Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Julyo 2017

Munleke Vamosa Naale Aninla

Munleke Vamosa Naale Aninla

“Mulipihaneke murima, mukhaliheryaneke”.​—1 ATESALONIKA 5:11.

ISIPO: 53, 28

1, 2. Xeeni nintthuneya ahu othokorerya moota wowaamaaliha ale akhweliwe? (Nwehe elatarato yoopacerya.)

SUSI onihimya wira: “Woovira okathi munceene noonaka owereya wuulupale mwaha wookhwa mwanihu mwaamulopwana”. Nuumala munna mmosa okhweliwa mwaarawe mootutuxerya, owo aahimmye so: “kaahixanka vanceenexa”. Mooriipiha murima, atthu anceene onnaaphwanya muxankiho owo. Mmulokoni mwa eKristau olelo-va, anna ni arokora anceene khiyaawehererya wira ole othelanne aya aamookhwa ohinatthi ophiya Armagedoni. Waaniheryasa mookhweliwa ole onimphenta anyu aahiiso munnimusuwela mutthu mukina okhweliwe. Akhala wira ti siiso, pooti wiikohaka so: ‘Ninrowa waamaaliha sai ale akhweliwe?’

2 Atthu akina anihimya wira okathi onnivoliha makhwatta. Masi niireke okathi wotheene ti siiso? Naamukhweli mmosa, onihimya wira: “Miyo kinoona wira ele mutthu onipaka awe okathi owo tenimukhaliherya ovoliha makhwatta”. Tthiri, wira nikhwatta nivole onnivira okathi ni nihaana okhapeleliwa saana. Moolikanasa, wira ole okhweliwe ovukule owereya onimphwanya, onitthuneya ovira okathi ni okhapeleliwa saana. Nto, exeeni enrowa waakhaliherya tthiri ale akhweliwe wira avukule oxanka?

YEHOVA TI “MULUKU ONNIHAKALALIHA INAMUNA SOTHENE”

3, 4. Exeeni ennikupaliha wira Yehova onnisuwela owereya onniphwanya nakhweliwa?

3 Yehova Tiithi ihu yoowo onnoonela othunku, tonnivaha nimaaliho neekeekhai. (Mmusome 2 aKorinto 1:3, 4.) Owo tori ntakiheryo nuulupale na wooniherya othunku, nave onnaaleiherya atthu awe wira: “Ti miyo kinohakalalihani”.​—Yesaya 51:12; Esalimo 119:50, 52, 76.

Mwekeekhai Yehova onniphavela waahihimuxa arumeyi awe oororomeleya

4 Nave Tiithi ihu oophenta, ootoko okhweliwa ni arumeyi awe ntoko Abrahamu, Isakhi, Yakobe, Moise ni Mwene Davidi. (Mothakoni 12:6-8; Matheyo 22:31, 32; Miteko 13:22) Tthiri Biibiliya onnooniherya wira Yehova onniphavela waahihimuxa arumeyi awo oororomeleya. (Yobi 14:14, 15) Nave-tho, arumeyi awo anrowa okhalana okumi wooloka ni woomalela. Yehova ootoko okhweliwa Mwanawe oopacerya. Biibiliya onihimya wira Yesu taari “muraji” opattuxiwa ni Muluku. (Miruku 8:22, 30) Tthiri nkahaya nuupuwele moota Yehova oonale awe owereya vaavo anweha awe Mwanawe okhwaaka wowooniha othunku.​—Yohani 5:20; 10:17.

5, 6. Mwa enamuna xeeni Yehova onnimaaliha awe?

5 Tthiri nikupaliki wira Yehova onrowa onikhaliherya. Tivonto okathi wotheene nihaana onvekela ni omuleela owerya onniphwanya. Mwekeekhai, ti voomaaliha woona wira Yehova onnisuwela owereya onniphwanya ni wira onrowa onivaha nimaaliho neekeekhai! Mwa enamuna xeeni owo onnimaaliha awe?

6 Yehova onnirumeela munepa awe wootteela wira onimaalihe. (Miteko 9:31) Yesu ooleiherya wira Tiithi ihu onnaavaha munepa awe wootteela otheene ale aninvekela. (Luka 11:13) Susi, olavuliwe wanipacerya, onihimya wira: “Okathi munceene naamakela okokhora nimuxonttelaka Yehova wira onimaalihe. Nto okathi wotheene murettele wa Muluku waanisuka murima ni muupuwelo ahu”.​—Mmusome aFilipi 4:6, 7.

