoota.) Osyaka wooniherya “mihakhu sirinahu” onoonikhaliherya ohimakelaka orweeliwa ni anatarau. (1 Yohani 2:16) Nave akhala wira ale naattamanne ahu aasuwela wira onninsivela murettele mwaha wookhala Anamoona a Yehova, eyo enoonikhapelela vanceene.​—Miruku 18:10.

MaKristau annittittimiha yowuupuxerya ya murima ya atthu akina. (aRoma 14:21) Anna ni arokora akina anooxanka aahiiso okhumuwa, akhala wira anoosuwela wira munna ookhalana kapwitthi oniixaakihana awe. Okhala wira ninnaaphenta anna ni arokora, nto hata nrine ene ehakhi ya okhalana kapwitthi, khaninrowa opaka etthu ninsuwela ahu wira enimwaakhumuliha.​—1 aKorinto 10:32, 33; 13:4, 5.

MaKristau ahaana waavaha atthu akina ntakiheryo nooloka. (2 aKorinto 4:2; 1 Pedru 5:2, 3) Akhala wira muKristau ookhalana kapwitthi wira iixaakihaneke, axitokweene ahaana omukhaliherya amurumeelaka Biibiliya. Nto athanla ovikanina okhalana kapwitthi awe, owo khonrowa ovaha ntakiheryo nooloka. Nave mutthu owo khoniphwanelela ovahiwa miritti mmulokoni. Malakiheryo ala, anivareleya muteko wa maKristau yaale animurumeela kapwitthi omutekoni waya. Nto vanooloka munna owo ophavelasa muteko mukina. *—Nwehe enoota.

MuKristau ohaana othanla moota onrowa awe wiixaakiha, waakiherya etthoko awe, mireerelo sawe ni muteko awe. Masi vaavo onipaka awe soothanla iyo, owo ohaana otthara malakiheryo a mBiibiliyani. Tthiri Muluku ahu a ankhili onninivaha malakiheryo awo mwaha woowi onniniphenta. Ti nthowa naya maKristau arina wataana woolipa ni Yehova anithanla aya ohimurumeela kapwitthi vaavo aniixaakiha aya. Awo annisuwela wira yamuroromela Muluku ni otthara malakiheryo awe ari mBiibiliyani animwaakiheriwa mahiku otheene.—Esalimo 97:10; Miruku 1:33; 2:6, 7.

Okathi wa maxakha maalupale maKristau anrowa omuroromela Yehova, ohiya weererya wiixaakiha mmensaya

^ etti. 3 MuKristau pooti othanla okhalana kapwitthi aahiiso pistola wira aaxayeke axinama aahiiso wiikhapelela mwaha wa inama soowali. Nto akhala wira khonimurumeela, ohaana okumiha ipaala sa kapwitthi owo ni ohaana ompweha opuro ohinooneya awe. Ilapo seiye guvernu onikhoottiha awe mutthu okhalana kapwitthi, maKristau anniiwelela nlamulo nno.​—aRoma 13:1.

^ etti. 6 Wira mwiixutte moota woosyaka otupheliwa, nwehe mwaha oni Como evitar o estupro”, erevista Despertai! 8 a Março 1993.

^ etti. 2 Wira mphwanye malakiheryo a muteko mutthu onimurumeela awe kapwitthi, nwehe erevista A Sentinela 1 a Novembro 2005 ni 15 a Janero 1984 ipaaxina 25-26.