YESU NAVE ONNISUWELA OHAAWA WAHU

7, 8. Exeeni ennikupaliha wira Yesu onrowa onimaaliha?

7 Okathi aari awe valaponi, moolumo ni miteko sa Yesu sahooniherya wira aamutakiha Tiithi awe. (Yohani 5:19) Yehova aahimuruma Yesu valaponi wira aamaalihe “ale aripiwe murima” ni “alipa-òpuheriwa”. (Yesaya 61:1, 2; Luka 4:17-21) Yesu aanisuwela ohaawa waaphwanya ale aninla, nto aahaakhaliherya.​—aHéberi 2:17.

8 Okathi Yesu aari awe mmiravo, owo aahikhweliwa apatthani ni amusi awe. Mwa ntakiheryo, vanikhala ntoko wira Yosefe aahikhwa nlelo Yesu ori ene mmiravo. * (Nwehe elatarato.) Nkahaya muupuwele moota Yesu aaxankale awe mwaha wookhwa Yosefe ni moota aawoonela awe othunku amamawe, axihima awe ni axirokorawe.

9. Okathi Laazaro aakhwiiye awe, Yesu oonihenrye sai othunku?

9 Okathi aalaleerya awe, Yesu aahooniherya wira aanisuwela owereya waaphwanya atthu, nto aaniwoonela othunku. Mwa ntakiheryo, okathi Laazaro mpatthani a Yesu aakhwiiye awe, Yesu aahixanka ni omoonela othunku Maria ni Martha. Owoonela wawe othunku waari wuulupale mpakha wunla, hata aasuwela wira aarowa omuhihimuxa Laazaro.​—Yohani 11:33-36.

10. Olelo-va, exeeni ennikupaliha wira Yesu onnisuwela moonelo ahu?

10 Olelo-va, masu oomaliha a Yesu annikhaliherya sai? Biibiliya onnooniherya wira Yesu khoturukeyale. Maana onihimya wira: “Yesu Kristu ti yole a nsana ni òlelo ni a mahiku othene”. (aHéberi 13:8) Owo onnihimmwa okhala “Mwanene ekumi”, maana oovaha okumi awe wira niwerye okhala moohimala. Nave-tho, Yesu “onniwerya wakhaliherya ale anehereriwa, okhala wira yowo-tho ohèhereriwa n’uhawa”. (Miteko 3:15; aHéberi 2:10, 18) Tivonto, nikupaliki wira Yesu nlelo onnixanka vaavo atthu akina anikhweliwa aya. Yesu onnisuwela owereya onaaphwanya ni onniwerya waamaaliha “okathi wophwanelela”.​—Mmusome aHéberi 4:15, 16.

‘OHAKALALIHIWA NI SOLEMPWA’

11. Soolepa xeeni sinoomaalihani vanceene?

11 Oriipiwa murima ni wunla wa Yesu okathi Laazaro aakhwiiye awe, onninimaaliha vanceene. Nto eyo ehinitikiniheke maana “sothene silempwe khalai, silepeliwe wira nixuttihiwe, wira niphwanyé ororomela, nilipihiwaka ni nthiti, nihakalalihiwaka ni Solempwa sa Muluku”. (aRoma 15:4) Akhala wira mookhweliwa, soolepa sinittharelana pooti woomaalihani:

  • “Apwiya ankhala vakhiviru n’ale òtemwa: anniwòpola alipa-òwojeya”.​—Esalimo 34:19, 20.

  • “Ovelavela n’uxanka wahìniha murim’aka: vano nyuwo [Yehova] mokihakalaliha, khukitteliha murima”.​—Esalimo 94:19.

  • “Pwiy’ahu Yesu Kristu mmansawe, ni Muluku Tith’ihu oniphentale, yowo onivanhe eparakha y’ohakalalihiwa wohimala n’uroromela wulupale, awo yotteliheni murima, yolipiheni”.​—2 aTesalonika 2:16, 17. *​—Nwehe enoota.

MULOKO ONNINIMAALIHA VANCEENE

12. Ninrowa waamaaliha sai atthu akina?

12 Nave-tho, ale akhweliwe pooti omaalihiwa ni muloko wa eKristau. (Mmusome 1 aTesalonika 5:11.) Munrowa opaka exeeni wira mwaalipihe aahiiso waamaaliha ale arina “murima woripiwa”? (Miruku 17:22) Muupuweleke wira wookhala “okathi w’omàla n’ukathi w’olavula”. (Musuweli 3:7) Naamukhweli mmosa oniihaniwa Dalene onihimya wira ale akhweliwe ahaana ohimya muupuwelo ni moonelo aya. Tivonto, etthu yootepa otthuneya waawiriyana okathi anilavula aya moohaakwasa masu. Junia, yoowo munnawe iihomphe, onihimya so: “Hata muhiweryaka osuwela moomalela owereya onaaphwanya, etthu yootthuneya ophavela osuwela moonelo aya”.

13. Nihaana osuwela exeeni voohimya sa oriipiwa murima?

13 Nihaana osuwela wira otheene ahu ninnooniherya oriipiwa wahu murima mwa enamuna yoovirikana. Ikwaha sikina hiyo pooti ohiwerya ohimya owereya onniphwanya. Nuulumo na Muluku ninhimya wira: “Murima onnisuwela sohawa saya: khavo onsuwelexa otteliwa waya”. (Miruku 14:10) Hata mutthu owo ohimyaka moonelo awe, ikwaha sikina akina khivanaakhweela osuwela ele eniphavela awe ohimya.

Ikwaha sikina etthu enireerela ahu opaka ti ‘wunla vamosa n’ale aninla

14. Ninrowa opaka exeeni wira naamaalihe ale ariipiwe murima?

14 Nave, ti voovila ommaaliha mutthu oriipiwe murima. Masi Biibiliya onihimya wira “nlumi na musuweli ninnivoliha makhwatta”. (Miruku 12:18) Atthu anceene aaphwanya moolumo oomaaliha ari ebroxura Vaavo Vanikhw’awe Ole Onimphenta Anyu. * (Nwehe enoota.) Nto, ikwaha sikina etthu enireerela ahu opaka ti ‘wunla vamosa n’ale aninla’. (aRoma 12:15, Waataana wa Naanaano) Gaby, yoowo okhweliwe iyawe, onihimya wira enamuna emosa onooniherya awe oriipiwa murima, wunla. Nave onnincererya oriki: “Tthiri, kinniphwanya nimaaliho vaavo apatthani aka aninla aya ni miyo. Okathi owo, nkinoona wira kiri mekhaka”.

15. Munrowa opaka exeeni akhala wira vannoovilani ommaaliha mutthu mukina? (Nave nwehe ekaaxa eni: “ Masu Vakhaani Oomaaliha.”)

15 Akhala wira munnoona ovila ommaaliha mutthu oriipiwe murima, pooti omuroihela ewarakha, e-mail, mensaxe aahiiso ekartau. Nyuwo pooti ohimya yoolepa yoolipiha, mukhalelo wooloka aarina awe mutthu owo okhwiiye aahiiso etthu yooloka enuupuwelo anyu yoosivelani. Junia onihimya so: “Waakhela mensaxe aahiiso olattuliwa wira katthekule ni anna, etthu enkimaaliha vanceene. Eyo ennikikhaliherya woona wira kinniphentiwa ni okhapeleliwa”.

16. Enamuna xeeni yootepa olipiha?

16 Mavekelo ahu annaamaaliha aana ni arokora. Nto nihaana waavekelela aahiiso ovekela nri ene vamosa. Nnaamwi vavilaka opaka eyo mwaha woowi munoona wira pooti wunla, ovekela ni murima wotheene onnaamaaliha vanceene. Dalene onihimya wira: “Vaavo arokora anrwa aya okimaaliha, kinnaavekela akhala wira anniphavela okivekelela. Nto wanipacerya wa nivekelo naya vannaavila ohimya etthu, masi vakhaani-vakhaani annilavula oratteene, ahimyaka moolumo oolipiha vanceene. Ophenta ni waamini waya woolipa ni okoonela waya othunku, onnilipiha waamini waka”.

NVIKANIHEKE WAAMAALIHA ATTHU AKINA

17-19. Nthowa xeeni nintthuneya ahu ovikaniha waamaaliha ale akhweliwe?

17 Vaavo mutthu onikhweliwa awe, khivanikhweya osuwela oratteene okathi onivira nlelo mutthu owo oriipiwe ene murima. Okathi onikhwa awe mutthu onimphenta ahu, ikwaha sinceene apatthani ni amusi annoorwa onimaaliha. Masi hata atthu awo atthikelaka owannyeya, nlelo ale akhweliwe anitthuneya omaalihiwa. Tivonto, nvikaniheke waakhaliherya. Biibiliya onihimya wira: “Mpatthani onnimphenta mpatthani awe okathi t’ukathi: onnisuwanyeya okhala munn’awe okathi w’oxanka”. (Miruku 17:17) Nihaana waamaaliha atthu akhweliwe.​—Mmusome 1 aTesalonika 3:7.

18 Muupuweleke wira mutthu okhweliwe pooti mootutuxerya oriipiwa murima vaavo onimuupuwela awe ole okhwiiye. Eyo pooti wiiraneya akhala wira onuupuwela nihiku na ekasamento aahiiso okhwiiya awe mutthu owo, esipo yaamusivela, efootu, miteko aavara awe, muhiriri awe, esooti awe. Ale akhweliwe ole athelanne aya, annitepa oxanka vaavo anrowa aya wasembeleyani aahiiso Wuupuwelela Okhwa wa Yesu. Munna mmosa okhweliwe mwaarawe onihimya so: “Kaanisuwela wira nihiku noopacerya wuupuwelela othelana wahu nuumala mwaaraka okhwa, naarowa okhala nootepa oxankiha. Masi anna ni arokora akina yaahipaka efesta nto khukilattula wira katthekule ni apatthani aka. Awo khiyaaphavela wira nihiku nle kivirihe mekhaka”.

19 Muupuweleke wira ale akhweliwe ahaana olipihiwa okathi wotheene. Junia onihimya so: “Ikwaha sinceene waakhaliherya ale akhweliwe okathi wotheene ohiya mahiku a vameekhaaya, etthu enaamaaliha vanceene. Maana okathi owo onnaalipiha vanceene”. Ekeekhai wira khaninrowa omaliha omeekha aahiiso oriipiwa waya murima, masi nnoowerya waalipiha ale aninla nipakaka itthu hoothe. (1 Yohani 3:18) Gaby onihimya wira: “Kinnimuxukhuru Yehova mwaha wa axitokweene oophenta yaawo anikikhaliherya okathi kinixanka aka. Kinnoona ntata na Yehova nikikhupaarelaka”.

20. Nthowa xeeni anatiri a Yehova annimaaliha aya vanceene?

20 Ti voomaaliha vanceene osuwela wira Yehova, Muluku yoowo onnimaaliha mwa inamuna sotheene, onrowa omaliha wunla wotheene okathi onrowa awe waahihimuxa ale akhwiiye. (Yohani 5:28, 29) Biibiliya onihimya wira: “Apwiya anomaliha khuliwí okhwa. Apwiya Muluku animukuttha maithori owitho wothene”. (Yesaya 25:8) Tivonto muhoolo ohiya ‘wunla vamosa n’ale aninla’, atthu otheene valaponi anrowa ‘otteliwaka murima vamosá n’ale antteliwa murima’.—aRoma 12:15, Waataana wa Naanaano.

^ etti. 8 Biibiliya onnooniherya wira okathi Yesu aarina awe iyaakha 12, nlelo Yosefe aari mukumi. Masi, Yosefe khonilavuliwa-tho okhuma okathi Yesu aapanke awe mwiiriirya awe woopacerya, eyo piiyo, otatuxa maasi okhala eviinyu. Eyo enooniherya wira Yosefe iira okhwiiye ene. Nave-tho, okathi Yesu aakhomeliwa awe vamwirini va nihaaxeryo, aahinvekela murummwa Yohani wira aakhapeleleke amamawe, nto Yesu khaarowa opaka eyo vaakhanle wira Yosefe aari mukumi.​—Yohani 19:26, 27.

^ etti. 11 Soolepa sikina soomaaliha tiiya: Esalimo 20:2, 3; 31:8; 38:9, 10, 16; 55:23; 121:1, 2; Yesaya 57:15; 66:13; aFilipi 4:13; ni 1 Pedru 5:7.

^ etti. 14 Nwehe-tho mwaha oni: “Console os enlutados assim como Jesus fez”, erevista A Sentinela 1 a Novembro 2010.